Mizorama carnival siam hi Kulikawn YMA tih chhuah a ni a. YMA tiha thlak anih hma, YLA anih lai khan Pu Biaktluanga chu Calcutta lamah lehkha zirin a awm thin a. Chutih lai chuan Maidan hmunah sapho carnival siam a hmuh thin chu Kulikawn vengah a rawn ching chhuak ve ta a ni. Kulikawn/Mizorama carnival neih hmasak ber chu December ni 28, 1939 (Ningani) ah ani nghe nghe.
Keini angin kan hriatthiam ve phak chinah chuan carnival pawh an tih tanna alo rei tawh viau mai a. Chutiang vang chuan Kulikawn carnival chu a phuisuiin, a ropui ve thin hle mai. Carnival neih dawn hnaiah chuan keini rual naupang ho chu ramhnuaiah min tir liam thin a. Hnah lak a tul thin vang a ni.
Ke kawng mai anih thin avangin kawngpengah te chuan kan kalna lam hriat theih nan kan kallohna lama “Chhawl” dahna chang te kan inzir ve zel bawk a. Chutiang chuan naupang te pawh phur takin mahni chanpual theuhah vengchhung tan kan tangkai thin hle.
Kan hnah la (Chengel hnah) kan haw chu Pu Lalsangliana (Lianliana pa Suddena ziaktu) te bathlar zau thin takah chuan min dintlar tir thin. Chutah Pu (TV) Lalthanzuala (Patrick Hauhnar (fam) patea) chuan, “Sweetan sweet a sem dawn tih rawh u le,” a ti a. A sawi ang chuan keini naupang ho chuan kan sawi thap thap thin a, sweet chu a mal malin min sem thin. Chuta tang chuan tun thleng hian “Sweet-a” tia koh leh hriat anih phah ta nghe nghe. Khatiang chithlum mum min pek khan kan hlim ve tawk em em mai thin.
Phur takin kawtthler cheina tur lehkhamawi te chu nu leh nula ho kan cheh pui a, buara hruiah kan belpui thin bawk a. Engkim maiah vengchhung kan tangrual tha thin em em a ni. Venghnuai Sihpui tuikhur kalkawng, tuna Pu Ngurhuzaua MCS te kawmchar lamah hian YMA in in asak sak/chawm, mi ang chiahlo a awm thin a. Chumi thleng chuan mahni tawkah kan buai tlang vek ani ber mai e.
Pu Biaksanga (BS-a) USA a awm nu, Pi Hrangi kha carnival police hotu lemah a tang thin a, a taksa pianphung leh a khawsak lem thiamna chuan mi a chawk hlim thin kher mai. Ani lah chatuan mual min liamsan ta si ale! Carnival tanni alo thleng a, infiamna chi hrang hrang a awm bakah, naupang lawmah merry-go-round te leh magic show te, thil tam tak hmuhnawm leh intihhlimna a awm thin.
“
Naupang kan la ni a, ka nu leh pa ten kan unau min hruaiin, lukhum chhip zum kan khum a, lungkham reng neilo vin, hlim takin kan hun kan hmangral thin. Lapaw chini her vir muai muai te kha kan kil bial laih a, khabe kham thum khawpin kan ei mai thin ni khan ka hria. Gorkhali nu chhang-kual te kha avan ngaihawm thin vele, tui ti tak khan kual khat pawh nei ila kan insem diat diat thin.
St. Pauls zirtirtu thin Pu Zorama (fam) kha Punjabi anga inthuamin, annu kha Punjabi nu anga inthuam bawkin kawtthler an rawn fang ta thin a. A nih loh vek leh joker lemah te khan a tang thin a, keini naupang ho chuan kan zui dul dul tawh mai thin.
Tlangval hoin Red Indian anga inthuam ten cowboy te nen kawng an rawn zawh (parade) a, fancy dress chi hrang hrang hmuh tur atam thin hle. Bazatawna! leh Pu Ruata (ka ni pasal nau) te leh Pu Thanthuama band party member hlui Pu Zonghingliana ten Baza (bagpipe) leh khuangpui te vuain mipui min awi thin. Anni hi an peih khawp a, kumhlui thlah zan emaw Kristmas zan emaw hian kan kawmchhak tlang atangin mipui chutiang rimawi chuan an awi peih fo mai, an fakawm takzet a ni.
