mi(sual).com

(Picture lam chu midang kutah a tam e. Ka duh duh ka sawi tawp dawn)

Lo…

Picture ka post dawn lo. Picture ka nei ve bawk lo. Ka post thiam bawk lo. Thiam pawh ni ila, ka peih hek lo. Ka hmeltha ber lo. Ka fel ber lo, ka thleng hmasa ber hek lo. First paragraph “lo” vek a, a tawp avangin ka uang kher lo.

Lamtluang chu-

Ni 26/10/2011 zing dar 7 velah Maxi Cab in ka chhuak a. Kan engineer thiam tak tak te’n duhthala an kawng siam chhiat zia kha. Kal lamin tukhum paw thur leh chhipa chirh kai luaiin ka thleng rup a. Mahse, a pawi therte lo. Ka inhmeh êm êm vek tho alawm, a chhan chu ka hmeltha tlat alawm.
Aizawl lam pawh kalkawngah an rawn chhe hlek a ni awm a. Tupa zak thei lo in, battery a zunkhum a; an lo thleng hram a nih hmel.

Pi Dari hotel ngeiah-

Ka ril a tam lutuk tlat. Ka thlen hnu chuan, nak veilam puar pawg leh dul hmul khát phuarin ka ei ang ka ti ran ran a. Ka chhipa chirh kai luaite chu ka nam thla tawp tawp, ka in beng fai thuak thuak a.
Chaw ei ang.
Eng hotel berah nge ka ei ang? Pi Dari hotel a awm em tiin ka zawng ru ran ran a, a awm chiah lo a ni ang. Rinzual hotelah puar mangkhenga kan ei nual kha. Ei leh in, hmel lamah chuan, ka buai ve loh na lam tak a ni. Ka buai ring suh.

Base camp lamah-

Dar 12 dawnah Taxi in ka tlan chho chauh va. Ka thleng hmasa ber ni a ka inngaih laiin, lo in report hmasa Pu Shailendra a thleng hmasa ta ber. Thleng hmasa ber award awm ta ang se, inhnial luai luai tham a ni tlat. Mai mai a.
An lo thu thup tawh a. Ka zawm mai hreh deuh va. Ka zahzelah Scooter upa lam tawhah ka thu chut a. Ka thu hman awrh tihin, pa lian pui mai a lo phei thurh thurh a. E heu, hei chu min hnek a tum chiang. Min hnek a tum vaih chuan, thing tang hian ka khawng kawrh ang.
Misual dot commer mi i ni em? Aw, ni e. I nick sawi a thiang em? Tehreng mai, lr hlonchhing ka ni a. E..e, i va ti tha ve. As_khiangte. A va nuam em! Min inhmel hriattir ta vek a, an va han fel tak em.

Hei le TuaiSialA leh dolly-

Apple ka khel bup bup a. Bus a an rawn thlen rup ka rin laiin, car in an rawn thlen belh ta sup sup a. A mah avanga ka kal ngamna, TuaiSialA ka hmu. Kan inchibai, kan lawm ngei mai.
Hmeichhe pakhat ka chibai, “lr hlonchhing” E..e, ka hria. Dolly. Kha in rawn tluang maw ka ti dek dek, a meng khup lap a. “Ka phu lo che” Ngawi teh, ngawi teh, insum a har khawp.
An hraw the thaw hlawm mang e. Mahse, naupang ber ka nihna theihnghilh thak khawpin min buaipui hlawm, an zinga awm a va nuam em!

Vantawngkhawhthla chu-

Kan kim thep thawp hnu chuan, kan chhuk thla ta a. Pu Davida carin kan chhuk a, a fel ngei mai. Pu Shailendra leh Pu Chawnghilh ten a tir atangin, an hmet ri chuai chuai reng a. Thlalak an ngah tiar tiar khawp ang. Roll film hman uar lai chu nise, GMI chhung khan roll film 10 vel zet an hmet zo hrim hrim.
Kan hmet puak tek tek hlawm. Mobile nen, a hmehtheih zawng zawng chu an puak tek tek a ni ber e.
Thianpa TuaiSialA nen Vantawngkhawhthla kan inkarah kan khawh thlak tir vel a nih kha. Ka dingdihlip ru zauh zauh va, a pawi reng reng lo. “Tunge sang zawk?” an lo ti kher a nih kha.

Chawngchilhi pûkah-

Kan tlan thla leh zel a. Chawngchilhi pûkah, ban phar meuhvin thla kan lak ho kha. Duhaiin a lo hnim a, vangvat hlau pawl kan awm bawk nen; kan kim em ka hre mai lo.
Rulpui pûk tak phei chu a lang thei tawh mai lo, kan zawng deuh nual nain; kan hmu ta lo. Let lamah Pu Kawlhawka chiang zet zetin a tlu. Mahse, kan dem love, lei kha an tang rual duh lo em atin a nih kha.

