mi(sual).com

Ka sikul bang chu chak tawk tak (Ramhuai speed) in ka tlan haw a. Kan in ka thlenga kekawr pawh phelh tha hman lo deuh thaw leh, “Ka uniform neihchhun a ni si a, a bal hlauh ang naktuka ka hak leh tur a ni si a” tih pawh ngaihtuah miah lovin, a kawngbahna (Hook) ka han phelh a.

Chutah amah a a tla thla lai chu ke veilamin ka’n rap hlip pawp mai a, chutih lai tak chuan kutin kawrkilh phelh a lo ngai bawk nen. Kawrkilh ka han phelh zo chiah chu ka kekawr pawh chhuatah a lo chingchivet nuaih tawh a, chu chu kawr phelh pahin ke dinglamin a tlakna na a tla turin ka’n pir leng leh lawp mai a.

Kawr pawh chu a ban veilam hmawra vuanin tlangbanah a ban lehlam chauhva uai tang hram hramin ka han vai chho leh pawp mai bawk a. Chutih lai chuan ka thian te pawh chu kan kawtah an lo ri nak nak tawh a.

Khum hnuaiah lut rawk rawkin, Rs 2 lai mai senga aia upa deuhte min siam sak nawhmam pawh ni lem lo, mahse ka hman ngun em avang leh ka kuah ngun em avanga hnum hlarh tawh mai ka puakrang silai (Sten-gun) tha elhkhen chu ka’n phih chhuak a. He ka silai hi a mu pawh ren a ngai miah lo, ka lei (tongue) ka tlir ran poh leh a mu a chhuak hnem a ni mai. Hmanhmawh tak main, kut veilama kekawr kawng pawt chho chungin, “Ka nu ka leng dawn a niaaaaaa” tih pawh sawi zo hman lo, “dawn a nia” tih meuh chuan ka thiante bul ka thleng der tawh a.

Ka thiante pawh chuan an ralthuam, Pistol-dawhkan ke hlui atanga siam te,Rifle-thing tuai atanga siam te, A.K.-47 chartin bung atanga siam te leh a dang dang tha lutuk tak thiau mai an rawn hum chhuak far hlawm bawk a. Anni ho pawh chuan an silai chu an hman ngun hlawm em avang chuan a khak bel hnum tliang hlarh hlawm a, a hman pawh kan hmang thiam hlawm hle reng bawk a ni. Kan kah pah a an hming kan han sawi nalh nalh tawh hi chuan Barel phena mi pawh hi an let tawp zel mai a ni.

Tichuan le(h), a tangho tur chu ‘fer’ (fair) tak main kan han ‘Ingki ingki pawngki’ (Inky Pinky Ponky) a, sawisel theih miah lovin a tang ho tur kan han in siam fel hnu chuan Thlanmual lam pan chuan Harley Davidson aia tha, kan sila theuh a khalhna atana hmangin leiah vawi 2/3 kan han per dawp dawp a.

A silencer-hnar hnuai atanga rawn ri chhuak ring deuh leh a lian deuh zawk te chu a tlan chak leh speed sang an ni mai a. Kan speed erawh a sang hlawm hle a ni ang, kekawr pawhin kan kaihza a thleng thla deuh reng a. Kut lehlama kekawr kaichho reng pahin lehlam chauhva khalhin kan indona hmun tur Thlanmual chu kan thleng ta a.

Tichuan thian in kawm ngeih em em, chawei naah pawh in nghak thlap zel khawpa inkawmngeihte leh inngainate pawh kha inkap let tawp tawp mai turin German sipai leh British sipaiah kan inseam ta a. A huai deuh ber leh a thu deuh ber kha a han au that that a, chutah German sipai ho chu Thlanmual mawnglamah an tlan liam a, keini British sipai ho chu thlanmual chhak lamah.

Tichuan thlanlung phenah tanhmun kan han rem a, kan in veh kual t azan zan mai, a thi hmasa nih hlau eng rengin fimkhur takin kan inveh a, a phe zeuh kan hmuh tawh chuan kan han inkap ta thin a. Kan kah pah a an hming kan sawi nalh nalh phei chuan thlanlung phena mi pawh nise an let tawp nghal zel mai a ni.

Ania sin, America sipai-commando rual aiin kan nep chuang bik hian kei zawng ka ring lo. Rilruah engdang reng a leng lo, aw……ava han nuam thin take m ve le. Lungkham neilo lekin hian Thlanmual War……..Thlanmual War.

Chutichuan engemaw chen chu kan han indo ta a, inkah fuh chian bal pawh a thi tha duh vaklo, vawi 2/3 kahhlum hnu pawh a la thi duh lo an han awmchinah chuan inhnialna a lo chhuak ta a.

A naupang zawk leh thi tha duh vaklo kha an hnungzangah leh mawngtamah a han ri thlawrh thlawrh mai a, chu chu Khawtlang Zai in a zui nghal a, chutah tap chungin indona hmun chu kalsan a tul ta thin a ni. Chuanin le, thlanmual war-II chu kan han tan leh ta a, kei a changtu deuh ber chu ka dawih vang pawh ni miah lovin, ka fimkhur leh thiam vang zawkin ka thi har thei khawp mai.

Enge maw chang chuan min kaphlum ve leh zauh thin bawk a. Kan han tui leh tan dawn chauhva, kan zinga pakhat sipai huaisen chu a u in chawei turin a rawn au leh ta vau vau mai a.”Pakhat zeal an kal bovin..” tih ang deuh khan a tlai tial tial a kan tlem ta telh telh a.

A tawpah meuh chuan inkap hlum tur pawh kana wm ta mang lova kan bang chu a nit a der mai a. chutih lai chuan Ni pawh a lo tla fel ve chiah chiah bawk a. Tichuan a tuk tlaia inkap chhunzawm leh tur in ‘Cease Fire’ kan puang ta a. Kan ralthuam tha elkhen nen chuan mahni in lam theuh panin kan haw ta hnak hnak hlawm a. Engdang kan ngaihtuah lo, aw…..a va han nuam thin kher em ve le……!

Similar Posts:

• An lo tunlai mi ve tawh thin
• Kha mi ni tak kha chu aw!!!
• Thlanmual
• Memorial Day
• Blue jeans

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Tuesday, August 2nd, 2011 at 9:00 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.