November ni 21, 2009, Inrinni tlai lam dar 4 vel a ni a.
Reiêk Touridge Lodge-ah niin ka hmaah fiamthu thawh thiamin fiamthu a thawh mêk a. Chu chuan a khât tâwkin mipui chu a tinui leh hak thîn a. Kei ngei pawh ka bula thu, ka thiannu hnungzang beng thak thakin ka nui a, ka hlim ve thawkhat e. Chutia kan hlim viau lai chuan ka message tone chu a lo ri ral ral a. Ka han en chuan ka thiannu message a ni a, ka han chhiar a.
“I thiannu kha kar kal ta Thawhtanni zing dar 2:45 vel khan a kal ta! In exam lai a nih avangin kan rawn hrilh lawk duh lo che a, min lo hrethiam dawn nia…”
Ka phu zawk a. Ka bing mup mup a, ka mittui a hnâm nghâl tuam tuam a. Midangte nui hluah hluahna karah mal tak leh lungchhe takin ka awm a. Ihmn.. Ka thian tha ber mai ka chân miau a. Ka ngaihtuahna rilru chuan suangtuahna ramah min hruai a. Amah nena kan inhriat tan dan te, a naupan lai chanchin bâkah a hmangaih ber nena hmangaihna kawng chhukchho an zawhdun dan min hrilh laite chu ka hrechhuak leh uai uai a. Chu ka thian hmangaih ber, a thurûk ril ber pawh min hrilh ngamtu chuan min kalsan ta a nih chu!
Amah hi nula kum 19 mi, ft 5 leh inches 3 vela sang a ni a. Hmai bial lam niin a biang vei lamah biangsum ngainatawm tak a awm kâk a. Cher lutuk lo, thau lutuk lo, vai hmêl pu lek lek ngaihnobei tak a ni. A pa American mitmeng chu chhûnfuhin mitmeng lian lam, pâwl râm mai a ni. A kâwng chen velin a sam chu ngîl takin a zuah a, chu chuan a tilang nû-in a hmelthatna a belhchhah hle a ni.
He ka thiannu, Notei hi nula hrisel lo ve tak mai a ni a. A kal (kidney) hi a pahnih hnihin an thlâk tawh bâkah a lung (heart) an zai tawh bawk a. A hnar a thi thin mai bâkah thiin a luak thîn bawk a ni. Hetiang khawpa nula hrisel lo chuan midangte angin hmangaih a tawng ve a. Chu a hmangaih nen chuan an hlim dawn chauh emaw tihin phatsanna tenawm chu a tâwk a. A rilru a nat êm avangin chuta tang chuan thian pawh kâwm tha duh tawh lovin a chhûngte mak tih hial khawpin inah a tawm chawt reng thîn.
Amaherawhchu, Siamtu hian kan tân ruat lâwk a lo neih angin mipa fel tak Mapuia (hming phuahchawp) a tawng ta a. Chutah chuan a hmangaihna zawng zawng hlânin a hlimna ber a lo ni ta a ni. Thian dang kâwm ta lo chu a tawnthar ‘D’ nen chuan an inkawm chawt a, an pahnihin innei tur leh damchhûnga inphatsan tawh lo tura intiamin damchhûng ni chu hmangaihna nen an chhiar tan leh ta a ni.
Inhmangaih tak takte pawhin intihthiam loh châng leh intihthinrim châng an nei thîn a, a hnu reilotê-ah a reh ve leh mai thîn. Mahse, anni intihthiam lohna hi chuan an hringnun a thlâk danglam dawrh mai le!
Tumkhat chu Mapuia nen tuanna mual a dan avangin an inhau ta hlauh mai a. A bialpa, a hmangaih ber mai Mapuia rilru nâ chuan zu a in ta nghek mai a. Chu a zurui lungpuam chu amah lo beisei ve rengtu nula senior pakhat nen an chesual hlauh mai a. Chu chuan an pahniha khawvel a thlâk danglam ta a ni.
