mi(sual).com

Run leh Tiau kar chen laia hla chhuak:- Mizo hla hlui, Run leh Tiau kara chen lai hla sawi hmasa ta ila. A upat dan indawt deuhva kan sawi dawn chuan:

Kan Ngente Khua, khaw nuam kha,
Thla ki fam hma’n ka nghilh rua lo ve,

tia mi zawng zawngin a hming kan hriat, Pi Hmuakin Chawnghawih khua phuahna hi sawi phawt tur ani ang.

Pi Hmuaki hi Mizo hla phuahtute zinga ropui ber ni kher mah suh se, a hun lai chuan a ropui hle a ni ang. Bul tantu anih avangin Sap hla phuahtu hmasaber, Beowulf te ang dinhmuna ding hi a ni. Hla a phuah a phuah mai thin a, miten,”hetia a phuah zel mai chuan thangtharin hla phuah tur an nei hlei nang, kan thlang tla tur buai vel nen, Pi Hmuaki hi i phum ngawt mai ang u” an ti a, a nung chungin an phum ta a. Mahse an phum lai te pawh chuan:

Nauva te u, nau haia te u,
Tha te te khan min vur ru;

a la ti talh e, an ti.

Heng hi an hla phuah thiam ber ir atanga lo chhuak a nih hrim chuan, chung hun laia mipui dinhmun chu a la hniam rapthlak mai tih chu sawi tam pawh a ngai lo vang.

Mizo hla hlui han chhui hian, thil tangkai tak mai leh ngaihnawm tak hriat tur a awm. Mizo hnam hrang hrang – Lusei, Hmar, Ralte, Paihte, Pawi etc etc kan lo inpumkhatzia a lang chiang hle bawk. Hlado leh Bawh-hla hi Pawi atanga chhuak, sakhaw hmanna leh inthawina hlate hi Hmar atanga chhuak, hla hlui hmingthang hote hi Ralte, Paihte, Lusei atanga chin chhuah a ni tih a lang thei a, a ngaihnawm hle a ni. Hlate hi a upat dan indawta ziak a harsa a, kan thawnthu hluite pawh chu, lehkha nei lo hnam kan nih avangin upat dan indawt in kan hre thei lo. Dar hla te hi a upa pawl chu an ni ngei ang a:

Chhimbu leh Peng Peng intu e,
A lu lam kawng, lu lam kawng;

tih ang te leh, Liandova hla leh Chawngvungi hla ang te, Dar hlaa kan hman takte hi an upa hle ang. Chawngvungi chu Sawngkhara’n a rim thin a,

Chawngi, Chawngi, kawng min lo hawn rawh,
Sawngkhara ka lo leng e;
Bawmzo fa leh tuium chhia,
Pawnah an riak na ngai e.

Hmanlai chuan a chi bing te tea awm thin an nih avangin chi tlem deuh leh mi hmuhsit deuh nih chu hreawm tak a ni a, nula rim nikhua pawhin zahna an hmu thin a ni ang. Mahse an nei ta tho va. Rei lo teah chuan Chawngvungi chu a thi ta mai a, chuta a pizawn nu tah hla dar hlaa kan hman tak chu

Chawngvungi man a tam e,
Thi ka pek, a duh lo va,
Dar ka pek, a duh lo va,
Kan darhuai kher i ngen e,
Chawngvung man tam sumhluani.

Hman lai chuan hla inphuah el (hlaa intuk) hi an ching hle mai a. Chi leh chi, lal leh lal, khua leh khua, mimal leh mimalte pawh hlain an intu thin a, inhmelmakna leh indona hial a chawh thin. Sawngkhara nu leh pa leh Chawngvungi nu leh pate pawh chu an inphuah el ta vak vak a.

Chawngi, Chawngi, va kal la,
Sawngkhara va sun ang che.
Chawngi u, Chawngi pa,
Sawnga sunah kan ti lo,
Fanu fapa chawiah kan ti a ni e.

He hla hian makna riau a nei, hla hlui ber te zinga mi ni awm hi, a hla thu kan en hian tunlai hle mai si a, a ngaihna hriat a harsa hle.

Tin, Liandova te unau thawnthu hi a lar hle a, retheihna ata lo ding chhuak an ni, hlain min hrilh angin:

Hmanah Singai sum tin phur,
Rulpuiin chhunrawlah nei,
Liando te unau lunglawmna.

Run lui lianin a nupui Chhiahchawngi a len sak a, chuta Liandova tah hla chu Paihte tawnga phuah a ni.

Ka chiah lamah pel siau siau ving e,
Ka kih lamah Run tui a lian e,
Ka thai Chawngi pam ta lua rawh e.

Liandova te unau chungchangah hian naupang hla hlui te a awm bawk a.

Ni a chhuak e, kan hmu hmasa ber,
Liandova te kawmchara, lailente su dem dem,
Chawngzawng te chawm ziau ziau.

Hetih hunlai vek hian mi hmingthang em em mai Lersia an tih chu a awm a. Liandova te unau pawh hi ama zar zova lo ding chhuak an ni reng a. Tin, amah hi a hausakzia sawi huai huai a ni. A chawng hmasa ber a ni chawk ang a.

Lersia chawng mata,
Van zawla a chawng mata;
In bang laiah in ral fei lu tung zut e,
Haw haw haw,

tih hla a awm bawk.

Run leh Tiau kara kan pi leh pute khawsak lai hian thil ho te teah an indo mai mai zel a, an inrem leh lawk bawk a, Suaipui Langmual vela an awm laiin Ralte hnam Siakeng leh Kawlni an indo va, Siakeng hovin Kawlni hotu pa Darbuanga an khawh thluk tak avangin an zam ta a.

Kawlni ka phat lai chun vun a, ka dak lau lau,
Kawlni kan chau kah Chawnglul man thei kau

an ti ani. Tin, Pawi ralin an rawn bei a, chu chu hlain:

Pawi no cha cha hawngthawk e, Kawlni runin
Ka suaipui leh ka lammual a nuam lo ve;
Nah thing nuaia sakruang pal thing ang kan tun,
An thlungtu leh kawr sial tui ang kan lak.

an ti ani.

Similar Posts:

• Mizo Zaithiam LIANTHANGPUII chu Tukin zing khan a Boral
• Lungena leh a thlahte chanchin
• Thado chanchin
• Kawlni chanchin
• Lersia Chanchin

Recent Posts:

• Thanglian, Aw…… Thanglian !
• CFL Hmingthanga Thihcham Vawikhatna Pualin
• NGAIHNAWM KAWLEKSAWN – 2 :
• Pathian Kut Dinglam {Sunday Pual}
• ZO NUNMAWI HLUTNA

This entry was posted on Sunday, March 20th, 2011 at 6:30 am and is filed under Information, Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.