Thu hma
Nikum angin an congress lai takin (live-in) ka lo post thei dawn tawh lo va, tunah hian ka lo post ta mai a ni. Zirtirtu leh zirlai, khawtlang tana mi pawimawh tak tak- misual kan awm teuh si a, tu emaw talin kan lo hlawk pui takin ka lo in zep leh hram e.
Sawi tan ang aw
A thupui en mai chuan khawi emaw lai Political Party a nih duh hmel in ti mai thei; mahse a ni lo tlat. Chinchang hre deuh chuan in lo hre viau tawh mai thei bawk. Children Science Congress hi Mizoram tan hian a mikhual lo hle a; mahse hre lo kan la awm teuhin ka hria. Chuvangin ka lo ziak leh hram a ni.
A bul tan dan
Pawl lian tak pahnih—Council for Science and Technology Communication (NCSTC)-Network leh Rashtriya Vigyan Evam Prodyogiki Sanchar Parishad (RVPSP), Department of Science and Technology, Government of India te chuan Gwalior, Madhya Pradesh-ah a hmasa ber atan kum 1990 chhovah khan an huaihawt a. Hemi atang hian Gwalior Science Centre, Madhya Pradesh chuan pawl pahnihte khi ram pum huapa Children Science Congress huaihawt turin an nawr ta a. Kum 1993 khan ram pum huapin an lo hmang tan ta a ni.
Enge an tih thin?
A tel tur hian Project (research tenau) tih ve phawt a ngai a. Chu project chu hemi Science Congress-ah hian mithiam hmaah an present thin a ni. Tin, Science lama thiltih chi hrang hrang tam tak a awm bawk a. Posture Session te, Cultural programme te leh Sight Seeing hunte a awm a. Thil pawimawh tak pakhat chu—‘Meet the Scientist Session‘ hi a ni. Hetah hian naupangte chuan zalen takin Scientist hote nen an hriat duhte an inzawt kual vel thin a ni. Hemi hun hmang tur hian Scientist lar tak tak ramdanga mite pawh an chahchhuak fo thin a.
Nikum lamah chuan
Nikumah pawh khan Scientist kan hriat lar pahnih—India President hlui—APJ Abdul Kalam leh Nobel Prize pawh dawng tawh—Venkataraman Ramakrishnan te an tel a ni. Physics lama Scientist lar kan neih UGC Chairman hial lo ni tawh Prof Yash Pal phei chu kum tin a tel ve ziah thin a ni. APJ Abdul Kalam pawh hi President a nih lai pawh khan a pelh ngai lo, a hawngtu a ni ziah thin.
Kuminah chuan mawm
Kumina neihna tur hi India rama khawpui dangdai tak- Jaipur a ni dawn. He hunpui liantak maia tel tur hian kan President zahawm tak pawh sawm an tum leh a ni. Pawisa hman ral tur pawh hi a thahnem viau mai- Rs 1.5 Crore vel ruahman chhin a ni a. Chung zinga Rs 70 Lakhs chu Rajasthan Sorkarin a tum dawn a ni. Nikum hmasaa kan pawisa thawnkir (Lapse) zat zet an thawh dawn a nih chu.
Ka hriat sual loh chuan Kolasib, Hnahthial, Champhai, Lawngtlai leh Serchhip lama kan sikulte hian project an lo la thawh tam lo khawp mai. Kuminah hian an ti lo a nih paw’n nakum lamah chuan lo tel ve tawh ngei se la a va tha dawn em! Mizoram pumpui kan tel kim hian a awmzia em em a ni. Cyberthug, Bucko, ruatruat pa, Xaia, Shailendra leh mi dangte kha in rem chan dan angin in thiante lo hrilh mai mai ula a va hlu dawn em! Cyberthug phei chu Sikul pawh a enkawl a, a duh leh duh loh a thu a ni tawh mai.
Project tih chu a har em?