Vânduaithlâk takin chu nula senior chu a râi ta hlauh mai le! Chu chuan innei lo thei lo turin a siam ta a ni chêk ang chu, Mapuia chhûngte chuan nei ngei turin an ti ta a. Ani lah inchhîr teh mah se, tui baw hnu a ruh theih loh angin chu a inchhîrna chuan sâwtna a nei tawh si lo. Palaite tîrin an inneih ni tur thlengin an tifel nghal chûk chûk a. Chu thil chuan hmangaihna la na tak, mi inthlahrung leh mi rilru tihnat hlau ngawih ngawih mi, a bialnu Notei a dêng ta a.
Notei rilru, hmâna tihhliama lo awm tawh chu a kehchhe ta a. Puitu tur a zawng ruai a, chu beidawnna khuarkhurum atâ hnukchhuak theitu erawh a hmu si lo. Chuta tang chuan a thian neihchhun ka nih bâkah ka thian tha ber a lo ni ta a ni.
A tihngaihna hre lo chu Mapuia tlânsan tumin zinbo thîn mah se, a kalna apianga Mapuia chuan a zui tlat thîn a. Ngaihdam pawh an indîl zing malh malh viau a ni. Hun a liam zel a. Mapuiate inneih ni pawh a hnai deuh deuh a. Mapuia chuan ngaihdam rawn dîl teh mah se, amah avanga fahrah an awm tur chu a ngaingam si lo.
Chutih rualin a hmangaih ber a ni miau bawk si a. Tichuan, midang rilru tihnat hlau ngawih ngawih, midang nat lohna tur a nih phawt chuan mahni hrehawm pawh pawisalo ta chuan a duh leh hmangaih ber chu nula dang nena fanau maltluan chawi dun turin duhsakna a hlân ta a.
Amaherawhchu, a Mapuia chu a beidawng mai hauh lo. Amah ru tura kal tur thu leh lo insiam lâwk tura chah thlapin Notei te inah chuan a lêng ta a. Chumi ni chuan Notei pi leh pute chu an office avangin amah chauhin inah a awm nghe nghe a. (A nu leh pa hi kum 10 mi lek a nih laia inthenin a pa phei chu USA-ah a awm nghe nghe a ni) Chutah chuan hmangaih leh hmangaihtu chu rilru na taka tap dûnin Mapuia chuan Notei hmaah thingthiin ngaihdam a dîl nawn leh ta a.
Notei chuan a hmangaih ber chu ngaidam mah se, a neih theih tawh loh tur thuin a chhâng a. Chu chu remchângah lâin Mapuia chuan, “A nih leh min hmangaih tak tak a nih chuan i thianghlimna tal min hlân tur a ni,” a ti a.
Notei, a thutiama dingnghet tlat thîn, a hmangaih ber lo chu pasala neih tum lo bur chuan a lo chhuan ve ber a thianghlimna chu hmangaihna avang liauin liauin a hlân ta a ni.
Mahse, chu chuan a tân hlimna leh lawmna a thlen si lo. A rilru leh taksa hrehawm tak chu hmâna a hmelma, hrisel lohna chi hrang hrangte chuan a rawn tlâkbuak ta a. A hnar thi chu a reh hleihtheih loh avângin damdawiin lamah an insuan lut ta a. Chutia damdawiina a luha doctorte’n an han en vel chuan a thlîng thlâk a ngai a, a zunkawngah hnai a awm bawk hi a lo ni a.
Enkawlna hrang hrangin enkawlin damdawi chi tinreng nen chiu mah se, a luak leh hnar thite chuan ziaawm lam pan chuang lovin hniam lam a pan deuh deuh a. A pa awmna hmun USA lama inenkawl tura kal zai an rêl ta a.
Mapuia pawh beidawng duh lovin damdawiina a awm chhungin a tlawh âwl lova. Notei pi leh pute hnenah bawkkhupa mittui tla zawih zawih chungin ngaihdam a dîl ta a. Ngaihdam a ni leh ta. Mapuia chhûngte pawhin chutiang khawpa inhmangaih ta chu an inneih remtiin a nupui neih tur pawh chu an thulhpui ta a. Tichuan, an tân khawvel a lo parvul leh ta! Mapuia chuan Notei dam hma chu haw pawh tum tawh lovin a awmchilh râwt a. An tân damdawiin pawh hmun nuam a lo ni chho ta a. Mahse…
Notei taksa chu a chhiat hman êm avangin a rilru damna ringawt chuan a taksa chu pui thei tawh lovin tlâkhniam lam a pan ta hret hret a.
