-Ex-Sgt. V.Thanzauva, Royal Indian Air Force. (Ex-VCP Hmuifang)
[Saitawka’n min requestna a rei tawh bawk a, hei ka rawn bel ve leh tawp e………..]
Kum 1966, March ni 1 atanga MNF, Pu Laldenga[L] hruaiin Independent a puan tak avangin ram rorelna chu kal thei lovin a lo awm ta a. India Sawrkar pawhin Rambuai (Disturbed-Area)-ah a puang ta nghal bawk a.
India Sawrkar chuan Pakistan a inrawlh ngei ringin a rang thei ang berin tan a rawn la nghal a. Silchar-Aijal lamlianah thapui thawhin 25 Pounder Laipui te, Armoured Car-te leh a sipai thate a rawn thawh chho chiam a. Chunglam atangin Jet fighter nen Bara Bazar leh Khatla Bazar-te chu a kang fai vek a; Army-ho chuan Aijal an rawn luh pahin Bawngkawn atang hian Kelsih khawlai leh Hlimen thlawhma thlam te chu an han sai chhin talh a. A hmuna thil awmzia an han hriat chian hnu chuan an ralthuam bumro zualte chu an hnukkir leh ta thuai zawk a ni.
Sipai erawh an lo chhuah belh ta zel a, Bawngkawnah Brigade Headquarter an rawn bun a. Tun hma a Community Development Project Headquarter a ni thin a. Tin, Chite lui ral mual uaithla-ah te an inkhuar bawk a. Aijal khawpui chu Carfew khauh tak hnuaiah bet takin an thut chilh a, lamlian dung tin mai chu hrutin an vak darh vel ta a.
Tin, lamlian khaw remchang lai apiangah awm hmun khuarin bial insemin Mizoram pum chu min thutchilh ta a, Secutity post nghet deuhin an bun zui ta bawk a. An ration leh mamawhte thlawhnain a rawn thlaksak zel mai thin.
Tin, hemi rual hian Central lamah ruahmanna dang pawh a kal mek a. Chu chu Grouping Mizovin “Khaw khawm” kan tih mai hi a ni. Pu Bawnthanga Punte [L], OSD khan chu an ruahmanna la tlangzarh loh chu min hrilh ve a, chu chu – Malaya ram British Colony a nih laia Communist helho [Malayan National Liberation Army (MNLA)] tukdaihna atana a lo hman tawh angin ‘Hmun khata khaw tam tak dah khawm a, hung hnan tlat chu keini Mizote thunun nan pawh hman ve an lo rel a ni. An tih dan tlangpui chauh han sawi ila.
Grouping Vawi khatna (Compulsory Grouping) :- Vairengte-Aijal-Zobawk-Lunglei thlengin lamlian dungah Grouping Centre tur an ruat a. Chung Centre tura an ruat atanga km 6-a hla china khuate chu lut vek turin an ruahman a. Kum 1966 September thla atang chuan Centre turah sipai camp turte sain, a lut tur khuaa in awmzat te, mihring awm zat te chhutin in sakna bungraw tul tur te an chhek nghal a. Ei tur dahna tur Godown te an sa nghal bawk a, hetiang khua an sawikhawm te hi tih luihna anih vangin “Compulsory Grouping” an ti a.
Khua chu ngun taka hung hnanin luh leh chhuahna Gate-ah mi lut leh chhuak te reng reng sipai duty in an check vek a. Hmun dang atanga lut leh chhuak tur pawhin an hotute phalna (Pass) a ngai a. Tin, hetianga an hung khuate chu kum khat a thlawnin an chawm ang a, an khuahkhirh tlat dawn a ni.
Chuti taka an khuahkhirh centre-te chu “Protected and Progressive Village” (P.P.V) an vuah a ni. Chung centre-te chu 1.Vairengte 2. Bilkhawthlir 3.Kolasib 4. Thingdawl 5. Kawnpui 6.Lungdai 7.Sihphir 8. Durtlang 9. Zemabawk 10. Thingsulthliah 11. Tlungvel 12. Baktawng 13.Chhingchhip 14. Chhiahtlang 15.Serchhip 16. Bungtlang 17.Pangzawl 18. Hnahthial 19.Zobawk te hi an ni.
Ei leh bar leh venhim thu leh kawng engkimah Sorkarin mawh a phur vek a, kum a thar veleh 1967 Group Centre (P.P.V)-a lut vek tura thupek a ni ta bawk.
