mi(sual).com

Pianna : Khawvel eng hmu turin November (Ber thla a piang hi an tha duh bik ??) kum 19?? khan Aizawlah fa hming koh ni turin ka lo piang ve a, ka vua leh vangte chuan ka hmingsak pawh an inchuh ve nasa a ni awm e (an sawi danin) Nu leh pa te lam atanga tu hmuh hmasa ber ka nih bawk avangin min duat in keh thei dawm tak meuh meuh hian min dawm a, heng avangte hian a ni angem le ?

Motor lem khalh zirna Sikul : Lung delh loh thing delh loh chu Sikul kai rual ka ni ve ta tep mai, ka hriat theih phak tawk a hla ka chhui kir hian  ka Sikul (?)  kaina hmasa ber Lunglei Rashi veng ngat ah chuan lehkha kan zir ngai ka hre lo, motor lem bak kan khalh ngai ka hre tlat lova chuvang chuan a ni mahna Motor lem khalh zirna Sikul tunhnu hian ka tih tak.

Thil pakhat ka la hriatchian em em thung chu, Motor kawngpuiah kan infiam laih laih a chutih lai tak chuan Jeep lo tlan avang chuan kawngsirah mahni sahimna zawng in kan til ar ar a, kei chu ka thiante awmlohna lam kawngsirah, zirtirtute bul lamah ka lo insaseng chu niin, ka thiante hnen lama awm tura ka tlan leh chu kawngpui ah chuan ka tlu ta thlawrh mai, Jeep break mumal hman lo chuan pilh hrup in mi chil a, ka vannei ka na vak lo a niang mahse ka va tap nasa em ? Kan aia pawl sangte khan min paw haw a in thlen dawn hnaih phei kha chuan ka tap uar sauh a ni kha. Hengte avang hi a ni angem le ?

Mizo Sikula-ah : Tichuan kum a lo kal zel-a Kum 4/5 vel ka nih chuan Mizo Sikulah ‘A’ pawl (a ni ta ang, ka hre ta mai lo) ka han inziak lut ve ta ngei mai a, sikul kai nilen nei ngai reng reng lovin zirtirtu chhuah lawk  hlan te hian tukverh atangin tlanbo turin kan lo chhuak leh hman thin, tlanbo e ti lo chuan in ah kan haw nghal ziah, a chang chuan ka thianpa pa khan kan Mawlliana te pahnih an lo haw leh ta, zuk kal leh ru a lo ti thin a, tha te hian kan kal ve mai thin .

Pawl 7 kan zir kum,  kum tawp Exam hnai tawh hnathawh ni a zirtirtute thahnem ngaiin lehkha zirpui min tum a hnathawh kan thlan tlat avanga kan zirtirtupa thinrim in Mau pum 12 feet 12 a sei pu tura min tih tum a, thianten mau pan tha lai an sah a kei in a bul chhah lam ka lo lak bik avanga in ka put thlen zawh tak loh te kha aw…, a hun lai chuan tap teuh mah ila khuarei an chang zo ta. Hengte avang hi a ni angem le ?

Sap Sikulah : Ka tlanbo reng thin kum chu a lo ral ve ta, a kum leh ah chuan Sap Sikul ah KG I zirtur in min han ziak lut ta, kan sikul ni hmasa ber-a midang nu leh pa te ngena Sikul a awm duh lova an tah a bang awng atanga thei leh thei lova an bih tawk tawk lai khan kei chu tap ve miah lovin ka thu fel kar kha a ni si a, khang hun thlirkir chuan engemaw tal thiam tur leh enkawngah emaw tal a fing tur ni chuan ka inhria asin mawle !!

Hunte a liam zel a, pa te hnathawhna an sawnna hmun apiangah zirna chu chhunzawm ve zelin,midangte aia thiam bik ni mah suh ila pawl sawn thei tawkte chuan ka inhlangkai ve zel a tunhun hi ka lo thleng ta a ni. Heng te avang hi a ni angem le ?

Ka fate tan hetiang hi ka duh lo : Mi saptawngin an inbia a, thu an ziak a, Mizo tawng leh Hindi an ti, thu an ziakin lem an chang, kei Mizo Sikul, Sap Sikul leh Vai Camp (CRP) bula seilian hian eng ka ti nge a engmah hi kan thiam miah loh chu le??

Thu han ziak ila zawm tur leh tur lo ka hre hrang lova, a Grammar zawng atanga teh lah chuan Past Tense tur kan Future a, Future Tense tur lah kan Present leh hu si, ka bei a va dawng em, engpawh nise kei hi chu ka LINGLET laklawh tawh ka fate chu hetiang ni lo tur hian Kawla nichhuak chhiar in a sur a sa pawh thlu lovin bekbawr leisi tai tat in hna ka thawk ang a,engemaw tal chu an thiam ngei tur a ni, kei hi thei ve, thiam ve, fing ve, chak ve emaw ka lo intih lai hian “ENGMAH KA LO THIAM TAK TAK HLEINEM” tih hi ka in hriatchhuah tak zia thu holam tak hi misual ho in in duh duh a in lo pawngsual turin ka han Share ve che u a ni e.

Similar Posts:

• Zirna sikul hi
• Ramhlun Primary Sikul-II (Pu Kaia sikul)
• ANGEM!
• Zirlai te tan thil hriat tur pawimawh zual te
• HSLC Exam tih tawp ?

Recent Posts:

• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN

This entry was posted on Friday, June 17th, 2011 at 6:30 am and is filed under HAHAHA. You can follow any responses to this entry through the RSS 2.0 feed. You can leave a response, or trackback from your own site.