mi(sual).com

(A clip from ‘Parliament-a ka hun lai’)

[Source: Assembly Silver Jubilee Souvenir, 1997 & Zirna Eng July 1998.]

Mizoram hi British Sawrkarin kum 1890-a a lak hma atangin, Mizote chenna ram hi Lushai Hills an lo ti thinin, a ram chhunga mi chengte chu “Lushai” an ti thin a. Tin, Lushai Hills chu Assam ramah kum 1896-a khung luh a nih atang khan Assam rama district pakhata chhiar a lo ni ta a. “Lushai Hills District” an ti thin. Chuvangin hnamdang Mizo ni lote chuan Lushai min ti vek a; keimahni ngei pawhin, Sawrkar leh hnamdangte hnenah chuan, Lushai hnam kan in chhal vek thin. Nimahsela, kan Mizo mipuite hnenah chuan “Mizo” kan inti a, kan chenna ram pawh hi “Mizoram” kan ti thin.

Khawvelah hian Lushai hnam an awm lo va, helaia “Lushai” tih pawh hi thil kalsual mai niin a lang. Saptawng hawrawp-a “a” hi “e” ang deuhva lamrik a nih avanga “Lushei” lam rik turin Lushai tia an lo ziak chu a lo nghet ta a. Nimahsela Lushai tih a a “a” hi kan a,aw,b-a “a” ang hian kan lam rik tak si avangin Lushei ti lovin Lushai tiin hman a lo ni ta zawk a ni.

Mizoramah politik a lo luhin, Lushai Hills chu Lushei ta bik ni ang hrima lo ngai tawkte an awm dawn dawn ta mai a. Chu chu, Lushei ni ve lo te tan rilru tinatu a lo ni ve leh a. Chutiang neuh neuh chu Mizo zingah a reh theih nan leh Mizo hnahthlakte  chu pumkhatin kan awm theih nan, Mizo kan nih vek avangin, “Lushai” hi “Mizo” tia thlak leh “Lushai Hills” tih chu “Mizoram” tiha thlak ni turin Sawrkarah ‘Mizo Union Pawl’ chuan kan ngen thin a. Nimahsela, pawl mai, thuneihna nei lo kan nih avangin leh kan Mizo mipuite zingah pawh dodal tlattute-entirnan, ‘The Lushai Chief Councils’ an awm avangin a harsa thin. September 1948-ah Manipur-a kan hmar unaute khawpui Senvawn-ah Mizo Union Divisional Conference ropui tak kan neih tum pawhin, kan Hmar unau palai zinga mite chuan “Mizo vek kan ni a, in zawmkhawmin rorelna pakhat hnuai a awm pawh kan duh. Mahse, kan hotute, kan in nghahna ber te hi “Lushai” in ni a, in chenna ram hming pawh “Lushai Hills” a ni tlat mai. Hengte pawh hi tih danglam a tul anih hi” an ti a. Mizo hnahthlakte in pumkhat nan “Lushai” tih leh “Lushai Hills” te hi bumboh leh than mawhbawk an lo ni tih ka hriat chian zual phah a; Political party atang ringawtin a harsa si a; tangkaina nei ve thei awm dinhmunah ka la din ve palh hlauh chuan, hengte hi chu ka hmabak tur ni rawh se, keima hriatah chuan ka ti thin.

Ka thil tum chu tih puitlin tumin, Lushai Hills tih chu ‘Mizoram’ tia thlak ka rawtna (Private Resolution) chu Parliament (Rajya Sabha)-ah chuan September, 1953 khan ka thehlut ta a. M.P te hnen atangin thil rawtna te hi luh a tam thin avangin inkhawmna-ah ngaihtuah chang tur te en nan thum an vawr thin a. Pathian leh Pu J.L.Nehru malsawmna a niin ka ring, ka rawtna chu vanneite zingah a tang ta a. Ka hun a lo thlen chuan Lushai Hills District chu MIZORAM tia thlak a tulna chhante ka duh ang leh ka thiam ang tawka ka sawi zawh hnu chuan mi chhang turin Dr.K.N.Katju, Home Minister, pa siniar tawk tak mai a lo ding chhuak a. A thuhmahruaiah chuan ka beisei phak hauh lohvin, “Tuna Member thusawi kha ngun takin ka lo ngaithla a; sawi thiam ka tiin ngaihnawm ka ti a. Kan Parliament-ah hian mahni sawi tum sawi chiang thiam ber pawh niin ka hria” ti meuhin min rawn fak der ta mai a, zahthlak ka ti hle. “A rawtna hi Sawrkarin a tlangpui chuan kan pawmsak a. Lushai Hills hming thlak dan tur erawh chu in lo ngaihtuah atan Parliament-ah Bill kan la rawn pu lut ang” a ti ta a.

