Mizo ṭawng ziah dan hi har kan ti a, har kan tihna ber pawh ziah zawm leh zawm loh hi a ni âwm e. Chuvangin tun ṭumah chuan hemi chungchang hi han thlur ila. Pawl 10 zirlaibu (a la ni em ka hre lo) ami ka rawn chuk lawr zuai zuai a. Hei hi ngun taka chhiara vawng chu ziah zawm leh zawm lohvah an buai tawh lovang.
Thubet: Hei hi sawi hmasak a ngai. Thubet kan tih, affix hi — in, ti, tih, a, ah, awm, in, mawh, na, pui, sak, san, te, tê, thlak, tir, tu, zawng, zia tihte hi a ni a, thu dang bulah emaw, a tawp lamah emaw a bet ṭhin. Mizo ṭawngah hian thubet chi hnih kan nei a — a bul lama bet chi (prefix) leh a tawp lama bet chi (Suffix) a ni a, tun ṭumah chuan Prefix kan zir ang a, a tam zawk Suffix chu remchangah ka la rawn post dawn nia.
Prefix: Hei hi thuhmabet a ni a, thu bul lama bet chi a ni. Mizo ṭawnga prefix chu ‘in’ leh ‘ti’ te hi a ni ber a, ‘ti’ chu ‘tih’ ti-a hman chang a awm a; tin, ‘inti’ ti-a a thuaha hman chang pawh a awm. A hman dan chu hetiang hi a ni.
a) in : Prefix-a ‘in’ hmanna thute chu — inbia, inchei, induh, inen adt. tih ang chi hi a ni. Mizo ṭawngah hian ‘in’-a inṭan, prefix ni si lo, thumal pangngai kan nei lo niin a lang. Suffix aiin prefix chu a awl lehzual tihna a nih ber chu.
b) ti leh tih : Prefix-a ‘ti’ hmanna hi thumal 300 zet a awm a, a modified form ‘tih’ hmanna hi 500 zet a awm. Hetianga ‘tih’ ti-a hmanna ang chi hi ‘Modification’ an ti. Mizo ṭawngah Verb hi Subjunctive Mood-ah a rik dan emaw, a sipel emaw a lo danglam ṭhin a; chutianga a lo danglam ṭhin dan chu a ni, modification an tih chu ni.
Thumal modification form pakhat chauh nei, a sipel danglam chi-ah chuan ni hi nih a ni a, la chu lak, ri chu rik a ni a, tam tak a awm. Chutiang bawk chuan ‘ti’ pawh ‘tih’ a ni a. Hetiang hian: tibo – tihbo, tichiang – tihchian, tifel – tihfel adt.
c) inti leh intih : Prefix-a ‘in’ hmanna thu 800 lai a awm kan tih zingah khan 50 zet chu ‘in’ leh ‘ti’ ‘inti’ ti-a hman thuahna (double prefix) a ni a. Chumi zat vek chu ‘in’ leh ‘tih’ ‘intih’ ti-a hman thuahna a ni bawk. Chutianga prefix ve ve hman kawpna thu leh a modified form chu hetiang chi hi a ni: intibuangbar – intihbuangbar, intichau – intihchauh, intihria – intihhriat, intizak – intihzah adt.
Similar Posts:
- Mizo tawng zir ang. Then 1-na
- Mizo ṭawnga ziah zawm leh zawm loh tur te-II
- Mizotawng chungchâng bawk!!
- Mizo ṭawnga ziah zawm leh zawm loh tur te-III
- MLC LEHKHABU KA CHHIAR VE A
February 23rd, 2012 at 3:52 pm
prefix hi chu a harlo, suffix hi ka buai thinna… i sawifiahna khi ka sawichhang thiam miahlo ang, sawifiahna hrethiamlo mah ila, ka lo hmangdik ve reng tho in ka inhrai a…’in’ leh ‘tih’ nanana(na nana/ na na na?) hi chu..
Report this comment
February 23rd, 2012 at 3:58 pm
#51 Sawifiah a har khawp mai. Suffix phei chu sawifiah a har lehzual. Mizo ṭawnga Part of Speech ho kha hriatchian a ngai khawp mai.
Report this comment
February 23rd, 2012 at 4:21 pm
49. Sawi dan hi ka pawm lo tlat. Nachhan leh nachang a ni zawk. ‘ kal nachhan tur ka nei lo’ ti ila a dik ang. Kalna a nih chuan kal kha noun formah kan siam tihna a ni zawk a, ke hi mihringte kalna a ni.nachhan leh nachanga na hi chu noun forma siamna ni lovin prefix a ni zawk. Nachang pawh a ni tho.