Har lo khawp mai. A huaihawttu NCSTC-Network te’n a tihdan tur an lo ruahman sa vek a. Chutiang chuan tih mai tur a ni. Naupang tan a ni bawk a, a tihdan pawh a awlsam. A tihdan tur hi lehkhabu pawhin an siam a. Mizoram angah chuan Science Teacher Association, Mizoram Office-ah lak tur a awm teuh. Tin, STAM hi Mizoram chhunga Science Congress huaihawttu an ni a. Anni vek hian Training hrang hrang Science Teacher tan heng—Workshop, Orientation led Seminar tihte hi an buatsaih thin a, Science Teacher tam zawk chu he training chhim tawh an nih ka ring.
Sawi ta zel ila
Project chu han sawi zau ta lawk ila. Sikul naupangte’n class rooma an zir, an ni tin nuna chhawr nghal thei tura an hriatthiam theih nan leh an chhehvel (society) harsatna Science thiamna hmanga sutkian dan ziak kha project-in a tum ber chu a ni deuh mai. In sak project nen erawh a inang lo deuh. Entirna han pe ta ila. Kum 2005 khan Mizoram aiawha kal pakhat chuan an Hostela tui lut zat leh hman dan a zir chiam a. Thil tam tak a hmuchhuak a. Chu chu National Level-ah a zu present ta a ni. Chutiang bawkin Pangpar kung pakhat khuaiin a par zu a tlan zat chhinchhiah ringawt ang te pawh hi tha tak a ni. Engtik hunah nge khuai chu an lo kal tam, zing lama tlân hma berin dar eng zatah nge a tlan tih te hmuhchhuah a, chumi report ziak chu a ni mai. Pui tak a ngai hran lo. Mahse kan thil hmuhchhuahte chu table, pie chart, diagram, graph, adt., hmangin kan entir tur a ni.
Project chu chi hnih a awm
Tin, Project hi Experimental leh Survey based Project a awm a. Experimental huang chhungah chuan, entirnan, Sa-um chungchang te, Vaiza atanga hrui kan neihdan ang chi te hi a tih theih. Kan naute’n National Level-ah an present ve ve tawh a. Endiktute’n an lawm khawp mai. Hman kuma Hlonuar/Hlozak (Mimosa pudica) kan han khawiha a khup rei zawng, a lo thawhleh hun chhung rei zawng, hun a mamawh zat chungchang naupangin research an tih pawh kha keini mai ni lo, Scientist thiam tak takte paw’n an lawm khawp mai. Congress hian kum tin thupui a nei thin a. Kumina an thupui chu—LAND RESOURCES: USE FOR PROSPERITY, SAVE FOR POSTERITY tih a ni. Tin, thupui hnuaiah hian thupui tenau(sub theme) a awm leh a. Chumi mil chuan project buatsaih tur a ni.
Tute nge tel thei?
Naupang kum 10 – 17 inkar tawh phawt chu an tel thei vek. Zirlai, sikul kal kher nih a ngai lo bawk. A chunga ka sawi tawh ang khian miin a tuina taka Science hmanga project a buatsaih chuan a tel thei vek a ni. Hetianga Project ti chin chu Child Scientist tiin koh an ni ve a, anmahni ngaihtuahchhuah thilte chu endiktu Scientist puitling tak takte’n an zahsak thin em em a ni.
Hmang tangkai ve ang aw
State dangin an hmang tangkai tehlul nen, Mizoramah hian duh aiin Science Congress lam buaipui duh kan tam lo hle niin a lang. District Level nei lovin State Level kan nei nghal mai thin a. Hetah hian kum tin project 30 vel a lo lut thin. Tichuan hemi atang hian kan inthlifim leh a. Project 8 chu National Children Science Congress lamah kan tir liam a. A tha zual pahnih chu Indian Science Congress-ah kan tir ve thung thin a ni. Mizoramin quota 8 kan nei tihna a nih chu. Nikumah khan India ram pum puiah nuai thum vel project naupangin an ti a. Chuta tanga thlan chhuah project 650 chu National Level-ah an present a ni.
