mi(sual).com

Zirtawp zan a ni a, a tuk Inrinni a kan bazar dan tur vel sawidunin ka ṭhianpa nen chuan an ṭhuthlengseiah chuan kan mu dun zar mai a. Inṭhenawm chiah kan nih avang leh zingkara college kal dun thin kan nih avangin kan inthurualin kan inkawmngeih hle mai a.

Chumai bakah chhun lamah hna thawkin kan inhlawh dun ṭhin a,kan hnathawhna ah pawh kan hlim dun in kan nui nasa thei hle. Tichuan a thil lei tur te a han sawi dan dan a, secondhand kekawr, T-Shirt, underpant, Pen, sikret (cigarette)leh funte.

A mamawh leh duh zawng zawng an chhut zawh chuana a pawisa neih atangin Rs 15 a la bang hram a ni. Chutichuan dar 10 thleng ka ti ti hnu chuan a tuk a bazaar kal tur chuan kan in mangṭha ta a.

 Ka han harh hlawl chu sana ka’n en a, zing dar 6:30 a lo ri reng tawh mai a. Ka han inphihfai zawh a thingpui no ka dawm mek lai chuan ka ṭhianpa chuan tuichawi turin min rawn sawm a, hmanhmawh deuh chuan ka in sawk sawk a, tichuan tui chawi tur chuan kan in zui chhuak ta a.

Tichuan tuikhur kan thleng a, tuikhur bul kawrah chuan kan ṭhenawm nula hi a lo insu ve bawk a. Tui kan thal zawh a haw mai kan tum lai chuan, kan ṭhenawm nula insu chu biak tuma ka thianpa han kal chuan tawhsual a tawk ta.

Nula in a thawmhnaw suk tura dahkhawm chu a hel na lamah patêk nalah chuan tukhum lei vaw chawrhin a tawlhthlu ta, chutia a tluk pah chuan nula ṭin chu a delhthlu a, tui zawng zawng a buak bak ah ṭin chu a sawi nasa ta mai a, chuatah ka thianpa chuan “ka tum dan chiah a ni bik lo asin le”, tih pah chuan ṭin chu an nem mar leh ang awt awt a, engmah pawh sawilo chuan kan haw ta nal nal mai a.

Chaw eikhamah chuan ka ṭhianpa chu bazar kal tur chuan ka lo nghak ta ran mai a. Engemaw chen ka nghah hnu chuan a lo thleng ve mai bawk a, ni dang ai chuan a nalhin a rim pawh a rawn tui ve hle a. Chutah a mah vek chuan, “Vawiin chu ka nalh fu lo maw?

Ka Sunday dress chu a ni chiah lo na a, ka no-1 dress a nih hi, ka rawn chhuah dawn khan ka u naute powder ‘Johnson Baby Powder’ ka rawn in hnawih ve thiak thuak a, coconut oil aia tlema rimna lo deuh ni a ka hriat kan naute Olive Oil ka rawn chhipchhuan bawk a, chuan ka u chapal ka rawn risk bawk a nih hi, vawiin chu khawnge i han inthehthil tak tak teh ang” a ti a.

Chaltlang Dawrkawn bus stand ah chuan Bus chu kan lo nghak ta ran a, minute nga hnu velah chuan Bus chu a lo thleng a, tawt ṭha telh tawlh hle mahse kan inhnawh ve ta a. Chanmari kan thlen chuan tlemin kan thawl ta deuh a, chutah nula chhelo tak, lian ṭha telh tawlh jeans ha mar ṭah mai, Nilai zan vela duh tawk a han chin phar chak awm hi ka ṭhianpa hma ah chuan a ding ta a.

Tichuan Bus han kal leh insawi vel ah chuan ka ṭhianpa chu a khawlo ṭan ta, zawi te hian ka beng bulah, “Tlem tawlh hnung deuh teh ka mualpho i duh loh chuan” a rawn ti sa sa a, kei chuan hrethiam tak in ka theih ang chuan kan tawlh hnung ve bawk a, Bazar bus stand kan thlen chuan mi dang chu an han chhuk sang sang mai a, ka ṭhianpa erawh chu a la ding tlat mai a, a ngaihna hre lo tak a ka en lai chuan, “Ka chhuk thei lo, a chi loh lutuk” a ti ringawt a.