Report this comment
February 23rd, 2012 at 5:03 pm
#50 & 53, thil awl-ai lutuk a ni vak lo tlat asin. Chhut deuh fe a ngai.
Report this comment
February 23rd, 2012 at 5:46 pm
#54k kei pawh ka chhut vak tawh a, har ka ti khawp mai. Mahse ka ngaihtuah dana dik a ni ber, mi ziak thenkhat ka hmuh nen…
Report this comment
February 23rd, 2012 at 6:06 pm
@vakul, i chhut dan hi thil ni thei a ni. Mahse, a nihna takah chuan NACHHAN hi a awm lo. ‘Na’ tel lo hian, entirnan, ‘ka kal chhan,’ tih hi a tawk viau zawk; mahse ‘na’ hi kan uar em avangin hman tel kan duh talh a nih chuan ka sawi ang khian hman tur a ni. NA hi prefix a ni ngai lo va, a mal din loh vek chuan suffix chauh a ni thei. Nachang tiha ‘na’ hi affix a ni lo. Khuareiah chuan (tun apangin) tawng dik a la ni thei ang chu. In pawm thei em aw. Han sawi zui zel teh u.
Report this comment
February 23rd, 2012 at 7:28 pm
Nia, i sawi dik ve thei tho. Na hi a tul lem lo, chuangtlai a ni. Nachang erawh single word a nih ka ring e. Namen, nachang, …
Report this comment
February 23rd, 2012 at 7:57 pm
Mizo tawng ziak dan dik hi in ti fo va, engtik atang khan nge kan ziah ve tran a, hetianga ziah tur ani tih hi tute lo siam nge maw ni le? Kan pi leh pu te kha chuan an ziak lo phot mai ah mahse an hmang tho kha chu a nih hmel sia………….
Report this comment
February 23rd, 2012 at 8:37 pm
He post hi vawiin chawhma lam khan comment ka tum a, phone atangin, vawi 3 vel ka submit a, a fail zel
Mizotawng har lutuk hi a ninawm ngawt mai. Ziahzawm tur leh tur loh hi a har lai ber a ni awm e. Ka buaina ziah ani. Ka theihtawp hi chuan ka uluk ve thin na a…Tuaitea, i post tha lutuk
Report this comment
February 23rd, 2012 at 8:50 pm
Ka la hrethiam vek chuang lo!!
Post tha tak ani, ka lo zir ve zel ange.
Report this comment
February 23rd, 2012 at 9:57 pm
@sheldon#59: a har na chhan chu maw, in rin dik siak a nih vang a lawm
. Chu bakah a dik zawk ni a sawi thin tu te hian saptawng kaldan hmang in an dah in an hrilhfiah tlat bawk sia lawm le 
………….Thalai(naupang zawk) te hian an rilru milpui in an tawng/ziak chho tan tawh a saptawng ang kalphung nilovin a rawn chhuah chhoh zel han beisei phawt mai teh ang 
.
Report this comment
February 23rd, 2012 at 10:16 pm
@malsta, a aia tha leh dik zawk hriat a nih hma chuan kan pawm zel lo thei lo. Kan tlin tawk a ni rih a, Sapho anga hnam upa kan nih ve hunah chuan i duhthusam kan thleng ve thei mai ang. Zawi zawia hmasawnna chi a ni a, hma kan sawn hret hret zel e.
Report this comment
February 23rd, 2012 at 10:34 pm
@Ts:
……..hmasawnna han tih chi chiah pawh ni mawn le? Dik zawk hriat si loh chuan a dik zawk e tih loh mai tur lawm, 
. Heti hian a dik/diklo zawk tih a nih hian mingo kalphung ah in hnuk lut nasa tulh2……a hausak chhohna tur in dal bawk si. 
Report this comment
February 23rd, 2012 at 10:46 pm
@malsta, hausak chhohna tur chu dâl lul lo ve. Kan tawng than chhoh zel dan milin kan grammar hi siamrem chhoh hret hret a ni zawk asin. Dik zawk hre lova kan ngawih reng chuan a hnam pum bovin kan bo reng mai dawn tihna em ni ang?
Chuvangin a hre zawk te’n dik zawk ni-a an hriat leh an tanchhan an sawi te kan dawngsawng thiam tur a ni, a dik zawk hriat kan ni si loh chuan.
Report this comment
February 23rd, 2012 at 10:47 pm
@malsta27, kalphung leh ah pawh khi ziahzawm tur an ti…LOLzz
Report this comment
February 23rd, 2012 at 10:52 pm
A hre zawk han tih tur vak an awm mawn le???? kei chuan hman tur ber hi ka hre toh vaklo, a hre zawk a te pawh an in hnial reng mai si……..pi leh pu te khan an ziak vak mang si lo. Kan bo chho mek tawh zawk reng lo maw?
