Kan Bible hi a bul atanga a tawp thleng hian Isua hlimthla leh a chanchin sawina vek a ni a. Genesis atanga Thupuan inkara kan Bible thupui ber chu ‘Chhandamna thu’ a ni mauh mai. Isua Krista ngei khan heti hian a sawi a ni, “ Pathian Lehkha in chhiar ngun thin, a chhungah chatuana nunna awma in rin avangin: chung Lehkha chu ka chanchin hriattirtu chu a ni si a…” (Johana 5:39) tiin. Thuthlunghlui atangin Lal Isua hi entirna hmangin lo tih lan a ni thin a, tin Zawlnei tamtakin a lo kal hun tur an hrilhlawk thin bawk a ni.
Thuthlungthara Chanchintha palite hian Isua lo kal dan, a tisa put lai ni atanga min chhandam hun thlengin min hrilh a. Lehkha thawnte hian Isua chhandamtu a nih zia leh a lo kal leh dan tur min hrilh a ni. Thuthlung Hluia Isua tin zawn a nihdan chu ziak ta lo mai ila. Thui tak ziak a hlauhawm avangin Thuthlung Thar atang hian Isua miin an lo tinzawn dan hi hmun hnih chauh han thurchhuak teh ang aw…
Pu Tirhkoh Paula ngat phei hi chuan Isua hi a tinzawn hnasa hle a. A lehkhathawn zawng zawng hi han chhiar ta ila- thilsiam chungchang thu te, mihring nunphung te, dan thu te, rinna thu te, thlarau thu te, thil sual leh thil tha te leh chhandamna thute hi a ziak nasa hle a. Mahse a thu ziak zawng zawngah khan Krista Isua teh khawng ah a hmang a, a tawpah chuan Krista Isua-ah bawk a hmawr a bawk leh thin. Pu Paula hi chu Vanramah pawh Isua thihna leh thawhlehna bak a sawi duh loh hmel asin, ‘Thisen thisen’ tia kan zai dup dup lai hian Lallukhum chhah lo deuhte hnenah, Isua tuarna bawk kha kil khatah a lo hrilh leh chhen mai ka ring fiamthu mai mai thin.
Pu Tirhkoh Paula’n Atheni khuaa Areopagi-ah ‘Hriatloh Pathian tan’ tih thupui hmanga sermon turu lutuk a thlak tum pawh khan a sawi tan dan kha a dangdai khawp mai. Atheni khua kha sakhaw mi tak an ni a. An rin dante kha a sawi kual vel a ni. Tunlaia kan kohhran Upa leh Pastor te’n ngaithla ve sela, a thusawi tan tirh lai velin an hawi phawk nasa viau awm mange aw ka ti thin, kei ngei pawh hi ka bang chuang hauh lo ang. Mahse an Pathian rin dan a sawi kual vak hnu khan Isua Krista thihna leh thawhlehna chu kan chhandamna a nih zia sawi chung zelin a sermon ropui chu a titawp ta nih kha(Tirhkohte 17: 16-34). Chutuiang zelin Pu Paula hian Isua Krista lo chu thupuiah a nei meuh lo a ni.
Isua vana a lawn chhoh dawna zirtirte hnena pek a tiam Thlarau Thianghlim a lo thlen dan chanchin pawh hi a ngaihnawm ka ti thin. Thlarau Thianghlim avang khan tih danglamin an awm a, anmahni ngei pawh khan mak an ti viau a nih kha. Mahse Thlarau Thianghlim Isua lo chawimawitua leh ringtute puitu tur kha an ngaihpawimawh ber a ni lo tlat mai. Boss ber Pu Petera a lo ding chhuak a Zawlnei Joela thu ziak atangin bul a tan a, Isua thih thu te, Pa dinglama a thut thu te leh thawhlehna thute a sawi piap piap mai a nih kha (Tirhkohte 2: 14-41).
Bibleah hian Tu emaw hi a laiah hian an lo dah zel a lo ni. Kan kristian nunah hian han chhut ta ila. Kan Biak In mawi tak kan hmuh hian Isua nge kan dah pawimawh a kan Biak In mawina… Isua chawimawitu leh a hmanruate hi kan lo la thutak ber thin ang tih a hlauhawm hle. Harsatna kan tawh changin Isua hi a laiah kan dah thei thin pawh a ni mai thei, a nih leh kan hlim niin, miin min chawimawiin kan thinlung lai ber hi a chang em le aw?
Bible zirtute hi a tlangpuiin Christocentric (focussing Jesus) tarmit bun chunga Bible thu zir tura fuih an ni thin. Genesis bu a ni emaw Thupuan chungchang emaw pawh ni rawh se Isua focus tak chung zelin an zir thin. A tha ka ti thin khawp mai. Mahse a chang chuan rawngbawltu, thuhriltu leh Upa thenkhatte hian Isua hi an lo focus lo deuh thin a, kan kristian thu rinah hian kan buai leh thin a lo ni. Hemi avang hian rinna dik lo pawh a lo chhuak fo reng a ni. … Science leh Philosophy i zir hian Isua tin zawn chungin i zir em.. nge nakinah atheist i ni ve mai dawn? Gap theory kan chhiar hian Isua a laiah kan dah em? Zirtirna dik lo pek chingte nen hmaichhana kan inkawm changte hian Isua hi a laiah han dah tlat thei ila aw kan harsatna tamtak hi a kiang ngei ang le. Tu emaw hi a laiah awm mawlh rawh se.