Kulikawn carnivalah hian tumah awm awl tum a thianglo a ni ber. Ziak emaw ngenna emaw a awm pawh ani chuanglo. Chhungkaw khat ang maia khawsa tlang kan ni a, chuvangin inthuam zuar pawh ni sela, an mamawh naah chuan kawngpui atang pawhin mi inchhungah an pawtlut rawih zel mai; nuam deuh a ni. Kan lo tlangval chho ve ta bawk a, keini pawhin kawngah nula lo kalpui chang kan nei ve bawk a.
The Three Amigos: Pu J.Lalhminga, ka pa, Pu Ngurhuzauva.
Tumkhat chu carnival neih laia vengdang nula ka kalpui lai chu u Te-i (Lianliana (fam) nau) chuan “Henry lo kal lawk teh u,” a ti a, an inchhungah kan zuilut ve mai a. Chutah chuan mi an lo phu mur mur hi alo ni a. Engmah sawi set set lo chuan u Te-i chuan ka kawr haklai aphelh nghal bawrh bawrh ani ber. Kei chuan min duhna chhan ka hria a, nui vur chung chuan ka inpelh ve sawk sawk zel a. Carnival fancy dress a tel turin vengchhung mipa an hmuh theih remchang an lo ko khawm alo ni a. Ka kalpui nula pawh chuan min pui chhunzawm ve ta zel mai anih chu; tih tur dang nei heklo!
Min thuam dan chuan nuih a tiza fahran lo viau dawn a, kan hlim phian lawi a! Kei, Malsawma leh Te-a (fam) s/o J.Lalhmingliana te unau tih loh kha chu patling thankin thah mai kha nula nalh tak angin min chei ta a nih chu. Ka high heel bun tur kha thianpa Op-a farnu Zothangliani pheikhawk min hawh sak a, kei lah chuan ka rap leka, a thler ta duai a, lehlam khai lauh lauhin ka kal phah ta a ni; ka bun tawk dang awm heklo.
Tichuan, Salvation biakin kiang kawn zaulai bera truck an hun chung chu stageah an siam a, kailawnah chuan kan lawn chho ta a. Keimahni darah theuh hian “Miss….” tih a inbel a, kei kha “Miss kawngphei” ka ni ta awm e. Truck hnung lawnna kailawn kan kal chho chu mipui an nui ta hum hum mai pek a, in ngaihbel a awl kher mai. A hnua ka hriat leh dan chuan kan zing ami pakhat Pu S…a chu a mini ven kar atang khan apen chhoh pahin a tilmu alo lang tle zeuh zeuh thin alo ni awm e.
Hetiang hian hlim takin Kristmas kan thlahliam a, kumthar kan lo hmuak thin. Rimawi tum thiam chi hrang hrang ten hun an hmang thin a, naupang ber atanga a upa ber thlengin kan hlim tlan theihna tur buatsaih theuh alo ni thin. Vengchhung/khawtlangin thianghlim taka pawisa a tuakna anih bakah Mizoram angah chuan intihhlimna tur awm vak heklo.
Khatianga carnival kanlo nei thin kha alo hlu thin ngawt mai. Tunah zawng, eng kanti ta nge, vengchhung pawh tun hma angin kan tangrual tawh lova, carnival leh intihhlimna, Kulikawn kan nih bikna te a chuai zo ta. Thil tamtakah erawh vengchhung tangrual pawl tak kan la ni tho awm e.
Kulikawn, ka veng, ka seilenna, ka chhungte vek ang maia ka en te ho, ka tan an va hlu thin tak em!
NB: Post thar a awmlo em mai a, ka blog ami ka rawn paste tawp mai. Tin tunkum Kristmas leh kumthar inkar hian carnival siam an rawt leh anih hmel 😀
October 6th, 2011 at 9:40 pm
a nih khi.
October 6th, 2011 at 9:40 pm
Kei chu Kulikawn carnival ah ka la kal miah lo, tunah hian Comedian search 4th round kan en mek.