Grouping Vawi Hnihna (Voluntary Grouping) :- Kum 1968 Sept. thla chuan khawlchhut lehkha V/C president te sign tur an rawn buatsaih chu khawtin V.C.P-in sign tura thupek a ni a. Thil awmzia chiang zawka kan hriat tak hnu chuan chu plan kalhmang chu hetiang hi a lo ni a. Kan hming sign takna lehkhaah chuan “Keimahni duhthuin sipai venhimna hnuaia awm kan duh a ni” tih a ni a. Sawrkar chuan venhimna bak chu engmah mawh a la dawn lo tih kan hriat chuan duhthlan chi a ni hauh lo mai si a.
A kalhmang chu “Group-na tur Centre an ruatah a lut tur khua/veng-ten mahni inhmun tur an thlanah Bawk an khawh ang a, mahni ei leh bar chu an inzawng tho ang a, sipaiin mahni inhung hrangin an veng ang” tih a ni.
Tu khaw tan mah mahni in leh lo thiat chhia a, mi khaw daia rem leh rem lova bawk khawh chawp a va khawsak chu thlan ngaihna a awm lo reng a. Chuvangin keini Circle-I Sateek Security Post huam chhung Aijal-Thenzawl-Lunglei Road a V/C 13-te chuan inhmukhawmin remchang siamho ka rel ta a. Ka in Khatla vengah ni 4.1.1969-ah kan inhmukhawm ta a. Voluntary Groupingah chuan kan kal duh lo theuh va. Chuvangin Bawrsap Pu Palita, IAS biak leh thain kan hria a (an lo be fo tawh thin).
A ni chuan, “Nangniho chuan Voluntary Grouping in duh a, sipai in dil a, sipaiin an group dawn che u a ni mai a, Grouping chungchang ka hriat ve chu sawrkar chuan Aijal-Champhai Road leh Lunglei-Demagri kawngdung Group a tum chauh hi a ni mai,” a lo ti ta a. [ Circle I bikah hian a ziaktu leh mi thahnem ngaiin an beih avangin a hlawh tling ta lo a ni]
Grouping Vawi Thumna : Kum 1970 Oct. thlain District Council hotute chuan Thenzawl-a Agri. Farm hawng turin Commissioner for Hills thar Pu Paramsivan, IAS, Shillong-a awm chu an chah a. Thenzawl a kal chu Official tam takin an zui a. A lo kir leh lam chuan Grouping tur thu bawk chu a rawn puang phei leh ta a. Kan han hria chu kan thin a thawngin kan mangang hlawm theuh mai. Kan ram rorel khawl ber kha Congress a ni a. Village Council-ah pawh Congress an ni tlangpui a. Group tawh sa te pawh kha Centre lian zawk siamah group khawm tam leh zual an tum a. He tumna hi keini bial V/C te chuan kan pawm lo, theihtawpa tan khawhho kan rawt ta a ni.
Grouping tur ruahmannaah chuan Bawrhsap Pu A.C.Ray, IAS-in hming a sign a, 7th Dec. 1970-ah an puang chhuak a. Hetiangin :- 1. Hualngohmun Centre-a lut turte :- Muallungthu,Kelsih,Thingdawl Mel8, S.Hlimen, Khawchhete, Lungleng, Vawkzawn. 2. Sateek Centre-a lut turte :- Tachhip, Phulpui, Maubuang 3. Sialsuk Centre-a lut turte :- Thiak, Sumsuih 4. Samlukhai Centre-a lut turte :- Hmuifang, Chamring, Lungsei 5. Sairang Centre-a lut turte :- Tanhril, Sakawrtuichhun, Rangvamual, Lengpui, Rawpuichhip, Hmunpui, Luangmual 6. Reiek Centre-a lut turte :- Ailawng, W.Lungdar 7. Kanghmun Centre-a lut turte :- Khawrihnim Centre sawn tur 8. Darlung Centre-a lut turte :- Sabual 9. Lokicherra Centre-a lut turte :- Zamuang 10. Bualpui Centre-a lut turte :- Changzawl, Aiduzawl 11. New Bukpui Centre-a lut turte :- Hlimen N, Bukpui.
*A tawi zawngin hmawr bawk tawh mai ang thui kan ti thei si a…. 