Midang an lo lut leh bawk nen, kan chuang tlang ta hrih a. Israel Point kan thlen chuan i chhuk thei tawh angem ka tih chuan bu nghut pah chuan mi zui ve ta mai a. Bus atanga kan chhuk tur chu ka ṭhianpa hma chiah ah hian tleirawl pakhat damdawiin kal tur ni awm tak, tiffin khai a bag puar angreng tak ak hi a chhuk ve dawn chiah a.

Bus kawngka atanga leia a zuk zuangthla chiah chu a puan hmawrah ka thianpa chuan a lo rap bet palh chu lo niin, Karei! A va han pawi thui teh reng em ve le…! Chu tleirawl chu a ṭe ṭhawt a, bag ak chungin tiffin khai bawk si hian, fenhnuai feng hek lo le kekawrte nen chuan a ding ta ṭhai mai le. A ṭe rual chuan a bag leh tiffin chu leiah a dah a, a ṭhu a, a hmai a hup a, a zak lutuk chu a ṭap ni ber hian ka hria.

Ka ṭhianpa lah chuan ti sual leh tipalh inti em em hian, inthlahrung tak, sawi tur hre mai silo chuan a puan chu a chhar vat a, chu tleirawl chu a pe nghal a, tleirawl chuan rang takin a la a, a bih sawk sawk a, a ding ta ran mai a.

Ka ṭhianpa chuan a thiam ang tawkin ngaihdam te dilin thupha te a han chawi a, chutah inthiamlo tak chungin a ipte a zen sawk sawk a, Rs 20 note hi tleirawl chu pek a han tum ringawt a, mahse a ni chuan a la duh bik chuang lova, tichuan bag leh tiffin chu a khai lawk a kun ngal chung hian kawngpui kân tur chuan hmanhmawh tak chuan a kal ta hmawk hmawk a, keini pawh chu kan kal sawn ve nghal a.

Zion Street lam ah chuan kan chhuk thla ta a, pheikhawk dawr kawt ah hian kekawrte hi an lo zuar teuh mai a. Chu chu ka ṭhianpa chuan a pan ding nghal a, hmeichhe underpant dum hi a zuk thur chhuak nalh a, a hmai zawn a pawh pharh pah chuan “A ha tawk chiahin han ha se chuan a va han it awm dawn tak e aw ”, a ti ringawt a.

A zuartu nu lah chuan fiamthu lo duh ve phian ni ngei tur a ni, “Kei pawh ka nulat lai chuan khatiang hlir kha ka ha ṭhin a sin, a hak a nuam a, a phelh pawh a awlsam” a han ti chiah mai chu(h) ka ṭhianpa a phur ngei mai. Ka ṭhiana chuan,”Ka pi, kei chu nula kekawrte ka pawh thlak sak ngai reng reng lo, ka pawh chhoh sak vak zawk a, a mar lutuk kha an mahnin an pawt chhuk ve ngar ngar bawk a, kan in pawh fe hnuah ka’n thlah thut maia, an mahnin an pawt thla daih zel, tichuan anmahnin an phelh a ni mai”, a lo tih zawm zat a.

Kei chuan kan lut ril lutuk dawn in ka hria a, kal ka rawt ta zawk a. Chutah ka ṭhianpa REMA chuan(ka thianpa hming hi Rema a ni a, a hmingpum chu sawi lo mai teh ang) TARA hring, vaki rawng aia tak deuh hlek hi a khai chhuak leh a, engkhaw sawi set set lo chuan a kekawr chhanah a han ha chhin leh ta pek a nih chu, kan bul hnai a awm ho chu an ṭhen ṭha tawh mai a, “Ka hman thiam dawn hi” a ti a, a phelh sawk sawk a a neitunu chu a fun tir nghal a.