A tan tirh (1993) atangin Mizoram pawh hian naupang (Child Scientist) a tir ve ziah thin a. A buaipuitu ber chu Science Teachers’ Association Mizoram (STAM) te an ni. Tun hnai deuhah phei chuan Zonet leh LPS velah Live Telecast ngatin an buatsaih thin a nih kha. Hun harsa tak karah an lo ti tang tang a, an fakawm hle.
Zirna a tibuai lo
Mahni naute leh fate tan a awhawm thin hle. A hun hi a fuh em em mai bawk a. Lehkha zir tibuai lo chiahin December 27-31 chhung hian neih a ni thin. Amaherawhchu Krismas lai a nih avangin a buaithlak deuh hlek. Tin, June emaw July emaw August thla emaw-ah project hi tih tan a ni tlangpui. Tichuan October leh November thla chho hi chuan zo tura ngaih an ni. Remchan dan angin a danglam thin bawk. State hrang hranga tihdan a inang lo thin bawk. Project titute khan Guide(kaihruaitu) an nei a. An Science Teacher te an ni tlangpui. Lehkha zir leh exam tibuai lo tawk chiahin ruahmanna hi an siam zel a ni.
Tel ve ang aw
A tlangpui chu i hre ta. I unaute leh i fate kal ve nan i awt em? Nu leh pa fing deuhte chuan an ngaihven thin khawp mai. An sikul Science Teacher te nen an tang rual em em thin a ni. Kal man hi tumsak an ni a. Project tih nan pawisa eng tham mah a ngai lo bawk. Private Sikula kal tan pawh a tel theih vek. Private sikul naupang kal hi an awm teuh tawh nghe nghe. Science lama hawizau ngawr ngawr piah lamah, India rama hnam chi hrang hrangte nena inkawmhona hun tha tak a ni bawk a. Zirlai naupangte chu an zir zelna tur atan te, ram tana mi tangkai ni tura an inbuatsaihna kawngah nasa takin phurna leh tumna a siamsak thei a ni. A hlutna leh tangkaina sawi tur a tam. Ka ziak zo seng lo vang.
Ka ti tawp tawh mai ang
Kan fate leh naute (student) tan thil pawimawh vak lem lo tihsak kan ngah viau thin hi maw…. An tana tha tur thil i ngaihtuah ang u hmiang. Pu A Sawihlira te awm tawh lo mah se, Science lama kan thuziak hi min lo hlut sak la. A titu i nih loh pawhin a hre lote sawi hmuhtu ni thei hram la a va lawmawm dawn em! I hriat chian duh chuan ka email (vanlalignatia@yahoo.com) kaltlangin min lo zawt thei ang. Mizorama Children Science Congress buaipuitu STAM (https://stammizoram.org/) pawh zawh fiah theih reng a ni. Puih che an chak viau ang.
Similar Posts:
- National Children’s Science Congress neih mek a ni
- Mizo Science Scholar Chhuanawm
- Google Science Fair 2012
- National Science day Chibai ule!
- Goverment Zirtiri Residential Science College Website
October 21st, 2011 at 6:34 pm
A tel awm mite hlim leh hlawk taka an hman theih ka duhsak e.
Report this comment
October 21st, 2011 at 6:35 pm
Ti ti ik ik thuai nang a.,
Report this comment
October 21st, 2011 at 6:35 pm
Bengvarthlak hle mai.
Report this comment
October 21st, 2011 at 6:42 pm
Post tupa hi tel ve ngat tawh a ni a, kan ram President Abdul Kalam pawh zuk Chibai ve ngat tawh a nih hi. Share tur che u a ngah khawp ang.(pil daih ang)
Report this comment
October 21st, 2011 at 6:43 pm
Ka la tel lo keichu haha! that dawn khi
Report this comment
October 21st, 2011 at 6:44 pm
#4. Ka type sual tlat President hlui tih kher tur a ni ang chu.
