mi(sual).com

Ni tam tak a liam tawh a, thla eng’emaw zat a ral tawh a, kumsúl eng’emaw zat a vei ta. Mahse, engvangin nge ka theihnghilh theih loh? Engvangin nge ka thinlúngah hian a châm tlat reng le? Hun liam ta záwng záwngte khân a herliampui ve thei mai lo’m ni? Theihnghilh ka tum poh leh ka hrechiang ting a. Hriatchhuah loh tuma thil dang daih ka ngaihtuah lai ngêi ngêi pawhin a rawn thar leh tlat thin. A mak a, a danglam a; ni theia langlo kha ni thei dik tak a lo ni si.

Zan lalnu Chhawrthlapuiin a lalram a fanna hrûlah zochhûm chu pan tê tea inzâr pharhin lungmúang takin sir an sâwn delh delh a. Vansâng sipairual siâr te chuan kâwlkil dâpin zan lalnu chu an vêng a. Chumi thlazár hnuaiah chuan leilúng leh a chhûnga awm chi tinrengte chuan Siamtu kutchhuak mawi zia chu hahipin sawi kherlo mah se, thenkhat tân chuan chuti ang hun chu zan duhawm a ni chiang kher mai.

Chhim leh hmar dúngzuia inkhawh zotlâng phei duai bâwmtu léntupui te, lélthang leh ngirtling záirimawi tak te, chunglêng sirva lunglêng thenkhat hrâm ve leh zauh zauh thin te, nula Ina tlangval nûi hám hám te mai bâkah, rálkhata tlangval lunglêng thenkhat tingtang perha zâi váwng váwng tháwmte chuan, chu zan chu an chawimawi mai a ni lo va; zan hi thim lalfapa inlár hun anih vek bik lohzia an tilang chiang hle zawk a ni.

Chutih lai chuan a ni, ka lungdi, khawvel mite mithmuhah chuan hmeltha leh duhawm ber ni lo mah se, ka tân chuan ani tlúka mawi leh nalh ‘rose par’ ka hmuh theih thlâwt loh- Sap tawnga ‘Sweet Sixteen’ an tih ang rual vel nen chuan túma chimbuai lohvin, ka thianpa Tluanga te bathlara thutthlengseiah inthlahlel tawn êm êmin rilru chhûngrila inphûmru, amah leh keima tân chauhva thûlkhung chu; chu zanthiang duhawm tak thlir chung chuan kan phawrh chhuak dun sëp sëp a.

“…hmangaihna awmzia tak tak hi ka hre lo, mahse, nang ka duhna che hi hmangaihna an tih ang hi a nih phawt chuan ka hmangaih che a niang.” Sangtei chuan a han ti a. Chutah, reilote a’n ngawih leh hnu chuan, “U Muante, thlasik kawng khi arsi inbâwrkhawm vek, thlasik lai chauhva lang thin a ni si a. Khi thlasik kawng ang khian ka bula i awm lai chauh hian min duhin, min hmangaih thu min hlân lo hrâm ang che aw?” a tih chhunzawm a.

A thusawi chu a kum zat ka ngaihtuahin a puitlingin ngaihtuah a ti thûi duh khawp mai. Chhân mai ngaihna hre lovin ka ngawi váng váng a. A kut nël tháp mai chu ka kut veilamin ka khál niap niap a. Ka kut lehlamin ka kuah a, lûngsi takin ka âwmah a bei hnâp bawk a. Chutah, “Ih e, Sangte, khi thlasik kawng khi thlasik lai chauhva lang nimah se, Nipui lai paw’n kan hmuh phâk lohvah a awm reng a. Chuti ang chiah chuan ka taksa hi i bula a awm loh lai pawhin, ka rilru chu i hnenah a awm reng dawn a lawm,” ka ti ve sáp a.

Aw……..!!! Khami zan, December ni 2 zan khân kan hma lam huna thil lo thleng tur hrelâwk miah lovin lungmûang êm êmin kan awmdun kha a ni si a!

“En teh, khi laia arsi éng deuh bik pahnih khi i hmu em?”

“Aw, hmu e, eng’ati nge?” Sangtei chuan nui vër vër chungin a han ti a.

