mi(sual).com

PI LEH PU ATANG RENGIN: Mizo nunphung leh ziaah hian, pi pû thlah atang rengin fanaute enkawlna kawngah hian tuna keini thangtharte zawm leh chhawm zui zêl tur kalphung mumal kan nei lo nge ni? Kei phei chuan sawi tur ka hre lo khawp mai. Kan pi leh pûte hunah chuan, naupang chu Zawlbûk thing fawm tura ngaih an ni a, aia upate zah tura zirtirna an dawng leh a, chuti tihloh enkawl leh kaihhruaina kan nei lo a ni mai thei a ni(?).

Tukverh atanga nau emaw û emaw lêng ko va, “Ka û lo haw tawh rawh chaw kan ei dawn,” “Enge kan hmeh dawn?” “Dawlrep leh Sakhi sa bawl kan hmeh dawn” ti a, in au haw thin, zanah nise zan rei tak tak thlenga pawnto thin, inchhûngah nu leh paten an fate enkawl leh kaihhruaina, hnam thilah leh sakhaw thila chhawm nun zêl tur mumal nei lo kan nih hmel khawp mai. Upa zingah naupang an awm ngai lo va, “Naupang kha kal bo rawh u, uite rim in nam,” “Naupang chumchiap” tih an hlawh thin. Inti tlangval chin lah nula rim a len chhuah tihmakmawha neih, Zawlbûk a riak leh zui nghal hnam kan ni. Fanau enkawlna kawngah pi pû chen atanga hetiang kan nih avang pawh a ni ang, tun hun thlenga kan fate heti tak mai a ngaihthah leh zalena kan dah ni.

Chanchin Tha êngin kan ram a chhun ên hnuah, Pathian Lehkha thu atangin kan fate hi, ‘Lalpa laka kan rochan’1 an ni tih kan hriat hnuin, fate enkawl bul kan tan tha a ni deuh chauh va. Kan fate hi Lalpa laka kan rochan an ni tihah chiang tâwk hle mah ila, a enkawl leh kaihhruaina kawngah hian tihhmaih kan nei tlat hian ka hre fo thin. A chhan chu, Lalpa laka kan rochan fanaute, heti tak mai a Setana thununna hnuaia kûn a; suahsual rawngbâwl an tam ta mai hi, Lalpa laka kan rochan an nihna aiin Setana laka kan rochan ni mai zâwk âwm mahin an lang a nih hi le!

Ruihhlo (Drugs/Zû) ngawl vei awm lohna chhûngkua hi engzat nge awm ang tih te hi, YMA/MZP hian chhui chhuak tawh tak maw? Vantlâng hriat hlawh lem lova, zû leh drugs laka fihlim lo chhungkua pawh chhiar tel vekin; a fihlim chhûngkua hian a tam zawk nih kan hauh tawh lo mai ang tih pawh a hlauhawm hlel lo ve. Fate chu sawi loh chhûngkaw pa, thenkhatah phei chuan chhûngkaw nu pawh fihlim chuang lo chhûngkua kan awm tawh zu nia.

Lalpa laka kan rochan fanaute kan enkawl danah hian hmaih nei lo ni ta ila, hetiang êm êm hi kan nih i reng em? Kan Pathian thu, kan rinna innghahna lungphum, tehna dik lo thei lo, thu nung leh thiltithei ‘BIBLE’ min zirtirna denchhen leh tlawhchhanin, fanaute enkawl leh kaihhruaina kawngah tan kan lain kan bei nasa hle a, a lawmawm e. Presbyterian Kohhran Hmeichhia phei chu hemi chungchânga an thawhrimna a nasain a ropui a, fak hlawh tlâkin hma an la. Kristian chhûngkua atanga Lalpa laka kan rochan fanaute humhalh tulzia zirtirin, Kohhran Hmeichhe rawngbawlna pum tihtheih tur hi a hmanhlel tak meuh a nih hi. Chutiang bawkin Kohhran unau dangte pawhin mahni hmazawnah nasa takin tan an la a ni. Beidawng mai lova bei zêl tur pawhin ka fuih ve duh nghal nghe nghe a ni. Kohhran tih atan chauh va khêk mai lova, kan phêk beih a hun tak meuh a ni. Heti taka beih a ni chung pawh hian Kristian nu leh pa tam ber hian ‘Fanaute hi Lalpa laka kan rochan’ an nih ang a; enkawl leh kaihhruaina kawnga Lalpa laka kan mawhphurhna san zia hre lo, nu leh pa inthlahdah, fate zirtir chu sawi loh, zirtir tura an nuna zir tur awm thlawt lo, fate tana entawn tur awm lo nu leh pa hi kan va han tam ta em!

