mi(sual).com

“Karbi lei arsi lian eng mawi tak, Sister Lianchhungi kha amah hmangaihtu bul a eng turin a enna a sawn ta, Aw Pathian, nangman chanchintha min pe. Haleluia! Amen!” – Karbi Anglong

Sister Lianchhungi, kum 82, Durtlang hi hun rei tawh tak atang khan Zunthlum leh thisen sang nei a ni a, han buai leh nat zual changte nei thin mahsela Pathian kaihhruaina in Doctor-te damdawi chawh in a ti ziaawm leh mai thin a. Dt. 16.10.2011 zing dar 2:40 khan heart attack-in min lo peih loh san ta a ni.
A chanchin tlangpui: Upa Hranghleia leh Lianchhungi te nupa hian fa pariat, mipa pahnih leh hmeichhia paruk an nei a, tu leh tuchhuan 46 lai a nei a ni.

Kum 14 mi anih kum 1943-ah Durtlang-ah Nurse zir turin a lut ve a, a hna chak ber zir tura a lut chu a hlimin nuam a ti em em a ni. Missionary sapte zirtirna leh kaihhruaina in tluang takin kum 5 training chu a zo ve a. An hotu ten thawk zui turin duh mahsela Silchar Civil Hospital-ah a u in hna a hmuh sak avangin 1948-ah a zuk zawm a, kum 3 zet hna a thawh hnuin Upa Hranghleia nen inneiin 1950-ah Silchar chu a chhuahsan leh a, kum 1951-ah Durtlang Damdawiin ah thawk tura an sawm avangin a lut leh ta a ni.

Missionary Nurse Pi Hruaii’n Sawleng khuaah Synod Dispensary hmasa ber a din chu enkawl turin Oct 1954-ah an chungkuain an kal leh ta a, damdawi leh Nurse mamawhna alo nasa hle a, Hmarltangdung leh Suangpuilawn tlangdung thlengin an rawn pan khawm thin a, an tul thei hle a ni. Khawchhung leh a chheh vel a mite phei chuan a kuta nau neih vek an tum a, a nau chhar tam berte chu a hming phuah sak pu hlenta an tam hle ani. Nau 2000 vel zet a chhar nghe nghe. Kohhran lamah naupang leh puitling zirtirtuah te, thuhriltu thlengin mawhphurhna pek a ni a. Kohhran hmeiche lamah tualchung leh Bialah Chairman leh Ziaktu niin a hun tam tak a hmang a ni. Hetiang taka tul leh pawimawha an thawh lai hian Mizoram buaiin a rawn nang ta a, kum 13 chung zet in ngai taka an thawhna Sawleng khua chu June 1967-ah an chuahsan a, Durtlang Hospital-ah a thawh zawm leh ta a ni.

Mizoram buai avanga India sorkar in sap Missonary-te an ram a haw vek tura a tih tak avangin a haw hnuhnung ber te Mission Veng Kohhran Biak-In a, February 1968-a an thlah rualin Synod Mission Board tirh a Mikir ram (Karbi Anglong) a Missionary a kal tur Rev. Rokhuma leh Upa K.Saibela te thlah nghal an ni a, hemi ruala tirh ve tur Nurse Missionary zawn nimahse inpe an awm mai lo a, kum 1969 kumtir atangin Kristian Tlangau Chanchinbu-ah Nurse Missionary tur mamawh a nih thu chhuah a ni thin a, a mawhphurhna a ngaiin a in pe ta a, May 1969-ah Durtlang chhuahsan in Karbi ram chu chhungkua in an pan ve ta a, an khawpui Diphu atanga hmar lam km. 85 laia hlaah Kristian in 20 vel awm na, Dokmoka khua chu thuthmunah hmangin an khaw hotupa Bawngin luahin bul an tan ta a ni. A mi chengte chuan an lo lawm in an hlimpui hle a, chhun zan zawmin an bawh reng a, nula tlangval leh naupang te solfa leh hla a zirpui thin a, thla 6 chhungin an tawng pawh a hman pui ve thei hial a ni. Kumkhat hnuah chuan Naupang Sunday School Zir turte siam in a zirpui thin a, Mizo hlabu a hlate letlingin tun thlengin an kohhran hlabuah a kutchhuak hlate a la awm ve a ni.