Report this comment
October 21st, 2011 at 6:44 pm
A post-tupa hi ka rin reng……
Chhiar phawt ang….
Report this comment
October 21st, 2011 at 7:02 pm
Post-tupa i thahnemngaihna a ropui hle mai. A ti mi leh tui mi tan chuan a chhenfakawm khawp ang le.
Report this comment
October 21st, 2011 at 7:36 pm
NCSTC huaihawt hian 1999 khan astronomical telescope kan siam tawh.Thla 1 vel chhung chu kan siam a,a lian tha khawp mai,X600 vel a lian thei a nia.Mahse tunah kan school hlui godown-ah hman lovin an dah tawl mai mai,uihawm tak a ni.
Report this comment
October 21st, 2011 at 7:45 pm
National children science congress a mi tur,paper present tur kan buaipui nasa ve thin a lawm,mithiam te rawn chungin.. khang lai te kha a ngaiawm thin hle mai,hmanlai an chang zo ta!!!
Report this comment
October 21st, 2011 at 7:52 pm
In lo comment a lawmawm hle mai..
van damme chu Goa lama huaihawt a nih laiin i kal a ni maw? Nature lam thupui a ni ta em? I project chu a tha hle mai a.
Mahse tun hnai lamah chuan hetiang tlema Science Exhibition lama an leklam ang chi chu tih loh hram an duh tawh. A bik takin pawisa to tak tak hmanga model siam phei chu an duh lo hle.
Engemaw ti lai phei chuan Science Congress hi Science Exhibition lam thil an ti nasa lutuk a tih tawpte an tum hial a ni.
A tum tak chu exhibition lam thil lo, methodology tha tak hmang- problem siam a chu mi solve tumna lam thil tih ni hram se a scoring bik. Abstract ziahte kha a ngai ve thlap a Guide pawimawhna a sang hle. Duh aiin Science teacher tam zawkte inpekna a la nep deuh. Mahse kan zia zel ang.
Tel awm tur tak tak an tel lo fo a; tin, tel lo tur awm tak tak – khawhmuh zua nana hman tum ringawt an awm leh pheuh pheuh thin hian ka lung a ti hnur thin deuh a ka lo thai lang leh zuai a ni e.
Report this comment
October 21st, 2011 at 7:56 pm
Vth National Children’s Science Congress, Bhopal, Dec, 1997 ah khan kan telve a, a nuam in ka hlawkpui ve khawp mai. Science lampang ka zir zawm thui ta lo na a, hetiang a lo tel ve thin hi nakin hunah, ‘resume’ vel atan a tha.
Report this comment
October 21st, 2011 at 8:01 pm
ch3rub: India our dreams tih lampang maw? A tir lama thupui ho kha a dangdai riau- Cean up India tihte kha a awm a. Ka nui kawr kawr thin. Tu berin hruai che u maw?
A kal tawhte hming ka collect vek a nia, mahse hetah ka kawl tlat lo. Ka hawn hunah ka lo zawng chhuak ang che u.
van damme: I tawnhriat a ngaihnawm viau ang le. Midang lo sawimhmuh ve zel teh khai. Nu leh pa hnena hrilh pawh hi a awmzia ve tho a nia.
Report this comment
October 21st, 2011 at 8:12 pm
@ A post tupa,thil ka sawi thui lo mai ang,min hrechhuak palh ang
Tunah chuan ram dangah ka awm hrih a.High school science teacher ka nih lai khan kan school naupang National children science congress a an project ka lo buaipui ve sak tawh a,theihtawp chuan ka lo tang ve thin a nia,mahse ka awmna a dang ta si a,duh angin ka tihpui hman ta lo a nih hi.
Report this comment
October 21st, 2011 at 8:37 pm
@Ignatia, Sustainable development and war on wastage tih lampang a ni. Rei ta deuh niang e, tumah ka hre tawh lo. Hmanni khan, a khaw thenawm lawkah ka awm ta bawk a, kan neihna hmun, RIE Bhopal campus te ka han hmu leh a, ka hrechhuak zawk.
