mi(sual).com

Kan tlang kan ram a hring a mawi,
Tlawmngaihna pangpar mawi a vul;
Rangkachak leh lunghlu aiin,
Chu pangpar chu a mawi zawk e.
– Rokunga
Zofate thinlungah hian ‘tlawmngaihna’ tih thumal hi a mawi a, awmze ril tak a nei a, a nei reng dawn bawk a ni. Kan hla phuahtuten hlaah an chawi vul a, Rokunga, ‘Hnam Pa’ ti a koh hiala mawi, a rilrua ram leh hnam veina khat liam zawih zawih thin pawh khan uar tak main a lo chawi tawh a, “Aw nunna par,” ti hialin a lo ko a nih kha.

Hmanlai pipute nun kha a mawi thin an ti; a chhan chu hnam dangte neih ve loh ni hiala kan sawi thin tlawmngaihna ze mawi tak hi an nunah a beh tel tlat vang niin an sawi bawk thin. Vawiin thleng pawh hian Mizo chu tlawmngai hnam kan ni tiin kan la uanpui a, hnam dang chunga lengah kan la indah tlat reng a nih hi. Kan naupan laia thingtlanga kan zirtirtupa phei chuan tlawmngaiha tih hi eng tawngah mah a awm ve lo niin a sawi, dik tak maw! Kei, dai kil kara hmeithai fa mai mai hriat phak zuk ni suh!

Mizote hi tlawmngai hnam kan ni e, kan tih mek lai leh, tlawmngai pawl lian ber YMA kan neia kan induh pui viau lai hian, kum tlem te ral ta khan, veng khat tlawmngai pawl hruaitu chuan, “He mite chhung hi kan lawm zo tak meuh a ni,” a ti an ti. He thu tawi te sei tak si hian ka rilru a luah reng mai, tlawmngaihna thumal nei chung si hian eng nge a awmzia tak tak kan hriat thelh ta a nih dawn hi, ka ti rilru reuh reuh a. He thu ka hriat thiam dan chuan ‘he mite chhung hi khawtlang tana an thathnem loh tehlul nen, khawtlang hian kan lova buaipui nasa zawk em’ tihna tluk a ni. Tlawmngaihna ka lo hriat thiam ve dan nen chuan chhim leh hmar ang vel a ni a, sipai bang ka bo map mai.

Ka lo hriat ve thin tlawmngaihna chu hmangaihna atanga chhuak mite tana inpumpekna nun a ni. Mite tana inpe zo leh khawtlang tana mi thahnemngai tan chauha kan tlawmngai a nih chuan chu kan tlawmngaihna chhal chu tha ba rulhna ang lek a ni. Mi challang leh mi awm thei te tan chauha kan tlawmngai thei a nih chuan mi dangte tlawna mahni hamthatna um tluk lek bawk a ni. YMA hminga (“YMA ang” ka ti lo ve) tlawmngaih kan chhuahna kawngah hian miten kan mit an tlun loh vanga phun ruk ser ser te, mahni thil tih hriat riau te, mi dangte aia thawk tha leh thawk tam ta riauva inhriatna te, miten ka hnathawh lai hi hmu se la ka tihna thinglung zawng nen lam hian tlawmngai kan la inti thei zel ang maw?
Zoram chhung aiin zoram pawnah hian kan tlawmngaihna hian awmzia a nei zawkin, a parchhuak a mawi zawk foin ka hre thin. Miin chiat tawk se,ka tawk ve anga mite an lo kal duh lo ang tih hlauh vang ni hauh lovin,vawikhatmah an la hmuh ngai reng reng loh leh a hming pawh an la hriat ngai reng reng loh tan an tha leh zung,sum leh pai sengni an kal khawm a, tuman a let leh an beisei lo a, miten tanpui let ve ta lo pawh nise an phun nawi reng reng lo nia.

Eng pawh chu nise, mizo tlawmngaihna kan tih hi a pawnlangin a huau huau riau te pawhin a hriat lek lek thin. A huhoa tlawmngai peih em em si hi, a huho lo chuan kan peih mang der lo mai. Khawvel changkang zel leh mitin te kan eizawnna a kan buai tak dan ngaihtuah hian eng tikah emaw chuan a hohoa tlawmngaihna hian mual ala liam ngei ang le,a nih loh vek pawhin tum atanga kum 50 ah chuan thil a danglam viau tawh ang. I awi lo anih chuan, tunah pawh Aizawl veng tam takah chuan thlanlaih leh khawharin riah tih vel hi thil harsa a ni tan der taw asin.!

Mihring kan buai zel a,thenawmte ngaihsak pawh aharsa mai dawn e,a huhoa kan tih theih loh hunah hian ‘Tlawmngaihna hlu’ hi mual kan liam tir mai dawn em ni ang!!?? Mualliam loa ding reng tura kan duh tlawm ngaihna hi a huho chauh ni lo hian kan mimal nunah hian awmzia nei tawh zawk se la,tlawmngai hnam kan nih a vangin mahni chhauha kan awm lai pawhin kan tlawm ngaihna hi vawng nung zel i la, kan nitin eizawnnaah te,kan hnathawhah te hian lang chhuak tawh se la,he hming mawi tlawmngaihna hian DIKNA,RINAWMNA leh HMANGAIHNA keng tel mawlh rawh se. Vawiin a thalai te hian nakina kan tu leh fate tan entawn tlak tlawmngaihna i hnutchhiah ang u !!

Similar Posts:

• Tlawmngaihna hi a tlahniam em?
• Tlawmngaihna, kan chhuang ‘over’ em?
• TLAWMNGAIHNA vs NIHNA
• Zo Par Mawi
• Tlawmngaihna

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Friday, January 14th, 2011 at 11:31 am and is filed under Mizo Society & Culture, Mizoram. You can follow any responses to this entry through the RSS 2.0 feed. You can leave a response, or trackback from your own site.