mi(sual).com

Ka tawm deuh chawt zel a, ka zin khat ve khawp. Mahni tawkah ka buai ve thin hle a, ka zin ngai meuh lo. Mahse thiltul tak avangin ka zin ve ta chèng a, a hahthlak dangdai khawp.

Ka zin ve chu beisei angin thil a kal lo kher mai. Kan motor kha a hmel chu a tha vur si a, rin aiin a lo tawng ru roh va. Ka zin tumna kha darkar li vel chauh tlan a ni na a,darkar sawm vel zet kan tlan.

Kan han tluang lo khawp a, kan tlan tan atanga darkar rei lote ah kan chhe tan der a. A tirah chuan kan fiamthu kual vel mai mai a, a tawpah erawh nui peih pawh kan awm ta lo a nih kha.Kawng lah chu a han chhe êm êm a, a khuar lai hel tuma driver-in duhthâla a han tih kual vel chiam pawhin a khuar lo chu dai tur a awm ngang lo. Inzirtir chawp pawh ngai miah lovin kan “Eih-Ah” rual thawt thawt zel zawng a nih kha. Kawng chu a chhia in a khuar a ni mai lo, dil te ang mai in tui a tling luau zel mai a, a nuihzatthlak letling zawk hial.

Ka bula thu lah kha mut a han duh êm êm khawp a. Kan chuan atangin a muthlu deuh nghal der a,muthlu na na na chu mi han delh deuh run zel mai bawk a. Mahni maha cher tawh a laia khatiang taka rit han indelh beh tir kha chu rin aiin zei a har phian.

“Thianpa nizan i mu na nge?” ka han ti a. “Mu e” tiin min chhang mai a. “Nizanah mu si, ngati nge i mutthluk reng?” si ka ti a. “Ka mut a chhuak alawm” a ti a, a bu leh lup zel a.

Ka ning ta deuh va, kan thutpui pakhat nên chuan an thutna an inthleng ta ringawt a. Chutia an thutna an inthleng takah chuan a meng leh kur reng thung si a, kan nuih kan nuih ta ringawt.

Motor lah chu a nuar zel a, tuihawk tamna ber emaw tih turah a han thi leh tawp zel a, tih ngaihna dang awm hek lo le, driver chu tuihawkah chuan mu leh thlawrh zel a. Huh hnuangin a lo lut a,rei lote kan tlan a,a thi leh zel si. Vawisawm vel kan din kha chuan kan la nui peih khawp a, mahse a nuar zel tho si a-nui peih pawh kan awm ta lo.

Kan thu ni miau hek lo. Kawngkawi chep lai berah a ding leh ta vun mai si. Motor dang rawn tlan pakhat phei chuan kan motor kha a kiss teuh ther ther khawp mai. A rawn ding bu luih a, a horn a ri tuar a, driver a nui then thaw ringawt. Tlan thei miau hek lo le, motor dang pawh kan dang bet vek a, an piit tuar tuar ringawt.

Kan driver lah chuan engvakah a ngai lem lo. “Horn pek tuar tuara tlang theih chu nise ka dang lo tawp ang che u, ka kal tir vek ang che u” a ti leh ringawt a. Motor chinchang engmah hre ve hek lo, kan en tlawk tlawk ringawt a. Driver dangte nên an phuah chawp luk lak a, rei lote bak kan tlan thei chuang lo. Mahse, driver aia tlawmngai an awm in ka hre lo, kan din apiangin min tanpui peih zel.

Zing chaw pawh kan la ei lova, darkar tlemte tlana ei mai theih kha darkar engemaw zat kan tlan si a, ril atam duh khawp. Kan chaw ei thin na khua a kan thlen hma kilometre khat velah a ding leh tlat a, ke in kan kal ta vel mai mai. Chaw kan ei a, motor kan nghak thap a. Motor a kal si, motor aiin kan thleng hmasa zawk a, lung a chhe lek lek.

Tluan tawh loh alai a, kan chaw ei na Hotel-ah Baibing ka hawp ve rawk a, hrawk an thak chiam mai chu(h)…hiah theih lah ni si lo, a nuihzatthlak lo khawp mai.

Beidawn tawp lamah motor a lo thleng ve hlawl a, kan lut leh a.A mize pangngai a bansan duh chuang si lo. A tawpah phei chuan a clutch tel lovin, gear no. 1 ngatin chhukah pawh kan phih ta hmiah hmiah a nih kha.

Kawng laklawh ah motor dang tawh loh theih hek lo le, clutch a chhe tawh si-break a han rap a, kan motor a thi leh tual zel a. Kan tlan chak lai tak khan motor dang kan tawk ang tih hlau reng rengin ka ip chawih chawih zel a. Break a rap chut ngei dawn si a, kan ding bu luih ang a, kan motor a thi leh dawn si a. Ka lo chuang ngam kha pa huaisen tak niin ka in hre ta.

Zin kawng hahthlak leh hlauhawm pawh ni mah se, a fiamthu zawnga kan her thei kha a ropui hle zawkin ka hre ta. Kan tum ram chu min thlen ve a hram a nih kha. Mahse, ka thianpa kha chu ka ngai love khawp ang, a ti ti pui theih loh tlat.

Kan hringnun ah pawh kan duh ang leh beisei ang diak diakin thil a thleng lo fo, mah se engkim a êng zawngin thil i thlir thiam hram hram ang u.

Similar Posts:

• Thlahrang
• Mizoram Kawng
• Zinkawng a ka thil tawn mak thenkhat
• Chief Secy. Car leh Bike insu
• Entawntlak a eizawngtute

Recent Posts:

• L.Kira an tih chu (The man behind Lalzova)!
• LUNGPHUNLIAN TUMKAWNG
• A liampui ta si
• ZU HI SUAL A NI LO, A IN A TE PAWH AN SUAL HEK LO
• Like!

This entry was posted on Thursday, August 18th, 2011 at 11:30 am and is filed under Luangliam, Travel. You can follow any responses to this entry through the RSS 2.0 feed. You can leave a response, or trackback from your own site.