Keini ang kum tluana mahni tlatna muala tawmim tlat mai tan chuan kum tawp bak hi han chetchhuahna hun a awm meuh lova. Eng emaw chenah chuan, mimal takin ‘ka ngeih phian’ zawk chuan ka hria. Thingtlanga seilian tih takah mi fate angin thlawhna te hi kan chuang tam ve lova. Dara Nu Tui kama pipu inthen thui deuh maia uai ringawt pawh ngam tha thum lo tan chuan thlawhna chuan hi thil nuam zawk zawk zawng a ni lo tawp mai.
Mahni tawka intipa ve ngelh ngawlh tak si hian pangang te hi ka hlau em em mai a. Pangang ka hlauh leh thlawhna chuan ka hlauh hian inzawmna a nei tlat pek a. Sikul naupang kan la nih lai khan tum khat chu sikul tlanga Sunhlu kungah hian kan lawn a. Ka lawn sang ve fe tawh tihah chuan ‘pawmrem’ (thenkhat chuan ‘pangrem’ an ti bawk) thankin var buk tawh mai hi ka han hum chat mai a. Ka hum nem nuak rual rual chuan a rawn inchhawk deuh nghulh a. Ka phu nasa lutuk chuan ka awmna ka theihnghilh a. 15ft vel atang chuan a hnuai tlangsam bukah ka tla thla dawp mai a. Ka hnang a. Ka thaw hlei thei lova. Thiante an mangang; ka hnungah an chum laih laih mai a.
Thlawhna ka chuan hmasak ber tum chuan thingkung 15ft vel atanga ka tlak kha ka rilruah a lian ngang mai a. Ka han ngaihtuah thin a. 30,000 ft vela sang atanga han tlak nal nal mai chu, a nat dan zia mai tur chu..ka hrethiam deuh vuai vuaiin ka hria. Ka tawngtai ve ngial a. Ngaih erawh a tha chuang hauh lo. Tute emaw dan takah van sang tak, 30,000 ft vela han thlawh vang vang mai chuan personality a inthlak thawk mai a, mahni tawka ‘optimistic’ ve thin tak kha kan ‘pessimistic’ ruih mai a. Keini ang rinna chak mang lo tan chuan ‘chhum zingah a lokal leh ang a, tum loh lutukin kan intawk phut mai ang’ tih kha ka hlau ni ta berin ka hria. Thlawhna chu chiangkuang lo ta thut sela, engtia awm nge tha ber ang? Nghet lutuka inthlun beh tlat mai nge tih chi zawk anga zuan chhuah tuma beih? tih vel te pawh ka ngaihtuah a. Ka thutna hnuai ka han dap a. Parachute aw zawng a awm bawk si lova. Zuangthla thei dinhmunah pawh ding ta tehreng ila, han zuanthlakpui tur engmah a awm lo. Ka han hawikual a, mite chu an nui thaw hlawm a, kei erawhin eng thil nuihzatthlak mah ka hmu ve lo. Ka bula thu, ka cousin lah chu a thu mu vang vang mai a.
Kei erawh, ka mut a chhuak lo nasa mai! Aircraft Engineer nih te ka chak rum rum a. Ni ngat ila chuan, cartoon movie ang deuh hian thlawhna a chetsual phut pawhin parachute lian mangkheng, thlawhna khai kang nul nul thei khawpa lian hi thlawhna tinah ka vuah vek ang. A nih loh vek chuan ‘jet fighters’ ang deuh hian thlawhna a chetsual emaw vaih chuan thlawhna chung chu inhawng pup theiin ka siam ang a, passenger ho pawh parachute nena thlawhna atanga ‘pop out’ thei turin ka duang hrim hrim ang ti tein ka ngaihtuah a. Thil awlsam leh nawmsakna ka um luatah thih mai theihna-ah ka ring ka rawlh ni hial te hian ka inhria a. Mahse, ‘situation’ reng reng hi, kan control theih bak a nih tawh hi chuan a nih ang anga pawmthiam mai a tul thin. Khami tuma kan thlawk pawh kha him dam takin kan tum ram kan thleng a. A hnuah pawh vawi tam ka thlawk kual ve leh tawh a. Eng em chu kan la ti lo chu a nia. Ngaia neih erawh a har chu ka ti. Mi thenkhat tan chuan a ho viau mai thei a. Mahse, a hlau mi tan chuan thil ho lo ber pawl a ni tlat! 🙂
