mi(sual).com

ZO RIMAWI 1900 – 1975 – Laltlanthanga Pachuau , Upper Republic, Aizawl.

Mizo te hi zai ngaina hnam, inpawlkhawmna hrang hrangah te kan lunglen leh khawharah pawh zai hmanga inhnem a, inkawm hlim thin kan ni a. Kum 1900 vel atang khan Kristian ah kan awm tan a, Zosap Missionary te khan kan Mizo hnam zai kha paihin anmahni hla thluk (Western tone) in zo tawngah Pathian fakna thu, rem leh remlo in an vawm bei a, heta Mizo zai hrang hrang kan neih te hi Lalvunga zai, Lerha zai, Thanglunghnemi zai te leh zai dang tam tak kan neih te hi a awmzia takah chuan an hla thluk a kha a ni ber a, entirnan Salu lawm na ah pa lungleng a lo ding chhuak a, “Awle, tunah Darlenglehi zaiin i han zai teh ang u”, a han ti a, a hla thu kha chu a lunglen zawng hla thu a thawh dan azirin a chham chawp zel mai thin a ni.

Chung Missionary-in a hla min siamsak te chu Mizotawng nena ing euh tak taka remkhawm an ni a, mahse, ringtu hmasa te kha chuan an ngaisang em em thin a. Tlangval lungleng zual deuh te chuan chung sap hla thluk hmang chuan lengzem hla thu lungkuai tak takin Mizotawng thluk nena inrem takin an lo siam a, chu chuan thalai tam tak te lung a kuai em em a, rinna kawngah pawh bahlahna eng emaw chen a siam phah hial a ni, chu chu ‘Kaihlek hla’ an ti.

Kum 1920 atang khan Pu Patea, Damhauha, etc. te ho lo zuang chhuakin chung sap hla thluk kalhmang (western music scale) zulzui chuan Mizo irawm chhuak fakna hla leh khawtlang lunglen leh khawhar hla tha tak tak a lo piang ta zel a, chung hla te chuan Mizo nunah ril takin zung a kaih tlat a, kan Kristianna ah pawh nasa takin hma a sawn a ni.

Tichuan hun a lo inher zel a, Thingrem zai thei (Ceramophone) te lo chhuakin chung atanga Violin leh Hawaiin Guitar ri te thluk mawi tak tak lo chhuak chuan Mizo thalai rimawia tuihal tak tak te chu kaiharhin chung hla thluk zulzui chuan hla an lo siam tan ve ta a, kan hriat theih hmasa chu Pu Dura Chawngthu-in 1926-a a phuah ‘|habungdawni’ (Tleitirah tleitiri) tih hi a ni awm e. He hla Timing/Rhythm/Beat & Bar a hla thluk inlaklawn dan te hi a fuh em em a, chhim lam mi bawk Lalzoa lo lang lehin hla tha tak tak a bu a siam tham zet a rawn phuah a, Lalzoa hla te hian Zoram dung leh vang a hrut chhuak takmeuh meuh a ni.

Tin, Pu Vankhama, Calcutta-a lehkha a zir laiin rimawi lamah a lo ruatawt ta a, Violin a rawn lachhuak a, Thingrem zai thei atanga inzir thiamin ‘Rimawi tum zaipawl’ te hial an lo din ta a. 1927 te kha chuan Boys M.E. School-a thalai punkhawmna ah hla mawi tak tak an lo rem tawh a ni. Chung hun laia member te chu Pu Vankhama, Ronald Roy Diangdoh (Ronala), Pu Nghaka, Pu Vanbuka leh Pu Jona te an ni. Violin pathum velin hla an sa a, tingtang pu leh Double Ban (Percel bawma a ngul neia hrui thlun) tichuan musical instrument te an thiam belh zel a, Hawaiian Guitar te hi-hat (vuak rik) te snare drum te an telh chho ta zel a.

Kum 1930 ah chuan rithei ngainatna a lo pung zel a, Mizo Mistiri te chuan India ram tual chhuak ang khawpa hnum in Hawaiin Guitar te, Violin te an lo siam ve ta zung zung a.Kum 1937 lam atanga Indopui II-na hun lai vel khan tingtang zaipawl (Orchestra) chu Aizawl leh Durtlangah an uar hle a, chung lai chuan zaimi (singer) an tel ngai lo. Durtlang hi rimawi hmanraw siam lamah an thawh hlawk hle a, chung hun laia rimawi tum mi Durtlanga mi te chu Pu Denga, Pu Lalchungnunga, Pu Thanga, Pu Hmingliana te ho an ni.