Kohhran a inhmang tak tak nu leh pate hian, a hmalama kan sawi; Kohhrana inhmang ngai lo nu leh pa, an fate Lalpa laka an rochan a ni tih hre fuh lo leh hre reng chung pawha pawisa lem lo nu leh pate hi, kan lo dem bik ngawt a nge. Demawm zawng an ni nameuh mai, mahse kan dem mai bik thei lo ang. Kan dem hmain kan fate hi eng ang nge an nih enfiah hmasa ila, nitin zantin tihtheih tur Kristian Chhûngkaw buaipui leh Committee chi hrang hranga kan inhman hlan a, an khawsak danin a zir loh avanga, lungngaihna chirhdupa kan fate an pil bo zia hi. Kohhran thil a inhman hi a tha na meuh mai, Tirhkoh Pawlan, “Thil engkim tih a thiang a, thil engkim tih a tha kher lo,”2 a tih hi engchenin nge zawma zawm loh tur ni dawn ta ni?

RAM RAWNGBAWLTUTE: Ram leh hnam hmangaih avanga fanau enkawl kawnga inhmang mumal hman lova; damchhung hun hmang thintute thawhrimna zarah ram pawhin hma a sawnin, hnam pawhin a that phahna chen zawng a awm ngei mai. Khawtlâng enkawlna (YMA/VC /JAC/MZP etc) a mi inhmang tak nu leh pate thahnemngaihna hi, khawtlâng tan a va hlu teh reng em! Mahni inchhûng leh fate enkawl lama tan la hman lêk lova thawhrimna hi ram leh hnamin a that phah êm êm laiin, inchhûng enkawl leh fate uâp hman lova kan awm thinna hian, Lalpa laka kan rochan fanaute sual kawng a zawh tir ve thunga; kan tuar ta zawng a nih hi.

Ram leh hnam tana thawhrim hi a tul takzet a, mahse mahni inchhûng leh fanaute enkawl thulh chuang lova thawh thiam a va ngai êm ti r’u maw! Tunlaia kan Mizo thalaite hian thatchhiat leh nawmsip bawlna lamah hma an sawnin, an hriselnain a thatpui tur ni si lo ruihhlo ngawl an vei a; anmahni nun ngei pawhin a tawrh dawn pawha pawitihna reng nei lovin, an damchhûng hun an tih tawi zawh takzia hi, ngaihtuah leh sawi chian ngam pawh a ni ta lo.

Kum naupang tê tê a damchhung hun hmang liam ta engzat nge awm tawha, engzat nge thlah liam leh mai tur awm ni? Lalpa laka kan rochan fanaute enkawl leh kaihhruaina kawngah hian, kan faten mawh an phur lova; a mawhphurtu chu keini nu leh pate hi kan ni si. Khûp tinreng Lalpa hmaa kan thingthit hunah chuan thiamthu sawi a sâwt tawh lovang le. Ram leh hnam hmangaih avanga rim taka kan thawhna chhan ber kan fate, thang leh thar lo awm zel tur an bo pil zel si chuan, Thuhriltuin, ‘Engmah lo mai alo ni e’ a ti ang chauh hian, tunge kan thawhrim rah chu seng ta chuang ang le?.