. Theology pawh mi theology kan zui reng toh hi, tawng leh zel ah te chuan grammar nen, prefix,suffix kan tih chhoh tlut2 mai chuan mingo ah kan in let cho vek palh a nge………… 
.
Report this comment
February 23rd, 2012 at 11:47 pm
@malsta, pi leh pute’n an ziah loh avang chuan alawm kan tih a ngaih ni. Prefix leh suffix hi sapho tihdan kan la a lo nih pawhin, a grammar hausa zawk atanga la kan nih avangin a pawina a awm ka hre lo. An hausak zar kan zo a ni ve mai. Tih emah chuan mi kohhran din sa-ah alawm kan awm tho ni. English grammar entawnin Mizo tawng leh grammar hi a tihhausak theih a, a tihausa tawh reng bawk a. Part of Speech te hi a fing hmasa zawkte grammar hawha kan zir loh chuan kum 100 thiamna ringawt hian a phak teuh lo. Sapho Part of Speech kalphung zuiin Mizo Part of Speech kan zawng chhuak ve mai a ni a, hemi kawngah na na na chuan mahnia intodelh turin kan la thiamin kan la upa tawk lo ve. Comment tawh ang khan, kum 1000 te ziak leh chhiar han thiam phawt ila, i duhthusam chu thlen hun a la awm em em ang!
Report this comment
February 24th, 2012 at 7:58 am
An hausakna zar i zo lutuk anga i identity bo thak khopin an hnuaiah i kun palh a nge!!!!!!
kum 1000 liam hnu ah chuan i bo felfai kim toh ngot ang ka ring 
Report this comment
February 24th, 2012 at 9:01 am
kan lawm e Ku TS
Report this comment
February 24th, 2012 at 9:20 am
@malsta, tawng chungchangah chauh an hausa zar zo kan ni hleinem. Kan nitin khawsaknaah hlei hlei an zar kan zo nasa a, an thil siamchhuah leh an thiamna tel lovin kan khawsa thei tawh lo. Chumi avanga kan bona tur a awm lo. I bo a nih chuan i nghet lo tihna. I comment-ah takngial pawh an tawng tel lovin i theih loh kha, kei ngei pawh. Chuvangin tlawma lak vak tur pawh a ni lo.
Report this comment
February 24th, 2012 at 9:42 am
Hahahahaha……………..ni viau mai ti raw? Thiamna pakhat mah nei lo ang a i in ngai toh ringot poh chu an thiltih kholoh toh a nih chu a
. A chhan enge phei chu ka hre lova, hnamdang chu ka soi lova, an mahni thlah leh chhul chhuak tih theih tur American ho ngei pon American english tiin an mahni ir awm chhuak an siam daih a sin. enge i ngaih ve dan? 
Report this comment
February 24th, 2012 at 10:05 am
‘Thiamna pakhatmah nei lo ang’ a?!
English grammar hmangin kan grammar kan tihausa mai chauh alawm. A zawng a zain kan la lo va, a bak chu keimahni thiamna hmanga kan thawhchhuah ve a nia. ‘A dik zawk hriat duhin an inhnial a’ i ti leh tho bawk sia. Thiam tumin a dik zawk hriatchhuah kan duh reng a ni. American English an siam a, American English-ah ngei ngei pawh a tihausatu atan Latin tawng leh tawng dang dang an senglut ve bawk a nia. Chu’ng an tawng lakchhawn hmangin an tawng chu an tihausa mai a ni. Keimahni ngei pawhin English tawng hmangin kan tawng kan tihausa ve a ni. Hrethiam tawh em aw..? 
Report this comment
February 24th, 2012 at 10:34 am
Hahahahaha…………….A dik zawk hriat chhuah i tum a, a tha lutuk ringot, chuvang chuan hei hi a dik e i tih chian chat hma chu hetianga ziah hi a dik lo a tih theih dawn maw ni le?
. I dik tih i tehna chu kan pi leh pu te kha ni seng chuan a hriatthiam awm deuh. 
Mahse Mizo tawng dik leh diklo teh nan mingo(Briton) tawng kalhmang i hmang daih bawk sia lom le. Mizo tawng chu mizo tawng atanga teh tur ni awm tak Briton kalhmang atang ni lovin. Grammar ah pawh mingo grammar ang in i kalpui tlat a lom le.
American english chuahna chhan chu maw an mahni version an siam duh vang a nia.
