mi(sual).com

- Rev. Dr. K. Lallawmzuala , Lecturer, ATC

Sawi hawnna

Kan thupui hian a huam zau hle a, mahni duh tawk chinah rek bung ve hmawk mai ila a ṭha ang e. ‘Tunlai khawvel’ tih hian eng nge kan huamtir ang a, a hun thuah eng chen nge kan huaptir ang tih pawh hi ngaihtuah tham tak a ni.

Kum zabi 21-na boruak leh thil thleng min nawk hnaitu deuhte hi kawhtir mai ila a ṭha ang. Tunlai khawvel boruak inlumlet chak tak kara Mizote khawthlir dan tur inkawhhmuhna lam kan hawi deuh ber dawn a ni.

Tunlai hi globalization khawvel a ni

Tunlaia ṭawngkam lar tak pakhat chu khawvel mihringte hi khaw pakhat (global village)-ah kan cheng ho tawh tih hi a ni. Football khel kan en pawhin London leh Manchester pa hovin ‘A goal’ an tih rualin Zoram kilkhawr ber aṭangte pawhin ‘A goal’ tiin tapchhakzawlah kan lo zawm ve nghal thei zel tawh mai.

Khawvel hmun hrang hranga chengte hi kan titi duh zawng te, ei tur tui tih zawng te, incheina leh kan ngaihsan zawngte a thuhmun ta deuh ṭhup ṭhup mai. Inbiak pawhnate a ṭha ta bawk a, khawvel hmun tina thil thlengte chawp leh chilhin kan hre nghal thei ve ta zel mai bawk. Globalization hian khawvel mihringte min pawt khawmin awlsamna pawh kawng tam takah a rawn thlen a ni.

Kan duh emaw, duh lo emaw globalization tui fawn chak tak hian min chim zel dawn. A lo hman ṭangkai dan tur kan zir chak a ngai a ni. Tuipui fawn khauh tak su zawnga hleuh ṭalh tum ai chuan tuifawn tha chakna hmanga thui tak thlen tum a fuh hle zawk ang.

Ram hausaa sumdawng company lianten khawvel hmun hrang hranga inzar pharh an duh a, India ramah pawh heng company (Multinational corporation) liante hi an inbun ta thliah thluah mai. A thiam leh a fel deuhte tan chuan company lianah hna sang, hlawh ṭha bawk si thawhna kawng a inhawng zau ta hle.

Lehkha kan zir pawhin thiamna bik a taka hman ṭangkai theih ngei tur zir chhuah tum a pawimawh ta viau. Computer lama thiamna te, management lama thiamna te leh a dang pawh hman tlakathiam viaute tan chuan kawng a inhawng zau tial tial.

Tin, company liante hi sumdawng an nih tlat avangin hna bik thiamna mai bakah mi biang biak thiam te, mi dangte nena thawh ho thiam te, nungchang mawi, rinawmna leh taihmakna neite tan kawng a inhawng zau zual ang. Mizo tlawmngaihna nun mawi kha thiamna nen a inkawp fuh chuan a man a to sawt hle a ni. Heng kawnga rual el tura Mizote kan thanharh a hun ta khawp mai.

Globalization hian thil ṭha chauh chu a rawn thlen bik hauh lo tih hriat erawh a ṭul. Globalization au hla (slogan) chu ‘nun dan pakhat, khawvel pakhat, suangtuahna pakhat’ (one culture, one world, one dream) tih hi a ni. Hei hian khawvel mite zai khata luang turin min nawr chak sawt khawp mai.

A ṭhat hmel viau rualin hnam lian zawkte’n hnam tenau zawkte an chimralna hmanrua a ni thei. Tu culture nge, tu khawvel nge, tu suangtuahna nge chawisan a niha, tu culture, khawvel leh suangtuahna nge rah beh a nih tih hi ngaihtuah a ṭul hle. Globalization hian ram hausaa mite culture leh ngaihhlut zawng a chawisang deuh ber a, keini Mizote leh hnam tenau zawkte nunphung leh khawsak zia hi zahpuiawmah a chhuah mek thung.