October 6th, 2011 at 9:47 pm
(Y)
October 6th, 2011 at 9:54 pm
The 1st ever carnival in Mizoram a nih chu
pix i nei tha ngei mai
October 6th, 2011 at 10:05 pm
Ngaihnawm hle mai, ku hva chu khum zum hle mai tak a, i ke vei lam i rah lek tlat danah khian naupang fel thlip thlep tih nuam tak chu i nih duh loh hmel (rin thu) 😛 😀
October 6th, 2011 at 10:33 pm
A ngaihawmin a hlu,kulikawn nge2 inlo changkang hma e..by the way pu.HV pic 3 na ami khi ava hmeltha ve..heh..
October 6th, 2011 at 10:41 pm
(Y)
October 6th, 2011 at 11:03 pm
Ngaihnawm aimahin a hmuhnawm zawk a ni. Thil eng emaw kan hriatchhuah zawk chu….
October 6th, 2011 at 11:10 pm
Klk carnival hi tunhma kha chuan chhim turin kan va kal ve vang vang thin. Kan thianpa hi kel leh varak man thei zet mai a awm a, khawtlang an tangrual hlein ka hria. Tun hnu khan a puipa te an tha a lo thum deuh hnu khan an chhunzawm tha ta vak lova, Sikulpuikawnah Ku_Shaia te veng hian ropui takin an ti ve thin thung.
Assam Riffles ho khan carnival kha an uar ve thin, Old Monk bur kha man an tum luai luai thin 😀 :hmanlai an chang ta mai si a:
October 6th, 2011 at 11:28 pm
Lung hlui a leng mang e, kir zai an rel si lo … Thakthing Bazaar, Khatla, Zarkawt, Chanmari — CARNIVAL nei thin veng an ni, che pui ber chu Khatla an ni thin.
October 6th, 2011 at 11:59 pm
va pui tek tek ve a
October 7th, 2011 at 12:38 am
Kulikawn carnival hi hman lai deuh ami kha a engemaw changkan zawk riua hmel tlat!
Tombola thai tluk tluk mai ila a nuam ber mai.. 😛
October 7th, 2011 at 12:44 am
Iblog ah ka hmu tawh reng ani.. Chuta ka chhiar leh ngaihtuah chu tunah pawh hian ala ngai reng. Kekawrte in ha tawh em? 😛
October 7th, 2011 at 1:34 am
rohlupuia chalrang #13 han kan awm anga halo pawh kan awm ang chu, tiraw? 🙂
October 7th, 2011 at 1:51 am
#14 ha lo zingah ila tel duh hmel ka ti deuh a.. hairehai..
October 7th, 2011 at 1:59 am
rohlupuia chalrang #15 ka nua strict reuh lutuk. 🙂
October 7th, 2011 at 2:05 am
#16 a ngaihawm duh awm mang e.. keini ah chuan zinglam dar 2:00. Nangni zantir lampang in hmang mek em?
October 7th, 2011 at 2:10 am
#17 tunah chawhnu dar 4:39 chiah chiah a ni.
Ni e, Kulikawn carnival hi chuan ka lung a len thin khawp mai. Mihlun ho lah an liam zo titih ta mai bawk si nen. Lung chu a leng duh chiang alawm. :-S
October 7th, 2011 at 2:25 am
#18 ka lawm hle mai. Nang zawng nunhlui ngaihman a awm deuh alawm, thlalak hmuhtur te inei thlap zel a. Keini ve zawng, SEPHUNG kan lai lai thlalak chu sawiloh sawi pawh ansawi tha peih tawh lo(ka la naupan viau ai hian ka ti nasa ve thei khawp mai).