Ka hrethiam thei tlat lo, tin a har poh ka ti a chhan chu Mizo tawng grammar kha tawng dang daih grammar atang hrilhfiah leh din chhoh i tum daih a tin lom le. Entirnan. Will graham-a(american) thu vuak thlak dan te, thluk te leh kalphung reng2 te kha a let tu tawngkam kalphung leh thluk dan nen khan in zawmna a nei tlem khop in ka hria.
.
A nihna tak ah chuan khami crusade kha tawng let tu tel lo khan, American tawngkam kalhmang ang bawk(american)tho khan sawifiah/let ta ang se, tuna i thil sawi fiah tum dan nen a danglamna a tlem ngawt in ka ring. Ka hriathiam loh dan a in cheng reng
Report this comment
February 24th, 2012 at 10:50 am
Dik zawk tura chu kan mithiam zawkte’n an duang a, zirlaibu-ah an telh ta reng a, kum tam tak a liam hnua kan tu leh fate’n ‘hei hi a dik zawk a ni’ an tih theih turin tunah ziakin kan dahtha ta a nih reng hi. English i sawiho pawh khuan a tirah a dik zawk an nei bik dawn em ni le? Ka comment i chhiar chiang lo emaw ni chu aw..
A ngaiah min kual luhpui leh thin a. 
Report this comment
February 24th, 2012 at 11:36 am
I point ah i ron lut leh ta chiah e
. I point ah ka awm reng zawk a lawm 
. Mithiam te i tihte khi, Mingo tihdan kalhmanga hrilhfiah tute an ni miau mai a, a buaithlak a ni ti raw? Keipoh ka thiam theih loh chhan chu hetiang vang hi a lawm. 
. A har pawh kan ti tlang a niang kan thiam theilo hlom em mai………………Mahni chhungril mizia leh kalphung nilo deuh mai a inhrilhfiah hi chuan thil a kal dik har hriathiam a har thin bawk a tin ni tiraw?, Pianthar rei pawh a har em mai hi maw Hahahahaha kan theology nilo pui khan kan in pianthar tir miau mai ah hehehehehe (tlanchhe nghal)
Report this comment
February 24th, 2012 at 11:41 am
A hun lai azir zelin a dik zawk chu a awm ngei tur a ni.
Mingo tihdan kalhmanga an hrilhfiah mai loh chuan, keimahni pual liau liauva ti tur chuan kan thiamna leh tawng hausaknain a la tlin ve lo alawm.
Report this comment
February 24th, 2012 at 12:10 pm
Hmanlai a dik kha tunah a diklo thei, chuvang chuan Mingo ngaihsan hunlai a thiltih chi hrang leh kan nu leh pa tam tak mingo ngaihsan na la reh lo ten a an thiltih khan dikloh chen a nei thei toh tlat a nia……..Chubakah Thiam vak a ngai hleinem, kan tihdan kha chu kan tihdan a ni mai a…………….I zahpui deuh a mi kan tihdan ho a chu?
(tlanchhe tak2)
Korean movie demand san na chhan em2 pakhat chu kan in mil deuh vang hi a nih mai hmel em, a script te, plot te leh acting leh tehna chi hrang2 a teh pawh a ennawm tha/sang vak mang lo pawh a lar viau tawh mai hi
Report this comment
May 6th, 2012 at 9:47 am
tunlai chu Mizo tawng a “g” leh “j” hmanna hi ka ngaihtuah thin a. “g” phei hi chu hmanna pakhatmah kanneih awm ka hre lo a. Tun thleng hian kan la kawl ve reng bawk si. A hman hun leh hmanna min hrilhfiah thei in awm hlauh lo maw.
Kan naupan ve lai kha chuan a hmanna awm kha kan zir ve ngei chuan ka hre si a.Mahse ka ngaihtuah chhuak zo tawh ngang lo. “g” leh “ng” hi hman kawp theih hun te kha a awmin ka hre ruai ruai….
Report this comment
May 6th, 2012 at 10:02 am
@Bawmrang, Double adverb, ‘gei gui’ ‘geu guau’ tih velin a la hman hram theih. ‘j’ erawh hmanna a ka hre lo, Mizo tawng ngau ngau bikah chuan.
Report this comment
May 6th, 2012 at 10:10 am
@TuaisialA ka lawm kher mai.
Report this comment
August 21st, 2012 at 6:00 am
[…] TuaiSialA thuziak awm sa pathumte: 1-na, 2-na, 3-na — hi chhiar phawt la, hei hian sawi nawn ngai lovin thil tam tak a […]
Report this comment