CHHUNGKAW EIZAWNGTUTE: Nitin a kan eizawnna kawng peng hrang hrangah pawh hian, sawrkar hnathawk kan ni emaw sumdâwng kan ni emaw fanaute tana rualawh leh thahnemngaihna avangin rim takin kan thawk a. Lalpa laka rochan fanaute enkawlna tura thawk kan nih avangin rinawmna nena thawh a tul tak meuh a ni. Pathian tihna nen dik tak leh fel taka thawk a, nawi khat pawh ei ru duh lo, mirethei leh chanhai zawkte pawhin an lei ve theih tura uchuak taka hlêp duh lo nu leh paten hei hi i vawng reng ang u, Pathian thu chuan, ‘Sum tam tak aiin hming that hi thlan zawk tur a ni a, Tangka leh rangkachak aiin duhsakna a ngainatawm,’ a ti a, min zirtirna theihnghilh lovin, Lalpa tihna nen fanaute kan enkawlna tur thawk chhuak ila, dik taka lakluh sum leh paia chhûngkaw enkawl leh inhmun lo ram din hi ringtuten kan tihtur a ni. ‘Lalpan in a sak loh chuan a satute chuan an thawkrim thlâwn mai a ni’ a tih thute hi chu; kan Bible chang duhthlan leh kan vantlâng châng a ni hrim mai a, a taka zawmtu engzat tak awm ang i maw?

Kan fate thinlungah Lalpa nena in sa si lo hian, keimahni chênna tur In; Lalpa tel lova kan sak In hi kan ngaipawimawh hmasaa, thenkhat phei chu eirûk sum a sak a la ni lehnghal a, eng sum atanga sak nge tih kan fate hian an hai lo; sual thiltih an ngampat phah zui ta a ni. Kan tisual zo ta a nih hi le. Bible i han râwn leh teh ang, ‘Beiseiawm a la nih laiin i fapa chu thunun la, boral mai turah ngai suh’.

Hawh u, Lalpa hnenah kan sual thupha i chawi teh ang u khai. Nu pawmham leh pa pawmham tak tak, Pathian tihna leh hlauhna chhe te pawh nei lo; kuttling lo va thiltih duh nu leh pate chungchângah, kan Bible chuan hetiang hian a sawi, ‘Kei Lalpa i Pathian hi Pathian thikthuchhia, pate khawlohna avânga fate hrem thin, mi hawtute chu chhuan thumna leh chhuan lina thlenga hrem thin leh, mi hmangaiha ka thupêkte pawmtu sang tam takte chunga khawngaihna lantir thin ka nih hi’ Lalpan a ti a ni.

Vantlâng bum nan thlarau mi ber anga langin Kohhran leh khawtlângah inhmang teh mah ila, kan fate-ah a rah kan hmu a ni lawm ni? Mihring buma sawrkar sum thianghlim ti bawrhbângin puanhnuai ru engang mah ila, Pathian erawh kan bum thei chuang lo. Inthlahrunna nei hauh lovin Kohhran thawhlawm ip kan la hnawh puar zui ngam a maw? kan va han huaisen teh reng em ti r’u maw! Anania-te nupa i hre reng ang u, Tirhkohvin, “Mi hrilh rawh, ram chu heti zât chauhvin maw in hralh?” a ti a. Tin a ni chuan, “Aw, heti zât chauh hian a ni,” a ti a. “Engati nge Lalpa Thlarau fiah nan in inthurual ni? Ngai teh, i pasal phûmtute kephah chu kawngka bulah a lo awm ta, nang pawh an zawn chhuak ang che,” a ti a. Kan puan mai nilova kan thinlung thlerin, simna puan sinin kan chhûngkua leh thlah leh chhâwng thleng atan malsawmna dilin tawngtaiin inhlan thar leh ila, kan sual thupha chawiin ngaihdam i dil teh ang u khai.