Assam C.M, Pu Chaliha a thi a, a aiah Pu M.M Choudhury an ruat a, Pu A.Thanglura MLA pawh Cabinet-ah lakluh ni vein Minister i/c Soil-ah a awm ta a. Nov. 1970-ah Aijal-ah a lo zin nghe nghe a ni. Pu M.M Choudhury Aijal a lo zin khan (24th-26th Dec 1970) Grouping duh lo aiawhte’n an lo kawm a, ni 10 chhung min lo nghak rawh u, Assam Sawrkar, Sipai leh Central Sawrkar inkawpho thu anih avangin keimahin thu tawp ka siam thei lo a ti a. 1st Jan 1971 New Year zing dar 10:00-ah khan Assam C.M-in Pu A.Thanglura (minister) leh Bawrhsap thirhrui a thawn chu an lo hmu a. Chu thirhruia inziak chu hetiang hi a ni, “GROUPING IS KEPT IN ABEYENCE” ! Tichuan Grouping pawh chu thulh hlen a ni ta a ni.
Sawiho tur : Pu Thenphunga khan Grouping Centre-a awmte kha an mahni khaw lamah haw leh kha phal ta lo se, hma hi kan sawn zawk ang em? Khaw then khat te lutuk te hi Group leh ta ila kan ram hian hma a sawn zawk ang em? Tui, Electricity, Kawng, Education thleng hian khawte reuhte te te hi hmun khatah dah khawm ila tha kan ti ang em? Khawkhawm hla Pu Suakliana phuah hi kan zep tel talh teh ang.
Kan hun tawn zingah Khawkhawm a pawi ber mai,
Zoram hmuntin khawtlang puan ang a chul zo ta;
Tlangtina mi hruaikhawm nunau mipuiten,
Chhunrawl an van, riamaw iang an vai e.
Chhung kim tea aw lenrual lungduhte nen,
Zai kan vawrna Vanlal run leh khawtlang a dai;
Thuva awmhar chun tawng loten an nghak e,
Zarva lenna ram dai aw an chang zo ta.
Ka dawn sei ngam lo kan ram lungngaihna hi,
Sappui lungfing Mingo valin hnutiang min chhawn;
Kan ram riangvai boral tur tungding turin,
Rairah chhantu Chung Pathian ka ngai vawng vawng.
Kan sualna zawng zawng Lalpa, min ngaidam la,
Zion parmawi Thlarau Thianghlim, min hruai zel la;
I chatuan ram hmun mawi nuam ka thlen hma chuan,
I kut chakin min chelh la, mal min sawm rawh.
Similar Posts:
- Kan thlir dan diklo
- Civil Hospital Cheina tur Rs. vbc 6.50 a bo
- Mizoramah Reliance hmangtute tan SMS Free
- Call Centre-kan sawi ta sa sa
- NLUP atan cheng vbc 2500 Centre in rem ti
June 18th, 2011 at 8:03 pm
awi
Report this comment
June 18th, 2011 at 8:06 pm
han sawi hmasa leh phawt mai teh u khai.
Report this comment
June 18th, 2011 at 8:17 pm
Khawkhawm hian thatna a neih chu khawvel changkanna lo thang zelah khawchhunga mi cheng an tam na na chuan thil engkim a awlsam zawk thin. Zirna lamah a bikin khaw lian deuh deuh 20 velah Mizoram hi lo awm ta se Pre-School atangin College thleng nei ta vek ila. Zirtirtu tan pawh posting buai neuh neuh awm thin hi a zia awm deuh ngei ang.
Hmasawnna atan a kan mamawh kawlphetha, tui leh lamlian tha thlengin khaw tlem deuh lo ni ta ila tun ai hian chuan maintenance lamah pawh kan changtlung zawk ang em?
Mahse, thlawhhma lak nan erawh chuan ram bawh tur a ngai hla viau bawk si ang. Sawikhawm a harsat teh lul nen kan darh leh kha a pawi hi ka ti ve thin…Kei ve niah nuah hian !
Report this comment
June 18th, 2011 at 8:19 pm
Ka dawn sei ngam lo kan ram lungngaihna hi,
Sappui lungfing Mingo valin hnutiang min chhawn;
Kan ram riangvai boral tur tungding turin,
Rairah chhantu Chung Pathian ka ngai vawng vawng…
He lai chang hi ka duh thei a sin aw…
Report this comment
June 18th, 2011 at 8:35 pm
Rambuai thim zual lai hian engmah kan la hrethiam lova, a vanneih thlak ngawt mai. Tin, mahni khaw hlui lama let leh theih a han nih khan thiante an bo duak a, a khawhar thlak lutuk ¤ Mahse mahni khaw lama an let leh hi a tha ka ti. Thlawhhma lak thuah leh Mizoram hmun awl a tlem phah a, a tha riau. ¤ Chuan, zing feh kal tur leh feh haw check kha Nu leh Nula hmeltha deuh tän a hreh awm lutuk an ti. An check kil khawr thei lutuk an ti. Aaa… Sawi thui lo mai ang. Thin a rim dawn tlat.
