[Pi pu len lai by Selet Thanga atanga lak chhuah a ni]
(Hei hi Chalpianga, Suakbuanga leh Khualhrawka te nula rimna a Khualhrawka an sawi tir a ni. A sawi dan hi vawi hnih tal chhiar chhuahah aw niang. A ngaihnawm em vang leh, lung a tih len ve em avangin ka rawn thur chhuak leh tawp a ni e…………)
“Zan lama kan nula rimah lungawi takin kan hawng a, ngaih tha takin kan han mu vang vang mai a, favang lo lam kan a hunin a chakawm hle tawh bawk si a. Zingah chuan favang ni, tute sakhmel emaw ang maia sen no chak, mawi em emin a lo chhuak paw riai mai a.
Zing chaw ei hmain langrawng chem ral lam leh vaihlo tui tak, dumbur thun khah tan ipteah kan han khung a, meitalhlung hriam tawk tak, meibu tang et awt nen kan han khung tel bawk a. Chutah zawng riruah eng dang a leng tawh lo va, hmeh mang lo pawhin thin zawl dawrh khawpin chaw kan han ei ta a.
Chaw lai ding, rum tawk el awl, changel hnah hringin fel thakin min han fun sak a, chi fun nen ipteah bawk kan han khung leh thak mai chu, thlam vela vai hmarcha lo hmin tuar tur mitthlain a hmu nghal uai mai a ni.  Chutah zet chuan, ‘thu hle hle rawh’ pawh min ti se mawnga hawlh ang kan ni tawh a, a theih tawh reng reng loh mai.
Thenawm khawveng, favang lo kan tur bawk an lo chhuak nak nak tawh a. Kan han zui chhuak ve a, kawtchhuah han thlen chuan le, khiang buk ler hring dep maiahte chuan, ngaihtuah lungkham dang nei lova hlim em emin, tlaiberh te chu an lo inbuan bingbilet tawp tawp hlawm a.
Lawmnute nena kan innghah khawma, hlim taka kan nuih za dial dial laite rilru mitthlaa hmu kiau chungin leh buh tha tak hmuh beiseia, buhseng hun thlir ran kan nih avangin kawng pawh eng ang nge tih hre chang lo lekin kan kal zel a. Kan hma lawka nuho kal te chuan tuibur an ham khu liam vut vut zel bawk a. Mahni chhungkaw dinhmun theihnghilh thak khawpin lo lam titi kai tha takin kan phul luam zel a.
Dam pang, fur laia kawng diak zualahte phei chuan nu hniak leh pa hniak pherh veng vung leh her tlen tlunte chu khuain a lo thal hnan ber bur tawh mai bawk a. Rilruin lawmnu hniak a zawng rilru deuh reng a, miten kan rilru an hre palh ang tih a hlauhawm hle. Ngaihtuah mang lova an hming lam chhuah nawlh mai palh pawh awl tak ani. Mahse rilrua hre kiau rengin, inthup tlat bawk siin kan saisik rut rut zel a, khua a har rilru ngawih ngawih mai a.
Tichuan lo chu kan va thleng ta ngei a, dai a la hul rih lo va, puan ven huh hnap khawpin kan han pal a, buhte lah chu a lo tulzum peuh poh tawh bawk a. Rilruin kawng lam hre chang tawh hek lo, mau bul chhuihin kan han petek leh uan uan vei thin nen. Thlam kan va thlen tur hre lawk lova mak ti ni awm takin thlam vela anthur parte chuan min lo en tak heu ho hlawm a.
Thlam khawhar tak mai lah chuan kan thlen hlan nghakhlel em emin min lo thlir reng bawk a. A hmel han en reng reng paw’n a khawhar rei tawh tih hriat fahranin a thing thap mai a. Mittui pawh a tihnai kuar mai. Mahse mahnia tah phut mai chu a zahthlak tur zia kan hre tho va.
Thlam leika kan rah rik veleh kawmchar lama ngawi renga lo thu, vathute chu an thlawk chhuak vawn vawn a. Hnawmhnawk kara laitel mam zarte pawh an tleng chhuak zek zek bawk a. A aia lian deuh telpui tleng ve zuk chu chau leh ta der niawm takin, dak ur chungin a ding hle hle bawk a. Thlam namthlak kan  han hawng ri thak a,kan han kuk raih raih a. Chumi thawm hlau chuan lo mawng lama thehleite chu hmanhmawh phelengin ‘chaka chaka chaka’ ti chul chungin vau chhehrawpah an tlan lut rawk rawk a.
