mi(sual).com

Thim thuneihna hnuaia leng tih reng inhre lova, zalen taka kan lenna hmun, kan ngainat, kan thlakhlelh, he khawvel leh a chhunga chengte hi Eden huan bawh chhiatna avangin Pathian anchhe dawng alo nih tak si-ah chuan, he khawvel leh Pathian inrem leh theihna tura rorel theihna leh thuneihna neitu awmchhun chu, Chungnungber, kan Pathian chauh hi a ni si a. Chu rorelna leh thuneihna chu mihring ‘chhe ber’ atanga ‘tha ber’ ni a inhria te chungah a ni.

Chungnungbera chuan khawngaihna leh hmangaihna in ro a rel a, ui-re lai an man meuh chungah pawh chu rorelna chu a takin a lo lantir tawh a nih kha. Lung a den hlum tumtu te khan, mahni nihna diktak (engchen chiah a nunrawng leh thisenchhuah chak nge an nih) in hre lova, mahni thatna lai changchawi a, midangte thiamloh chantir thintu te an ni tih an tarlang chiang hle. Chutih laiin, Pathian mithmuhah chuan, ‘sual ber’ atanga ‘fel ber’ te, ‘rorelna’ leh ‘thuneihna kengkawhtu’ ‘midangte thiamloh chantirtu’ zawng zawngte hi in angkhat vek kan ni lawi si a.

A ni tak a, mihringte ah hi chuan famkimna reng a awmlo, ui-re nu chunga, thihna khawp hial a rorel tumtu te meuh pawh kha, Pathian Fapa Lal Isuan ‘sualna neilo’ a tihte zingah anlo la tel pha bik hauh lo, ui-re nu nen a ‘in angkhat reng’ nihna lai nei, sual laka fihlim bik aw zawnglo an ni ve tho mai le. Midangte hmangaih a, an harsatna leh chaklohna a tanpuina leh,  chhandam anlo nih ve theihna tura chhanchhuahna kawng reng a nih loh avangin – thiltha ti ni-in inhre mahse, Chungnungber Pathian mithmuhah an rawngbawlna a thlawn mai a ni. Keini ‘Pathian zawnchhuah ram’, ‘Pathian fa inti te’ chenna ram pawh – kan han chet tak tak chuan, kan  danglam bik chuang lo ve.

Rukru thinin, ruk a ruk loh lai leh mi in ‘rukru’ a ni tih an hriat lemloh chuan, mahni nihna dah tha in, ‘ui-re’ denghlum tlak hial khawp a mifel niin a inlantir a. Sorkar sum eiru puk puk pa chuan, Rs 100/- rutu chungah chhe takin ro a rel leh ang lawi bawk a, mi rilru chhe tak pu mi chuan, a thenawm eiruk ching pa itsikin, a rel a rel leh lawi bawk a….chutiang zelin, tu te mai pawh hian mahni in en hauh lovin, mi sualna kan hmu lianin, thihna khawp hial a rorel tumin kan za zek zek thin. Hringnun vervek, depde, mahni hmasial, chapo zawng zawng chunga rorel theitu awm chhun Pathian chuan, heng mihring ngaihtuahna leh an thil tih tumte thlir-in “tumah mifel tak reng an awmlo” tiin min hnawl ta vek zawk si.

Ni e, mihringte’n thiamloh kan chantir te, ‘rawng’ leh ‘diriam’ taka an chunga ro kan rel sak te chhandam leh tuamhlawm chu hmangaihtu  ‘Pathian thiltum’leh khawvela alo kal chhan a ni . Bible-in, “He rilru Krista Isua pawha awm bawk kha, nangmahni-ah awm rawh se.. ..(Phil 2:5) a ti,  Bible zirtirna pawmtu, Lal Isua zuitu te zingah hian, midangte hmangaih -tu, an harsatna leh chaklohna a tanpuitu leh chhanchhuak tu, chhandam anlo nih ve theihna’n a Krista hnen/Pathian rorelna hma a hruaitu, dinpuitu, Pathian tihna leh zahna tak tak nei Kristian hi kan tunlai hunah pawh hian engzat tak awm ang i maw?

Thihna khawpa roreltheitu chu, ‘Nunna’ pawh petu Pathian chauh a ni. Ui-re leh ui-re chunga thihna khawp hial a rorel tumtu te chu in angkhat reng-in, Lal Isua, “Pathian nung Fapa chuan a rawn ‘ep’ ta vek a. Mahni nun in bih chianga, ‘denhlum tumtu te’ felna ai a ui-re nu ‘sual’ nih inhriatna in Lal Isua thinlung kawngka sawi hawngin, chhandamna ‘hlu tak’ chu a chang ta a nih kha. Pathian rorelna ang chhungah chuan, sual nih inhria a,‘inchhirna vawrtawp’ nen a tlu lut te hian, Lal Isuaah ‘himna’ ‘damna’ ‘hahchawlhna’ ‘thlamuanna’ chhandam na’ an chang thin. Mihringte mamawh diktak leh thlakhlelh ‘Thlamuanna’ chu Lal Isua Kristaah chauh hian a awm tih hi ‘ui-re nu’ pawh khan a hre chiang ta hle a, Chhandamtu Lal Isua a bel zui ta a nih kha.

Mahni felna leh thatna chhuang a, mi bo/misual te hmangaihna neilo te hi, Fapa tlanbo-a u zawk  ang mai khan, pawn thim anla chang a nga, in chhira sualsim a, Pathian hnena tlu lut te chu, hlim tak a zai-in, Pa ang chhungah an la lam ang.

He Krismas lawmawm lo thleng turah hian, nang leh kei ‘misual’ thinlungah Krista lo piang thar leh se, thiam chantirtu Lal Isuan ‘thiam a chantir’ kan nih ve ngei theihnan, sual sim leh thinlung tlawmtakin Lal ilo hmuak teh ang u hmiang…

Pathianin malsawm theuh che u rawh se, Amen.

Similar Posts:

• Rorelna hrang hrang 5 (panga) te.
• Pathian A Thi Elo!? {Sunday Pual}
• Pathian Kut Dinglam {Sunday Pual}
• Thihna hnehin a tho leh ta!
• Kohhran leh politics

Recent Posts:

• HRIATNA DIK CHU HNAM DAMNA, BUMA AWM CHU HNAM BONA
• SAKHAW CHUNGCHANGA INKAWMNA -3
• Chhandamna Man To Zia Hi I Ngaihtuah Ngai Em? – Part 2 (Adapted From My Sermon, “A Costly Christmas” Delivered on Dt. 27-12-2015)
• 2015 MIZORAM
• Davida Kha ‘Pathian Thinlung Ang Pu’ Kan Ti Thei Dawn Emni

This entry was posted on Thursday, December 9th, 2010 at 11:00 am and is filed under Religion. You can follow any responses to this entry through the RSS 2.0 feed. You can leave a response, or trackback from your own site.