November ni 14, 2009 a lo inherchhuak a. Nichhuak pawh thlasik intantir nichhuak a ni tih hriat takin a mawi leh hle a. Zing chawei khamah chuan nidang ang bawkin Notei message a hmu ka hmu leh a. An tâna khawvel tiparvultu ang hiala min ngaiin ka chunga a lawmzia te, an inneih hun turte suangtuaha a hlimziate mi rawn thawn a.
Kei paw’n amah ka ngainat thu leh ka thian tha ber a nih thute ka thawn lêt hnuah ka call a. Chutah chuan a naupanlai chanchin leh a chêtchhiatna zawng zawngte min hrilhin hlim takin kan nuidun bâwk bâwk a. Kan inbiak hnuhnunberna tur a ni tih hria ang ziazângin darkar khat vel zet kan inbe nghe nghe a ni.
Chumi kan inbiak tûk, Pathianni zanah chuan thil engemaw ziakin zanrei tak ka meng a. Zing lam dar 12:42-ah chuan Notei message chu ka hmu leh a. Hetiang hian: “Ka thian, ka ngai lutuk che. Mahse, ka chau a ni..” tiin. Ka reply vat a. Mahse, chu chuan chhânna a hmu ta lo. A message mi rawn thawn hnuhnungber a ni ta a ni.
A hnu darkar hnih, zing lam dar 2:45 khan a kal tâk thu a kar khatna, inrinni tlai lam dar 4 velah Reiêk Touridge Lodge-a ka awm laiin a nutei chuan Notei phone atangin mi rawn hrilh ta a ni.
A nutei nen chuan kan inkâwm zui zel a. Chuta tang chuan a chanchin tam zawk ka hriatbelh a; min hrilh a tum min hrilh hman tâk loh, Mapuia fa a pai thu te pawh. A nutei chuan Mapuia chanchinte pawh min hrilh zel a.
Mapuia pawh chuan a hmangaih ber nunna thihnain a lâksak chu hrethiam thei lovin a tuar em em a. Notei thlalâk leh a thil pêk dang dangte kengin a thlânah zing, chhûn leh zânah a kal a, haw nachang a hre lo fo thîn. Engmah a eiin a in duh lova, mittui nen Notei thlânah a hun tam zawk a hmang thîn.
Chutianga engmah eia in lo ta chu a taksa a lo chau a. Tichuan, a hmangaih Notei hnungzuiin pialral ram nuama hlim tak chêngdun tawh turin he khawvel hi a lo chhuahsan ta a ni.
Notei’n a boral hmaa ka tân liau liaua thuziak ropui tak a hnutchhiah, a nutei’n mi rawn thawnchhâwn hmangin he thu hi ka’n khâr ang e. (Hei hi Vanneihtluanga thu a ni âwm e)
“Tidamtu ka pan theih nân natna min pe a; rinna chakzia ka hriat theih nân rinhlelhna ruam min zawhtîr a. Thlamuantu ka hnaih theih nân thlabârin min siam a; malsâwmna ka thlâkhlelh theih nân ânchhe râpthlâkzia min kawhhmuh a. Felna hlutzia ka hriat theih nân sualna pawizia min temtîr a; lungâwina vân ka thlen theih nân lungâwi lohna khawvêlah min dah a. Chatuan ropuizia ka hriat theih nân ka damchhûng nêpzia min hmuhtîr a. Ka mamawh zawng zawng nei ta ila, Famkimna Pathian ka mamawh lovang..”
Note: Hei hi dâwt phuahchawp mai mai ni lovin a taka thil thleng ngei a ni e.
Similar Posts:
- Tu hmangaihna nge thuk ber ang?
- Love – Blessing or Curse?
- Khawinge Hmangaihna zawk niang le?