Ka han hawi vel a, hla vak lova thing ding ro lerah chuan thuro nupa, an induh thu a ruk tea inhrilh tawn ni awm tak maia hmui leh hmui inchuktuahin an lo titi melh melh a. Tichuan mei chhem tumin phuai ka han met a, phuai muh han vai alh pap pap maia mei han chhem khuk chal chal mai chuan, kim taka thut khawm lai bawk a hriat chhuah leh loh theih loh. Thlam chhung han hawi vel lahin, lawmnu sulhnu meivap leh vaihlo kuangte hmuar irh iarhin a lo let rem rum mai si a. Thinlai a hnim, hmanlai aw…hmanlai aw….!
Lo ka han thlir vel a, zan dai fim a lo dawh khawl sa sawi buak tum ni awm takin, dawl chu a lo insawi hluau hluau hlawm a. Chibai min rawn buk tum ni awm takin, pi-khawizu leh thosite hmai hmai hrul lawk lawkah an lo thlawk sek bawk a. Kawltukna leh tuidawn velahte tho tual an lo inchhaih vir zawr zawr bawk a.
Tuma ngaihsak hlawh lovin, rum vang vang chungin meizuk ka hansiama, ban nghengin kan han zu vang vang mai a. Thlam chhung tukrawp kua-ah chuan khuai mawng rek a lutin a chhuak sek mai bawk si a, a khawhar thlak vang vang khawp mai. Ral lehlam leh mahni bul vel kan thlir chhawk sek mai a, a eng zawk nge lung tilengtu zawk pawh a hriat theih tawh lova.
Lo kan vel turin ka han chhuak a, kan kawng neihchhun lah chu buhin a lo ping zo tawh a. A nal bawk si, buh tih tliah palh hlauh nak alaiin kan tlu thelhin buh hung ka han bawh eng huai mai a. Lo mawng lama maite hnum tha tak tak lawh ka han tan ta a, mai par kawrawng chhungah chuan englo hloh zawng ni awm takin khawichhur an lutin an chhuak chhen bawk a.
Kan thlawhhma chu a la him hle a, buh pawh a tha hle mai tih kan hriat hnu chuan chaw fak turin thlamah ka han thu a, rilru khawi dangah kal hek lo, chaw thial chawl chat chat chungin khua kan han hawi vang vang a. Ral lehlam pangah chuan nu dawrawn leh bething buk hi an lo inpel zut zut tawh a.
Chu veleh hawn a hun ta tih hriain ipte puar teuh chung chuan thlam chu ka han khar tha sawk sawk a, vawi thum lai ka han kuk raih raih hnuah chuan kan hawng ta nal nal mai a. In thlen veleh chhungte buaipui turin ipte puar tak chu chhuatah ka han hung hnawk a. Chhungte’n ‘lo lam engtinnge a lo awm?’ an tih pawh hmai phih pahin kan han chhang liam tawh mai a. Rilrua cham reng lawmnu puan tahna bulah kan va mawih leh ta suah suah mai a ni.
Khawvel hi a chang chuan a nuam teh bawk asin aw. Vanram tla fual kan chen zawng a ni ve ngawt a lawm. Mahse mi u te zun ngai reng renga uai hi chu a retheihthlak hle bawk si, a ngaihna tak a awm lo a ni ber e. Tu zun mah hi ngaih tur awm ta lo sela chuan khawvel hi a ho hle awm bawk si. Mi u te zun han ngaih vang vang mai chu nawmna tak chu a awm ve a nia,†a ti a. An za chuan an nui ta dar dar a.
October 6th, 2011 at 8:19 pm
Post thar! yessss!!! 🙂
October 6th, 2011 at 8:21 pm
Chhiar chhuak dap teh ang..
