mi(sual).com

Khirh

An dinhmun chhutpui miah lova ‘pasal nei tawh rawh’ tih thlakzen rikngawt pawh hi a dawngsawngtu tan chuan thil nuam a ni hauh lo. Mahni lama lo inngaih senior tawh nak laia a ka kaw na zawngin an fiam thlazen mai pawh hi ‘nuihpui loh dawna rilru te nihna ni si, nuihpui viau pawha na ru tlat si’  hi a ni thei bawk, an mahni lam hi insawisa vak vak pawh ni se han sawisa ve ila nui uarh uarh mahse an rilru chhungrilah nuam an ti tak tak hauh lo.

Nula senior-te dinhmun hi a khirh ru ang reng khawp a, ‘ka nei ve tawh ang’ pawh ti se a mipa lam palai rawn tir tur an awm miau loh chuan kawng a bo ru riau. MHIP khawmpuiah ‘hmeichhe lamin palai tir ve thung tawh rawh se’ tiin thu dah se a ziaawm ang em aw? Va tirh theihna tur process lai kha an mu tan a ni kumkhua thei tho bawk si.

Mipate hi chu han leng rei deuh pawh ni ila  a chhaitu chan  kan chang a, tum tawk tete hi an lo  bo bik lo va tlai khawhnuah pawh a inchhai lunglen ve theih viau tho. Hmeichhe dinhmunah ngat chuan har tak a ni, min rawn chhai rawh se tia tan han lak vak theih a ni bik si lo; zawng lutuk nih hlauhawm si karah hnartu an neih loh vaih chuan eng mi pawh ni se an chuti der thei tlat.

Duhtui theih lai hunin mual a liam tawh ngat chinah hi chuan duhtui hlei thei kan lo ni lo va, duhtui thei lo dinhmun pawh luah zo tawh lo kan nih phei chuan hringnunah hian tan lak ngaihna a tlem pharh tawh mai thin. Chuvang chuan thil dang zawng aia leng senior-ten an hlauh ber chu an senior-puiten pasal an neih san daih anga an nun hrehawm tak hi an mal tawrh ang tih an hlau va, mualpho nia an inngaihnaah hian mualphopui tur an mamawh a ni.

Zirlai nih lohva hnathawh bulfuk neih loh phei chuan khawtlang leh leh kohhran-ah kan lo tal tam a, kan inti senior zung zung mai anih hi. Chu achhapah taksa lam pawh than a kin tawh hi hi chuan than leh ngaihna chuang awm tawh lo le-feet 5 leh 6 inkarah hian kan inumkhawm ruih tawh mai a, zirna lamah lah BA bawr velah kan fu tlang thup a, naupang tete nia kan hriatte nen kan han kalkhawm a, a senior loh theih bawk loh thin a tin ni.

Vantlang kamchhe tleuh nana leng senior-te hmang thin culture-ah kan seilian bawk si a, nupui pasala innei hma hnam kan lo ni bawk nen; chutah a tuai thar deuhte chu an lo mam deuh bawk si, van laklawh chuan van theih tak pawh a ni reng a-chet han lak ngaihna pawh vang tak a ni.  Eizawnna bulfuk nei pawh he thlaphanna thlipui hian a nuai lo chuang lo, an fin poh leh an mangan dan a fing a ni chauh si; mahse khawngaih an mamawh miah lo hi an ngaihsanawmna a ni tlat.

Inkiltawihna thlipui a lo tleh a, kum a lo vei ve teivet bawk nen chuan chu chuan kum chhiar a tipung chak bawk si. Mahni lama inngai upa chuang hauh lo hian kum lam hian min lo chaldelh hma khawp hi a lo ni. Mizo chhungkuaah mo khan chhungpui nu chan a chan chhoh tawh chuan chhungpui fanu kha a lo mikhual tan a, thu a tam tial tial a, chhungkua a buarchuar tial tial a;  nu leh pa’n an thlavang an hauh na ngam lo tial tial bawk nen. Nutate lamin an lo zahpui dawn dawn ta mai si- chhungkuaah inlakbingna a lo awm tan a, innghahna tur sawn tal pawm an thlahlel thin pawh hi a mak lo ve.

A chhan

Engvanga senior nge an nih sawi sen a ni lova chhut chhuah rual a ni na hek lo; a ril lutuk.  Tleirawl chhuaha tlangvalte vir ve hat pawh rei tak an leng rei thei tlat a, tin, an vir reng reng loh leng rei zui lah an thahnem bawk. Ngaihsak miah lo anga lang nei ta phut mai pawh an awm tlat bawk si, ngaihsak em em nei mai pawh an thahnem zual; ngaihsak hurh chi pawh a ni lo va ngaihsak miah loh lah a ni lo zual. Nupui pasal hi chu khawl kelha ang deuhva inbat hi a ni a, inbah fuh hi a tul ve hrim hrim; chu chu sakhuana tawngkamah chuan ‘Pathian samsuih’ ‘Khuanu samsuih’ an ti.

