mi(sual).com

Kan ram zimte hi internet khawvelin min runna a la rei lo hle a. Thalai lamin kan tuichilhna pawh kha a la rei lo hle anih kha. Kei phei chu 1999 kum atang chauh khan ka khawih ve tan a. Chutihlai chuan mizo website emaw hmuh tur a vang kher mai. A zawn hmuh dan leh an website hming ka hriat loh vang pawh a ni mahna. Chhun lamah bioinformatics centre lamah a free in kan khawih a, zan lamah pu te room ah duhtawkin kan khawih zui leh thin.

Mizo site pakhat ka hmuh kha College lampang a ni tain ka hria, ka chiang ta lo. Zep thu cheng lo, literature survey leh abstract collection kha hna pawimawh ber a ni mai a, chutiang te chu search tur awm reng hek lo le, porn site hrang hrang kan lut hnem malh malh hle. Chat kha an uar hle na a, mak tak maiin ka peih lo ve teh tlat anih kha. Email lamah erawh ka ninhlei thei khawp mai. Thiante email a lut turin porn site mail emaw subscribe sak kha ka ching thin a. Khatih lai khan a in subscribe tir thei tlat nia, confirmation mail kha an thawn let lo thin nge maw ni dawn ni. Tin, mail mak tak tak kha kan dawng zut zut thin a. Kan pu kha a mail password ka hrechhuak a, a ni pawh ka subscribe sak a, mail tha tak tak a dawng tam thei malh malh khawp mai. Khang hunlai te tak kha aw…

Vawikhat chu zanah porn site ka lut nasa mai a, mak deuh maiin porn site pakhat chu homepage atan ka set palh ta hlauh mai. Ka tidanglam thiam tawh si lova, “Nakinah a bo ve leh mai ang chu,” tiin rilru nuam zan lovin ka hawsan ta a. A tuk chhun dar 11 bawr vela ka va kal chuan kan pu hi a lo buai khawp mai a. Computer hmaah a lo thu a, a nui leh vur vur thin a. Nuih ve tawp mai loh chu tih tur dang a awm lo.

A thiam a ko va, ani chuan homepage chu a thlak danglam ta a. Chuta tang chuan fimkhur tawh tak hi ka ni ringawt. History delete ka theihnghilh ngai miah ta lo bawk. Journal changkang tak tak han hawn a, chumi ruala porn site hawn tel ve te kha a lo nuam riau va. Thian te, pu te an lo lut thut a, kan han hmet bo daih mai thin te kha a nuam ve riau. Khang hunlai khan adult magazine a lar a, Fantasy, Mermaid, Debonair tih ang reng vel kha kan buaipui hle thin. Chutih laia internet lama pawisa seng hauh lova han en pap pap mai kha chu nuam ve tak a ni. Thiante khan zan lamah hmuhnawm en turin min zui hal hal fo reng bawk a.

Google kha a rawn lar thar hle a. Mahse search dan te kha thiam a ngai riau va. Tunlai angin sentence pumpui ang hian a search thei lova, “in, on by,etc” ang hi a hmu lo thin. “Importance of rhizosphere microflora on soil fertility” ti te hian search duh ta ila, a theih loh reng reng thin kha a ni a. Tunah erawh engti zawng pawhin search ila, a rawn hmu zel tawh chu anih hi.

Ka sawi tui laklawh, sawi zawm zel ang. Technology lamah kan va lo thang chak e aw…. Kum 1998 kum khan vawikhat chu kan professor pakhatin camera lawk lel lawl a rawn lek chhuak a, far thing hnuaia kan thian te thu lai thla a laksak a. A camera atang chuan floppy a rawn phawrh chhuak a, computer ah a dah lut a, computer desktop a dah nghal a, a ropui kan ti ngei mai. Khang hunlai te kha chuan roll film bak kha kan hmang ngai si lova. Kei ngei pawhin kodak Gold kher kha ka lei thin a ni si a. Khata floppy nia ka hriat kha floppy a ni tak tak ang em aw…

Computer hi a hranpa in ka zir lem lova, kan pu in min zirtir lui a. Ka thianpa nen, a hnuaia kan zir tantirhin computer tangkai zia leh pawimawh zia min hrilh a. A hmasa berin mouse hman dan min han zirtir a, a va han harsa tak e aw, ka thle ngawng ngawng a, ka inher luai luai a, hahthlak tak a ni ringawt.. Tun hnua ka ngaituah let pawh hian mouse hman zir kha a lo hautak ta ber chuan ka hria. MS Word hawn dan min hrilh a, min type tir nghal a, save dan min hrilh bawk a.

Tichuan, zan lama type tur min pe nghal bawk a. Kan thiam chak rem rem khawp mai. Chawlhkar khat a ral meuh chuan kan duh leh kan mamawh ang chu kan khawih thiam nghal vek. Khatih hunlai khan miin a hranpa in computer an zir thin a, thla thum lai te an zir thin. Keini ve chu internet nen chawlhkar khat chhungin kan thiam nghal vek. Tunlai chhanah chuan a ho viau maithei; mahse khatih hunlai ang atan kha chuan mi mak tih khawpin kan thiam chak ve tlat asin.

Vawi khat chu Bioinformatics centre ah khan information lam khawih lovin mail leh web browsing lam an khawih nasa lutuk a. Yahoo, Msn leh Rediff kha an block tlat mai a. Tumahin a ngaihna an hre lova, mail pawh an check thei lova. Mahse yahoo website atanga mail check tura lut kual lovin mail.yahoo.com atangin ka lut direct hmiah a. A lo hawn theih reng chu niin, a rukin mail ka thawn char char. A hnuah chuan an hrechhuak ta thova, ka tilui zui ta bik lo; zan lamah duhtawkin kan hmang thei thova.