A zuartunu pawh chuan chutiang dawrtu dangdai chu a neih vawikhatna niin, ka ṭhianpa in dil miah lo mahse Rs 20 in a hniam phah tawp mai a ni. Tichuan a man te an in pek zawh chuan kan chhuk leh ta zel a.

Secondhand lane a kamis zawrhna dawrah chuan min kal pui leh ta, an thlek vang vang a, chutah a paw dal nalh ve deuh mai hi hak chhin turin a lak thlak tir ta, chutah a kawr, tawnzau nen lam a phelh ta, chumai a la ni lo,intih maksak nan a kawng hren nen lam chuan a phelh vel.

Tichuan kamis chu a han ha chhin ta, a kawrkilh kilh malh malh pah chuan a zuartunu hnenah chuan ka hak chhin hi nangmah han ni zawk se aw te chu a la ti ta deuh deuh a. A hak zawh chuan thil ṭul lo lutuk a ti leh ta, a ṭhu chhin, hmalam ipte zen chungin a khawngkhawbai, chutah inkuangkuahin hnunglamah pen hnih an pen, a dingdihlip, veilamah pen khat pen in a ṭhu leh, a chang leh an kun vel, kan bul hnai a mi te pawh chu an nui zo ta vek mai a, a mahlah chu a nui duh der lo mai leh nghal a.

Tichuan phelh pah chuan a man a zawt a, a lei chu a ni dêr mai a. Kal dawn ṭep ah chuan,”Nakkum tun ang hun a i lo la awm a nih chuan kawrchung ka rawn lei leh ang, Bawihte” an ti leh hram pek a. Tichuan pen nga vel kan pen tih chuan naupang thingpui inna no ruak chawi nen hian an han in su bur mai chu, no zawng zawng keh bawk, naupang thal bawk, a tho vat a kan chhar khawm pui hnu chuan, no dang lei na tur chu an pe ve leh mai bawk a.

Naupang kal hnu chuan, “Let leh lawk ang” a ti a. Kan let leh ta a, Engtak chu ti dawn ni maw ka tih lai chuan a kawr lei na nu hnenah khan,”Enteh ṭhiannu, ka tihpalh a” a va ti ringawt a, chuan kan kal leh nghal daih ang reng bawk sia…Chutia kan kal hnu chuan, ka ṭhiana hnen ah chuan,”Engati nge Kamis kha i lei daih a, i lei tum reng pawh a niin ka hre si lova, kekawr aiin i duh zawk a mi”? tiin ka zawt a.

A ni lah chuan,”Duh zawk lo ve, a zuartu nu kha ka duh vang zawkin ka lei ta mai a nih kha, naktuk pawh va kal leh ka duh, an awmna ka lo zawt ta lo kha Pathian mithmuh a ka thil tih sual te zing a mi a ni awm e, ka va zawt leh dawn emawni le” a ti ta duah mai a.

Tichuan kekawr awmna lamah chuan kan kal leh ta a. Dawr tlar phei zinga a tawp ber a mi, a nghaktu la pavalai tak chuan,”Lo en vel ta che u, dak ula han thlir vel teh u. Tuipuirala ka ni Dari te ta, K’u Phaki zuk lak a nih hi, han ha chhin ula han phelh leh vel chhin ta che u, a man chu inbiakremna ang a ni ang” a lo ti ham ham mai a, ka ṭhianpa nen a kan lawm zawng tak mai chu niin.

Heta ka ṭhianpa han che vel zet zawng khawvel eng ka hmuh tirh atanga ka la hmuh ngailoh, khawvel êng ka hmuh tawp ni thleng pawh a ka hmuh a, ka tawn leh ngai tawh loh tur thil a ni ka tawn tak chu ni……..

(Peih hun a chhun zawm leh ah)

Similar Posts:

• Kha tleitiri kha.
• Paws 226-na
• Thlawi Fakna…! (Ka Ṭhianpa Pual)
• Tui ka tla teuh hle, min chhanchhuak
• Ka Bo Trep

Recent Posts:

• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN

This entry was posted on Sunday, October 2nd, 2011 at 11:00 am and is filed under Luangliam. You can follow any responses to this entry through the RSS 2.0 feed. You can leave a response, or trackback from your own site.