“I va’n hrethiam lo tak! Veilam zawk ami khi keimah ka nia, dinglam ami khi nangmah mawle,”

“Ka damchhûngin khi arsi khi ka lo thlir thin ang a; nang nena min zawm nghettu pawh a ni mai thei a sin,” ka ti ve a. Chutah, Sangtei chuan a kut chu lachhuakin ka nghâwngah a rawn suih a. Min kuai hniam a, duhthawh zetin min fâwp ngáwih ngáwih a……

Dar 9 a rik meuh chuan a tlai lam a ni ber tawh a. Thlasik lai hi chuan ni a táwiin zan arei hma si a. Amah chu ka ngaihtuah a, a chhûngte lakah hauh a tûar ang tih ka hlau deuh a. Ngâwi rengin ka thianpa Tluanga chuan a pindanah min lo nghak chár chár bawk si a. Inthlahlelin inkhamlo hle mah ila; zanthiang mawina chuan hun a thunun thei miau si lo. Dimtein Tluanga awmna lamah kan lut a. Ani chuan lehkhabu “Goodbye Forever” tih bu hi a lo chhiar mêk a.

“Tluanga, i chhûngte an lo haw tawh em?” ka han ti a.

“La haw nâng! In va rawn chhuak hma ve, duh ang te in sawidun thei maw?” fiamthu in a lo ti a. Sangtei nen chuan kan in melh zauh a, kan nui dun vár vár ringawt a.

Chawlhni(Sunday) zan anih avangin lênkhawmna lamah Sangtei nu leh pate pawh an kal ve avangin, an in kan thlen pawh chuan a nau mipa chauh a lo awm a, TV a lo en mêk a. Reilote ka thut hnu ah hâwn mai ka tum a, Sangtei chuan, “Ka nu te lo haw pawh nghák thleng law law la,” tih pahin ka kalchhuak tur chu ka hnungah min rawn zui a. An luhka(Verandah) electrict éngin a chhún riai hnuaiah chuan inmangtha nan kan infâwp ngawih ngawih a. Kan infawh leh hun tur ngaihtuah chuang lovin hlimtakin kan inlam panin ka haw ta a.

Dar 11 a rik pawh chuan khumah ka let ka let a. Muhil thei mai lovin Sangtei chu ka súangtuahna ramah ka lênpui a. Christmas ‘Urlâwk zan’ leh kumhlui thlah zan kan hman dun dan tur te chu ka ngaihtuah pah bawk a. Mutthilh zái rêng ka rél theih tak siloh avangin ka sûangtuahna ram atanga chhuah tumin khum atang chuan ka thochhuak a. Ka mutna bul chhuara lehkhabu pakhat chu lachhuakin ka han chhiar a. Amaherawhchu, ka rilrúah Sangtei chauhlo chu a lût thei chuang lo. Khumah chuan ka mu leh ringawt a. Sûangtuahna ram mawia chêng chung zelin zing lam khawvár dawn velah chauh ka muhil ve thei ta hrâm a.

Ka nu chuan, “Muante, chaw ei ka peih tawh a nia. Aizawl lamah i kal a ngai bawk si a, hmanhmawh duh hleka i insiam a hun tawh a nia,” a rawn ti a.

Rang takin ka tho a, ka nu’n chaw eitur a siam chu ka bâr nghal mawlh mawlh a. Sana ka’n en a, Bus kal hmain darkar chanve chiah a lo awm tawh a. Hmanhmawh takin ka insiam zúng zúng a. Bus kal hma hrétin a chhûngah ka lût hman hrám a.

Gov’t Aizawl College-ah Second Year B.A ka zir ve mêk a. Aizawl atangin kan khua chu a hlat lutuk loh avangin kârtawpah hi chuan Chawlhni hmang turin kan khuaah ka haw thin a. Chu hun chu a ni, Sangtei nena kan hun hlu ber(Golden chance) chu! Sangtei erawh chuan kan khuaah Class XI a zir mêk thung a; a thiam thei páwl tak a ni nghe nghe a.

December ni 4 atangin exam kan tan dawn si a, theihtawp chhuahin ka zirlaibu chu ka chhiar ve nasa hle a; pawi ta bêr erawh chu ka mit leh zirlaibu inkâr zimtea Sangtei hmêl ka mitthla thin chu a ni.

