mi(sual).com

(misual.com article Bank tih hausak nan leh bengvar nan.. a fans te in lo awm ve takin.. A SEI CHI AW!)

Talent ropui tak te hi siamchawp leh zirchawp theih a ni lova, Siamtuin mi tlemte te hnena a pek bik a ni. Chung talent te chu hmasawn na’n a hman a tihpun leh zual a nih chuan chu talent chuan a kawl tu chu sang takah a vawrh thin. Hetiang talent ropui nei David Phelps-a chanchin hi chhiartu thenkhatte ngenna bawhzuiin i han thai lang ve dawn teh ang.

Hman deuh khan Billy Graham-a rawngbawlna a zai thin zaithiam engemawzat chuan music video simple leh hmuhnawm tak si Home Coming video chu version hrang hranga siamin an tichhuak a. Kha video kha Mizoramah pawh a larin Demand channelah te pawh dah a ni a. Heng zaithiam hrang hrang ho bakah hian Gaither Vocal Band (GVB) te video pawh a lar hle a. GVB a an zaitu pakhat Zofate beng fah em em zaithiam aw sang tak David Phelps chu mi tam zawkin heng hmun hrang hranga a zai kan hmuh thin atang hian kan hre fur awm e.

David Phelps hi October 21, 1969 khan David Norris Phelps tih hmingpu in Texas-ah Gene leh Mary Ella Phelps te inkarah a lo piang a, a pa Gene hi Banker niin Houston College-ah Finance leh Bussiness lam zirtirtu a ni a, a nu Mary Ella Phelps erawh English subject ah Professor a ni thung a, tin zaithiam tak leh music thiam tak a ni bawk. An chhungkua hi music lamah an tui hrim hrim a, a nu Piano tumin an unau chu part hran theuh a sak tir a, zai a zirtir nasa hle thin. David hian unaunu pahnih Sherri Proctor (a zai thenkhat a backing vocals pe thintu) leh Kari Lee (Millar Brass Ensemble a tawtawrawt ham tu) te a nei a. A naupanlai hian Houston bul Tomball, Texas ah an cheng thin.

Panlai: Kristian chhungkaw dik tak a seilian a nih angin leh naupan lai atanga zai ngaina tak a nih angin Biak in leh Kohhran inhmuhkhawmna hmun hrang hrangah a unau te nen an zai thin a, a solo thin bawk. Zai lama a talent that zia hi a naupan lai atangin mi te’n an hre tawh hle a, Tomball High School-a pawl 9 a zir laiin school talent show-ah ‘Bethlehem Morning’ tih hla a sa a, a sa zo chiah chu mipui zawng zawng chun standing ovation an pe hial a ni. A sikul luhna a an zirtirtu te chuan Opera lama kal a theatre-ah te leh broadway show-ah te hlawhtling taka zai thei tura inbuatsaih tur in an tur nasa hle thin.

Mahse David Phelps hian a naupan lai atangin Pathianah inhlanna mumal tak a nei tawh a, talent pe tu Pathian faka zai a Pathian hla chauh sa turin a lo in tiam tawh a, a inhlanna hrethiam lo te’n nasa takin khawvel lam hla sa turin nawr thinmahse a thutiamah chuan a ding nghet tlat thin a ni.

Kum 1988 khan Tomball High School atangin a graduate a, hemi kum vek hian Gospel Music Association (GMA) in zai a intihsiakna ropui tak a buatsaih thin Estes Park, Colorado a neih, Seminar in the Rockies-ah chuan pakhatna niin pakhatna ni thei naupang ber a ni bawk. Hemi hnu hian zailamah hma la chho zelin Baylor University atangin kum 1992 khan Music & Vocal performance ah degree a hmu a. A graduate hnu pawh hian zai lamah hma la chho zelin First Baptist Church, Hurst, Texas ah zaia rawngbawlna a nei chho zel a ni. Hetia zai lama hma nasa zawka lak chhoh a tum lai hian a thil tum leh an chhungkw thil tum a in an loh avangin a nupui Lori nen kum 1996 khan Country Music hmunpui Nashville, Tennessee-ah beiseina sang tak neiin an pem lut a.
Chutia Nashville a an pem luh hnu thlaruk lai a ral hnu pawh chuan an beisei angin thil a kal ta tlat lo. A hna a lo bansan tawh avang leh hna thar leh producer tur te a hmuh tak mai loh avang chuan an mangang hle a, pawisa an neih bawk si loh avangin an chhungkua in hmuhkhawmna Texas a an neihah kal in an chhungkua chuan Pathian hnenah thilmak thlen tir tura dilin an tawngtai ho a.