A tukah chuan, India rama chanchinbu lian zawng zawng phek hmasa-ah chuan, “Lushai Hills hming thlak a ni dawn. R.Thanhlira rawtna Sawrkarin a pawm. A thusawi thiamzia Minister-in a fak” tihte chu thupui(headings)-ah hmangin a lo chhuak ta uai mai a. Zahthlak ka ti angreng nachungin lawmawm ka ti hle. April 1954-ah Sawrkarin Bill an rawn putluhah chuan Lushai Hills District chu Assam rama district pakhat a la nih rih avangin “Mizo” district tih ni turin an rawn siam ta a; Parliament chuan lungrual takin a pawmsak ta a ni, Heta tang hian Lushai tih thinte kha Mizo an lo ni zawk tih a chiang hle. Parliament Dan siam chu September, 1954 atangin hman tan a ni ta a. Chuta tang chuan Lushai ni thinte chu Sawrkar leh khawvel hriatin tuma mitmei veng hauh lovin “MIZO” kan inti ngam ta a ni. Ram lem (Map) ah te hian, district tih tel lovin, “Mizo” tih ringawt a ni fo thin. Hemi zulzui hian Schedule Tribes chu “Mizo(Lushai)” tiin, hun remchang hmasa ber, 1956-ah thlak zui a ni ta a ni.

Lushai Hills leh Lushai tih hming thlak thu hi Prime Minister, J.L.Nehru, Aizawl a lo zinin, Bawrhsap Bungalow (tuna Raj Bhavan) ah hian Lushai Hills tih chu Mizoram tia thlak Mizo mipuiin kan duh thu ngunthluk takin April ni 3, 1953 zana ka titipuina rah a ni a. hemi tum hian kan Chief Minister, Shri B.R.Medhi pawh a awm ve a. Lushai ni lovin Mizo hnam kan nih zia te ka hrilh chiang a, amah pawhin a man chiang khawp mai. Nimahsela, “Lushai Hills chu Assam rama district pakhat a la ni rih bawk a, “Mizo” district ti phawt ila; Lushai ni lovin, Mizo in nih a chiang tho dawn a, I pawm thei mai lawm ni?” tiin, “Mizoram” han tih nghal mai chu, Naga ram buaina avangin harsa a la tih rih thu pawh a sawi vek a. Chunglai chuan Nagaland, Meghalaya, Arunachal Pradesh leh Mizoram te hi Assam ram anni vek a. “Chutianga harsatna tak in nei anih chuan, a pen khatna atan chuan ka pawm rih mai ang. Ka duh tak chu “Mizoram” tih ani e” ka ti a. “Engpawh nise, Parliament rawih a ngai ang” a ti leh a. “Chu chu ka lo tum ve mai ang. I malsawmna erawh chu ka mamawh dawn a; ka dil che a ni e” ka ti a. A nui sak a, kan inthen ta a.

Lushai Hills hming chu “Mizo” hming ngeiin ka thlaktir thei dawn a ni tih ka hriat avangin ka lawm haw hle mai a. Mizo hnam tan, hun lo kal zel turah pawh hnuhma pawimawh (Historical Importance) nei zui thei a ni tih pawh ka hria a. Mahse ka thil tih tum chu engtikawng mahin a bahlah loh  nan Parliament-ah tih fel a nih hma loh chuan tumah hrilh lovin keima hriat atan chauh ka veng khiau mai a.

“Mizo” district tih chu kum 17 leh thla kua chuang zet a put hnuin, Jan 21, 1972-ah Assam district nihna a chhuahsan atangin Parliament-a ka rawtna ang khan MIZORAM tih a ni ta a, mimal takin ka lawm ngawt mai.

Hetianga Lushai kan nihna kalsanin khawvel hriata “Mizo” kan nih takna leh Lushai Hills lo ni kumkhua thin, Mizoram a lo ni thei ta hi ka awmkhawhar nia ka ngaihtuah chang chuan, M.P ka nih laia ka kutchhuak ni ve ngeiah ka puh thin a. Thangtharte mi hriatreng nan ka ‘Lungphum’ an te ka ti rilru thin.

Kan khawvelah hian Mizote’n “Ka Ram”  kan tih ve theih chu tunah hian pakhat chauh, zimte, MIZORAM hi kan nei a. Hei hi tumahin engtikawng mahin an pawt bal leh an tih hek loh nan, Mizote hian kan hmunhalh tlat ngam tur a ni.

[P.S: Kan thil post thenkhatte Lawrkhawm emaw, Buannel emaw, News Paper emaw, khawi site-ah pawh chhuah chhawn hi thil uihawm chu a ni lo va; mahse a source hi ziah lan ni hram se a duhawm ngawt ang. Mizote'n a tam thei ang berin lo chhiar rawh se tih hi kan duhthusam a ni.]

Similar Posts:

• Burma Ram Vanglai leh Mizo te
• The Lushai Expedition, 1871-1872
• Bawih chhuah chungchang
• Eng hi nge Mizo Tawng chu?
• Jack Longbottom and the Lushai Scouts by Jane Robinson nee Longbottom

Recent Posts:

• Ka thianpa Johny
• I ta ka ni kumkhua ang
• Ka thiannu kha…!!
• mr. Duhlova Sermon (Rev. Lallura of Nepal)
• Chowmein ei avangin pawngsual

This entry was posted on Wednesday, January 19th, 2011 at 2:00 pm and is filed under Mizoram. You can follow any responses to this entry through the RSS 2.0 feed. You can leave a response, or trackback from your own site.