Kan tunlai khawvel hun hman mêka Mizo Thalaite nun heti tak mai a a bawrhbâng zo ta hi chu, tumah mawhpuh tur dang an awm lo, vawiin a nu leh pate hi kan ni chiang mai zawng a ni. Enge a chhan? Engtin nge kan tih tâk ang? ti a, phi ruai a hun tawh takzet a ni. Lalpa laka kan rochan fanaute hi kawng dika hruai tur leh thutak a hruai tur chuan; an bula kan chen tam a; kan kawmngeih hi a tul takzet a ni.

HNAM UPA ZAWKTE ENTAWN TUR: Ka hmuh ve phâk tâwkah, hnam upa zawk Bengali, Marwari, Bihari, Punjabi etc. zingah hun tam zawk hmanga chenchilh kan ni a. Mizovin naupang enkawl kawngah hmaih kan nei nia ka hriat chu, anni hnam upa zawkte hi chuan an hmaih lo a ni; chûng chu, ‘Nu leh pain an fate an uâp’ ‘An hnamzia leh nunphungah naupang enkawl a bet’ a ni. An nu leh pate hian, keinin kan tuipui êm êm, ‘Fanaute hi Lalpa laka kan rochan’ tih hi, Bible atangin hre kher lo mahse, keini a hria intite aiin he thu-ah hi chuan an ril zawk tlat niin a lang. An chhûngkaw khawsak inenkawl danah, ringlo mi nimahse entawn tur a tam hle hian ka hre thin. An fanau enkawl chungchângah an hnam nunin kawng zawh mumal tak an nei a, an faten naupan têt atanga an hriat leh zir tur, an hnam nunphungin a ken an nei a ni. An hnam zia leh nunphung hre tura an duh avangin, an hnam lâm leh zai, an naupan têt tê atangin zirtirtu laksakin an inah an zir emaw a zirna hmunah zir turin an hruai mai thin. High School zirlaite thlengin an nu leh paten an kal lam leh haw lam an lam peih a, naupang pawl hniam chin phei chu nilengin an nghak thin zu nia. Keinina thlah pawh kan thlah ngai lote hi mak an ti êm êm a ni.

Pi pu chena an lo chhawm nun; an hnam nuna an hnamzia leh kalphung, hnam lâm leh rimawi chi hrang hrang zir an ngai pawimawh êm êm a. An naupan têt lai atangin, zai an zir tir a, khuang ben an zir tir a, nu leh pa-in chûng zirtir chu an tihmakmawhah ngaiin an zirtir ngei thin a ni. Nupui pasal inzawn kawngah pawh heng ang thil hriat leh thiam hian thûk takin awmzia a nei thlap a ni. Nupui pasal inneih thu hla nise an fimkhur êm êm a, keini ringtu intite aiin an fir fê zawk emaw tihtur khawpin an fimkhur bawk. An fate, nula tlangval puitling tawh pawh hian; an nu leh pate hmuhah zûk leh hmuam an ti ngam lo, an hmuha tih a hnêkin an hlauh rualin an nu leh pate hi an zah êm êm mai a ni. An nu leh pa chu sawi loh, keini tak ngial mit hmuhah pawh zûk leh hmuam an ti ngam lo. Chutiang avang chuan an nu leh pa bula awm an duh lo a ni chuang lova; an bulah an tâl heuh heuh reng tho. In chhûngah, chhûngkuain mihring nunphung an zirin an khawsa ho va, pâwn lamah an inhmang tlem êm êm a ni.

Thawhtanni zan inkhawm an nei lova, Thawhlehni zanah pawh an inkhawm chuang lo va, Nilai zan thupui an zirho ngai lova, Ningani leh Zirtawpni zanah Committee a chhuahna tur an nei lo. Inrinni zanah Tawngtai inkhawm lah an nei hek lo, Pathianni chhun leh zan an âwl hlauh bawk. Kar khat chhungin Inrinni tlai leh Pathianni hun remchangah chhungkuain an leng chhuak a, chhungkuain an hun tam ber hi an hmangho a ni. Milem Pathian bia an nih avanga an nuna zir tur awm lo leh zir tlâk awm lovah ngaih ngawt chi a ni lo. An fanaute hi Lalpa laka an rochan tih an hre chiang zawk daih ni ngei tur a ni, an fate puitling tura enkawl kawngah an ulukin an fimkhur em mai.