October 6th, 2011 at 8:25 pm
Chhiar hmain comment teh ang. A va tihzia ve, khua a har hman a lawm le. (H)
October 6th, 2011 at 8:28 pm
vawihnih chhiar zawh hma chu comment lo teh ang 🙂
October 6th, 2011 at 8:42 pm
Tui pui phak leh an rilru puthmang tur suangtuah pui pha kan tam awm lo ve. Chawfak dawn hnaih a maian no tak mai sih chawp an han bai a, Lengser an han thlak ngei a. Tlangval fel deuhvin vau tuiah insilfai pahin Chakai an rawn man nual a,(Aiawt a awm phei chuan kham khawp an rawn hawn a) an han chhum chawp chuk chuk a, chawei a va han tui chiang thin em. Thian zahoa Sa keng ngei a Lo zawh te kha a nuam thin e.
October 6th, 2011 at 9:32 pm
a tawp ah chuan Post thar awm hram ee!! Favang hunlai hi Inneih hun lai an ti 😀 😀 chhiar ang
October 6th, 2011 at 9:55 pm
A seizawng ah hnam sakhua post emaw ka ti hman tep alawm le! 😀
October 6th, 2011 at 9:55 pm
ka pawh pha vak lutuk lo nain ka mitthla thiam ruai ruai mai,ka lung a tileng ve tho 🙂 (Y)
October 6th, 2011 at 10:21 pm
Ka lung a ti leng veng veng
October 6th, 2011 at 10:24 pm
Lo feh haw phah a, a neitu te hriat si lova kawng kam vel a fanghma han lawr zeuh zeuh hi a tui bik…ngaihnawm dap dap hle mai
October 6th, 2011 at 10:25 pm
Tawngkam lar vak tawh lote:
1) Langrawng chem
2) Dumbur
3) Meitalhlung
4) Meibu
5) Tuibur ham khu.
6) Buh tulzum
7) kawmchar
8) Vau chhehrawp
9) phuai muh
10)Pikhawizu
11) Kawltuk (Tuidawn for some )
12)tukrawp
13) khawichhur(hria an tlem tawh mai thei)
14) dawrawn
15) bething buk
Khawlum (na hmun)ah hi chuan Favang pawh hi a tawrhhlelhawm tho mai a lo ni. Ngaihnawm khawp mai.
October 6th, 2011 at 10:30 pm
A ngaihnawm e (Y) , a lunglen thlak hle mai . .
October 6th, 2011 at 10:36 pm
khuai mawng rek hi Khawitairek kan tih hi a ni tho ang maw ?
October 6th, 2011 at 10:48 pm
@Maya, ni tur a ni. A mawng chu a pawng/puar tha viau a, a tai a rek ngat a ni zawk a ni tiraw?
An thu tawpna hian lung hlui a tileng thei dawn alawm male… 😉
October 6th, 2011 at 10:50 pm
#13: Khuai tai rek leh khuai mawng rek hi thuhmunah kei pawn ka ngai.
October 6th, 2011 at 11:00 pm
@sandman : Thank khiu, Admin zawng zawng hi an Puja ve anih hi kan lo ti tawh mai a, vawiin chu ka hman ve ka rin avangin post kan submit ve a nia, naktuk lamah a chhuah ka lo beisei zawk a.
Aizawl lam chu ‘dai’ a tla tawh em aw, B’lore lam chu a tla tawh ngei mai! (nizanah ka hmu)
October 6th, 2011 at 11:06 pm
Hehe hei chu ‘Pa nuamsa ‘ tih ami kha ani maw..Khualhrawka te, Chalpianga te, Suakbuanga te..An Numami ber kha ania ka lawm ni..An nula naupang ber la a phuang si, Khualhrawka rilru awmna zawttu ngei kha :-P.
October 6th, 2011 at 11:07 pm
lunglenthlak, hmanah ka pute khua ah ka zin a, thlam bula maian thar sar mai chu kan bai a,min vil tir a,anthur leh thlam bula maite,etc kha i duh2 thlak rawh an tia, ‘a pi anthur ka thlak teuh ‘ ka tia, chaw kan han fak dawn a, hei hi enge an tia,an han en chiang a, VAIHLO hnah ka lo thlak ngheng..a tui vaklo
October 6th, 2011 at 11:09 pm
‘Favang’ han tih ngawt pawh hian lung a tileng. Khi thawnthu khi tunhma khan ka chhiar thin, chhiar leh tur ka duh ngawt mai.
October 6th, 2011 at 11:16 pm
#19 : In zir ve hman lo a ni maw..! ‘Pi Pu len lai’ bu a ‘Pa nuamsa’ tih atanga lak anih hi. He he.