- Ka ar thai
- Ka Ice-Cream
November 5th, 2011 at 2:36 pm
Engkim mai hi a lutuk (extreme) chin hi zawng, thalam aia thalo lam min hruai thei an ni chawk… hmangaihna thleng mai hian… Pathian hmangaihna chauh lo chu!
Report this comment
November 5th, 2011 at 2:41 pm
I ziak lung kuai thiam hle mai, nang pui hi nula mittui poh i koh ho sak fo thei mai ang a, thil nilo poh ni ah i chhuah daih theih hmel riau mai i ziah thiam dan en hian……
Report this comment
November 5th, 2011 at 2:42 pm
Chhiar phawt ang, a post tupa atang hian a ngaihnawm dawn tih a chiang sa
Report this comment
November 5th, 2011 at 2:49 pm
Ka chhiar zo chiah a, an inkara inhmangaihna hi ropui ka va ti em!! chutih rualin ka lainatna erawh a nep chuang hauh lo. Post tha tak, lungkuai tak zawng a va ni em!!
Report this comment
November 5th, 2011 at 2:49 pm
A ngaihnawm piah lamah, a ziaktu pa’n a present tha khawp mai.
Kei atan erawh zawng, hmangaihna hi tahna a ni e (sawi tam lo mai ang, mittui a hnam dawn tlat)
Report this comment
November 5th, 2011 at 2:50 pm
i thiannu chu a lainatawm hle mai.
Report this comment
November 5th, 2011 at 2:53 pm
ngaihnawm dap dap hle mai…hmangaihna diktak zawng a ni e…
Report this comment
November 5th, 2011 at 3:01 pm
Zuruih lungpuam chu tha lo hle mai.
Report this comment
November 5th, 2011 at 3:12 pm
a va ngaihnawm ve
Report this comment
November 5th, 2011 at 3:27 pm
.
Report this comment
November 5th, 2011 at 3:28 pm
Chhiar kuit ve thak chu le, buai chung chungin
Report this comment
November 5th, 2011 at 3:44 pm
Nuih a vazalo ve.
Report this comment
November 5th, 2011 at 3:56 pm
Story in ang reng pawh hi a ziak tu a zir hian a va in ngaihnawm hleih thei tak em, I thuziah thiamna hi ka ngaisang. Ziah thiam ve min ti chak thin ngawt mai.
Report this comment
November 5th, 2011 at 4:08 pm
I phuahchawp ani si lova maw…. ka chhiarchhuak thlap a, ka rilru an tina lutuk. I thil hriat min hrilhdan i thiam e.
Report this comment
November 5th, 2011 at 4:10 pm
Rilru na, hah, mangan vanga sual lam kawngzawh thatloh zia a chiang hle mai, a hun lai chuan na viau mahse nakina kan inchhir leh na tur ah chuan fimkhur a tul.
I thiannu te inhmangaihna thu hian min hneh a, hnuk an ti ulh thei alawm le
Report this comment
November 5th, 2011 at 4:15 pm
Dolly, i kawmen in ka hnuk a ti ulh
Report this comment
November 5th, 2011 at 4:27 pm
Hmangaihna vanga nun chhe ta vek te, chu hmangaihna tho vanga hlim taka nun hmang mekte an awm a. Hmangaihna in an nun a va khawih ve phak lutuk loh mihring an awm ve bawk a. Tsa thiante khi chuan hmangaihna an la na
Ts, Misuala i hun khawhral mai mai lo hian Novel puitling i ziak zawk mai dawn mawn le
I story presentation a fuh tlat (fiamthu lo)
Report this comment
November 5th, 2011 at 4:38 pm
In mi fakna k phu lo mang e. Phone atangin ka comment thei thak lo mai a, a buaithlak angreng hle.
@sheldon: Ka lawm hle e. Novel hi chu a hautak angreng khawp mai a. Pakhat chu ka ziak ve zãn tawh asin! Mahse, bu chhe deuhvah kan chhuah ta a ni.
Khi thu khi thawnthu tawi angrengin tlem tlem belhin ka ziak a, A5 (lehkhabu size tlanglawn) phek 20-30 vela ka ziah a nia. Chu thu atangin khi thu tak khi phuahchawp tel lova a tawi thei ang bera ka rawn dahchhuah a ni.