Laklawh vang hian a lo len rei theih dawn a lo ni. Hna thawh laklawh, zir laklawh, chhungkaw chawm laklawh vangte leh laklawh hrang hrang avangte hian an  nei lo laklawh thin. Tin, Zei loh vangte pawh a ni thei. Mahni zir leh thiamna kawngah chuan fing tak, thil zei zia hre thlup si thin kha mipa bulah an awm huat ta thin a, mipa thian chang an ngah a han kal falpui tur an awm lo thin erawh an thiam loh vang a ni.

Awmnain a zir hi a tul ve tlat. Hnam dang kara awm vangte hian a lentul theih bawk, hnampui mipa awm meuh lo, awm chhun pawh zun phur hlawl si lo karah hian a teirawlai theih khawp ang. Tin, zirna leh training hian kan nun a pawt hek ve hrim hrim, BA/MA hnu lama kan zir chin hi chuan min vawrh senior duh hle, zir chhuahah hnate kan han beisei kual leh a kum khat tete inbelhkhawm kha a lo tam hma khawp mai si a. Tlangval na zawngte cho rual loh chi hna thawh tawh phei chuan changkang deuh hian a hawi hil theih hle.

Hna reng reng hi eizawnna(profession) anih tawh chuan induhna(Pride) a keng tel a zawlpui teh ru si van ru tak bawk si hian kum chhir chhuah mai hi a har miah lo. Mi dangten an thlir dan tura buai ru tak, neih tur an sit ruksak ang tih hlau bawk si, ban tlang zuam chiah si lo-hmuh chhun iai deuh bawk si-an iai-a te ngei pawn ngaisang let bik der lo hian a len theih bawk. Tin, val na zawng zuam loh hna tha thawkte hi an nun a khawhar ru thei hle bawk.

Mipa rinawm loh vanga leng rei hi chhiar ila an thahnem ve thawkhat viau maithei. Neih tura thutiampui, chumi avanga mi dang pawh lo hnawl tawh mahse mi dang an neih san leh site hi an leng rei chawk, an khawngaihthlak bawk. Rinhlelhnain a tuam vel tawh a, chu achhapah bul han tan tha leh turin thenkhat chu an lo tlai tawh rawl nen an tuara vanpui chim hi a rit zual bikte pawn a hriat.

Nu leh pa’n pasal neih an phal loh hi zu awm thei a. Anmahni hma an sial avangin an chelh thin a, an phal tlai khawhnu meuh chuan neih mai tur an lo vang tawh si-an kut chi lo hawi vak vak tawh mai  a ni. Tin, Duhtui ve hrim hrim, tumah teh tling zo lo an awm bawk; heng mite hi chuan len rei hi an phu, an sual chhuah a ni. An kawppui ni turin mipa tumah hi an fel tawk lo, ‘an neih pawhin a beisei loh em em tleirawl aa deuh an bum thlu khut duh’ te ti ila, anih duh hmel.

Ngaizawnawm loh ve hrim hrim an awm, an tihsual phei chu a ni miah lo mi an lem lo ve hrim hrim a ni. Mipa tan an khuamkho ru riau; lung an tileng lo va mahse kawm erawh an nuam phian. Thiante tan an inphal em avangin puarak atan an tha tawk viau. Pa deuh tung , mahse patil ni si lo an awm bawk an zia hi an len reipui duh viau. Tin, nulat kham thei mawlh lo an awm bawk, an hmel a chhia a zeng pawh ni si lo hian an leng rei phian duh. Tleirawl tirh ata ngaihzawng an tlachham ngai lo mahse khiang han awih mai hi an hreh nge chhungpui nu ‘line’-a kal hi an thiam lo, a tawpah nupui sun tawhah an bei leh mai thin, a sual chuang erawh a ni law.

Hmuhzawh loh vanga leng rei hi tam an ni lovang duh tak hmu lo erawh an ni deuh vek ang. Mi’n pahnih pathum an hmuh lai karah hian pakhat pawh chhai thluk tur hmu zo lo hi an awm thei ang em? Nge an lungdum zattu an hmuh loh vang? Lungdum zat loh hi tlai khaw hnuah an fawm leh chawk. Ngaihsak loh vang hrim hrimin a len rei theih ang, mahse an tam lo vang. An sawi chhuak lo a ni chauh ang, kum a’n pun chhoh tak tak hian mi pangngai hi chuan lungkham rukah kan nei tlangpui tho. A tirah mahni aia u deuh an beisei phawt a, chumi hnuah mahni rualpui-chutah mahni aia nau pang fe-a tawpah nupui sun tawhteah hian hmawr an bawk tlangpui duh khawp mai, mahse an ni vek lo erawh tih a chiang.