October 6th, 2011 at 11:19 pm
ka hrethiam pha lo hle mai aaaaa….. mahse a hun lai a awm chu chakawm ve duh khawp
October 6th, 2011 at 11:23 pm
@lushai_er, zir lo, mahse ka hre lutuk. Mizo thawnthu ka chhiar nasa thin. A rei deuh tawh vangin ka theihnghilh, han chhiar khian ka hrechhuak leh deuh a.
October 6th, 2011 at 11:26 pm
#21 : Kan Favang hman dan nen chuan a dang tawh khawp mai. An (hmanlai mi) lunglenna boruak erawh hi chu rinna mitthlain kan thlir pui thiam vek chuan ka ring.
Tangka Sum-in hlimna mihringte a pek ai chuan mahni kutkawih, rim tak a an thawhrah an seng hmabak hlimna a pek hi a nasa zawk hial ang em ?
October 6th, 2011 at 11:28 pm
Pawl sarihah emni kan zir thin kha aw… Lung a ti leng mang e. (Y)
October 6th, 2011 at 11:31 pm
@lrp : Mual i liam ta mai nge, khawi lam nge i tuan tak le ?
Vawi hnih vawi thum lo chhiar chhuak rawh…lolz
October 6th, 2011 at 11:37 pm
Khawichhur kan han veh a, maian par chhungah an thlawk lut han hmuh fuh a, a par kan han hmer phui hmak mai thin kha chu a ngaihthatthlak thin teh e. Uluk tak maiin a zang kan han la a, lazaiin kan han hling a khawvel kha kan tan khan a lova nuam thin em ve aw..
October 6th, 2011 at 11:46 pm
#24: Hmanlai Pa Nuamsa nawmsak dan kha tunhnu hian a lo hrehawm awm mange aw…..ka ti vawng vawng thin. Mahse, kan lo tluk lo hle tih erawh phat rual a ni lo. Vangpui lunglen erawh hi chu lo nei kher lo tan pawh fur khaw cheng atanga han chuan chhuah hi chu a nuam ve hrim hrim a lawm.
October 6th, 2011 at 11:53 pm
Favang hi a boruak a nuam a ni satliah mai lo va, awl-len lai a nihna hi a hlutna tak a ni thin; furpui hnuaia hlo thlawh a tul tawh lo va; hlo thar an tiah tawh loh bakah buh-bal an lo lian zo tawh a(an hmin tan) dip hlum rual an ni tawh si lo. Miin lo an zo sup sup a, hna a rip lo va, an thlahlel em em a ni.
October 6th, 2011 at 11:57 pm
#28: Favang hi an nghahhlelhna chhan pakhat dang hi chu ‘Sechhun /Khuangchawi’ an awm thin vangte pawh ani kan ti thei ang em?
October 7th, 2011 at 12:03 am
# 25 Lushai_er..kan hawi paw leh pheu tawh. Delhi kha ka cham rei hman si lo a, ka rawn contact ta lo che. 🙂
October 7th, 2011 at 12:06 am
27@, ningawt mai, mahse an hunlai ang nga hnathawh inang vek mai, a hreawm emaw a nuam emaw pawh nise an han thawk ho dial dial mai thin kha chuan khawtlangah pawh inlungrualna leh inpawhna chu a siam khawpin ka ring.
Tunlai a kan khawtlang nun lo khawlohna tamtak pawh hi inpawhna kan nei ta lo lutuk hi a ni te hian ka hre thin.
An tan kha chuan favang awllente kha a hluin a mawi danglam dawn em a sin. Mitin kha an lawm hun leh hahdam hunte, an hreawm hunte kha a inang tlang vek mai si a.
October 7th, 2011 at 12:07 am
#30 : Va pawi ve, lo haw leh hun a ni mai a lawm.
October 7th, 2011 at 12:11 am
#31: Lunglen changa han chhiar mai tur article tha deuh deuh han thawh thei ula kan va duh em. ‘Thal Favang’ by Zikpuii Pa kha zirlaiah te an hmang an tiin ka lo hria a, rawn post thei ula kan va ti ve aw….
October 7th, 2011 at 12:18 am
#29 a va dik em.