Tun thla hi a boral thla a ni e.
Report this comment
November 5th, 2011 at 4:40 pm
atha kher mai,thuthiam pol tak ina cheers….
Report this comment
November 5th, 2011 at 4:44 pm
Hei vang pui roh te hi ni zawk lo maw, i fb i kalsan tak mai le?
Tak tak an a, keipawh hian ka kalsan tep tawh a ni. Zirlai nen a buaithlak deuh.
Report this comment
November 5th, 2011 at 4:46 pm
Parawl ei rawngbawl a hun e, chaw ei phawt te’ng. Lam ang ka lo haw leh ang, kan tap hawm hawm dawn nia.
Report this comment
November 5th, 2011 at 4:49 pm
Tsa & Lr-a, FB te chu ka sawi tawh reng kha
Novel hi kei chu ka chhiar thiam a, ka phuah thiamlo. Han ziak teh u ngaihnawm tak takin, a chhiar lam chu ka taima teh ania. Chhiar chi chu ka chhiar vek, eng bu pawh. Thil thleng tak tak behchhan a lehkhabu ziah phei chu min hneh zual thin alawm.
Report this comment
November 5th, 2011 at 5:01 pm
Biangah mittui an luan chu le
Report this comment
November 5th, 2011 at 5:07 pm
i ziak chhuak thiam thin e. Reng rengah sms lungchhiatthlak deuh hi i dawng thei bik re re.
Report this comment
November 5th, 2011 at 5:16 pm
Tumkhat chu Mapuia nen tuanna mual a dan avangin an inhau ta hlauh mai a
Inhauh chhan dang tha deuh zawk an neih ka va ring em..
A ngaihnawm a, a lungchhiatthlak a, true story a nihna hian min hneh bawk a. Tin, i rawn ziak chhuak thiam hrim hrim bawk.
Report this comment
November 5th, 2011 at 5:19 pm
I ziak ngaihnawm khawp mai. A tak tak a nih phei chuan lainatawm tak tur an nih hi maw le. Arnold-a te ang meuh pawhin chhiar se an inhnit ve fuih fuih lovang tih a sawi theih miah loh.
Report this comment
November 5th, 2011 at 5:25 pm
A changtute nunin a zir a, nangin ngaihnawm takin ilo ziak bawk nen mittui tla purin kan chhiar mai dawn alawm le.
Hmangaihna hi zawng a hmang thiam lote tan chuan ‘Aw ral mai rawh Lei ninawm..’tih vawng vawngna tur khawpa mi vuak let a ching teh mai ania.
Report this comment
November 5th, 2011 at 5:30 pm
@K’u Kawnga: A chanchin mi hrilh dan a nia. Tuanna mual dang hian harsatna tam tak a thlen thin nia! Ka lawm e.
Khi thu ka ziahna a rei tawh angreng a. Ka edit tawh lem hlei lo va, tihsual a awm nual mai a. Chuti chung pawha ngaihnawm ti taka in la chhiar thei chu a lawmawmin ka lawm takzet e.
Report this comment
November 5th, 2011 at 5:40 pm
@TS, ni ve thei tho mai. Tuanna mual lo dang ta lo se, tun dinhmun rapthlak takah hian an ding lo ve thei tho mai. Han chhiar chhuah puata ka ngaihtuahna hruai peng deuh tu a nih vangin ka han tarlang satliah mai a ni e. Ka lawm ve e.
Report this comment
November 5th, 2011 at 6:38 pm
Pialralah tal intawng leh se…..
Report this comment
November 5th, 2011 at 7:29 pm
Lal Ts, i thil rawn chhawp chhuah hi chawei lai pawhin ka rilru ah awm reng a, ka lo lut leh ta ringawt….