Pathianni hman nuam mawlh mawlh u!
Similar Posts:
- Tunlai ka mutmawh hnarmawh.
- Kristian Chi 2 Te {Sunday Pual}
- Tu hminga Baptis tur nge?
- Thlarau Thianghlim (Pentecost Pual)
- Pentecost pualin
hairehai
June 5th, 2011 at 8:29 am
Chhiar tran ang
Report this comment
June 5th, 2011 at 8:39 am
Amen,
A laiah Isua, a ropui e.
Chawlhni hman nuam le.
Report this comment
June 5th, 2011 at 9:03 am
Alaiah Isua awm mawlh rawh se.
Chawlhni hman nuam vek u..
Report this comment
June 5th, 2011 at 9:15 am
Mahni a laia awmkuk kan ching thin a…Christ a lai, chung, hnuai, sir, veilam dinglam ah awm vek se….
Report this comment
June 5th, 2011 at 10:53 am
Ka hul hle mai..
Report this comment
June 5th, 2011 at 11:04 am
A tha dap dap hle mai, hetiang lam pang ziah hi han uar teh, a karah zirlai pawh a zeh tel zauh2 theih tho a nia
. Sunday sermon tha tak a ni 
Report this comment
June 5th, 2011 at 11:17 am
Isua lam hawia focus tak tak kan nih chuan kan hriat ngei ngei tur chu midang laka kan awm dan ani. Mahni hmasial takin Isua ka zui a tih theih loh. “Nangmah i in hmangaih ang thovin i vengte (meaning all other people) hmangaih rawh”, a tih kha. Tuikuk/Bru leh Chakmate (kan hmelma anni miah lo chungin) haw viau chungin Thlarau Thinghlimin ka khat, an ti thei lovang. Thenmawnte ram chuh pui chungin Isua zuitu anih theih loh.
A awmzia chu Pathian biak ringawt a tawk lova, midang tan tha nih tel kher loh chuan rinna nung a puh a har khawp. Hei hi Isua zirir pawimawh tak ani.
Report this comment
June 5th, 2011 at 11:29 am
A va tha em ve aw.. Paragraph 1-3 vel chuan Bible a sawifiah khawpin ka hria. Sermon ropui tak a ni.
Isua chawimawitu leh a hmanruate hi kan lo la thutak ber thin ang tih a hlauhawm hle..’
A pawimawh khawp mai. Mi tam tak chuan kan thil tih chhan dik tak kan hre lo. Kan inkhawm chhan dik tak kan hre lo. Pathian thu kan sawi chhan dik tak pawh kan hre chuang lo. Kohhran leh kohhran thalai pawl hruaitu kan nih chhan dik tak pawh kan hai fo thin. He’ng thil zawng zawngte hi khawvel thila inelnaah kan chhuah a, Isua a laiah a awm lo fo.
Inkhawmna hmun thenkhatah chuan Isua hi a sir kil khatah inthlahrung dékin a awm thinin ka ring hial. Biakin a ropui a, member pawh kan tam a. Inkhawm taima kan tlem a, inkhawm chhan dik tak hria chu tlem lehzual tak kan ni. Inkhawm thin tam zawk chu inkhawm ni leh inkhawm zan a nih vang chauhva inkhawm an nih ka ring thin.
Kei pawh ka thil tihna apiangah Isua a laiah a awm lo fo tih ka hre ta e!
Report this comment
June 5th, 2011 at 12:42 pm
Lal Isuan hmun sang ber chang se.
Report this comment
June 5th, 2011 at 12:46 pm
“Chhun hian chhun hnenah thu a sawi chhawng zel a, zan hian zan hnenah …” — GAP THEORY chu theory mai mai a lo ni e! Many theories though, but only one TRUTH.
Krista hian Christocentric taka i rawn ziak hi a lawmawm e.
Thuthlung Hlui kha a tha a, Thuthlung thar hi a thaw zawk thung.Luka, Paula, Sila te rawngbawl hun lai pawh khan Thuthlung Thar Bu keu tur a la awm lo. Ni tina Beroia khuaa miten Pathian Lehkhathu a lo bih thin pawh kha Thuthlung Hlui Bu (TANAKH) vek a ni.
Thuthlung Hlui khan PAI (conceive) a nei a; Thuthlung Thar hi a puanchhuah (reveal)-na a ni. Eng ber chu nge REVEALED-a awm chu? The MESSIAH is a true answer.
Luka 24:27 Tin, Mosia leh zawlneite zawng zawng lehkhaah a tan a, Pathian Lehkha zawng zawnga ama chanchin ziak apiang chu anmahni a hrilhfiah zel a.