Report this comment
June 18th, 2011 at 8:40 pm
A bengvarthlak khawp mai. Mizoram buai chungchang chu Col. Lalrawnliana lehkhabu, ‘Zoramin Zalênna a sual vol 1-10’ ah a kim khawp mai.
Report this comment
June 18th, 2011 at 8:48 pm
@TS: Hmanni lawk khan MUP pawhin an chhuah a ni lawm ni?
Report this comment
June 18th, 2011 at 8:55 pm
7. Lushai-er, i lehkhabu sawi khi hmanni Shillonga kan kal khän ka chhiar chhuak thuak. MNF leh Indian Army ho kha an lo tha lo ve ve mai.(According to that book)
Report this comment
June 18th, 2011 at 9:21 pm
Beng var thlak hle mai
Report this comment
June 18th, 2011 at 9:23 pm
@lushai_er: Ka hre nang! Kum 2003 khan Col. Lalrawnliana ziak kha Vol 1-10 (10 thleng niin ka hria) ka chhiar chhuak vek a. Khaw khawm, in hâl adt a kim viauin ka hria. A bak mumal tak chhiarna ka nei leh tawh lo va, ka chhiar tawh hnu ho pawh kha ka chhinchhiah reng thei tawh lo.
Report this comment
June 18th, 2011 at 9:27 pm
Vaiho nen khan thlahtu lamah leh sakhuana lamah inlaichinna chhe te pawh nei lo kan lo ni bawk a, lainatna leh duhsakna tel map lovin min bei ni berin ka hria. Ka ngaihtuah chian hian ka thinrim tlat….
Report this comment
June 18th, 2011 at 9:30 pm
Grouping hi a tha ka ti…hma kan sawnpui ka ring khawp mai.
Tlangdung khawha khaw inhung pawh ni lo, penhleh taka awm develope tura kan sum sen tam zia hi a uiawm ka ti.
Khaw te reuh tete-ah kan inbawk hrang a, population kan tlem tho si a, khawpui lo vulh deuh pawh ni se awm tihna chen ka nei.
Report this comment
June 18th, 2011 at 9:31 pm
I khawkhawm hla rawn tarlanah chuan ngatinge a thunawn i rawn dah tel loh aw!!!
Report this comment
June 18th, 2011 at 9:46 pm
25 pounder laipui khi ka hrethiam ve lo naa kan khua an rawn kahna a nia (ka pa sawi ka hriat). A sawidan chuan khawchhung kap hmasa loin an kah hual phawta tichuan khawchhung an rawn kap leha,kan kawmthlangah pawh an rawn deng fuh,thi leh hliam erawh an awm lo a ni awm e.
Report this comment
June 18th, 2011 at 9:50 pm
MNF kha a pangai leh a dum pawl kha enge an danglamna?
Report this comment
June 18th, 2011 at 10:16 pm
MNF dumpawl chu in surrender duh ho tihna ani mai lawm ni?
Sawiho tur tih khi ka ngaihdan tlem sawi lawk. Sorkar service (school, hospital, etc) lamah remchang zawk mahse, lo neih (buh chin) hi tun thlengin mi tam takin ei leh bar an hmuhna ve chhun ani a. Khaw khawm khan an fehna a ti hla em em ani. Leh lamah chuan ran vahna pawh a hla a, ransa humhalh lamah lo tang ila chuan a thatna a awm tur.
Report this comment
June 18th, 2011 at 10:16 pm
#15 3d, eng dang a ni lo; Pu Laldenga khan Independence a sual chhung kha a rei lo lutuk a(1975 khan Indira hnenah luh lehna chance a zawng daih tawh). Kha kha intellectual group khan an hmu ve vek a. A sipai lumum lah khan an hrethiam ve si lo va…President nihna lah kha a keipui sahauh hlur bawk si a, an phel ru ta a nih kha…a chhan dang pawh a la awm…
Report this comment
June 18th, 2011 at 10:19 pm
Sony hian ka sawi duh loh a rawn sawi thleng tep. chuan Pu Lalnunmawiate ho khan an hotupa hmalak dan kha an duh lo va; lang tlanga khawsak an duh a ni ber.
