Thla khat leh a chanve chhûng lek pawhin kan chènna leilung hian hmêlhmang lan dàn chi hrang hrang a chhuah a, dârkâr tin hian thil thar naràn lo tak tak a thlentîr bawk thìn. I chungah leh ka chungah a la thleng mawlh ang … fîmkhur chuh ang aw!
Thlâmte pawh a hil rip rep tawh a, a kiang lawkah di pâr a vul chêk chûk bawk. Kehme pàr hun intiam kan thawnthuah nula leh tlangvâl kan nei —an hriat a lo inkhuangrual si lo! A pawi zo ta! INTIAMNA hriat chian a pawimawh fo.
Mawi hle mah se, an vul lai hun a rei lo. A tùl-zùm lai chuhin naupang kam-hlei zual chuan chewing gum atân kan hmang thìn a. Nu leh pa feh hàwte pawh an fate tân min rawn hawnsak châng a awm. Tùnlai hian la inhawnsak zui ve zèl tak màw?
A hun ngaiah rau rau pawh mual tin leh ruam tin hnaivaia mi pawh an lan dàn a la dang ta cheu va, mihring sùlhnù tharlâm hian rilrù-ngaih a tingam a. Kan chènna leilung hian hmasàwn lam a la pan zèl zawng a ni e! I humhalh ang u, mawhphurtu vekah i indah ang u. DESTROYED IN SECONDS ràpthlàk theihzia hi! Duhthâlin Mizoram hi a chhûnga chèngte azìrin kan la nihlawh zual telh telh thei.
Thing ding-tâwl mai maia lang pawh hi cheimawitu dang naubânten an làn mawitîr belhchhah ve thei tho mai! Hringnun pawh chu tho chu, inchawimawi tawn tlânga mawi thei chauh kan lo ni theuh mai!
He thing hi a riang hle thung. Thlèk chìktu a nei ngai lo va, amaha hrui zâm uai hnawk pawh hmuh tùr a awm lo. Thlèk chian erawh a chovin a dàwl thung a. A tang pahnihte khi a thla zâr pharh a ang thuak a, a nih loh vèk paw’n … a chang inzâr pharh —sava thla zâr pharh emaw i ti thla’ràwk ang e. Ka hmuh hnuhnùn ber tumin, a zar uai thla khi a lo thlìngthlàwn hman leh dèr tawh asin! Chuti maimai tho chu hringfate hi kan ni!
Pâr tin mai hian rawng chi hrang an duhthlan dàn kherin pàrfung an chawi hran lo, Siamtû remruat ang zàwk zèl a lo ni! A sen, a eng, a vâr kher lo pawh —a nawinàwk rawng lehzèlte nèn! Thliah phàk lohva pâr vulte an nihlawh za-lel … wild-flowers don’t care where they grow … an pâr vul ve hrim hrim tho. I pian leh mùrna aiin i hlènchhuah thil a pawimawh zàwk tawh ang. Mahse, hei hi hre reng rawh … pâr mawi nei thei tùr chuan a zung (roots) a pawimawh tel zèl.
Tlai khua a lo ngui ta, thlang lam kâwlkil chu tùrnipui chuan ni dang rawn inherchhuak leh tùr atân leh kan chawlh hahdam nân hun min rawn kian ve leh ta! Tùkchhuak tin hian thawnthu thàrlâm leh lamdang tak tak min thlen fo thìn. Kan damtlâng hlawm em le, mi(sual) duh tak te u?
Similar Posts:
- Tawngkam Mawi – Mizo zia
- Communication tools!!
- Khiangkawi Ipte
- Khawpui ti mawitu thingkung te.
- mi{5ual}.com – Black/Dark Theme duh tan
a tha khawp mai
April 25th, 2011 at 12:45 am
A mawiin a thlalak inhmeh dan ziain thu i rawn chhep nalh bawk hle mai!
Report this comment
April 25th, 2011 at 7:15 am
Lamlian pakhat sirtuaka thil awmte mai an ni a, kan Zoram dung leh vangah hian thil mawi leh hlu a tam a, information leh publicity lam hian rilru tak takin kan ram hi han tuam peih sela chuan, Zoram hian mite ralkhat atang pawhin a hip lehzual ngei ang.
Lalhmaa thìha inawrh hnawk tak kha ka ni e. Zan khat riakin ka rawn kal kha.
Nia, picture ka dah lian thin a, ka ti te lui ta mai. Imageshack-ah direct link a in-highlight loh vang a ni pakhat. All comments get me enthralled.
Report this comment
April 25th, 2011 at 7:20 am
@chawnghilh..i thil rawn post chu lung a ti leng hle mai.. A pic leh i thu zeh a in mil thlawt e. A dang pawh rawn ti zel teh khai…
Report this comment
April 25th, 2011 at 10:34 am
Thlalak mai nilo thu thatak zirtir nei tha bawksi i rawn pho chhuak chu ava lawmawm em. A lem leh a thu inlaichinna a tha ropui bawk nen. . . Mi(sual) ho tan hian ilo vahan hlu tak em.
Report this comment