Dawrpui Vengah chuan Pu Vankhama, Pu Vanbuka, Pu Zochhuma, Pu Rualkhuma, Pu Thangridema. Mission Veng ah Pu Lawmthanga, Pu V.L.Hruaia, Pu V.L.Ngena, Pu Lunghnema, Pu R.Zuala, Pu L.Rongenga, Pu Lalsawia. Kulikawn ah Pu Lalzuithanga, Pu Rotluanga, Pu Pachhunga, Pu Chana, tin Thakthing ah chuan Pu Hrangaia, Pu Lalrosiama, Pu Thansanga. Hetih hun lai hi chuan Spanish Guitar, Mandolin, Ukulele te an rimawi atan an hmang a, violin hi chu a hlasatu, a kipui ber anih avangin mi 4 – 6 velin an tum thin.

Heng hun lai hian tingtang zaipawl te chu an inel nasa in hla zir te pawh an taima a, an hunlai na na na hi chuan tu dang, ram dang an ngai bik lo. Mizo zinga rimawia thleng sang hmasa ber leh rimawi eizawn nana hmang hmasa chu Upa CH.Pasena leh Chawntuahi te fapa pathumna Pahlira 1st Dec.1922 a lo piang, a hnua P.S.Chawngthu ti a kan hriat lar tak kha a ni.

Kum 1947 kum khan Calcutta zai leh lamna hmunah Cabaret & Dance Orchestra (Music play) a an Manager nena inhmelhriat tharin lam leh rimawia a tui ve thu te an inhrilh hriat hnu chuan chu pawl ah chuan a thiam dan te an han chhin a, chu Mizo tlangval chhuanawm tak chu lam leh rimawi tum lama a chungnun zia an han hriat meuh chuan i he lovin an pawl zawm tur chuan an sawm ta nghal a. Ball Room Dance, Cha cha, Waltz leh Sap lam hrang hrang te hmanga a han chheu pual zet chu tunlai hun ang ni se a C.D., pendrive te a lo thlir a chakawm takzet a ni.

Tin, chu Orchestra ah chuan an tingtang pu ber a ni bawk a, India ram Club hrang hrang bakah Karachi, Teheran, Beirut, Naples, Manila leh Singapore velah an chetla ber a, he pawl a zawm chhung hi 1947 – 55 kum 10 dawn a ni a. Tin, amah hi thu leh hla ah a sang em em a, a hlaphuah \ha tak tak te chuan Bead/Bar leh Rhythm beat dik tak an keng tel vek a, Mizo hla in nasa takin bung thar a keu a ni.

Kan thu hma ah khan lo lut leh ila, chung tingtang zaipawl te chu Indopui II-na a lo reh tak khan thlahthlam a lo ni ve ta mai a, a chhan chu khang kan rual u te rimawi hmanrua te kha a tum a harin hla pakhat thiam tur khan hun leh tha a ngai tam em em a, tunlai thalai te chuan Mandalin, Ukulele, Banjo, Violin te chu kan ralkhat hriat ta mai mai anih hi.

Tin, Mizo lengzem hla lo piang chho han rem nan khan awlsam taka zai remna ‘tingtang’ kan tih (Accoustic plectrump Guitar) kha a lo thain a awlsam a, reilote ah tual chhuak tha ve tak tak Se dar tia tia kha khawtin leh veng tinah a lo awm ta a, mipa fa chuan ‘D’ key tal kha chu thiam turah kan ngai vek a, tin tingtang nawhrik (Hawaiian Guitar) kha a tui fal leh a thiam te khan lunglen kurpui nan an lo hmang ve bawk a. Hetianga tingtang nawhrik hi Pu Lawma (Sikul Sen hotu thin) Sikulpuikawna (Lawma Enfield) an tih chhan hian Tlangnuam nula hmeltha lemthluk nan Indopui II-na hma khan he tingtang nawh rik hi a lo hmang tawh a.

P.S.Chawngthu Mission Veng leh Pu Ngila, Bazar Bungkawn, Pu Lalthianghlima Venghnuai te hi Hawaiian Guitar lo ching hmasa te an ni a, tin tun thlenga He Guitar nawhrik a kan la hriat lar Pu Dengrikhuma, Tlangnuam hian kum 1953 a Pu Ngila hnen atanga a thiam a ni. Pu Dengrikhuma hi chuan Hawaiian Guitar-in Thawnthu te pawh a sawitir thei a ni.