Report this comment
June 18th, 2011 at 10:24 pm
Khawkhawm hi economical pawn a tha………sociological pawh in a tha tho.
Report this comment
June 18th, 2011 at 10:35 pm
A ngaihnawm chur chur hle mai.
Kan nu pu (anu pu) Sanglinga hi Thaidawr khuaa Chinzah lal ani thin. Mizoram buai khan an khua chu sipaiin an khawm zingah telin Farkawnah khawm annih tak kha. An ngaiin an sawi reng mai anih khi.
Farkawn:
https://i52.tinypic.com/5of2xc.jpg
Report this comment
June 18th, 2011 at 11:03 pm
Tun hnuah chuan Khawkhawm hi atha ani mai thei, mahsela ahunlai kha chuan Ei leh bar ah an darh khan a awlsam zawk dawn zawk tlatin ka hria an hawng leh kha ka demlo e. Achhan chu lo nei mi an ni sia lo hla tak tak bawh kha achakawm tlat lo bakah tui Electrict etc Sorkar tunlai angin an zar zo pha lo tlat kati.
Report this comment
June 18th, 2011 at 11:06 pm
3d & Sony, Ka hresualin ka ring lova, ka hresual anih tak leh ngaihdam. Laldenga khan Mizo pasaltha MNA te leh Mizoram mipui dawtin a bum nasa lutuk kha,an thluak a khel kual vak a ni ber. Ka pa u J. Manliana (Mankebaia) khan thurawn pek a tum thin a. Ani lah hotu ber lo ni bawk nen a bengkhawn duh der ta mai silo. Ka pa Manliana khan Underground movement kha a chhuahsan phah ta a ni.
Underground a chhuahsan khan Laldenga chuan, “Mizoram i awm chuan nang leh i chhungte kan kaphlum ang che u,” tiin a vau anih hmel. Shillong lamah an pem thla ta nghe nghe a ni. Khata ka pa Manliana chhuah tuma zuitu te kha kawr dumpawl ha (Phatsan tu) tiin an mahni tih hmingchhiat nan an hmang niin ka hria. Hriat pawlh ka nei maithei, ka chiang ngam zanlo riau.
Sawiho tur ami khi:
Khitah khian #20 a ka ziah lan, Thaidawr khua, kan nu pu lo lal tawhkha khua an sawn kha an kir tir leh lo reng reng. Tunah Farkawnah khian veng hrang ang deuhin “Thaidawr veng” tih chawiin an awm hlen. Duh vang renga insuan chhuak te chu nise rilru lamah hmasawnna vantlang rilruah a awm ka ring. Chuti lova mahni khua, thlahtu te lo khawsakna thin han in rauh tir tawp mai kha chu mihring tan eng vak ngaihtuah peihna a awm ka ring chiahlo. Sawi awl viau mahse mihring zia a ni tlat.
Report this comment
June 18th, 2011 at 11:24 pm
#13 @CFL : Sorry lutuk ka lo hmaih palh tih ka hre miah lova……….! hei ka rawn bel leh pawp e.
“Kan Chatuanpa Vangkhua ka ngai zual thin,
Lungduh lenrual an kimna khawpui thar nuam,
Min hmangaihtu Lalnunnem ka ngai zual thin.”
Report this comment
June 18th, 2011 at 11:26 pm
@machete: khatih lai pawh khan lo awmkhawm ta se a tha zawk in ka la ring fo a sin, an rilru natna te kha chu lo dah tha ta i la…….Grouping 1 khi han en chhin mahla, tun thleng hian a Khaw phuisui, ngialnghet deuh vek an ni a sin. Mahse a lan dan ah hi chuan grouping hnuhnung ho pahnih ah khi chuan thil an kalkhawm tha lutuk tohlo pawh a ni maithei khaw te tak2 leh tun lo haw lo se, thang vak lo an ni deuh vek in a hriat.
Report this comment
June 18th, 2011 at 11:28 pm
#14, misual : 25 pounder i hriat duh chuan hei a link aw !
https://en.wikipedia.org/wiki/O.....25_pounder
Report this comment
June 18th, 2011 at 11:30 pm
@lushai_er thanks lutuk,a thla hi ka pa ka hmuh ve dawn a ni
Report this comment
June 18th, 2011 at 11:38 pm
Kan hriat angin rambuai lai khan a then chu tihluihna-in grouping an ni a, a then chuan an duh lo hle. Hun kal toh a nia…ka sawi thui lovang. Tunah hian – ruahmanna tha tawk a awm chuan grouping ni ila tun ai hian hma kan sawn zawk ka ring
Report this comment
June 18th, 2011 at 11:39 pm
#15, 3d : A dumpawl kha Pu Lalnunmawia pawl kan tih mai te kha an ni a.