Kan exam avang chuan kârtawpah pawh kan khuaah ka haw lo va. Republic Venga ka inluah zimteah chuan khawhár takin hun ka hmang a. December ni 19-ah exam ka zo va. A tûk maia haw turin ka insiam nghal a. Hrúi tel si lovin Sangtei chuan min páwt tlat si a! Chutih lai tak chuan kan inluahna nu in phone-a miin min biak duh thu a rawn sawi a:

“Hello”

“Muante, Tluanga ka nia. Exam i zawh hma kha chuan tihbuai che ka duh lo va. Ih maw, Aizawla i phei hnu lawk khan Sangtei a damlo va. Damdawi In lamah pawh inentirin vawi hnih ngawt an kal tawh a. Mahse, that lam a pan thei meuh rih lo. Naktuk hian i lo haw phei ang tiraw?”

Ka phu zawk a, ka bing chúm chúm nghal a.

“Aw, a hma thei ang berah haw ka rawn tum e.”

Tluanga nen kan inbiak zawh hnu, ka han pênchhuak chiah chu ka a mup hian ka in hria a.

Ka haw tur chu Bus hnung kil berah thûin a chhe ber thleng Sangtei chunga ngaihtuahin ka rilru chu a mumal lo hle a. Ka bulhnaia thû te’n min bia ang tih ka hlau hle a. Mahse, Bus tukverh lam ka hawi that avangin tuma’n min be lo va, ka lawm ru angreng viau a. Mahse, mahse, hma taka khaw thlen tum nâk alaiin kawng a lo chhe thut a. Tlai dar 4 velah kan khua kan lût thei chauh va. Manganna leh thawpikna chuan mi kiansanlo chiang khêr mai!!

Chhawrthlapuiin a lalram a fan zan a ni lo ná in, vansâng sipairual Siârte erawh chuan an hna chu rinawm taka thawkin hmuntinah an pë neuh neuh a. Tluangate inah ka kal a, Sangtei damlo min tlawhpui turin ka sáwm a. Dar 7 velah Sangtei te inchhûngah chuan kan lût ta a.

Sangtei chu khumah a lo mu dâng bêm a. A cherin a tisa senno chik chêk thinte chu a hloh deuh nual tawh a. Min han hmuh chuan a nui vár vár a. Zawitéin exam ka tih that leh that loh te chu min záwt a. A bulah chuan thû in a rizai sin lai hnuaiah ka kut chu zen lûtin a kut chu ka hmer váwng váwng a. Christmas hma tala dam hman a châk thu a sawi sép sép a. A mutna bula dawhkan té reuhte chungah chuan damdawi eng’emawzat a awm bawk a.

Tluanga chhuah lawk hlanin ka iptea ka thi ah chu ka phawrh a, dimtein ka awrh tir a. Chu thi hmawrah chuan bâwm te reuh te(Love sign ang), kéu hawn theih a chhûng lehlam lehlama kei leh Sangtei thlalak inbel a awm a. A lawm ve hle tih chu a hmêlah ka hmu thei a. Darkar khat vel kan awm hnu chuan hreh viau mah ila, midang rawn tlawh ve tute hmai éng zah a tûl si avangin kan inmangtha ta a.

December ni 21 leh 22 a liam a. Sangtei chuan ngai a la awh reng a. That lam a pan thei si lo. Engtin nge Lal Isua piancham hi ka duhber nen hlim taka kan hman ve tak ang le? December ni 23-ah phei chuan ka rilru a hah ngawih ngawih tawh a.

December ni 24 a lo thleng a. Hmun tin maiah chuan ‘Urlâwk zan’ inbuatsaih nan chhang dêng thâwm a ri tlúk tlúk a. Kei chu keimah chauhvin dâiah ka kal a. Hrámthiam vâ chi hrang hrang râwl mawi tak tak te, khawilo ram bawha pârmawi vúl chûk te, naupang hlim tháwm ri chêl chûl te leh ka khawhárna chu inkawprém thei lovin ka rilru chu he khawvelah hian a vákvai ta a ni.

