mi(sual).com

……Chu thawm chu enge ni? Nui ri a ni, a ni, a ni chiang mai. A aw lah ka hriat chian em em, ka bula ri fo thin, ka beng bul ngeia ri thin kha a ni. En ka chak tlat! awngah ka han bih chuan ka ngaihtuahna chu a tak a ni tih ka chiang leh zual. Ka hmangaih Matlan-i ngei mai chuan tlangval a kalpui mai a ni lo.

A duh ber a kalpui a ni tih hai rual a ni lo. Kawng ualau a ni lo reng a, an inkaih danah leh an awm dante chuan an induhnate chu a nemnghet hliah hliah ni berin ka hria. An sawi chu ka hre tawh. Ka awih. Mahse, han tawn meuh chuan a dan a va dang tak em! Ka bing chuk chuk ni berin ka in hria.

Ka thil tawn chuan hun kal tawhte chu mitkhap kar lekin min chhuichhuah tir vek ni maiin ka hria. A ni, kum 3 chu a lo liam ve leh ta reng mai. Ka hmangaih Matlan-in zaipui a tawh dawn avangin ka rilru a buai em em a, ka nupui la ni lo mahse, nakin lawka ka nupui la ni mai tur a nih avang leh he zaipui hi hmachhawn lova a awm chuan a nunnain a tuar dawn lo tih a chhungte nen pawh kan hai lo. A chhungte lahin a tan sum leh pai sen tur an nei bik bawk si lo.

Chutia rilru hah leh beidawng taka ka hmangaih ber thihni nghah thlen ngawt ai chuan tiin beiseina thar beisei bo tak nisi chu min hnemtu ber niin chu beiseina thar chuan ka hmangaih nunna chu a chhan chhuak thei mial mahna tih chu ka ngaihtuahna-a lian ber chu a ni ta.

Tichuan, Pipute atanga kan rochun kan inhmun (in dinglai, ka luah lai) ngei mai chu kan khaw pa hausa Pu Hrima hnenah aman chanve awrh chauhin hmanhmawh takin ka hralh ta kha a ni a. Chu tangka hmang chuan ka hmangaih ngawih ngawih chu hmunpui lamah enkawlin a awm ve thei ta!

Neih nei tawh lo mah i la, hmangaih leh hmangaihtu ka neih avang chuan ka hlim ve em em tho a ni. Matlan-in zai atawh atanga a that deuh thlengin ka awmpui ve ta ran a. Mahse, inthiam lohna ka nei tlat, ka nupui pawh la ni lo chutia han awmpui ve reng chu a chhungte pawh ka chungah tha hle mahse, zahawm tihna ka nei ve tlat a, chu lo rengah kan hmalam hun turte ka ngaihtuahin ka hmangaih nena hlim taka kan awm dun theih nan hmalak chu ka tihmakmawh a ni tih chu ka hai bik hauh lo.

Tichuan haw zai ka rel ta a… Matlan-i ka haw san dawn zante kha aw…kha baka hlimna kha a awm chuang bik dawn em ni? ka ti hial thin. Damdawiin bathlar thim laia kutsuih riala hmangaih biahthu kan thlun nawn laite…Run hmuna len dun kan rel laite leh “Usang…ka nunna i ni, engtin nge ka thungrulh ve ang che?” tia inthlahrungtak leh ngaihnobeitaka ka tang a bei lai mawlh maite kha!

Thawh tur awm apiang thawkin ka inhlawh a, beiseina avang chuan hah pawh ka hre lo ni berin ka in hria. Mahse, vanduaina hian zawn bik a nei em ni? Ka hnathawhnaah lungin ka khup a delh a, ka khup hnuai deuhah tan a ngai tih min hrilhnia ka lungngaihzia tak kah aw! Mahse, ka duh ber nena tuar dun tur kan ni a, a ni pawh tha takin kan khua-ah a lo haw ang a, min awmpui ve ang a, ka taksa peng pakhat tho a ni si a. A thlamuan thlak tho ve.