Ringlo mi mahin hetianga an fate an enkawl thei a nih a, an ram leh hnamin a dam phah a nih si chuan, keini Pathian nung ringtu zawk hian engah nge kan fate puitling tura kan enkawl theih loh tehlul ang, kan rahbi i tuk thar leh teh ang u khai.Mizo kristian intite hian an nunah entawn tur kan ngah hle zawk a, an thlarau nun lam erawh a ngaihtuahawm e tih a ni chauh zawk a ni.

Anih leh, sâpho khuan an fate engtin nge an enkawl le? Kar khat chhûngin, zantina nu leh pain fate uâp mumal hman lova chhuah bo sanna tur nei lo an ni lo, nupaa chhuak bo tur chuan hman an inti lo ngam tlat a ni. Sâpho phei chu, an fa sêntê pawh mut hran tir nghal an ni, mahni kea ding tura an buatsaih bul tanna a ni nghal bawk. Keini chuan nausen hnute hnêk pawh la thiam lo mut hran tir chu kan phal lo, kan tlin lo, kei ngei pawh hian ka remti lo nghal a ni, iti ve ang u tia rawt pawh ka tum lo.

Amaherawhchu, sâpho pawhin an fate enkawl puitling tura nausên tê an nih atanga bul an lo tan dan hi chu entawn tur zawng kan ni hrim mai zawng a nih hi, sawi thui hman a ni lo. Keini hnam mâwl, nimin lawka khawvel êng hmu ve tan chauh hian, fanau enkawlna kawngah kawng zawh mumal nei lovin, Lalpa laka kan rochan fanaute mâwlmang thei ang ber a enkawl kan nih avangin; tisual kan nih pawhin a mawh lo ve. Tunah hian insiam thatna hun kan la nei e. Hetiang hian tan la ila:

1) Kohhran leh Khawtlang hruaituten, nu leh pain kan fate hun tam zawk kan uâp theih nan kar khat chhungin Inkhawm leh Committee nan a tlem thei ang ber programme siam ni thei se a tha. Hemi chungchangah hian Kohhran leh Khawtlâng pawhin a man an pek a ngai tlat a ni, a mawhphurtu ki pawimawh an ni tlat. Mizoram Kohhran Inzawm Khawm leh YMA/MZP hian Ram leh Hnam damna turin chak taka tan lain ke pen se. Kum puanah pawh neih hial se. Mizo Thalaite nun tluchhe mêk tungding leh tur a, Kohhran leh Khawtlangin a man a pek tur hetiang hian han sawi ta ila:

KOHHRAN: Kar khat chhûnga inkhawm tam lutuk hetiang hian ti tlem ta se – Inrinni zan atanga inkhawm ni tawh se (Presbyterian bikah Nilai Zan thupui ni tawh lovin Inrinni Zan thupui tih ni tawh se). Pathianni Sande Sikul a ngaia kalin, Pathianni chawhnu inkhawm hi KTP/TKP leh Kohhran Hmeichhiate puala serhin; Pathianni zan vantlâng Pathian biak inkhawm ni ta se. Kar khatah Committee tultuah tak vawi khat emaw awm chauh se.Kohhran tinin zawm ngei nise.

 KHAWTLANG: Kar khat chhûngin (a bikin zan lam atan) VC/YMA/JAC/MZP etc. ten tultuah tak tihtur a awm chauhvin pawn chhuahna tur thiltih vawi khat emaw chauh programme siam se. Chhiatni thatni erawh kalphung pangngaiin kalpui mai nise.

