mi(sual).com

‘Ber’ thla kan hmang chho mek a. Nipui boruak hrehawm takte chu favang thlifim te’n tihluihna awm hauh si lovin dam tak leh thuhnuairawlh takin an chhem kiang zel a. tun ang ‘Kut Ni Vangthla’ mitin te’n kan thlak hlelh em em hun a rawn herchhuah leh te hi chuan rilru ah thi theilo tam tak a rawn irh chhuak leh thin a!

Tuna mi ka rawn tarlan tur pawh hi thla 9 bawr vel chauh hun ka hmanpui mah ni sela, thlasik khawvawtin min hmeh khawro tak tak hma si a, “Mami mami…” han ti leh lo thei ni in ka in hre lova! Kei anga lungleng ve thin te hnem nan tal pawh, Mami hminga lunglen zualzawpui han sirsawn chu ka bat lian tak ni ah ka ngai ve reng bawk a ni.

Ka hringnun darthlalang a ni tiin Mami chu ka han sawi nghal ngawt mai teh ang. Dik chiah chuan, mithenkhatte anga mahni insit leh inngainepa, a siamtu ti zak fo thinte ang chu ni ve ngat sela chuan khawvel mi rethei berte zinga chhiar tel ve tur a ni ngei ang.

Mahse chutiang mi chu Mami chua ni hauhlo. Unaunu duhawm, entawn tlak a ni. Chapona tel hek si lovin mahni ingaihhlut le inzah dan tawk a thiam a; Dawihzep vang nilo, rilru huaisenna avang zawkin thuhnuairawlh takina awm a; Inngaihhniamna tel hauh lovin a inngaitlawm a, ava mawi teh lul em!

Hmel lamah chuan ka duhthusam a tlinna chuan midangte sawichhiatna a khuh zo a. Ruangam ah lah nise Mami te zawng tu val mahina an iai phak hlek loh tur ‘Lady’ hi a ni a. Tute emaw angin lai lang kap tawi ha in han he heu kual vel ta pawh nise, ani ngat hi chu khawvel pawh hian a thiam khawp ang! Mahse, mihring mawina hi chhungrilah a inbilh lut tur a ni a ti tlat reng a. Nun hi thlarau mit nena en a nih loh chuan fiahzo tak takin a hre lova; khawvel tana nun chu thihna a ni a, khawvel sual hnehtu erawh chu chatuan thleng pawhin a nung reng dawn a ni, tih thute hi a vawng reng thin.

Mi famkimlo ve tak a ni tih a inhria a, awmze nei lova sawisel theitu niin a in hre ngai lova. A te zawnga midang sawisel leh fiam ngat phei hi chu a duh bau lo. a ni chuan hringnun hi fet takin a teh ngai lova, samkhai taka a lak aiina pekchhuah a tam anga, a tum hmel leh thinrim hmel aiin a hlim hmel; huatna aiin hmangaihna, sualna aiin thatna, chapona aiin zaidawhna mihringin a neih tam zawk phawt chuan ‘tha tawk’ a ti der.

Thiamna leh zir finna kawngah midang khumin sang lua lo mahse, Mami chu a theihtawk chinah rinawm tak leh hlawhtlin ngei tuma bei mi a ni. Mahni inchhungkhur kal pel a in la sanga, thenawm khaw vengte thlawhkhum zawnga in la changkang chi mihring a ni lova. A kephah lumin an inchhung khur a rap reng thin. A tihtur leh tih loh tur a hria a, khawi hmunah pawh eng hunah a hun leh a hmuna zir zelin a in her danglam thuai thuai thei thin. A bulah mipa te an mipa a, hmeichhia te’n an mawina an hrechhuak thin.

Mihring nun hlutna hi sum leh pai hausakna ah a teh ngai lova, pian leh mur zahawmna maiah a tawpsan ngai hek lo. Zahawmna chu mahni thawhrahah, mihring hlutna pawh midangte nena inzarzawmnaah leh thiltih ahte a teh mai thin. Hetiang mi a nih avanga ka bula lo kal a, dam chhunga ka natna tur a ni tih hre lawk lo leh ngaihtuah lo a lo pawm chu ka ni si a.

Nia, vawi khat a tihsual thu ka hriat atang khan ka rilru chu a kehsawm vek a. Mahse, khitiang mi ni thin a ka lo ngaihna khi hmuhchhuah that leh tumin ngaihdamna famkim pek intiamin ka nghak a, thla 9 dawnlai a ni ta. A mize dik tak chu ka bulah chuan a chhawm nung reng a. Mahse, a tleirawl rilru no lai leh midang lakah a hun a hmang dawn tih a inhriat hma a, min rawn melhtu amah Mami ngei mai ka lo melh let ve lo kha…… Kumkhua a min tina tu tur chu a lo ni reng si a.

Hun rei tak hmun dangah awmin lehkha a zir a. Kan han intawn tak hnua kan han inbel chiang chu. Hmana Mami kha a lo ni ta reng reng lo. Mahse, ka hmangaih a, a ni pawhin min hmangaih. Ka hun kal tawh a ka lo tihsual tawh zawng zawng ngaidam thei khawpin min hmangaih. Amaherawhchu, keia hmangaihna chuan thikthu a nei tel ta tlat. A hun hman tawh dan zawng zawng chiang takin min hrilh a, engmah a zep lova. Ka ngaidam a, mahse, engtiklai mai pawh hian a hun lo hman dan chu ka ngaihtuah lo thei silo.

Hmana Mami ka hriat thin kha hmun danga a awm hnua a lo nih lohna chuan min tina a, Mahse, a tel lova hun hman erawh ka zuamlo mai pawh ni lovin ngaihtuah pawh ka ngaihtuah ngam lo. Chutianga hun ka hman reng thin avang chuan ka lo chau a. Ka ngaihtuahna te alo buai a. A lo haw hun tura a intiam Dec ni 30 chu ka nghak thleng thei angem? tiin keimah leh keimah inzawt chungin thlasik khawvawt hmeh char huamin ka mutna chu ka pan leh ta hnu hnu a…….

Similar Posts:

• Kha naupang kha….
• Mami Tak Kha Aw..
• Mami Varte a la chungnung ber
• Berh
• Dear Brown.

Recent Posts:

• Doctor-ten min rawk em?
• Keini chu thingtlang mi kan ni a
• MIND-SET: MIZOTE LEH KAN RILRU SUK-THLEK
• ZoRO Press Release
• Ka lawm e, Mi(sual)-nu!

This entry was posted on Thursday, November 25th, 2010 at 5:00 am and is filed under Whatever. You can follow any responses to this entry through the RSS 2.0 feed. You can leave a response, or trackback from your own site.