Entir nan, incheina chungchangah khawthlangho inchei dan kan ngaihsan em em rualin kan Mizo inchei dante chu kan hmusit rilru tan deuh a ang. Thalaite zingah Sap hla pakhat tal sa thiam mang lo chu an star that duh meuh tawh loh laiin kan khawhar hla sa thiam lote erawh changkanga ngai an awm tlat!

Ei turah pawh khawthlangho chaw – pizza, burger leh coke – tui ti pha chinte chu changkanga kan ngaih rualin buh leh antam tui hanga inhnawh puar ngawtte chu kan hmusit rilru tan em ni? Nun phungah pawh khawthlang mi mal nun dah sang (individualist)-ho rilru puin mi dang ngaihsak lo leh zahna nei hauh lova mahni mawi leh ṭha tih zawnga duh duha nung kan pung sawt hle.

Mizote hi huho nun dah pawimawh hnam kan ni a, khawtlang tana ṭha lo turin mi malin duh duh tih ngawt a thiang lo. Patil leh tuai an inlar nasa tulh tulh a, mipa leh mipa, hmeichhia leh hmeichhia inkawpte pawh hmuh tur an tam ta hle mai. Henghote sawisel chu mi rilru zim leh hriatna nei zau lovah kan dah lek lek ta mai. Globalization-in khawthlangho nun dan a chawisan viau lai hian a ṭha lo chu hnawl ngam a, kan Mizo nun dan mawi leh Kristian nun tha chhawm nung tura ṭan lak hi thil ṭul tak a ni.

Tunlai hi hmang ral tam theite khawvel a ni

Globalisation nena kal dun tlat chu consumerism hi a ni. Consumerism chuan thil chhuak thar leh awh zawng apiang neih tuma insen ral huau huauna hi a kawk ber awm e. Tunlai hian awh tur leh duh tur thil thar a chhuak tam ta hle mai. Khawvel ram dangte thil siam mawi leh ṭha tak tak – car, electronic hmanrua, digital leh computer thil, hmai hnawih leh rimtui etc. kan bazar-ah awlsam tea lei mai theih an ni ve ta.

Chu bakah, TV, internet leh media dang hmangtein kan in chhungah a awhawm thei ang bera pho langin min rawn zawrh ngar ngar ta mai. Hengte avang hian rilru piangsual kan tam tial tial niin a lang. Thil changkang leh chhuak thar apiang bawh huam huama neih nghal zel duh Mizote zingah pawh kan pung tual tual.

Kohhrante pawh hian kan tum ni lem lovin consumerist culture hi kan lo vawrh darh mek em? Kan biak in kan chei duh dan te, biak in chhung fashion leh sound system changkang neih kawnga kan intlansiak ta lutukte hian he lam hi a hawi ve lo maw?

Sumdawng company liante hian anmahni kan dawr zel theih nana mi phuar beh dan an thiam hle. Mobile phone ringawtah pawh hian offer chi hrang hrang a tam sawt ngawt mai. Ruih theih thil zuarhovin ruih theih thil la ti ve ngai lote chu a tir lamah chuan man lo pawhin phal takin an pe fo ṭhin an ti.

An duh ber erawh chu ching dawklak ve sela tih hi a ni. An nghei theih tawh loh hnuah dawrtu nghet an nei tih hriain man sang tak takin an leitir leh si ṭhin. Chutiang chiah chuan mobile phone companyte hian an duh ber chu mi tin hian kan mobile hi hum mai mai lovin a tam thei ang ber hmang dawklak ila, tih hi a ni.

Tunhmaa biak phak pawha kan ngaih loh kha tuk tin zan tin biak torah kan ngai nghet ta hle. “Ka balance a zo dawn, engtin nge ka top-up ang” tih chu zanriah thlak tur neih loh ai chuan kan engto mah zawk tawh a ang! Sumdawng lianten an thiam em em chu nei lo chung pawha kan pawisa bawm min hawntira, anmahni pawisa bawma min khungsak zel hi a ni.

