mi(sual).com

– Lalthakimi pa

Tlangval pakhat hi a lung a leng thei em em a, hna thawh zai pawh a rel thei lo. A chhun in awm tih tur hre lo chuan Thingrem a hai mai mai a. A mawng kilah a lung len chhan a ngaihzawng hluui thlalak leh hmangaih biahthu a rawn hlanna thaikawibawngte (love letter) a dah that chu a hmu fuh a.

Kawldai buk hrula pal nghenga an ding dun lai thlalak a han hmu tel phei chu a phu hial a. An pahnih chauh a thing an phurh dun ni te, Pathianni tlaia Thlanmual tlang vela an len dun lai hun leh nite a ngaihtuah chhuak a.

Thla eng hnuaia an thiannu Thangkungi te Leihkapuia insi riala an thutna hmun te pawh chu thlalak lehkhathem, kutphah pawh tiat lovah chuan a leng vek mai a.

Chul ram an fan nia a bialnu tamchhawl a duatziate phei kha chu a ngaihtuah rei phal lo; hun kal tawh ni mahse nimin lawka thil thleng angin a thinlungah engkim mai chu a thar uarh uarh a, tlangval a pumpa a mittui a hnam sawk a, thlalak chu a biangah a nem bet vang vang a.

Hmanhmawh hauh lovin a bialnuin hmangaih biahthu a hlanna lehkhathawn hlui chu a keu parh a. Vawi tam a chhiar tawh hnu chu a chhiar leh a. A hmangaihzia te, a mah hmu lova zan khat awm pawh rei a tihziate, a rilru ngui tihlim tura amah a mamawhzia te chu thiam leh nalh takin a sawi a. A thusawi hmehrem turin lengzem hla thu chang miten an zeh tel thinna hmun angah chuan Zosapthara lehlin Pathian fakna hla a hmang a.

“Nitin tiharh rawh ka rilru,
I ta angin siam la;
He thu kalhtu tur hi lo awm phal suh –
I thu ni se” tiin.

A lungleng na lutuk chuann a rilfang zem ngalh ngalhin, a thinhnun vit ngaih in a hria a.

Love letter te hi tunlai chuan a hlu vak tawh awm love, nula tlangval in Mobile Phone an neih fur avangin hmaichhana inbia ang maiin thil an inhrilh ta a. Message inthawn lah a awlsam na rawh. He thu ziaktu tlangval lai chuan love letter hi a hlu em em a; tawngkam ka thiam vang a ni bik hauh lova, thian ten an bialnute lehkha an thawn tur erawh min ziahtir chawk thin.

Tum khat kan thianpa Thianga bialnu lehkha tur uluk fahranin ka ziahsak a, a bialnu pawhin a duh ve thuin a rawn chhang a. “I chhang leh ang,” a tih avangin chhanna ka ziak leh a. Chumi pek pah chuan zan khat chu a bialnu kan rim a. Tunlai angin electric eng awm ve hek lo; Bati eng riai ruai karah a thim lai chuhin kan thiana chuan midang hmuh hlau takin lehkhathawn chu a pe ru zauh a, ka hmu reng si a.

Veng chhak kil UPC Biak In piah muala leng kan ni a, kan hawn thlak chuan kawng lakah kan thiana chu a indap thut thut a, “E khai aw!” a ti ta mai. A kekawr hnung ipte a lehkhathawn a ah chu phawrhin, nawalh enga a en chian chuan a hlauh ang ngeiin a ni lo zawk a pe a lo ni.

A bialnuin a rawn chhanna kha pawtchhe phal lovin a ak reng thin a, a daikal leh fianriala a awm changin a chhiar thin a. Chu nen chuan lehkha ziah thar chu a lo ah pawlh avangin a bialnuin a rawn thawnna zawk chu a pe let leh hi a lo ni. Kan va nui nasa e aw… kan nui ring si a, kan vela tukverh zawng zawng a rawn inhawng a, engtizia nge tih rilru puin mi an rawn dak fur. Ui lah a bauh chuah chuah a, veng pumin Ui kha zu bauh a maw le, a va zia lo.
Aw le, chu zawng, remchangah ka’n sawi kai mai mai a nih chu.