MNF-hotu lian ho kha East Pakistan a tlawm hnu khan an pu ber Pu Laldenga kha a awmna chin pawh an hre tawh lova, chutia an buai nuai nuai lai chuan Jail-ah an khung khawm a nih kha maw! Khang ho khan MNF an bansan ta vek hlawmin ka hria. A mah Pu Lalnunmawia pawh Aizawl Civil Hospital Cabin No.4-ah khan a nupui damlo a awmpui laiin “Buhbanah” an thawn liam a nih kha.
Report this comment
June 18th, 2011 at 11:45 pm
@ 23 lushai_er, I tilawmawm e. Mahse, “Min hmangaihtu Lalnunnem ka ngai zual thin.” ni lovin “Min hmangaihtu Lalnunnema tuallenna,” tih zawk a nia. He hla Pi Suakliana’n a phuah dan chanchin kimchang remchang hmasa berah ka la rawn post ange.
Report this comment
June 18th, 2011 at 11:47 pm
No. 18, 22 and 28. Ka chiang lo reng ani. In hre dik zawk ang. Sawiho tur tih zawkah khian focus ila. Ka ngaihdan chuan a thatna leh that lohna an in zar vel hmel.Mahse tih luih anih vang hrimin a run thlak ti an tam ka ring.
Report this comment
June 19th, 2011 at 12:01 am
@ 29, Pu Suakliana tih zawk. Edited.
Report this comment
June 19th, 2011 at 6:01 am
post tupa, laikhum zau, buhbana thawn.. tih vel kha thangthar ten an hrethiam lo tawp ang. Han sawichiang law law la maw le. Hun a kal ta deuh bawk a..
Report this comment
June 19th, 2011 at 7:33 am
Protected hming a pu na khan — venhim an ni vak lem chuang lo; Progressive hming a pu na khan — hmasawnna a vang hle.
Tun lai leh hman lai (1970s) hun kha khaikhin tham a ni ngawt mai.
Venhim leh hmasawntir kha Sorkar thil tum ber a ni hran lo — MNA leh MNF-te, an ni tin ei leh bar, silh leh fen tur, riahbuk thlengin — mipui zar an zo theih lohna tura ruahman a ni daih.
Thlamte pawh hal a ni chum chum bawk. Underground tana shelter tur an tihchhiatna hmanrua a ni e.
A fiah theih dan ang tur berin, tunlai anga zalen hi a ni lo thlawt!
Report this comment
June 19th, 2011 at 5:24 pm
Khaw khawm boruak leh a hrehawmzia hre pha tawkin naupang thingnawi fawm rual an tih ang vel kha ka ni ve a, a hun lai kha chuan a hrehawm mai mai a sin! Mi tinin Identity Card, kawm sen kha kan ak far mai a, khua kha mau sah zum ngatin “Sakuh Dai” an tih mai khan an hung chhuak vek a, Gate-ah sipaiin kan chhuak lam leh haw lam min lo check leh vek a…Curfew karah thlawhma pangngai nei thei awm hek suh! Ni tin maia mitthi dar ri inzawn zut mai thin te, tam nasat lutuk avanga mi feh chaw fun lo ruksak tawk lah bo lo!
Tun hun atanga thlir leta ‘khaw khawm kha a tha’ han tih ngawt hi a hun lai kha chuan a thatna hriat a har khawp nia!
Report this comment
June 20th, 2011 at 12:58 am
Saitawka hi the-hmeh ang hmiah mai, min request te te a, a comment leh mang si lo. Nge Lunglei lam hian power supply an nei lo leh tawh em ni ?
Khawkhawm kha a hunlai khan a tha tihna lam ni lovin, khua an khawm ta rau rau kha kir leh phal kha phal ta lo se…..ti a hmeichhe thu dawn ang deuh a ni e! Tin, buai vang nilo hian khua hi khawm tha leh dawn ila, kan ram tan hian a tha zawk ang em? Kei chu a that zawk rinna lian deuh mai ka la nei tlat! A theih leh theih loh lam chu thudang lo ni se.
Report this comment