Dokmoka-ah hian damlo enkawl in a tul thei hle a, an kohna apiangah a kal a, thirsakawr kal theihna ah chuan thirsakawr a hmang ve mai thin. Thirsakawr kal theih lohna ah pawh ke in hla tak takah a kal thin. Nau nei tur leh hlam tang buaipui tur an tam thei hle a, zanah tute koh ber nge tih pawh hriat loh in hla tak takah an hruai thin a ni. An awmna khaw hotupa chuan an pa hnenah, “Misual an tam, hmeichhia a ni si a, a tan a hlauhawm, zanah chhuak lo turin hrilh rawh’ tiin a lo hrilh hial a ni. “Tanpui ngaite tanpui turin he hmun hi ka lo thleng a, min mamawhtute engtin nge ka hnar ang,” tiin kum 17 chhung Pathian awmpuina in a hna chu hlim takin a thawk a ni.

Heti chunga thawh tur tam tak a awm lai hian Durtlang-a hnuchham enkawlna ‘Hmangaihna In’ hawn tur ah Superintendent hna thawk turin June 1986-ah kohkir a ni leh a. Dokmoka-a hnam hrang hrang te nen tap chunga inthlah in Lalpan a hmangaihte Karbi ram chu a hawsan leh ta a ni. June 1986 atang chuan ‘Hmangaihna In’ ah a thawk leh ta a, kum 5 a thawh leh hnuin January 1991-ah Pension-in a chawl ve ta a ni.

A rawngbawlna Dokmoka mite chuan an la ngai hle a, kumtin zin tura sawmna an la thawn fo a ni. An Kohhran Hmeichhe Inkhawmpui Speaker tur leh Kohhran Diamond Jubilee hman puiin vawi thum lai a zuk tlawh leh nghe nghe. Kum 1997 khan Durtlang Kohhran Ramthar Committee bul tumin a lo thawh tawhna field Karbi ramah Ramthar Field tlawh in Kohhran mi engnge maw zat nen a kaihhruaina in an zuk zin leh bawk a. Hemi tum a an zin hi anmahni tawng ngei a Pathian thuchah pulpit tlang atanga a sawi chu ropui an tiin an hlimpui hle a, a thusawi an dawngsawng tha hle a ni.

Karbi ram a chhuahsanna kum 25 na chiah May 28, 2011-ah khan Lalpa avanga a hmangaihte Karbi ram atangin mi 25 lai rawn tlawh turin an rawn thleng hlawl mai a, a mah pawh a hlim kher mai!! (LPS News-ah pawh tih lan a ni).

Anmahniin an lo kal chhan tawngkam leh ziaka an hlan ang ang hi Lalpa ropui nan han tarlang ila:-

1. “Kan hnena i awm chhunga i thawhrimna avangin Kohhranah te, khawtlangah te, ram chhungah te hmasawnna nasa tak kan hmuh avangin in chhungkaw hnenah leh Mizoram Synod hnenah lawmthu sawi turin kan lo kal a ni

2. “Damlo leh tanpui ngaite tanpui a, chhun leh zan ngaihtuah lova thosi leh ramhnuai vangvat kara i thawhrimnate avang khan”

3. “I hnathawh rah avanga ringlo khua pariatah Kohhran a lo din tak avangin”

4. “Min kaihhruaina leh zirtirnate avangin kan ram pumah:-
i) Lehkha thiam tamna ber khua kan ni.
ii) Sorkar hnathawk tam ber khua kan ni.
iii) Kohhran Zaipawl nei tha ber khua kan ni.
iv) Naupang Sunday School tha tak min siam sak.
v) Kohhran Hmeichhe Rawngbawlna tha tak min din sak.