Ramtuileilova thla 3 zet ka awm hnu chuan matlan-ite pawh an lo haw tih ka lo hre ve a, ka va han hlim tak em? Piangsual ka ni tih reng ka in hre chang tawh lo. mi zawng zawng hian min awt nite hian ka in hria. Chu chu ka hlim lai ber a ni ang tih reng ka hre lo. An lo haw na a rei tawh nen a va lo lang har em?

Amah vangin mi in hnuai-ah (ka pate_a te in hnuai) ramtuileilovin ka u fate a hman rem chang apiangte awmpuin ka awm si a…Aw le, a aw ka hria…ka van lawm tak em!…. Mahse, a mi en dan chu a va mak em! Mi tawhpui lai hmel hmuh lo beisei nak a laiin, mak min ti a ni.

Nge, mi hlau zawk? ka va han hrethiam lo. “Matlan, lo hnai teh, i tha tawh maw?’ “Aw, tha e, enge i an zawk,” “Ka tha e, mipa ka nia lawm le.” A insum thei lo, a tap ta zawih zawih a, ka va han lainat tak em! sawi tur ka ngah teh lul nen, mi tlan haw san daih mai. aaa… a awm tho e, mi lainat em a tin a ni.

Thla 6 a liam, matlan-i hmuh ni reng a awm lo. Kei lah tiang nen inchungah (ka patea-te in) chaw ei turin ka vak chho thei hram hram a ni si a. Enge a chanchin tia ka ngaihven em em lai chuan ka thian pa, engkim ka hrilh ve na, Kunga lo leng chuan ka dam chhunga ka ri hriat a zawnga hriat hrehawm ber mai chu mi hrilh ta phawng mai..”Matlan-i chuan ngaihzawng dang a nei a sin, kei pawh mi hmu ngam tawh lo, a lo va han mak tak em!

Hrilh che chu ka chak lo khawp mai, mahse, tu emaw hnen atanga i hriat tho ka ring a, ka hrilh tawp mai che a ni,” Aw hmangaihna, damlai par tia an tlan thin chu hei hi maw lo ni…Hmanngaihna avangin ka neih zawng zawng ka chan a, ka hmangaih nena hlim taka kan awm ve nan tiin ka theih ang ang ka thawk a, chu ka hmangaih avang vek chuan ramtuileilovin ka awm leh a…a tawpah ka hmangaih chu ka chan ta tho si a maw!

“Matlan…natna avang khan lo boral ta ni la, ka tuarh hi a nuam zawk ngei ang. I tana ka tawrhna zawng zawngte kha hetiang hian maw min thung rulh tak le…!!!”

Van hnuai khuavelah hian kei aia vanduai leh chuang tur hi an awm bik dawn em ni? Ka piansualna, lainatna leh hmangaihna ti zual zawk tura ka lo rin kha… hmuhsitin a awm a, kalsanin ka awm ta maw…Mahse e, pianngsual awm tawh lohna pialralah tal run hmunah leng dun ang aw, hei chauh hi maw ka chan tak! Ni a ral, thla a vei, kum a lo thar zel. Hlimna hian keimahah awmzia reng a nei thei lo.

Chutia ka hring nun khawngaihthlak tak mai chhui kira ka in dawm kun reng lai chuan aw ka hre ta tlat mai…Chu aw chu ka hriat hnu ngei kha a ni si a. A va na em!

He ti hian ka ngaihtuah thin. Kan Pathian hian hmangaihna avangin van ropuina zawng zawng kalsanin lei hrehawmah a lokal a, chatuan nunna kan neih theihna turin Cross-ah a lo tuar a, mahse, kei ni lah chuan kan kalsan zel si a, engtikah nge a hnen kan kir ang a, a lam kan hawi ang aw…tiin min thlir reng thin a, “Ka fa, i sualna zawng zawng nen lo kal rawh, ka lo chhawk ang che, ka hmangaih che a sin, i tan ka nun zawng zawng ka hlan zo ta.” tiin.

This entry was posted on Tuesday, August 16th, 2011 at 9:30 pm and is filed under Luangliam. Both comments and pings are currently closed.