Zan khua a lo tlai a, rannung chiap cha thawm a reh lo. Thla arkaidengin vanlaizawl pana a invawrh chhoh tan mek laiin kan sawi tak Vallunglenga khan Se dar tia pui mai a thianpa Tingtang a tuai hnum a, a hrui herh nan pawh Phulraw ro fip feng fawng hman a ni.

A dik thei ang ber turin uluk takin a herh a, a hrui thumna phei chu Chaicheh nen meuh a herh a. A duhtawka a herh mil hnu chuan Thla pawh vanlaizawl panin a invawrh sang ta. An thiannu Thangkungi te Leihkapuiah a lawn a, chhun lama a rilru phawrh chhuak in heti hian hla a han sa teh reng a:-

“Awmhar tinkim dawnin vawiinni chu,
Ka tuahrem lai chhung ka han hawng a;
Tah chuan lungdi hlimthla enchim loh leh,
Biahthudi tham hnu ka chhar chhuak a.”

Hmangaih biahthu an inhlan thinna a nih vanga chu Leihkapui chu zai nana hmang a ni lo; a thlang lawka a bialnu a lungtilengtu pasal nei tawh ngei chuan lo hria se a ti a ni. A hla thunawn a han sa thleng a-

“Enchim loh a hlimthla ka chan tawk te hi,
Ka vawng ang fam ka chan ve hma chuan;
Awmhar chang dawntam lunglenna reng a’n,
Nghilhloh par kumtluang ro a’n ka ti.”

A han ti chiah chu a sa hlei thei lo a chha a ni e. A mittuiin a Tingtang kuah lai kawm chu a far ri kauh kauh a. A bialnu hlui pasal nei ta chuan a hriat than zai ri chu hun dang zawng aiin mawi a ti a, a ngaihtuahna a ding ve hle. A hmun phiat lai pawh a chawl dat dat a.

“Chun leh zua hal vanga khiangawi hi,
Min dem bik suh aw, Chaltuai,
A rukin i hming sawi ka bang bik lo.” tiin a hmui a lo phun ru ve sap sap a.

Aw, a chan chin kan sawi tak chu tlangval lunglenga chu a ti lutukin a lungleng chu a uchuak deuh in kan ngai em? A nih loh leh thianpa Thianga’n love letter a dawn tichhe phal lova a ak reng te kha a mak kan ti em? Kei zawngin ka dem love. He thu ziaktu pawh hi eng ka lo ni bik lo. Khai aw, zah fakah lu em a chhum lovang chu maw.

Kum 1970 khan kan inti tlangval ve tan a, kan ute rual hnung zuiin nula kan rim ve a; a hminga mi ang ve na fam chu nula zingah hmel duh te kan lo nei a, eng lai maha la hriat ngai loh nulat tlangvalna ram chu fang ve in chumi kum la la chuan hmangaihna khurah ka zuang lut ve ta a nih kha. Di ngaih leh khawtlang lunglen la na mi ka nihzia chu hun in a rawn hai lang thuai a, zai thiam lo teh mah ila lengzem hla leh hla lenglawng te hi a ziak en lova sak chhuah theih ka ngah teh a nia aw.

Chung hun lai chuan electric eng hian kan veng a la thleng lo hrim hrim. Chirhdiak leh zan thinm karah khawvel kan thlir a. Khaw chhiat tum chuan a zualpui thian tur chauh pawhin nula te kawngka bulah rei ngial ke berh tah fai a ngai thin.
Thiante tana love letter ziak thina khan mahni tan ngei ziah tul ve tain ka hria a.

Mi tan vawikhat ziah tawk mai thin kha uluk a ngai ta hle. Ka ziah tan chauh lai te, a zatve vel ka ka ziak tawh ang tih lai te, ka zo tep a ka hriat laiten ka pawtchhe leh thin. Ka ziak tha ngun hle mai, khami tum zet kha chu. Chhanna duhawm, hlimawm leh min tinuamtu lehkha chu tleirawl pakhat hnen atangin ka dawng ta thuai reng a, pian tirh ata hmangaih lehkhathawn ka vawi khat dawnna a nih avangin ka roh hle.

