mi(sual).com

Ka room turverh la inkhar tha lo chu kan pawt khâr mai dawn a, thangvân zâwla Chhawrthlapui êng kulh mai chu kan thlir leh te te a.

Arkaiden  zân tih takah Chhawrthlapui pawn a mawina zawng zawng a rawn lan chhuahpui a. Mite angin a êng mawina chhawr ve em em lem lo mah ila Siamtu themthiam zia leh a kutchhuak ropui zia min hriatchhuah tir thung a. Heti chung hian a siam  hringfa te hian… E heu! Chu e nge ni ta tuar tuar?

Ka thil ngaihtuah lai pawh chu a rawn thlâk hlawk mai. A nei faten thla êng lawm nan khawpui dung an fang ni âwm tak a ni. Thlen hman loh hlau ni awm tak leh driving liscence pawh keng hman lo hial tur khawpa hmanhmawh leh chakin an lirthei, nu leh pa thawhchhuah ringa an lei chuan an lîm fua fua mai zawng a nih hi le.

A khu chhuahna ni mai tur a ka lo hriatah te chuan, ‘Mi ten ka thlen chin an hre lo palh a nge’ ti ni awm takin ri bengchheng tak tak chu a ri chhuak tuar tuar a ni ber a. Kawngpui ân a cheng damlo leh lungphu tha lo te tan chuan thil ngainatawm tak chu a ni lo ve ngei ang le.

Chu mai a la ni lo, thenkhat te lah hi a tui lei na túr lam chhûngte an dil chawp a la ni leh nghal. Tun lai chhanah thil man a sangin Petrol te lah hi thil man sang chak ber te zinga mi a la ni lehnghal. Thil man sân chak zia leh pawisa hlutna tlâk hniam chakzia te chu ka ngaihtuah kai zêl a.

Han ti ve khanglang ila College kan kal lai te kha chuan nilengin chêng sawm te kha kan tla thin kha a ni si a. Tunah te zawng ngaihtuah chi pawh a ni tawh lo hial zawk awm e. Kan nautê Nursey kal lai tawng fiah thiam awrh te pawhin School kal dawn apiangin, “Â nu chêng sawm min lo pe” an ti thla zen tawh mai a nih hi maw.

Chhûn lama vâi thil zuar vak vel, a thil zawrh to an ti deuh ni ngei tur a ni; Mizo tawng pai tawk a, “Congress Sawrkar chu tha lo, thil man jawng jawng to bek lawm, BJP tha ber” a tih te chu kan hre chhuak a. Sawrkar thiam loh nge kan khawvel kal zel hian a hrin chhuah tih pawh ngaihtuah tham a tling reng a ni. Thil man sâng chak lutuk leh pawisa hlutna tla hniam chak lutuk hi chuan a tu a te pawh hi phat rual lohin min lo nghawng vek a  ni.

Zan rei a la ni lo bawk a, râl leh lam Biak In a Speaker aw teng chhuai te pawh chu a hriat theih a. Kan ramah hian Gospel Camping/Crusade kan neih ngun tawh zia te ka ngaihtuah a. Fiamthu ti taka, “Mizoramah mipui chêng aiin piangthar zât an tam tawh zawk” an lo tih thin te chu thil ni thei tak niin ka hria a. Thlarau lam thil chu sawi ve thiam vak lo mah ila mahni hi kan lo pawimawh berin ka hria. Keimah niin tumna kan neih loh chuan “A kekawr rawng thlak tir aiin a da leh hma zawk” tih te chu kan chan tur a lo ni reng a ni.

Kawmthlang kawr tui chhe tling a U chang a khat tawk a hrâm kauh kauh tih mai loh chu rannung dang hrâm hriat tur a vang ta hle mai. Hman ni lawka thing leh mau hring dup thin na hmunah te chuan kan mi lian leh mi hausa ten an eirûk nge rûk lo tih pawh chiang lo atanga an din in lian pui pui te chu a ding khup tawh mai a, khawhawi a tawi tarh tawh mai a nih hi. Thawhrim na avânga in leh lo ropui tak tak din tu te erawh ka ngaisang tawp thei lo, fak pawh an phû in ka hria. Kei ‘misual’ tê hian an lakah zirtur ka ngah hle tih pawh ka hai lo..

Zân la rei vak lo mahse, len na tur hre hek lo le, kan ni lovin ka khum ngeiah chuan kan tlu zâl ta a. Tawnmang lamah ka liluh tan dawn chauh tih chuan, ka room a sazu ninhlei zet ka man theih der loh chu a rawn che leh ta. Ka room hi inhnuai ber a nih bakah lehkhabu dahkhawmna a nih vangin sazu ho nen kan in luah tawm a ni ber a.

Vawi tam man tumin thang ka kam tawh a, thang a per a, a awh tum pawhin chu sazu chu ni lovin chaichim a lo ni ziah leh nghal. Ka awh teuh ber tum pawhin, a tawktarh a tana sangha ka hman a lo ei zo vek a, ka thang a lo êk khum kha chu ka sa teh e.. Tih ngaihna hre chuang hek lo le, zangthalin  ka thil ngaihtuah ho chu chhui kir neuh neuh chung chuan hriat loh karin ka lo muhil ve mai ni awm tak a ni……

Similar Posts:

• Ho lawk teh ang hmiang
• Mautam?
• THANG PART-II
• Ka nu chawhmeh siam kha ka va ngai tak em!
• Ro sum ka ngai

Recent Posts:

• MIND-SET: MIZOTE LEH KAN RILRU SUK-THLEK
• ZoRO Press Release
• Ka lawm e, Mi(sual)-nu!
• MIZORAM SUM LEH PAI DINHMUN IN HMA A SAWN NASA
• ZoRO Press Release

This entry was posted on Friday, October 28th, 2011 at 6:00 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.