Tunhmaa Afghan snow hmai hnawih tur neiha lawm hlum lo chauhte kha tunah chuan Avon, Oriflamme, Revlon, etc. tel lo chuan kan tlei thei ta meuh lo a nih hi!

Tunlai khawvelin a buaipui ber pakhat chu mahni thawh chhuah aia hmang ral tam zawk mihring an pung tual tual hi a ni. Khawvel sum leh paia tlakchhiat mekna (global economic crisis) pawh hi hmang ral tam si thawk peih si lo khawvelin fa a ngah lutuk tawh vang hi a ni thui hle. Mizote hian eng lam nge kan hawi ve le?

Tunlai hi inelna khawvel a ni

Globalization-in a ken tel tlat free market ideology te hi a ṭhat hmel viau a. ‘Khawvel hi bazaar pakhat a ni a, tu pawh a leitu a ni thei a, a hralhtu a ni thei bawk’ an ti. “Mi tin tan bazarah hmun a awm” an ti a ni ber mai. Mahse, a tak takah chuan ram hausate thilsiam chhuah keini ram rethei zawkte hian kan lei mek a ni.

A nei sa pek belhna leh a nei lote chhuhsakna hmanrua a ni thui hle. Awh tur leh it tur a tam tawh em avang hian nei leh nei lovin, a ṭhen phei chuan puk chawp te, ruk ruk hmangte leh mahni inzuar hialin thil chhuak thar hi lei kan duh ta. Tunlai khawvelah hianram dang mite duh zawng thil tha hralh tur kan neih ve si loh va, a leitu ngawta kan ṭan zel chuan kan hnam hian boralna lam kan zawh zel a ni tih hriat a hun ta hle.

Khawvel inpawh tawnna leh insumdawn tawnnate hi hlawkpui ve tur zawnga Mizote harh a hun tak zet. Internet hmangte hian mi ram ṭhalai tam takte chuan sumdawnna an kalpui mek a ni. Internet sumdawnna hmun e-bay leh sumdawnna website dangahte hian mi an bazar nasa em em tawh a, kan Mizo thilsiam chhuah ram dang mite pawhin an duh ve ngei tur thilte hi pho chhuah a hun ve ta hle mai. Khawvel hian bazar kan intawm tawh a, a hralhtu ni lova a leitu ngawta kan tan reng bik chuan rei kan daih lo vang.

Look east policy te hian khawi lamah nge min vawrh dawn le? Khawvel inzarzawmnain a nghawng chhuah pawimawh tak chu India sawrkarin khawchhak lam (South East Asia) ramte nen sumdawnna leh kawng hrang hranga inlaichinna ṭha nei tura hma a lakna hi a ni.

Look east policy kan tih hian khawchhak ram ṭhenkhat China, Singapore, Thailand, Burma, etc. te nena hmasawnna tura India sawrkarin inṭhian ṭhatna kawng a zawnna hi a kawk ber awm e. He India policy tihhlawhtlin nana hmun pawimawh tak luahtu chu keini India hmarchhak ram (Northeast India) hi kan ni. India sawrkar hotute ruahmanna tuna chak taka kalpui mekah hi chuan keini hmarchhak state-te hi khawchhak ram hausate nena insumdawn tawnna turah hian a kawtchhuah kan ni dawn a ni.

Sumdawnna kawtchhuah ni tur hian Mizote kawng hrang hranga kan inbuatsaih a ṭul. Sumdawnna khawvelah chuan mi rinawm leh taima, thiamna leh finna kawngah pawh mite lehkhalhtute hian hlawhtlinna an hmu ṭhin. A bik takin tunlai globalization khawvelah chuan eng kawngah pawh inelna (competition) a lian em em vek mai.