Hrantumvala ngei khan chengrang chawiin zo lentu hnuaiah lunglem nei lovin a kai vel a; Zawhzawzo tumin mualveng pa chuan thawmmawl a thawm belh a; zaukhan-thuamah Lengi leh chalmawia an han intawk lawi chial mai thin dawn a nia. Chhungpuinu vau hlim lo sul haw chu Khuangchawi-pa talh tur sepa chuan kawtkaiah a lo melh tum bar mai bawk a. Thimhmulah rawlthar rualin sanghar ruang zawnin buhfai an khawn diat diat ngei bawk ang.
‘Rualtin kan khum e tlang lianah
zaleng kan ngir khua lianah
Khuanu’n kan sawmfang maltin sawm se
Vangpui khaw nuam kan chhir e”
an tih duh hmel.
October 7th, 2011 at 12:18 am
33@, ka lo ngaihven ang nge, phone atanga on line ka nia, word limit hi a awm roh pek a, mahse tihdan a awm mai ang.
October 7th, 2011 at 12:22 am
Ngaihnawm reuh mange a :-S (Y)
October 7th, 2011 at 12:24 am
34@, a va tha ve aw, ka lung a kuai mang nge.
Sanghar leh mu ruang zawn hian vawi thum chu buhfai ka khawn ve tawh, thinlai mu hnu i kaitho e. (Y)
October 7th, 2011 at 12:30 am
Post dangah sawitur ka van lai leh lunglen em em lai tak mai a chhiar atan chuan a aia thlan tur ka nei lo. (Y) Vawihnih chhiar rawh u i ti na a, a thupui hmuh ringwt pawh a ithilsawi hmu iar uar tan chuan vawi 1 chhiar pawhin LUNGLEN MITTUI afar dawn alawm le..
October 7th, 2011 at 12:32 am
A ngaihnawh khawp mai….
October 7th, 2011 at 12:35 am
38@, kan in ang chiah, he post hi ka vil tlat dawn.
October 7th, 2011 at 12:42 am
Zankhat ‘Sa-uak’ hi kan awk a, kan zawn a, khawlai fangin buhfai kan khawn a. Min pe tha duh vak lo kha an awm nual, mahse han dawn kir hian ar an lo vulh ve hlawm lo ni tain ka hria. Ar ngah deuh ho kha chu an lawm der thiam khawp mai.
Ka connection a chiangkuang lo hle mai a, zanin ber kher chu!
October 7th, 2011 at 12:47 am
Favang a lo thlen dawn hian ‘Thereng’ hi a hram thin khan ka hria. Ka pa hian chu khua a thal dawn, Favang a in her chhuak dawn a ti thin. Tin, Lailen te pawh kha hmuh tur an awm tan tawh bawk anga. Zing dai fim mawlh te kha aw !
October 7th, 2011 at 12:52 am
Kan zir thin ‘Pa Nuamsa’ kha chhiar nawn a chak awm rum rum mai a!
Hman lai deuh nun kha a awhawm chang hi a awm ve tho mai. Ei ber pawh nise buh chinga lo neih tak hi chu ka peih vak lo, buhfai hi a tlawm ve ang reng si a. 🙁
October 7th, 2011 at 12:54 am
lushai_er..Sauak chu sanghar lam chi deuh em ni? A hming hrim hrim chu ka hriat vawi khatna..
October 7th, 2011 at 12:55 am
Kan sanghar zawn tum khian alawm kan buk lem sakah kan puah a, kan buhfai khawn sa thenkhat kha kan chhum bawk a, khawnvartui bati alh lian zet mai hi kan chhi a, kan thianpa pakhat khan a pal tlu palh a, kan chhawlbuk bang kha a lo ro tawh si, a man kai ta, kangthelh buaiin kan buai a, chaw kan ei mumal pawhin ka hre ta lo. A lova nuam thin em !
October 7th, 2011 at 1:18 am
Kan khua atan chuan mut a hun ta hle mai, vangpui lunglen hril chung zelin, muttui vek u le.
October 7th, 2011 at 1:19 am
Zan rei tawh lamah chuan CHINGPIRINU in THIZUN ati thin asin. Khawvel ava inher danglamin thingtlang a isawi ang Favang hun hman pawh mitthla leh ngaih mai loh chu tihngaihna dang a awm meuh tawh lo. [Chalrang ah chuan ala awm asin le..]
October 7th, 2011 at 1:28 am
Lushai_er #41 Sanghar awh tum a artui kan khawn te pawh min ti hrechhuak ve mange a.