Hengte avang hian ralkhat a sawi mai tawk kan ti lova, i dam lai ngei in i bulah lawmthu sawi turin kan lo kal a ni” tih a ni.

Ni 3 chhung an cham chhung hian a bawrhsawm tawh viau laiin an bula awm nuam a tiin a hah deuh pawn mu mai duh lo in a thu ve reng thin, an cham chhung hian hlim taka Pathian chawimawi in hun an hmang a, Synod puipa te leh hmun hrang hrang fan pui an nih hnuah khualzinna khawvelah in hmu leh phak dawn tawh lo mah se Van Jerusalem Tharah kim taka inhmu leh turin ‘Dam takin – Kardom’ tia in chibaiin mittui nen an inthen leh ta a ni.

A ruang awm ni a Karbi ram lam atang a thu dawn chu a ropui hle! Dokmoka khua a kohhran hoten, “Vawiinni hi Bhaido (kan nu) pual a serhin, tawngtaina te nen hun hman tum a ni. A thlalak kan kawl ang angte phawrhin a Quarter-ah tarchhuah a ni a (tunah chuan kohhran office atan hman a ni tawh) tah hian mipui pungkhawmin a sunna hun dar 1:00 pm ah kan lo hmang ve dawn a ni” tih thu te an rawn thawn. Heta an thu rawn thawn tel ropui tak chu, “Karbi lei arsi lian eng mawi tak, Sister Lianchhungi kha amah hmangaihtu bul a eng turin a enna a sawn ta, Aw Pathian, nangman chanchintha min pe. Haleluia! Amen!” tih thu an tar kuau tih chu a ni. Tin, Karbi Anglong Mission Field-a kan kohhran Ramthar Office leh School zawng zawng chu amah sunna lantir nan an khar thu an rawn sawi a. Tin, Karbi nu pakhat, Guwahati a zirtirtu training a awm mek, Gloria-i chuan, “Kan fanu nen phone in kan inbia a, Bhaido (kan nu) thih thu pawh la hre si lo khan nizan a mumangah Bhaido (kan nu) chu a lo thi a, a ruang hi Dokmoka, rawng a lo bawlna thin Karbi ramah ngei min phum tur a ni, a lo tih avangin thlawhtheihnain an rawn phur dawn a, mi tam tak lo pungkhawmin kan lo hmuak mup mup mai a,” a tih thu an rawn sawi bawk. Hei bakah hian Thlanthutni ah kohhran zawng zawng ten mahni biakin theuhah sunna hun an hmang leh bawk a ni.

Karbi rama a awm chhung hian Zoram Pawn Kohhran Hmeichhe Rawngbawlnaah Chairman hna kum 9 chhung a thawk a. A pension hnu hian tualchung Kohhran Hmeichhe Chairman leh Kohhran Hmeichhe Central Committee-ah term khat (kum 2 chhung) a chelh leh a ni. A hriselna te a that tawk loh avangin kum 2005 atang chuan a mawhphurhnate a lo chawlhsan ta a ni.

A tawngkam hnuhnung, ‘Lalpa i kut chak takin min chelh tlat ang che,’ ti chungin min kalsan ta a ni.

Lalpa’n a rawngbawlna te chhiartu thinlungah nungreng turin Lalpan Malsawm rawh se.

Similar Posts:

• Zosap Pi Puii a boral
• Karbi Inneih na ah ka tel ve a.
• Ka thawh zel dawn! (Engtin ngai che’u maw?)
• Kohhran leh Chiahpuam
• Dr Ramdinthara Sailo pa boral

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Friday, October 21st, 2011 at 11:00 am and is filed under Obituary. You can follow any responses to this entry through the RSS 2.0 feed. You can leave a response, or trackback from your own site.