2) Chhûngkaw nu leh pa-in fate kan chhuahsan tam lutuk hi kan fate nun kal sualna a ni tih hi kan hriat phal a hun tawh takzet a, fate uapin zanah in chhûngah awm tam ila a tha a ni.

3) Kohhran leh khawtlâng thiltih a tam lutuk a, kan fate an chhuak tam lutuk hi a pawi a ni tih hriaa, Kohhran leh khawtlang hruaitute pawhin abik takin zan lama thalaite chhuak vâk lo zawnga thiltih kan thiam a hun tawh a ni.

4) Fa enkawl chungchangah nupa tanrual a pawimawh. Pa emaw nu emaw in an fate thil tihsualah an hauvin an hrem ang, a tu ve ve pawhin fate vui pui leh thlem zawnga tihloh a tha. Entir nan- Pa in a fa a hrem/hau a nih chuan, nu pawh pa lamah tan tlat tur.

5) Naupang an len tawh hnua vuak leh velh aiin, vuak tham loh nia ngaih an nih lai atanga thunun a tha ber fo.

6) Vawi khat tihloh tur hrilh chu ti lo tura khap beh hlen a tha, duat avanga a khaptu dawl zawka tan a pawi thui thei hle a ni.

7) Ti tawh suh ka vua ang che tih a, an la tilui a nih chuan vuak ngei tur, vuak leh loh aiin vuak ngei a tha. ‘Naupang thunun tim suh, Tiangin vaw mah la, a thi dawn si lo va. Tiangin i vua ang a, Tichuan Seol ata a nunna i chhan chhuak ang’9 tiin kan Bible chuan min zirtir a ni.

8) Puitlin huna nih an tum zawtin, chumi ni thei tura fuih sauh sauh va, an nih tum an nih theihna tura kawng dap/zawn pui a tha. Kan Pathian thu chuan, ‘Naupang chu a kalna âwm kawngah chuan zirtir ula, a upat hun pawhin a thlah lo vang,’10 a ti a ni.

9) Tihsual leh tih dik loh an neihin, an tisual tih an inhriata an inlamlet ngeina tura hmalak a tha.

10) Tunlai nu leh pa tam ber harsatna tawh, an fate zan meng rei leh zing a tho tlai leh si thin lakah hian inven a tha. Pathian thu chuan, ‘Mut thlahlel suh, i lo pachhe dah ang e; i mit meng la, chhang kham khawp i nei dawn nia,’11 tiin min zirtir a ni.

‘Lalpa laka kan rochan fanaute’ enkawl leh kaihhruaina kawngah hian, tuna kan han tarlan tihtur leh zawm tur 10 chauh pawh hi tihlawhtling thei ni ila, tun atanga kum 10 hnuah chuan a rah kan hmu ngeiin a rinawm. Nu leh pa, Kohhran leh Khawtlâng kan tanrual a ngai a ni ber. Kan ram kan hnam tlu chhe mêk leh, kan thalaite boralna lamtluang zawha kal mêk chhanchhuak tur hian a man kan pek a ngai, kan pêk ngam chuan chhan tlâk kan la awm a, chutin kan Zoram leh a chhûnga cheng ringtute hi Pathianin tun aiin a lêtin a chawimawi anga, fanau rochan min petu Pathian ram a lo zau zel dawn a ni. “Hawh u, Lalpa laka kan rochan fanaute hi thlahthlam lovin i uâp lum teh ang u”

(He thu hi kei tehlul Kohima Mizo Kohhranin Golden Jubillee Hriatrengna Lehkhabu an buatsaihah thuziak thawh tur an mi sawmna tih beidawn duh lohna avanga harsa tak chunga ka sual chhuah ve ani a…a sei deuh kan ti anih pawhin a mawh lo e…mi tam zawk chhiar atana thahnemngaihna avangin  ka rawn pho chhuak ve leh ngawt mai a ni e… rlchhana@gmail.com)

This entry was posted on Sunday, September 25th, 2011 at 1:00 pm and is filed under Advice, Opinion. Both comments and pings are currently closed.