mi(sual).com

-Soma Renthlei

Ka thatlaipui khawvel changkanna tukverh a rawn dak chhuak mek, mahni indahsanna leh midang ngaihsan bik lohna khawvel a rawn zuang lut ve te u, hei hi ka chah duh che u a ni. I thil chin hi bansan reng reng suh. He khawvel hian nang aia ngaihpawimawh tur leh ngaihsan tur a nei chuang hauh lo. Engkim hi i ta a ni thei a, he khawvelin i chung a roreltu ni a an hriatte hi i ngaisang bik lo a nih chuan dem awm i ni lo. Hmasawn tum ngam mi huaisen i ni. A dik tak chuan i nih theih loh he khawvel hian a chhawp chhuak lo a sin.

Mahni aia midang ngaisang zawk tlat khawp a rilru hniam ni lo, mahni indah sang a Its My Life ti ngam thalai huaisente u hei hi theihnghilh suh u, midangte ngaipawimawhna neih hi mahni zahawmna leh midangten min ngaihpawimawhna hmanraw tha ber a ni tih hi. Hmasawn tur leh hmasawnna nei tur a ngaihtuahna seng te u – hruaitu sawisel chauh va kan duh tawk hian eng hmasawnna nge min thlen ang le. Kan huaisen a hmasawn kan duh tak tak a nih chuan a chhungah i lut ila, kan duh khawp lohna hmunah ngei chuan keimahni hian hma ila ang u.

Nge khawlai lun laia miin min khin dawn a, “rui thusawi a lawm” an tih theih tawk tur vel a rak kual mai mai hi kan la duh tawk dawn. Kan huaisenna leh Mahni kan indahsanna hian midang hnen a thleng phak tur a ni dawn lawm ni!!!

Khawvel finna leh thiamna kawng a hmasawn mek, mahni chanvo leh zalenna hrechiang em em tute u hei hi ka ngen duh a che u, kan zalenna neih hmang a midang zalenna tih buai hi sual (Illegal) a ni tih hi hriatna kawng a hnufual kan rual u te leh naupang zawkte hi kan chet zia hian kan hriattir dawn lawm ni!!!? Rorelna dik leh tha duh, harhfim chu sawi loh rui chung pawh a thil dik lo au chhuah pui ngam generation hi chuan thu dik chanve ( Mahni zalenna chauh ) chhuang hian engmah ti ve lo ila, ram lo la awm tur ngaihawm takin kan siam thei dawn a ni.

Tharum hmang a thuneihna leh rorelna neih hi zalenna daltu leh keini ngeipawhni kan chhuan em em mimal zalenna kan neih ti chhe tu a ni. Kan right neih te hi tih bawrh ban anih loh nan tharum hi dah tha ila, Global World a khawvel hneh nan a hmanraw hman rim ber leh tha em em mai thu hmang hian hnehna chan hi kan tum ngam ve dawn lawm ni.

I hmelma chu a taksa hneh mahla a rilru i hneh loh chuan a tlawm ngai lovang, i chauh hun atan i vulh lian mai a ni. A rilru i hneh erawh chuan kumkhuain i rawng a bawl tawh ang. Uncivilised culture kal san lova i kut thachakna hmang a rorel i tum chhung chuan he khawvel hi i kutah a awm ngai lovang. Chutiang tum te chu khawvel hian an hlawhchham tih a hriatpui zel thin.

Thalai huasen, mahni dikna hum ngam, inchhuang tak a Its My life ti ngam chin Huaisenna hian kawn leh mahni veng lun lai a inhawtphur a, huaisenna lan tir aia sang deuh hi chu a thlen tur a ni dawn lawm ni!!? A rual a huaisenna lantir thin atang hian khua leh veng hian thlamuanpui khawp mi huaisen hi a hmu khat khawp nia. Zan khaw tairek a thlen hma chuan mahni tawm kuk chhuah san a mahni In lam pan ngam tlat lo huaisenna hian nu hmangaihna a hre lova, chhungkaw nih phung a hre lo a ni. chhungkua ngaisang lova engahmah chhungkua ngailotu chuan chhungkua a din hunah chung thil chu a pum bilh ngei ang.

|halai huaisenna kawng zawh mek a, huaisen tak a khawlai lun lai a zanlai thleng a rorelna chhak chhuak thin, hmelhriat loh rorel sak kawng a thuvuak thlak chak em em te, khawvel inelna huangah hian kan rorel thiamna leh huaisenna hian eng thleng nge min dah tir le!!? Midang mit mei veng hauh lova thawm ring tak chhuah a, chak tak tak a Bike khalh thin te u, I bike manah khan nangma thawhchhuah engzatnge tel ve le!!! I chhungte khan nangmah vangin thlathar an nghakhlel thin em? Fairel bel chhunkhah a ngaihchangin i hmel an mitthlaah a lang thin nge, Fairel bel a phai chang a piangin an mitthlaah nungin i inlan thin zawk!!?

Thalai huaisen, I lakah i chhung ten enge an beisei? Nangmahah an innghat nge tharum nen nu pawnfen hnuai a mi, i huaisenna leh i dikna i chhuan em em chuan a pawtchhuak thin. I huaisenna chuan i eikhawp pawh a pe zo lo che a nih chuan chapo tak a Its my life ti thei i ni dawn em ni!!? Mahni nunna khawp pawh i nei zo lo a nih chuan i nun chu nangma nun chauh ni lovin thawhkhawm vang a nung chauh i ni dawn si a. Its my life i ti duh anih chuan i hrawk hian i thawhchhuah ei hi a phu ve a ni lawm ni!!?

Thalai huaisen te u a tawp berah chuan hei hi ka sawi duh. Kan huaisenna hian nu nau ti thlamuang sela, hmelhriat loh te tan thlamuanna pe rawh se. Hlauh neite ti thlamuang sela, hlauh neilote pawh ti zalen rawh se. Hlimna thlen sela, buaina pumpelh rawh se. Aia upa zah ngam khawp a huaisenna neih hi thil har tak a ni a, chu thil chu i nei thei anih chuan nangmah mai ni lovin khawvel hian i huaisenna a tawmpui ang che nga, a ngaisang bawk ang che.

Pasaltha huaisen chu khawtlang tan muanna leh innghahna a ni thin. chutiang chuan thalaite u kan huaisenna hian keimahni chauh ni lovin midang nun pawh a humhim tur a ni dawn lawm ni. Midang dikna humhim ila tichuan kan dikna chu a lo parchhuak mai dawn zu nia.

Similar Posts:

• Mizote hi hnam huaisen kan ni
• Ram hmasawn nan zawhtë
• Mizoram hnar kaitu atan Mi Huaisen kan mamawh! Tunge ni ang?
• HUAISENNA
• Zalenna

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Saturday, July 9th, 2011 at 8:00 am and is filed under Advice. You can follow any responses to this entry through the RSS 2.0 feed. You can leave a response, or trackback from your own site.