Zan a lo thleng ta! Ka nu chuan âr min pawmchhuahtir a. Tluanga leh a bialnu Hmingthanite nen Sangtei te in lam kan pan a. Sangtei chhûngte chu a then lênkhawmnaah an kal a, a then an thiante nen hmundangah urlâwk zan lawm turin an kal bawk a. Kan pali chauh chuan in chu kan nghâk a. Tluanga te pahnih chuan âr chu talhin an siam a, kei chu ka chet ve an phal lo va. Khuma mu ka hmangaih Sangtei kianga awm turin min ti tlat a.

Dar 12:30 velah ârsa chu kan ei ve ta a. Sangtei chu a lukham ka tihsân sak a, tlem téin a rawn thû a; ka mittui chu a tla lo chauh a ni. Ka thinlung lamah erawh chuan ka hnúk a ulh khawp mai. Sangtei chuan a inthlahrun thu a sawi thin a, kei chuan sawi lo turin ka ti thung a.

Kan ei zawh hnu chuan Tluanga te pahnih chu an kalbo lawk a. Sangtei nen chuan kan ti ti sép sép a. A heh nél tháp chu dimtein ka fâwp zauh zauh a, a kut chu ka vuan reng a. Ani pawh chuan ka bula awm nuam a tihzia leh a thlamuanzia te a sawi nual a.

Tluanga te an lo lêt leh hnu lawkah Sangtei nu leh pate pawh an lo haw a. Dar 2 velah inlam panin kan haw ta a.

Christmas tûk nichhuak chuan ka mutna bul tukverh chu a rawn chhuntlang a, ka hmai bâwr velah a zúng zâm chuan a rawn ên a. Ka tho thuai a. Chaw eikhamah inkháwm turin ka kal a. Inkhâwm bân veleh Sangtei te inlam chu ka pan nghal a. Sangtei chu a nuin alo awmpui a, mi thenkhat an lo awm ve bawk a. Tléma a chauh zual deuh avangin kan khuaa Nurse pakhat, Mahriati chu an ko bawk a.

Zah pawh dâwn zo lovin Mahriati’n nachhâwknaa Sangtei a ‘chiu’ lai chuan a mutna pindanah chuan ka lût ve a. Sangtei chuan meng diar diar chungin min rawn en a; harsa tih hmel takin a núi a. A bulah chuan reilote ka thû a; Tluanga’n min rawn koh avangin pâwnah kan chhuak a.

Tluanga chuan, “Muante, Sangtei vangin i rilru a hah lutuk a. Inti thawveng rawh. Tlângah han lêng ang u,” a ti a. Hnial lém lovin tlâng lam panin kan chho ta a. Tlângah chuan nula leh tlangval tam tak an lo lêng a, naupang pawh an tam hle a. Hmingthani te thianho kan hmu a, kan pan nghal a. Kei chu hlim awm deuhvin ka awm der ve vel mai mai a. Ka rilruah Sangtei chauh a awm avangin ka ngaihtuahna chu a kal pêng thei thláwt lo.

Haw thlâk tuma kan in koh lai mêkin mi thenkhat chu hmanhmawh takin an tlân thla hláwk hláwk a. Engvang nge ni’ang aw? ka tih rilrûk mêk laiin , “Hei hi YMA Information Centre a ni e. Chhiat tawh thu kan han puang ang e. Zothansangi, Pu Lalnunfela fanu chu vawiin tlai dar 3:00 khan……..natna avangin a boral a…..”

Tharúma min beitu awm si lovin ka ná ngáwih ngáwih a, ka ngaihtuahna a nú bút a; ka lú te chu hái búrin ka hria a. Tluanga chuan min kuah a. Min chhúk thlâkpui ta niin ka hria…

………………….

Similar Posts:

• Kal-tial-tial…
• Heaviest Recorded Snow Storm of December!
• Camping ah Isua inlar
• Ka rawn fang leh hmana kan tuanna
• Thlasik rim a nam tan…

Recent Posts:

• Bawihpuia kha
• L.Kira an tih chu (The man behind Lalzova)!
• LUNGPHUNLIAN TUMKAWNG
• A liampui ta si
• ZU HI SUAL A NI LO, A IN A TE PAWH AN SUAL HEK LO

This entry was posted on Sunday, December 12th, 2010 at 7:00 pm and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.