Kan in prepare tha tawk lo nen, rilru te te chuan improve tur kan la ngah. Tunah erawh chuan a changtlung tawh zawk ang chu, ka hre bik lo.
Report this comment
October 21st, 2011 at 8:38 pm
Insawithei ve LOKS: National Children Science Congress 1998 Chennai-ah khan ka tel ve toh tlatsss.. Kan main theme kha ‘Nature Let Us Conserve, Share, Care’ tih a ni a ka paper kha Environmental Degradation due to Waste Polythene and its management’ tih kha ni ve ngei bawk a. Model tura ka siam Hlum scenery te, chart te kha Rel stationah khan ka pawm bawr ve khawp mai a, Polythene chhia atanga Singa hmanga table mat leh bazar bag phiar ka ken te kha Scientist ho khan lei chhawn ah te min dil a, ka phal lo vel!!!! Thangkhat leh tlem a lo liam ve ta reng mai… Ignatia post chuan lung a ti leng ve pang ngai
Report this comment
October 21st, 2011 at 8:39 pm
E khai van dame chu i tih dan fair lo hle mai. Ka man chhuak tho tho ang che.
Mamit districtah hian Science Teacher tha hnem ngai tak kan nei a, kum tin an lo tel ve ziah thin. An project pawh a tha. A fakawm thin khawp mai.
Report this comment
October 21st, 2011 at 8:50 pm
@ch3rub: I buaipui chu a that chu le.
Nia, i hunlai chuan tlemin a phuailuai deuh mai thei. Tunah chuan a changtlung tawh khawp mai. Orientation leh Seminar pawh an nei tlut tlut thin, kum tin.
Report this comment
October 21st, 2011 at 8:52 pm
@he pa: Ka hria che a nia aw. Lunglei Venglai HS atanga zu congress i ni chiang mai. In sir kha a in la buai ta em a, tumah a buaipui hman ta lo. Kei paw’n ka rawn ngat ngat a lawm i boss kha.
He thuziak hi i enkawl lai meka chhuahtlak khawpa hlu a nih hi aw, keimah thlirna tlang atang chuan.
Report this comment
October 21st, 2011 at 9:06 pm
nia lo chhuah ka lo tum dawn nia… Ignatia hi K***t* ni em
Report this comment
October 21st, 2011 at 9:10 pm
E khai he pa ka hlutzia ka sawi tumna lamah ka fiamthu mai mai alawm, chhuah chi loh vang.
Tuna i misualna email hi check rawh.
Report this comment
October 21st, 2011 at 9:45 pm
Post-tupa, i thahnemngaihna a ropui a, i hriatna a ropui bawk e. Post tha lutuk a ni.
Comment-tute zingah theuneu lo tak tak in tam hle mai, ka te chem chem….
‘Mahni seh seh mual hranah,’ tih te, ‘We must be the change we wish to see,’ tihte ka rilruah a lo lang. Sawi duah erawh ka thiam ve lo.
Report this comment
October 21st, 2011 at 9:50 pm
In lo chhiar ve zel ang chu maw. Sawi zel mai teh ang.
Engtik kuma tih nge ka hre tawh lo a, naupang pakhat chuan Aizawl khawpuia street light an tih en hun leh zing kara an tih mih(off) hun hi a project a lawm le. A tha ka van ti tak!
Street light tam tak khaw thim hmaa tih en te, tin khaw thim hnu daiha tih ente leh zing ni chhuah thleng thlenga la OFF lohte kha a thliar ngat ngat thin ta nih chu. A thil hmuhchhuah kha a tha asin aw. Thuneitute beng pawh a thleng hialin ka hria. Mathematics takin a thliar hranga- graph leh chart hmangin a zir chiang bawka. Street light a hun taka off loh avanga pawisa kan hlauh zat tur ni awmin thlengin a chhut ve a nih awm kha. Examnaa distinction pass tluka thil tih tha a niin ka hria kei chuan, a chhan chu societyah impact a nei tha tlat.