Pathianni tlaiah thiante nen khawlai kan leng thin a, kawngkam Dawrte a Kuhva leh Toffee tih ang reng bak hmawmsawm dang a awm lo. Bawngek khawro bulah thla kan la a, black and white thlalakna “CLICK 3” khan hun a lo duh rei thin mang e. Roll film hmeh zawh vek phawt a ngai a, kan lak atanga thla khat te, a aia rei ngial te nghah a ngai thin. Thlalak a lo chhuah a kan hlimpui thin zia te kha aw. A hnung lamah, “Kan la ngai dawn mange khuareiah” tih thu kan han ziak ngei a, a lo va hlu thin em.

Ngaihzawng hmasa ber te nen hian nupui pasalah kan innei kher lo na a; theihnghilh erawh a har bikin “Anhnah tel inpek pawh a lian bik e,” an lo ti thin reng a.

Kum ruk vel lai a kal leh tawh ang a, tum khat chu ka nitin hnathawhna thlang lawkah nu pakhat nen kan inhmu hlawl a. Kawng sir step vawn ban nghengin, “E, i dam thin a maw?” tih mai lo deuh thu dangte pawh kan sawi kai ta luam a. Khawiah nge a awm tak pawh ka hriat tawh loh chu nu hnenah chuan kan tleirawl laia kan thlakte ka la kawl that hlawm thu ka sawi a, a awih lo. “I awih loh tlat chuan dawt sawiah min puh tihna a nih chu.

Cowboy hun lai phei chu ni se Puakruk nena in draw-na tham a nia sin, dawt ka sawi i hre tawh em?” ka’n ti ngawt a. A ni chuan, “A rei tawh em a, i kawl ka ring tawh bik lo a lawm,” a ti a. Aw ki dang hret, ban chet chawt hian, “Dawt i sawi chu ka la hre ngai lo,” a tizui a. Kei chuan, “Thlalak mai a ni hlei nem; i lehkhatawn ka dawn hmasak ber pawh kha tun thleng hian ka la kawl tha asin,” ka ti leh zel a.

Ka mit taka min en pahin, “Tak tak maw?” a ti a. “Dawt ka sawi ngai lo,” ti chauhin ka chhang a. “Awi, Rova,….” tih paha lei lam bihin a kun ta ngaih a, lehlam a hawizui a. Tun hma kum 30 vel kal ta a ka koh thin dan chiahin ka han kova. Zawi te hian, “Min kalsan rawh,” a ti ngawt a. Tu hmuh leh hriat lohna hmun han ni se, mittui kan inhruksak keuh keuh mai awm e.

Minute khat vel chu tumah mah kan tawng lo, chutih lai chuan hlim min petu kan belh Thingbukah chuan nipui Thereng a rawn hram vang vang a; piah deuh hleka Officer pakhat Pisa pindan chhungah chuan hmehrik (Calling Bell) a ri char char bawk a. Thiani chuan rawn hawi chhuak chuang lovin, “Ka chak lo leh ta. Khua rei kum sul tam a liam hnuah pawh min la phawi khalh in i Puakruk mu chuan ka hmangaihna thinlung hi a la rawn kap keh nawn fo zawng a nih hi,” a ti thawp sat a.

Engemaw ti ti chuan kan intha then ve leh mai a. Mipa leh hmeichhe inkara Pathianin a dah chatuan thu nung HMANGAIHNA makzia ngaihtuah chunga ka han kal sawn kha, ka ke a lo va rit e, ka khai zo mang hlek lo. Thinlai mu hnu lunglen a thova. A tira kan sawi tak Vallunglenga chanchin te ka hre chhuak uaih uaih a, ngaihtuahna in fan loh ram reng a nei lo. Kan nunhlui te kha a thar leh thin thinlaiah.

Kr/25/7/2011.

Similar Posts:

• Thaikawi Palai te kha
• Zan vak #2 (Jewel in the night)
• ‘Post’ Tur Ka Hre Thlâwt Lo
• A Thar Leh Thin…
• What is Love? What does it mean to me?

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Wednesday, September 28th, 2011 at 2:00 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.