Thilmak chu Pathianin a rawn thlen tir ta. A tuk lawkah Nashville a an let leh hnu chuan David chuan Word Records executive nen an in tawng ta hlauh mai. Ani chuan David-a tan Gaither Vocal band a luhna chance a awm thu leh chu band a zawm theihna atan chuan hma a lak pui ta a. Hemi hma deuh hian GVB-a baritone(Bass aia sang hret, Tenor aia hniam si) sa thin Mark Lowry chuan David leh GVB puipa ber Bill Gaither chu a in hmelhriat tir a, Lowry hian Phelps-a zaina tape chu Bill Gaither hi a pe nghe nghe a ni. Karhnih hnuah chuan chutih laia Gospel Band lar ber leh album hralh hnem ber Gaither Vocal Band chu a zawm ta a ni.

Gaither Vocal Band a zawm hnu hian GVB hian hma an sawn phah hle a, an hla te chu an hralh tha in Music huanga chawimawina sang ber Grammy Awards tum 2 an dawng tawh a, Gospel huangchhunga award ngaihhlut ber Dove Awards pawh tum 4 lai a dawng tawh nghe nghe. Heng bakah hian an album te chuan hralh tam lam tehna ah Gold vawi 13 leh Platinum vawi 15 chuang an kai pha hial a ni.

David Phelps hi a hria apiangin a aw san zia hi kan hre tel theuh awm e. Hei hi amah ti special tu pawh a ni a, sang tak tak in rei tak tak a thluk thei a ni. Studio ani emaw, GVB a a thiante nen an zaiho anih pawhin sang tak tak a zai hi nuam a ti a, an band pawh hian an hmang tangkaiin GVB-a a part chan tenor pawh hi a sa hneh hle. Octave thum sa thei khawp in a aw range hi a sang a, hla thenkhat te chu E2, F5 te a sa in studio chhunga note a sak san ber chhinchhiah chu C#6 a ni.

Gaither Vocal Band-a a tel chhung hian David chuan ama irawm chhuak leh a duhdan ang ngei a solo album hlawhtling taka siam a chak thin hle a, chu a thiltum leh chak ber chu kum 2004 a Regie Harm leh Chris Harris te produce na hnuaia a siam high-energy pop album ‘Revelation’ album chuan tihlawhtlingin chart-ah No 7 a kai pha hial a ni. He albuma hla tam zawk hi David a phuah a ni a, ama puala phuah nilo pawh hi midangte nena an in phuah tawm a ni.

David Phelps hian Word Record hnuaiah deuh vek album a siam a, chart kai pha lo album hmasa pathum Journey to Grace (1994, Joy Joy (2000), David Phelps (2001) te erawh chu Springhill Music hnuaia a siam a ni. GVB a a tel hnu hian Word Records nen hian an thawk dun nasa hle a, heng Revelation (2004), Life is a church (2005), Legacy of Love : David Phelps Live (2006), No More Nights (2007), One Wintry Night (2007), The Voice (2008) leh O holy Night (2008) te hi Word records nen siam dunin Producer lar tak tak Phill Naish, regie Hamm, Chris Harris, Greg Bieck, Jim Chaffee. Rudy Landa leh Monroe Jones te hian an lo produce sak tawh a ni.

Heng bakah hian Gaither Vocal Band hming hian album 10 chuang an lo siam tawh a. Chubakah a aw that avang leh a zaithiam em avang hian midang album sawm chuang zetah a zai a, a duet pui a, backing vocals tein a lo pui tawh thin bawk a ni. Tin, Music Video 20 chuanga siam tawh a, a hla hming leh a zaivena zawng zawng erawh kan sawi seng awm love.

March 22, 2011 khan David Phelps hian a hla tha thlankhawm 18 dahna leh amah leh anupui fanau te Bill Gaithers-a’n a interviewna te leh stage chhung leh pawn a amah leh an chhungkaw nundan hrang hrang tarlanna ‘The Best of David Phelps’ DVD chu a tichhuak a. Hei hi company lar EMI chuan zuarchhuakin UK ah chuan Integrity Music in a hralh chhuak thung a ni.

Chhungkua: Baylor University-a Music & Vocal Performances a zirlai hian a nunah thil pawimawh tam tak a tawng a. Chung zinga pakhat chu a hnu a a nupui ni ta Lori Purtle a tawng hi a ni awm e. Lorri Purtle hi Kristian tha tak leh nu tha tak a ni a, a ni nen hian Kristian chhungkua dinin fa pawh pali lai an nei nghe nghe. Heng an fa te pali Callie, Maggie Beth, Grant leh Coby te hi David Phelps-a te band Gaither Music Video thenkhatah an lang ve nghe nghe a, an chhungkua hian hlim takin tunah Country Music khawpui an tih thin Nashville khaw dai femah an cheng mek a ni.

(Source : https://gilbertrenthlei.blogspot.com/ )

Similar Posts:

• Daduhi video album released
• Sunday Pual
• Scarlett Johansson’s first album
• Sora Family-Family Anthem
• American Music Awards (AMA) 2010

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Sunday, May 22nd, 2011 at 8:30 am and is filed under Music and lyrics. You can follow any responses to this entry through the RSS 2.0 feed. You can leave a response, or trackback from your own site.