Khatia tingtang kan uar tak viau khan tlangval leh nula lungleng khan hla an phuah ta zung zung a, chung an hla phuah te chu zaithiam ten an sa a, Malzai thiam ten Zoram ah hun an rawn chang ve ta a, chu hun chu 1960 atanga kum 1980 kha a hunbi angah lo dah ta ila. All India Radio Shillong leh All India Radio Aizawl a zaithiam zai ngaithla tur khan Radio nei Inah khan patling nutling chen khan an thu khat hmur thin anih kha. Khang hunlaia hla chhuak kha Shillong-a Mizo zirlai awm ho Lalsangzuali Sailo, Zira Hnamte, Zirsangzela, Vanhlupuii, Ramhluna Hnamte, Lalnunmawia (Valtea) te leh midang te khan hla changkang leh rimawi nalh tak taka rem kha an rawn vawrh chho thin kha chu a ram pum nghin hian a nghing a ni ber a.

Zoram lam atangin Siampuii Sailo, Thantluangi, Laikunga, Ngurliana Sailo, Lalhmingliana te leh midang tam tak te khan khang laia Zoram buai chhumdumin a zin hnan te hlimna awmchhun ti ila kan tisual awm lo e. Mahse kh^ng hunlaia hla te khan Sapin Beat/Bar dik an tih kha an palzut hneh hle a, hun hmasa a Orchestra (tingtang zaipawl) ho in sap hla an rem hunlai leh Hawaiian rimawi thluk a hla phuah te kha chu an entawn a tha bawk a, sapho tehna ah chuan a in san hleih viau ta ve ang. Tin, kan sawi hmaih hauh loh tur chu Zorama electric guitar rawn chhuak hmasa leh perh thiam hmasa chu R.Sangzuala, Khatla venga awm a ni a, thalai zawng zawngin an hria emaw tih tur a ni a, a tingtang solo ngaithla hian thalai tam tak an kalkhawm thin a ni.

Zo rimawi hmasawnna a kan sawi hmaih miah loh tur chu 1st March, 1953 a Dhaka a piang, chu mi hnu a Sikkim lama insuan chho leha Kalimpong Hostel-a kum 1962-64 a a awm laia sap naupang ho nena an din Rock Band ‘The Stranger’ a an zaitu leh a khaipa ber Joseph Zokunga Saza hi a ni. Function hrang hrangah English hla a lo huk pui dup dup tawh a.

Aizawl ah 1965 ah lo lut lehin Theatre Hall ah Italian hla leh Elvis-a hla te-in Aizawl thalai te a rawn awi hlim zuai a 1967 ah zirna lam chhunzawm turin Shillong ah a chhuk leh a, hemi kum hian Mizo band hlawhtling leh ramdang leh hnamdang ten an tluk phak loh hial band ‘The Agent’ chu Pu Rosangliana (P&S) ho in Shillongah hian an din a. Group member te chu –

Joseph Zokunga – Bass Guiter Vocal
Rammawia Vanchhawng – Lead
Thanliana (Me-a) – Rhythm Vocal
James Kaia – Drums
Guess Singer – Vanhlupuii

Hetih hunlai hian vawikhat zaiah Rs.1500/- an hlawh thin a, Assam Thingpuihuan ah Thingpuihuan Sap hovin an ruai nasa ber a. Shillong Junction hrang hrang ah an zai reng bawk a. Khatih hunlai na na na kha chuan Shillong khawpui ah chuan Zofate an hawi champ thin hle a ni awm e. India ram hi English ho Cliff Richard te Queen Singer Fredy Mercurry te pawn an pan lai hun an lo hman tawhna a ni a. Tin, The Beatles Drummer Ringo a’n a thlak tak Pete Best kha Assam Thingpuihuan ah hna thawkin a rawn kal ve a.

The Agent zai chu a en in thiam a ti ve hle mai a. A Guitar Hofner chu inngaihhruina ni pahfawmin Rs.1500/- in a leitir a. Full Instrument kim nena 1968 a The Agent hoin Aizawla Show an rawn neih pawh khan an rawn keng a, mipuiin an hlut hle a ni. Heta The Agent Aizawl a show an nei hi Zoramin Full Instrument a hmuh vawikhatna a ni. Khanga an Hofner Guitar te kha la roh thiam ni sela tun hunah chuan dinchhuahpui lawih na khawpin a lilam theih ngei ang

…… to be continued……

Similar Posts:

• Ting tang (Guitar)
• Peace Concert, Ka Perhkhuang zaitin thiam…
• Sap hla thluk lak hi!
• JAZZ UP AIZAWL CONCERT
• Clapton is God?

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Wednesday, June 29th, 2011 at 9:00 am and is filed under Information, Music and lyrics. You can follow any responses to this entry through the RSS 2.0 feed. You can leave a response, or trackback from your own site.