Ar lam sawi takah chuan, kan ar hi mu hian alo hel thin a. A chang chuan a la thin bawk. Kan hmuh hman hi chuan ka pi nen hian, “mu khah mu khah..” tiin ban vaiin kan au chiam thin. Ka pi te kha thlanmual lei daiah a mu ta mai si ale. :-S
October 7th, 2011 at 2:43 am
@lushai_er Bangalore ah hian zing dar 6 -7 hi lung a tileng leh zual, vawt deuh sur a, dai siam tu ang chi chhum ni si lo ang kha a la awm chiai bawk sia, chuan ni a chhuak tho bawk sia, fresh lutuk.
@ any admin, engtin nge password hi thlak dan tur, comment ka duh ve te hian ka gmail hai vak a ka password lak chhuah a ngai a, chutah ka password lah hi a har over lutuk a ka hre thei lo.
October 7th, 2011 at 4:02 am
#11,,keini naupang ho chuan a awmzia hriat loh kan nei nual ania..min han hrilh nghal la kan va ti em! Kei lo pawh hre chak an awm in ka ring tlat.misual nih nawm/that na. (Y)
@lushai_er,,ava ngaihnawm in ava tha ve aww..! horror lampang han fawm leh tawh la khawngaih in(my humble request.)
@sawhthing,, log in>dashboard>profile>keuh 😉
October 7th, 2011 at 4:05 am
#11,,keini naupang ho chuan a awmzia hriat loh kan nei nual ania..min han hrilh nghal la he post leh comments te hi a va’n hlu zual dawn em! Kei lo pawh hre chak an awm in ka ring tlat.misual nih nawm/that na. (Y)
@lushai_er,,ava ngaihnawm in ava tha ve aww..! horror lampang han fawm leh tawh la khawngaih in(my humble request.)
@sawhthing,, log in>dashboard>profile>keuh 😉
October 7th, 2011 at 4:24 am
@Lamji TY.
October 7th, 2011 at 7:48 am
Sanghar ruang zawn te in lo sawi a nimaw . ka lung a va leng em . .Artui leh buhfai kan khawn khawm khan Buk lem ah kan inbailemchhuan ngei a . a lo va nuam thin em .
October 7th, 2011 at 8:07 am
11@Pu Vakul rawn sawi zauah ka hriat hriat(inthlahrung deuhin)
1) Langrawng chem- chempui chikhat.
2) Dumbur- vaihlo paina bur
3) Meitalhlung- lung chikhat nawh tek theih
4) Meibu- lapua ang tak a uk deuh meitalh nawh tek a lo mut kai tur
5) Tuibur ham khu- hmeichhe ho meizuk ve thin, a nun that vak loh chuan a phunthli an pawt phawi deuh a an ham khu luai mai thin.
6) Buh tulzum- buh vui tur, a rai, a laiah a hnah han inkhawr zum cho zaih hi
7) kawmchar- In a kawngka pui lo lam hi.
8)Vau chhehrawp- lo sir a lo hal leh mangkhawh a kang bang an khawh khawm
9) phuai muh- mei fawh kai atan a thing sah phuai
10)Pikhawizu- khuai chikhat mi chhaih ve chhen thin
11) Kawltuk (Tuidawn for some )- kawltuk hi ka hre chiah lo, kawltu chu tuthlawh a nia(h). 😛
12)tukrawp- thing chheh khawm
13) khawichhur(hria an tlem tawh mai thei)- parzu tlan chi khuai chikhat
14) dawrawn- emping ang lian leh sei tak
15) bething buk- bete kawmei loh chi kung sawina (belh zeuh 🙂 fa-buh, vang-vanglai. Favang-Buh vanglai)
October 7th, 2011 at 8:12 am
Favang hi a nuam viau thin a,keini ang tan erawh chuan thlasik-Skul chawlh leh Krismas kha kan nghakhlel zawk mah awm e.