@lianchhiara: Kan inang vek alawm, tumah chutiang bik kan awm ne’m…
Report this comment
October 21st, 2011 at 11:10 pm
Ignatia post anih hrim2 avangin ka chhiar hmain kan comment ve hrim2 teh ng
Report this comment
October 21st, 2011 at 11:12 pm
@he pa: Ignatia hi K—-a a ni e.A inzep rei thei lo lo ang..ka va han chiang em
Report this comment
October 21st, 2011 at 11:35 pm
Sawi leh lawks hman laiin…
Hlonuar/ hlozak ka lo ziak a, ka sawi zau chak tlat. Nuih tur a awm.
Hlonuar hi kan han khawih khan a hnah a khup thin a, chumi a khup hun chhunga a hun hman zat leh a lo thawh leh hun chhunga a hun hman zatte kha kan teh a ni. Zing ni chhuah hma, ni chhuah fel hnu, zing dar 8, dar 10, dar 12, dar 2, dar 4, leh tlani tlak rual, leh zan dar 8 vela teh (reading lak) turin kan ruah hman a. Hun bi hran hrana a hun hman zatte chu a dang lam em? Pot-a khawi hlonuar leh khawi loh, a awmna hmun pangai(natural place) amite nen enge a danglamna? tihte kha zir chian kan tum a ni. Tin, he thil hi ni 25 vel reading lak tur angin kan ruahman bawk a.
Naupang ho chu an zavaiin(team khatah naupang 5 an awm thin) zing atangin an teh tan ta. An thil hmuhchhuah chu a tir apangin an lawm em em a. An hlim hle. Chhun ni sat vanglai takte khan a hnah kha an khup rei lo bik riau ni awm a ni. Mahse class kal a tibuai ta. Sikula lamah ka awm si lo. Ama thuin Principalin zan lamah chuan reading laa chhuak tawh lo turin thu a pe hmak mai(hlonuar an va zirte hi bawngkawn Brigade field ami daih a ni hrim hrim a, a hla bawk a ni).
Mahse kei hi pa strict ve tak mai- ‘Naktuk tlaiah in reading lak a kimin min lo hmuh tur a ni’ ka ti tlat mai bawk si a. Ka thu awih loh kha ni theiin an hre bawk si lo, chuan le warden leh Principal thu bawh pelhin zanah a rukin reading(va teh turin) va la turin hostel atangin a RUKIN an chhuak ta a nih kha.
Mahse hlonuar awmna hmun- Brigade an va thleng a, hlonuarte chuan an hnah an lo khup thap mai. Experiment tur a awm ta lo. Mak ti em em in an lo let a; mahse warden DETECTIVE lutukin an zavaiin a man ta a nih kha. Naupang fel tak tak vek an ni a, an lawmawm ang reng. A tuk zingah anmahni tlanchhuak turin hman lo chung chungin ka va kal a, mahse puitling leh puitling kara thil sawifel chu a awlsam khawp mai. Ka ngaihtiahchhuah chang hian ka nui nasa thin.
Sawi tur a tam. Kan harsatna lai nia ka ngaihte chu-
1) Buaipui tlaka kan ngaih thil tih awm tak tak hi kan ti lo leh mai zel. He Congress ngei, thil tha lutuk pawh hi hre tu kan la tam lo.
2) Research methodology pangai ve tak hmanga tih tur a nih avangin zirtirtu (guide) tan pawh inzir a ngai nasa hle. Extra effort an tih ang hi pek a ngai.