1997 khan excursion in India chhim lam khaw thenkhat tlawhin kan zin chhuak a. Kan haw lamah Mumbai kan tlawh bawk a. Mumbai rel station ah chuan kan professor unaupa in min lo hmuak a. Amah chu pa hausa zet mai hi a ni a. Phone te tak te a keng a, chu a phone ah chuan no sei zet mai a type a, midang a bia a. Mak ti takin kan en reng a. Kha phone kha mobile phone a ni ang em aw….. Khatih laia kan phone hmuh ve thin kha chu ken sawn pawh rem lo, hruia inthlung tlat thin (land line) a ni si a. A kensawn ve theih ho lah kha mahni in bul kiang hnai bakah a hman theih der si lo. Tunah meuh chuan thingtlang pilril ber ber thleng pawhin phone kan hum ta fer fur anih hi. Kan va han changkang sawt tak em. Duah mai a.

(Hetiang lam han sawi hi chuan ka kid kumhlun lrpa of misual.com hi ka hrechhuak vawng vawng thin. Tun tum ka thuziak chu ka va sit e aw, ka delete leh daih dawn emaw ni chu le.)

Blog lam ve thung hi le:

Hmanah chuan mizo site a luhna tur a vang thei ngei mai. Tunah chuan a tam tawh lutuk. Luh sen loh khawpa tam blog pawh a awm ve ta. Sandman’s Zo blog directory te hi han lut chhin teh u, a tam tawh tiar tiar a nia. Hei hi hmasawnna tha tak a ni. Miin hmundanga a ziahlan ngam loh, chanchinbu lama chhuah atana a sit em em te, social website lama post atana a duh vak loh te thlengin mahni blog ah chuan a ziak ngam ta a. Thuziak nen, thlalak nen tha tak tak nen, video clip nen lam, chhiara en tur a awm ta. Hma kan va sawn nasa tak em. Ka student te hnenah, “Google lamah hian zawng ve thin ang che u, in mamawh, in zirlai lama pui theitu tur che u chu a tam ang,” tia ka lo hrilh thin te paw’n tunah chuan computer lamah te, blog lamah te, nasa takin min tanpui ve thei ta. A va ropui em…a va rapthlak em….a va nasa em…. kha daih kha asin.

I blog kha back up rawh:

Tunlaiah mi an sual tawh a, i email takngial pawh an hack sak duh che a, i email ah virus chhe ber chi vawrh luh an hreh lo. Buai vak vak mah la pawi tihna chhete mah an nei lo. I email mah khawih an hreh lo anih chuan i blog pawh khawih chingpen an hreh miah dawn lo ani tih kha han hre phawt mai teh. Hetiang tih ching ho hi an sual hrim hrim vang a ni thei a, tin an ninhlei vang a ni thei tho bawk. I blog, uluk taka i design ve, i thuziak tha tak tak te, i thlalak roh tak tak i dahna blog te kha, zan khat thil thuah bo vek ta mai se, i ui lutuk dawn a. Chuvangin i computer hard disk ah khan back up hmiah mai rawh. I duh hunah i la import thei ang a, tin blog dang pawh siam la, chumi blog tharah chuan i import thei ang.

Hetiang hian ti ang che:

I blog settings ah lut rawh > Basic ah khan lut la > Export blog tih kha click rawh > Download Blog tih kha click leh ang che. A bak chu a rawn inkahpupchaw chho tawh mai ang.

Mifa te’n thu tha tak tak, thu rotling, ram leh hnam hnuk khawih phak an ziak lai te, an blog atanga sum an lakluh hiau hiau lai te hian, an tih thikin blog chhete chu kan han siam ve thin a. Daily blog traffic a hniam miau chuan sum lakluh ve nana hman ngawt pawh a rem lo. Thuziak mi nih lem loh chuan mahni blog update reng te a lo harsa a. “Blog siam ve a, update tha leh peih hlei lo,” tih te, “A blog a thuziak te chu an ho hlawm em mai,” in tih sak ngawt chi pawh a lo ni lo.

Mahni eizawnna anih loh chuan thuziak tha tak tak dah tur neih reng te hi thil harsa a lo ni. Blog lama in tlawhpawh a harsat zia ka hriat chang hian ka blog rawn tlawh thintu te hlut zia ka hre chhuak thin. Thuziak harsat zia ka hriat chang hian thuziak mite lo hlut zia ka hre chhuak thin. Blog lama thuziak te lo tar chhuak a, lo tih lar sak thintu kan admin zahawm tak Sandman-a chungah lawmthu sawi nachang hria kan awm em le?

Similar Posts:

• Bloggers kan mamawh
• Blog bo bonus
• Social Networking phallohna University!!!!
• Mobile Phone+Wapsite+Internet
• Blogspot.com

Recent Posts:

• Thalai ni si:
• Ruatfela Nu thu leh hla
• Thingkha Par Lai – Nghatun Mut Hun (Ka tawn hriat te) !
• Chiahpuam Part II
• FANCHUN

This entry was posted on Tuesday, January 11th, 2011 at 5:00 pm and is filed under Blog, Internet, Opinion. You can follow any responses to this entry through the RSS 2.0 feed. You can leave a response, or trackback from your own site.