October 7th, 2011 at 8:21 am
Naupangte siah chuan Chhuaklinga hi mizo tawng upa leh thilhluite i hre thin khawp mai. Tangkaipui tak tak an tam ka ring. Favang hi chu a nuam a ni; nipuilai angin ni a sa rum rut si lo, fur ruahsur, khawdur leh diak kawi a awm tawh lo va, Lui tui a fim tawh si. Thlasik vawt vin tuk a la awm si lo. Lui kal, thangkam, ramvah nawm hun lai a lo ni. Tin, loneimi tan hlo thlawh hah a ngai tawh lo va, a rah seng hun nghah veng veng a ni tawh mai si. Thla eng te hi a fiahin a mawi bik a, Sechhun-khuangchawi thla intìhhlim hun a lo ni a, inngaizawngte tan nupaa insiam hun tha a lo ni bawk si. Nichhuak leh ni tla te pawh hi an mawi bik a nia. Lung a leng duh…
October 7th, 2011 at 8:31 am
Lung i va ti leng vele Postupa (Y)
October 7th, 2011 at 9:04 am
Favang pic hi misual regu deuh chuan kan hmu ang, mahse tlawh khat deuh tan favang sawmfang misual.com post (XaiA) hlui atangin
http://www.misual.com/2011/09/27/sawmfang-2/
October 7th, 2011 at 9:07 am
#51 : Meitalh leh meibu chu hei post hlui (Shailendra) atangin a lem nen a hmuh theih bawk.
http://www.misual.com/2011/02/11/mei-talh-pi-pu-te-lighter/
October 7th, 2011 at 9:21 am
Em chi hrang hrang, tah phui vek chi-ah chuan :-
1. Emping :- Tin 1 – 1.5 dawng.
2. Empai :- Emping ang deuh, tin 2 – 3 dawng.
3. Dawrawn Siaktuam :- Empai aia sei, hmeichhe phurh bik (tunlai chuan an inhmantawm tho) tin 2-3 dawng.
4. Dawrawn : Siaktuam nen a san zawng inang, hnang sin te a tah. Tin 2-3 dawng. Mipa hman chi.
5. Tlam em : Empai ang deuh tin 4-6 dawng. Parlak a buh sengten an laksa chhunkhawm nan an hmang thin.
October 7th, 2011 at 9:24 am
“Kawltukna leh tuidawn velahte tho tual an lo inchhaih vir zawr zawr bawk a.”
Heta kawltukna hi chu nghawngkawl thlanvawng atanga an tukna a sawina a ni thei em ?
October 7th, 2011 at 9:26 am
kei chuan ka enjoy pha vek.. Thingtlang ram hna kha chu ‘lawmna tur hlir’ a lo ni..lo tur an han pawta an pawh fuh deuh chuan an lawm em em a. an han vat a, ram a tha..a kan that chuan hlo a awl khawp ang..tiin chapchar awllen thlir ranin phur em em in an vat a.. lo an hala ‘a kang tha’ an tia, an lawm leh em em a. thlai leh buh chi an han thlaka a to that chuan an hlim leh em em a. Chutiang zelin..kum tluanin hlimna leh lawmna hlirin hun an hmang liam thin.
October 7th, 2011 at 2:45 pm
Ling-ling + lushai,, lawm tuk2 e.. (Y)
October 7th, 2011 at 5:40 pm
#44, @lrp : Sa-uak chu Sanghar tiat vel, mahse vutbuak rawng a ni thung a. Tun hnu hian ka hmuh leh tawh pawh ka hre lo ! Kan awh tirh chuan Zanriah ei kham, thimhlim hi a ni a, a ri a ri a. Kan han en chu a lo inkhai zuar mai a, thingfakin kan vawhlum ta ani.
October 7th, 2011 at 5:51 pm
@Lamji : “Chaw lai ding” tih hi in hria em aw?
Ka hriat dan hi a dik loh chuan min rawn hrilh mai ula.
“Hmanlai gas(LPG)awm hma chuan thing hmanga rawngbawl a ni thin. Chaw hi a so bawrh bawrh hian kan suan a, meilumah kan ur hmin thin, kan her kan her kual a, a chhinna khuhhriang ke chhungah khan chi kan dah deuh kher thin bawk. A lai hi a so pawng thar thin a, a rum bik thin.
Kutbuli phei kha chuan ‘Chaw lai ding’ lo chu a ei duh miah lo an ti thin.
October 7th, 2011 at 7:10 pm
Chaw sawi takah chuan chhunbela mizo buhfai ngei mai han chum a, han her chhuah leh dap mai, zo arpui tuilai anthur leh buh tlem thlak nen a han ei ngheng mai thin kha chu mizo nih man a awm thin teh e.