Luka 24:44 Tin, an hnenah, “Heng hi ka thu kha a ni, Mosia Dan (Torah)-ah te, Zawlnei Lehkhabu (N’vi’m)-ahte, Fakna Hla Bu (K’tuvim)-ahte ka chanchin ziak apiang a lo thlen turzia in hnena ka awm laia ka hrilh thin che u kha,” a ti a. 24:45 Tichuan Pathian Lehkha Thu hriat nan an thinlung a tifing ta a;
Report this comment
June 5th, 2011 at 12:59 pm
ka ‘like’ e
Report this comment
June 5th, 2011 at 1:05 pm
tha hle mai kris
Report this comment
June 5th, 2011 at 1:06 pm
Tihdikna : Thuthlung Hlui kha a tha a, Thuthlung thar hi a tha zawk thung. Luka, Paula, Sila te rawngbawl hun lai pawh khan Thuthlung Thar Bu keu tur a la awm lo. Ni tina Beroia khuaa miten Pathian Lehkhathu a lo bih thin pawh kha Thuthlung Hlui Bu (TANAKH) vek a ni.
Thuthlung Hlui leh a Thar te hi hriat chian bawk tur. Thuthlung reng reng chu a lo berah TEAM HNIH emaw inkara thlun a ni ziah a. Van leh lei inkara thlun a ni. Thuthlunna hmasa kha ran thisena nemngheh a ni a; a Thar hi Messia thisena nemngheh a ni thung. Team hnih inkarah Palai rinawm a awm a ngai bawk. Thuthlung Hlui-a palaiten an thisen an hmang lo, a Thar-a palai hian Ama thisen a hmang thung.
Thuthlung hmasaah chuan beramte an Pu tan an thi a; a Tharah chuan beramte tan an Pu a thiin a tholeh ta thung.
Isaac Watts-a hla hi a tha hle, “Juda maicham chungah …” sak zawm mai chi!
Thuthlung Hlui hi a bu chhah zawk emaw, a Thar hi a pan zawk emaw i lo ti rawk ang e.
Report this comment
June 5th, 2011 at 1:46 pm
Comment leh chhiartu zawng zawng te’n in hlawkpui ka beisei. Sony, TS leh Pu Chawnghilha te’n thlirna zau zawkin in lo tuihnih a, a lawmawm leh zual e.
Critical approach taka han ngaihtuah leh ziak hi ka ti ve vak lem lo a, practical theology lam hi ka awn viau. Mahse a pawimawh vek tho mai.
Report this comment
June 5th, 2011 at 1:54 pm
Ka chemkal lohna lam a ni, mahse Krista & mr.Duhlova te hi helamah hian an chemkal fu mai. Good post.
Report this comment
June 5th, 2011 at 7:30 pm
Pathian nia chhuak awm tak a ni e…. Mizo te hi chuan Pathian thu hi chu kan hria mawle… comment ho atang hian!!!
Report this comment
June 5th, 2011 at 7:41 pm
Krista chu i hming ipu zo e. Hman atang tawhin Pathian thu lam postah chuan Chawnghilh’s commentries te ka hmaih ngai lo, ka ei thei hle. Thawk khat lai khan Juda unaute ati pawng hman tep a, tun tuma a comments phei chu 101% in ka like e.
Report this comment
June 5th, 2011 at 8:59 pm
A tha hle mai. Keimahni chapona te, midang te, thildang tam tak te hi Isua Krista aia kan dah lal leh dah chungnun zawk fo avangin buaina te, inremlohna te, innghirnghona te kohhranah leh mimal nunah kan tawk fo thin a nih hi.
Report this comment
June 6th, 2011 at 10:36 am
“Lallukhum chhah lo deuhte hnenah” he thu hi kan hre fo mai, a dik pawh a dik mai thei, Lallukhum kan dawn tur hi a in ang diak diak lo tihna a mi aw?
Report this comment
June 6th, 2011 at 3:21 pm
Atirin Thu a awm, Thu chu Pathian hnenah a awm, Thu chu Pathian a ni…… Tin, Thu chu tisaah a lo chang a, kan zingah a awm ta a, (Pa fa mal neih ropui angin a ropuizia kan hmu,) khawngaih leh thutakin a khat.
A tir atangin kan Bible thupui ber hi ISUA KRISTA a ni. Chutiang bawkin kan nuna kan thupui ber hi ISUA KRISTA ni vese ava tha dawn em.
Report this comment
June 7th, 2011 at 12:16 am
krista chu va bei kristacentric ve. Mahni i in dah lian lutuk..
(:fiamthu:)
Tak tak a, i thuziah ka chhiar vawi 1 na, a tha khawp mai. God centred tur kha self centred kan lo nih chiah kha alawm, mihring hi mahni in pathian(self worship) kan lo nih takna chu,Pathian in a huat em em chu.
Report this comment
June 13th, 2011 at 1:35 am
Gud! Chhandamna hi kan lo phuah chawp ve a thiang lo,bible a chiang khwp my.Mimawl ber tan pwh,,
Report this comment