October 7th, 2011 at 3:44 am
Haha!! Thil min ti hrechhuak thut ka nui vur2 mai….kan school kal laiin The 3 amigos ho signature move kha class room ah hian kan ti nasa thei lutuk. 😀
#12,, ha….ha….tombola…ka nui nasa lutuk…new market chungah an tih nasat theih thin kha…kan dawr neih lai in ka han en ngei thin alawm….’….double hockey stick…seventy seven'(fan deuh ruih in 😀 )ha….. Tum loh deuh a mahni a ka nuih tak vur2 chu. 🙂
October 7th, 2011 at 5:18 am
Pu Hva hi naupan lai leh tlangval lai ngaih tur inei tha bik khawp mai. Pa lungleng thei tak i nih dawn hi. Kulikawn chu in lo changkang hma hle mai. I nu mawlh mai hi a ni. Ka duh chi a ni tlat. A la dam chuan min lo biak teh. “Pk-an i thlalak a lo hmu ve a, a * lutuk che” ti ringawt mai rawh. Tunah chuan a tar ve tawh awm si a, a vanglai a ngai thin awm e.
October 7th, 2011 at 8:10 am
Ka kal ve fo thin…an ti nuam deuh ber bawk a!
October 7th, 2011 at 9:01 am
A nawm hmel khawp mai a . .thlalak pawh a hmuhnawm hlawm khawp mai . (Y) kumin Carnival chu chhim ve tum ila .
October 7th, 2011 at 10:13 am
Kulikawn ah hian kum 2 dawn chu kan awm tawh. Insual chu an hrat ve khawp mai. Sunday sikul tan hma te an han insual lawk a, tan dar a ri a, ang bang ve leh mai :-S Carnival Queen (a hming an vuah chiah ka hre ta lo) atan khan nu-lian leh thau deuh ang thlang thin.
OT deuh reuh, Pu H.V., Henry Lalbuanga a tih thin kha i ni em? I nih chuan ka U te nen in in kawm thin…chuan ilo nih hlauh chuan i vawk vulh chaw i pek dan ka sawi maih lovang…MAN tak ani 😉
October 7th, 2011 at 10:21 am
Matte #24 Maharashtra ah maw i awm a. Ka vawkchaw pek dan a MAN vak pawh kalo hre hleinem. Tunge i u chu aw?
October 7th, 2011 at 10:26 am
Kulikawn carnival thlalak dang:
http://i52.tinypic.com/dmtk78.jpg
http://i53.tinypic.com/28bcmrt.jpg
October 7th, 2011 at 10:28 am
A dang:
http://i56.tinypic.com/2lledf8.jpg
Bonus: Kulikawn 1935
http://i53.tinypic.com/28wo5m0.jpg
October 7th, 2011 at 11:07 am
Pu H.V., Tamil Nadu ah ka awm. I blogspot lamah leh FB ah i email id ka zawng hmu thei mai lo tlat. Comment ah hian min lo hrilh mai..a rem loh pawn, moite13.cl@gmail.com hi ka email id a nia.
Thlalak hlui i nei tha khawp mai. Save keuh2 e.
October 7th, 2011 at 11:45 am
Carnival hmasa berah khian tel ve a chakawm mange, nawm hmel luttuk… Tih leh hun chu tel ve ngei tum teh ang (Y)
October 7th, 2011 at 11:55 am
a hunlai chuan a puiin a nawm dawn hi a..tunlai masi carnival siam, shamiana in zar hliaha card khelh luih luih leh tombola khelh mai mai ai chuan…jish
(Y)
October 7th, 2011 at 12:10 pm
levodopa #30 nuam ve thin deuh asin. A thu hrimah Kulikawn hi chu tumah dah san leh dah hniam hi kan nei vaklo niin ka hria.
Officer lian tak pakhat pawh Vengthlang(Mission veng thlang) atangin alo pem a. Hnatlan naah an lo tir nghal bawrh2 ta mai si a. Ani chuan, “Ka veng hmasaah chuan zah takin ka pu ka pu min ti a, Kulikawnah kan lo pem ta a. Hei, tuman min ngaisang tawp lo mai, alo nuam ber anih hi,” a tih kha mawle.
Chhungkaw lian tak ang kha kan ni mai thin a, carnival te hian awl tum an awm ngai lemlo. Tul tur ang kan in dap chawp loh leh hotu lam kan zawt a, kan che sawk sawk hlawm mai thin. Veng inthurual nih hi nuam deuh alo ni.
October 7th, 2011 at 12:17 pm
thlalakho hi tha hlawm em mai save keuh keuh teh ang 🙂