Mi phak zat loh vang  hi chu sawi thu a cheng lo ve, hmu tawk chu an awm tho bawk.

Damdawi

Thesis ni se, he bung hi a huphurhawm khawp ang. Mahse kan sawi hnawk laklawh tawh a, an lo leng rei laklawh tawh bawk si a, kan sawi zel ang.

Nula senior mahni veng chhunga taptawm reng pasal neih duh ru ve si tan chuan awm hmuh sawn a tha. Senior an tih luai luaina hmun hi chu an veng chhung/khaw chhung a ni chawk. Ni-te khuaah pawh zin daih mai tur, inhre ngai lo karah ‘chance’ a sang bik. Kohhran upa thlan ang deuh a nia, khawhlun/ venghlunah hian veng chhung mi nghet tan tlin a har, mikhual pem thar tan chance a tha; kan tlin lohna hi kan inhriatsak thui tlang lutuk.

Duh chu awh tan tum mai tur. Thangkam hawt lo hian kan en ve tlut tlut ang tih pawh a hlauhawm, kam mai tur. Neih loh hi kan zak deuh anih ngai chuan leh neih ve ngei hi hringnun kalh tikimtua kan ngai anih tlat chuan chetpui chhuah ve mai kha a him ber. Mipate hian hawtu leh hriat ngai loh mi naran bul ai chuan hmangaihtu/thlahleltu bula awm hi an chak tih hi thu dik sawinghin rual loh a ni. A tir lamah chuan lo kawp lawp lawp pawh ni se a phuar nghettu zawka tan tum mai tur.

Zawlpui zawn lutuk hi a fu ber lo.  Kan pangngai chuan tu pawh ni se kan kawppuite hi kan chawimawi nghal. Mi mitmei ven avanga len rei zak, neih dawna neih tur zahpui leh si tan din khawchhuahna chance a tlem. Pasal turten eng qualification emaw an neih a tul kher anih loh chuan chan tawka lungawi a, chumi hnua hmasawnpui tum hi a tha. Mi pangngai niha chhungkua din meuh chuan tu’n an sel reng lo ve. Tin, hmun danga awm tan hawn changin senior awm chuah loh hi a fu ve khawp, naupang tete lo dawng chho nguak mahse a hotu nu anga awm tlatte tan kawng a kaw zawk-inkiltawih daih aiin.

Hmangaihna hi tlai khaw hnuah a changchawi tlak teh chiam lo. Inneih hnuah a inhmangaih chawp theih a, a nghet lo chuang lo. Inhmangaih ber anga lang inneite pawh a nghet ber an nih chuan loh hi. ‘Ti mai rawh tunah(just do it) policy hman a tha, engmah lungkham lem nei loin tih mai tur. Fing ber ang maia hun hma lam thlir chiam chiam hi a tul loh chang a tam mai.

Tawngtai la ti rawh(pray and do) formula hman a tha bawk. Pray chauh hi chu a thu thluang hna deuh tlat, thlarau mi tawngkam takin ‘chet chhuah ve  a ngai’ tichuan kan rah chin apiang kan ram. Mipa kawm dan inenfiah ngam a tul bawk. Thian lo deuh tura siam dan khum laizawlah duan a tul fo, mei nei ngaihno bei si chham chhuah dante pawh darthlalang hmaa practice a tha ang. Mahni hi kan inzah lian ve a, kan chham zat zat tawh chuan a  hman tlak ang.

Suihkhawmna

Nula seniorte deu-na tura ziah a ni lo; mahni tawkah phurrit hi kan nei tlang theuh va inchhawktawn theih dan awm se tihna lam a ni e. Thil khirh tak a ni a, beihpui chhuahna tham a ni. Tin, nupui pasal neih hi a lo him bawk si-kawng hrang hrangah. A ngaihna hre tura rilru sen a, ‘zahfakah lu em chhum suh’ tia khawsak luih ve deuh talhna tur chi pawh a ni. Kan inkawp loh chhan tam tak hi chu kan inhriat pawh loh vangte a ni chawk. Duh leh duh hi kan inpel thui thei viau, han inpawh mai hi a har lai a nia sawi pawp dan zawn hi a tha hle.

Similar Posts:

• Nula Senior
• Nula senior…
• Nula te hriat atan
• Inneih hi
• Thunawi

Recent Posts:

• CFL Hmingthanga Thihcham Vawikhatna Pualin
• NGAIHNAWM KAWLEKSAWN – 2 :
• Pathian Kut Dinglam {Sunday Pual}
• ZO NUNMAWI HLUTNA
• NGAIHNAWM KAWLEKSAWN – 1 :

This entry was posted on Friday, April 8th, 2011 at 3:30 pm and is filed under Opinion. You can follow any responses to this entry through the RSS 2.0 feed. You can leave a response, or trackback from your own site.