Hetiang deuh hi ka tawng ve tawh, mahse a inang chiahlo. A nat chu na ve chiang alawm, Pathian lakah pawh ka hel a, nun beidawng luttuk in ka awm a,ka chhungte hian thahnem ngai takin Pathian min auhsak lo se chu tun dinhmun hi ka thleng hauh lo ang
Report this comment
November 5th, 2011 at 7:43 pm
U Tuai..sob2..
good post
Report this comment
November 5th, 2011 at 8:00 pm
Tuanna mual dang hian inthenna chu a thlen thei teh meuh mai. Khawkhat hmelthaa sawi hat ve ve an nih phei chuan zar buaitu an lo tam ve ve lo thei si lo, engemaw ngaihdan inhmu rem thei lo an neìh hlauh phei chuan. A ngaihnawm hle mai. True story anih ngei pawh ka ring.
Report this comment
November 5th, 2011 at 9:06 pm
ka chhiar chhuak parh tih ka in report ve e.
Report this comment
November 5th, 2011 at 9:08 pm
Min tizawi vek thei alawm le…! Hmangaih hle mah se, innei thei anni lo tih hre reng chunga, a nulat thianghlimna a hlan khi eng nge in ngaihdan le? Hmangaihna mit a del… kan ti dawn nge, lungmawli… kan ti dawn?
A hrim2in, Tuaitea hi nula hmeltha leh nalh deuh i sawi zuah2 a, an duhawmzia te thiam takin i rawn sep chho a. A tawpah – ka thian tha tak… i ti ziah zel. Nula nalh deuhte chu thian atan ni lo, nupui atan an itawm jokes a sin.
Report this comment
November 5th, 2011 at 9:25 pm
Ava ngaihnawm lungrun ve le….
Hmangaihna kiangah hian rinawmna te, dawhtheihna te, inpekna te, lainatna te awm mahse a hrulah itsikna, thikna, lungngaihna, beidawnna te a lo awm ve bawk anih si hi…”Hmangaihna kawng hi alo va mak ngai em.. Ariang nun ti vula ti chuaitu mai an..” an lo ti ani lo’m ni kha..han hrethiam teh reng ila aw…..!!
Report this comment
November 5th, 2011 at 9:50 pm
@Kawlhawk, a lungmawl vang anih ka ringlo. Keipawh hian ka hmangaih ber ka nei thei dawnlo anih chuan sex tal chu ka hmanpui ang ka lo ti ve thin asin, hmaaaaaaaaanah!
Hmeichhe leplerh deuh an awm laiin hmeichhe pangai tak, kan bialpa, kan ngaihzawngte kan hmangaihna lantir nan chauha inhlan ta hi an awm ve tho
Report this comment
November 5th, 2011 at 10:18 pm
sad story T_T..
Report this comment
November 5th, 2011 at 10:25 pm
Yes! #37, Ka ngaisang che. Innei thei dinhmunah ding lo mah ula, i hmangaih ber chu i neih hlu ber i hlan phal tur a ni. I hlan ngam tur a ni. Mahse… Bible hiiii… Sakhua hiiii… (?)
Report this comment
November 5th, 2011 at 11:16 pm
Nakin lawka zofate’n thu leh hla lama kan chhuan tur k’u Tsa thu ziah han chhiar hi chuan suangtuah na tawite neite pawh hian kan suangtuahna min fan thui pui thin mang e..
Report this comment
November 6th, 2011 at 12:56 am
39#, Komen ka chhiar thla zel a, i komen ka chhiar thleng chu kan nuih chhuah huk chu le… Ka rilru a thil awm ve mai mai chu mi pa 2, in hmangaih em em kan tih fo te hi an in hmangaih tawn tak tak ang em le tih hi ani…post hi ka ringhlel tihna lam ni lovin…lo in hmangaih tawn viau tak tak te pawh chu an lo awm tak tak thei tho va… Thil 1 erawh chu mihring in hmangaihna hi chu a thuk poh leh mahni hma kan sial nasa ….chuvang chuan chawlhna, lungawina, hahdamna hi hmuh a har… Pathian hmangaihna ah erawh chuan thlamuanna, chawlhna, hahdamna, hlimna tluantling te hi a awm ve thung..mihring hmangaihna leh Pathian hmangaihna kaikawp thiamte hi mi vannei ber annih ka lo ring thla ve rawk a…
Report this comment
November 6th, 2011 at 7:16 am
very ngaihnawm
Report this comment
November 6th, 2011 at 11:00 pm
#39
Report this comment