Tum khat pawh Mizoram team ka hruai ve laiin Aizawla sikul tha ve tak ami hian ‘Bamboo Flowering’ chungchang kha a project a. Mahse a projectah duh aiin a awmzia lova. Article thuziak ang a nih thu leh ti danglam a, Senior Citizente ngaihdan leh hmun dan tal zawta survey ti turin ka ngen a. Mahse kha nau khan ka ‘guide’ duhdan a ti teh tlat pek a. National Levelah a present laiin keiman ka veng ta… Evaluator pakhat chuan ‘Hei hi Scientific Project a ni lo, a thupui a that nen, thawnthu(story) ang mai mai a ni’ a ti hmuk mai a. Hrilh fiah kual nan hun kan hmang nasa hle.
Ka sawi tum tak zawk chu- Zirtirtu online kan awm takin, project titute hi naupang an nih avangin guidete kaihruaina hi a pawimawh tawpkhawk a ni. Chuvang chuan Congress chungchanga Workshop, Orinetation leh Seminarte tel hram hram a tha thin khawp mai.
Ka hman em a, ka ziak leh ta teuh mai le. Hlawkpui in awm chuan ka lawm viau ang.
Report this comment
October 21st, 2011 at 11:45 pm
Post-tupa i thu vuakthlak hi a tha thin a, ka la chhiar thla zel e.
Report this comment
October 21st, 2011 at 11:46 pm
@malsawm: Va hre chiang awm kheng khawng ve. Delhiah chuan hlim takin han Diwali ang che auh…
@Chhuakte: Chutia mi… Nangpawh i comment nem duai mai- mi pawisawi ngai reng reng lo hi hmuh a nuam alawm.
Report this comment
October 21st, 2011 at 11:49 pm
2001 khan Pune ah ka kal ve tawh a, kan thupui kha ka hre tawh chiahlo nangin la sawnbawl dan, a tah thlengin ka zuk sawi ve chiam kha, abak ka la hriat reng chu hun tight thei lutuk kan chau thei lutuk leh ei tur tuihnai thei lutuk kha a ni deuh ta mai a….
@Post tupa
Report this comment
October 21st, 2011 at 11:58 pm
@RosangaD: Indigenous Scientific Knowledge tih lam a niang a. I project chu tha hle mai a. Ka lo chhinchhiah zel che u nia aw.
Ei tur tui hnai, cultural session leh Sight Seeing kha nuam riau a sin. Tin, meet the scientist sessionte pawh. Tum khan Indian born American professor-in ‘Unified field thery’ naupang zinga a sawi kha chu a tifuh vak lo a ni. Thlalak pui lai chiahin amah kha an hlut..
Report this comment
October 22nd, 2011 at 12:10 am
Ku Ignate, chu ti e, tun tum i post leh comment atang ringawt pawh hian, ka lo hmuh liam mai mai leh eng vak a ka lo ngaihloh tamtak atang hian mi thluak tha te chuan zirtur an va lo hmu hnem em! tih ka hriat phah lehpek.
I naute chu an vannei hle mai, i enkawl tha e, tihna lam ni lovin
Report this comment
October 22nd, 2011 at 3:25 am
Avan bengvar thlak cher cher vele.
Report this comment
October 22nd, 2011 at 10:38 am
Chhuakte chu min lo chhang leh a ni maw. Ka thil sawiah khian Principal hnen atangin phalna ka laksak vek a; mahse ka awm loh hlanin a lo VETO ta keuh alawm le.
Nakum nipui chawlh hunah Pathianin a rem tih chuan ka Sikul duh tak- mi dang tana mi tangkai ni ve thei tura min siamtu, puih ka tum a, naupang 25 vel tal project tih pui ka tum. Mahse a saseh hunah hian Principalin a lo VETO keuh keuh ang tih ka hlau khawp(Amah pawh a misual ve reng ahh…
). Project tha tih dawn chuan Class hi OFF a ngai ve leh keuh keuh thin a.
He post hi chu ti tawp tawh mai ang aw. Tuma’n comment tawh awih loh. Mahse he thuziak hi chhuahchhawng duh kan awm chuan chhuan ka phal lutuk e.
PKFanai ngei mai khan malsawmnain han khar sela ka ti asin le. Mahse a tuina lam a ni lo a niang e.
Report this comment