I hna thawhah I rin tlak a, mi aia i thiam bika chhawr nahawm i nih si loh chuan a ram neitu i nih avang ngawtin tu mahin rawih che an ba ngawt lo. Look east policy hi lo hlawhtling ta ngat sela chuan dan rual lovin sumdawng hausa kan ramah an lo lut ang a, state danga mite leh khawvel ram danga sumdawn thiamte nen kan tualchhungah kan intlansiak dawn a ni. Silchar Vai lehkha thiam lo te te pawh sumdawnna kawngah chuan pha thei lova kan inngai tlat reng a nih chuan kan ropui vak lo mai thei. |halai lehkha thiamte kan thiamna chhawr tak tak tura intuai hriam a hun ta hle mai.

Tuna Mizote awm dan aṭang ngawt hi chuan India look east policy hi a hlawhtling palh ang tih a hlauhawm mah zawk. Kan hnathawh dan (work culture) hi insiam ṭhat kan ngai nasa hle. Thawhrimna, rinawmna, chhelna leh thiamna tak tak neih kawngah hma kan sawn a ngai.

Sawrkar office-a zelthel taka hna kan thawk mai mai ang hi chuan din chhuah ngaihna a awm lo vang. Tunlai inelna khawvelah chuan hna thawk ṭha peih lo tan hmun a awm lo. Tuna kan ram ṭhalaite nun luah mektu ‘meng rei – tho tlai culture’ nen phei hi chuan thil kal dun thei a ni lo.

Hnathawk ni mang si lova tlaivar dawn dawna meng thei, chhun hnathawhna hun ṭha mu bo leh daih site tan chuan din chhuah a har hle ang. Ei tur duh tui, thil thar ṭha ṭha hre thei tak, thawk chhuak peih si lo Mizote zingah hmuh tur an awm ta nual mai.

Hetianga thawh chhuah nei lo nuam tawl mai kan nih chhoh zel chuan keini aia taima leh fingten kan ram ngeiah hian min la bawh bet ngei dawn. Hnam taima leh rinawm chim ral an ni ngai lo, hnam thatchhia leh dawngdahte an ral ṭhin. Hna thawk tak tak thei tura intuai hriam a ngai hmasa ber a ni.

Kan ṭhanharha, kan insiam ṭhat erawh chuan Mizote aia hlawhtling tur bik an awm lo vang. Khawchhak ram hausa tam takte pawh khi pian hmang leh hmelah chuan keimahni ang tho an ni. Khawthlang ramte pawhin China, South Korea, Singapore, Japan, etc. te hi an ngai hniam hlei thei tawh lo.

A chhan chu tunlai insumdawn tawnna khawvelah hian a hlawhtling ber ber ramte an nih chhoh mek vang a ni. Mizo, Kristian ni bawk site tan hian huphurh tur eng mah a awm lo. Kristian pawh ni lo pianhmang leh hmela keimahni ang tho khawchhak mite heti taka an hlawhtlin theih chuan, kan tan hlawhtlin theih lohna bik tur hi a awm lo. Krista leh kan ram tan tiin hmasawnna min rawn chimtu hi min vawrh kangtua hmang turin keimahni lam I inbuatsaih ang u.

Similar Posts:

• Chalkhawpui aṭanga sawmna..! (By Ka Ṭhianpa)
• Kan au zel dawn!
• Mizoram Designers’ Week
• IT lam mithiamte chhawr tangkai dan a awm em??
• Mizote leh Football

Recent Posts:

• L.Kira an tih chu (The man behind Lalzova)!
• LUNGPHUNLIAN TUMKAWNG
• A liampui ta si
• ZU HI SUAL A NI LO, A IN A TE PAWH AN SUAL HEK LO
• Like!

This entry was posted on Friday, August 12th, 2011 at 5:00 pm and is filed under Opinion. You can follow any responses to this entry through the RSS 2.0 feed. You can leave a response, or trackback from your own site.