Tui cheng ang-

Kan tlan thla zel a. Vanva lui hnar lamah tui kan zuk cheng siau siau. Ka underwear thing chi ka keng khanglang, duh ang thalin ka cheng ngam ta lo.
Pu mzvision, kawlhawk, As_khiangte, ninja, chawnghilh te tui cheng reng a hmuhnawm. Michael Phelps kan mamawh reng reng lo, kan thiam êm. Thenkhat sangha ang hlauh, thenkhat erawh lungtum tuia thlak ang hlauh. Chhuah leh zai reng rel lo tur e an ni.
Pu mzvision khingpha kan awm ngang lo. Darkar khat vel zet kan chen hnuin, kan khur hlum lo chauh va. A ni zawng, hnung zawngin a la inbin thak thak.

Lam ang let in-

Lam ang let zai kan rel ta a. Base camp kan thleng, hla an play dup dup a. “Mate ainawn” reng break dance a hneh e. Mi lamkual pui zek zek, thingtum ang maiin ka ding khawng tung a. Zei lo theih ngei mai. Hre rawh, kan thlahtute thlah leh chhawng thlenga, lam ngai lo thah.
Kan lam, kan zai, kan ei, kan nui- a va nuam êm.
Pu Chawnghilh rock starah a inngai tlat a, a kut a perh nuap nuap. A ki te a thlak kual thul, a zai bang chuang lova. Beng, mit, pum an nihlawh chung chuang e.
Mate ainawn nuam a ti bei a, nuam ti ber award; i he lova hlan chi a ni.

Intlan siak ka chák-

Dul offside zut khawpa kan ei hnuin, Pu Chawnghilh a phur ta hlut mai. Chaw ei kham hlim puar vanglaiin, “Intlan siak ka va châk e…” a ti vawng vawng. A zuang theuh theuh va, mi chawhhlim leh phúr a va thiam tak êm.
Tlan thei leh tlan peih kan awm ngang lo a ni ber e. Kan thu mawm hmuk hmuk. Pumpui elastic a mar tha pang pang e, kan puar, kan fan e. “Rahte, rahte lo haw rawh” min ti mah se, “Ka puar e, ka fan e” kan ti ngei ang le.

Thenzawlah zawng lunglen a nâ e-

Haw hmasa ber nih tum nak alaiin, a hnung khartu ah kan tang ta hlauh. Pu Shailendra te ho nen kan awm khawm a, a hnung kan khar ta a nih kha. A nelawm mang e, nel loh tum mah ila; a nel loh theih loh. A phun a phun a, ” a va ho teh tawl ve” a ti nuap nuap a. Kan kham lo tlang a ni e.
PWD bangla-ah kan riak a. A tuk zingah U Ruata(shailendra driver) min thlah thlap a, ka va lawm ve. Ninja te ina riah tum ka ni zawk mah a, ka riak ta lo a nih kha.
In ka thlenin, ka khup hit sawk khawpin ka tauh sawk a. Ka serthlum hawn ka bun lut rúih a. Chaw ei khamah, Haihawta(Tsa) kap a lo thak leh hman a, ka kapthak ka hiah leh hram a nìh kha.

Thank you-

Shailendra, mzvision, As_khiangte, chawnghilh, mate ainawn, nastycool, littlerascal, dolly dollz, marvinic- ka lam seng lo. In chungah lawmthu ka sawi mawlh mawlh e. Ka lam hmaih an awm teuh mai, ka lam vekah min ngaihsak teh un. In zinga tela nuamin, in va fel tak em ve aw.
A bik takin TuaiSialA chungah lawmthu ka sawi a. Amah vang chauhva kal ngam ka ni e.
Nilengin kan inzui a, min va care thiam tak. Kawng engkimah ka ráwn ber a ni a, he post hi a tan ka hlan e. A chungah lawmthu sawi mawlh mawlh tur ka ni- KA LAWM E.

Bonus: Thenzawl nula pakhat hnenah, “I nu leh pate an hmeltha ngawt ang a” ka’n tih hnap kha. Min vei rem rem khawp ang.

Similar Posts:

• A mak ka ti!
• Section-I Day Out
• Hei le, OT Huang Reloaded!
• Ka GMI zinkawng
• Che hlek a MI ti reng mai…

Recent Posts:

• Ka lawm e, Mi(sual)-nu!
• MIZORAM SUM LEH PAI DINHMUN IN HMA A SAWN NASA
• ZoRO Press Release
• MIZO KRISTIAN MARTAR THENKHAT TE
• BEIDAWNG SUH

This entry was posted on Thursday, October 27th, 2011 at 10:11 pm and is filed under Luangliam, News. You can follow any responses to this entry through the RSS 2.0 feed. You can skip to the end and leave a response. Pinging is currently not allowed.