mi(sual).com

A hunlaia vala pumpa kan mittui a tlak sak sakna kha tunhnu hian uangpui changchawiin kan han nuihpui veleh chhawng a. Ka inthlahrung deuh a, mahse eng tizia nge mawni ka ziak chak tlat, hmangaih tur neilo ber hian hmangaihna kan kurpui kan kurpui a, tute emaw tana nuihna alo thlen a, thenkhat tana ngaihnawm alo nih tak mialin mahni chanchin I han sawi nghek mai ang aw…

Nia, khatia kum 5 zet mai thiam thil zir tura hun tha ka han hmu ta mial mai chu ka phur at at in hmalam hun hi engsur mai hian a hriat a, mahse alo ni hauh silo..12 zo hlim intih tlangval thawven lai kha ani bawk nen, pheilai a zang hah mai in , mahni tawka duhber kan lo tawn ve lai kha ani bawk nen, uluk mangkhengin Sunday tlaiah thiante inah inthlah nan tiin kan han inhmu a.

Rinawmna thu te kan infah nasa in thiante pawh khan kan boruak an hrethiam aniang chu, min kal bosan ta diak a, mahse ka thianpa Pi kha enga tinge ka thiante chhuah velah an bedroom lama a dumbur keng chunga a rawn phei a, mei a rawn zial tak daih chhan kha tun thleng hian kala hre chhuak zo ta lo.. Tichuan ti tawh mai ang, kut inhum sak chung chuan kan inthlah ta hnap a (a bak a theih siloh) ..

A tukah chhungte, thenawm khawveng tena min thlah zawh chuan Joshua Travels Sumo ngei maiin Guwahati lampan chuan kan kal ta a.. A hma ni a ka thianpa Pi khan min tluanlo nge ka hrelo Sonapur leiminah kan tang nileng a, Zan kanla riak zui a, July thla tawp khaw lumlai lo ni bawk nen hreawm ngian ngian tak ani.. Tihtheih awm talo chu a tukah kan let leh ta ringawtin thlawhna in kan kal leh tain, kan thleng ta a..

Tichuan kal hmasaka kan tluan loh avangin ka Nu leh ka thianpa Nu ten min hruai a, Hostel luhni alo thlenga, lung a leng tan!!. Mizo senior fel tak tak ten minlo hmuakin minlo dawngsawng a, kan chhungte bulah chuan college nawmzia, hostel thatzia te an sawi a, min tiphur leh ta deuh a, mahse fa naupang ber ve ve, lian ve uai tawh chunga pangchang tak tih takah chhungte haw dawn kha chuan kan tawng tha hlei theilo ani e..

Chhungte an tlan liam ta maw tihah senior te titi a dang tan, Pa deuha awm tur, tawrh hram hram tur, Vai pawn an tuar thei a Mizo tan chuan theihloh tur a awmlo Etc,etc.. rilru in an sawi tum a man tan, kan room tur ah min hruai a, Vai senior ho te lo awm thapin awmdan mawi min han fah tan a, chaw ei kham hnu chuan senior zawng zawng lo kal khawmin min han bawl ta a, a lehlamah a hlimawm phian a, min muttir ta a..

Dress coat chu thla 3 chhung smart dress, inbilhluh thlap, belt hren, mawza bun reng tih kha ni tawp mai ani, bathroom a kan inbual dawn pawhin smart shoe nen smart takin kan lut a, smart takin kan chhuak leh thlap..Khatiang zirtirna kan dawn avang khan ka zan hmasa ber pawh chu August thla tir Guwahati khawlum hnuaiah ka mu ta ap a, ka roommate kha hostel monitor tih takah, a lo felin, a lum si, kekawrte nen mu rawh, hlau suh a tih avang chuan thlamuang takin ka zan hmasa ber chu ka mu ta a..

A tuka an titi hmangin thiante chu anlo mu thei manglo ani awm e.. Chhun a ral a Zan alo thleng a, eng emaw ti a hun kan hman hnu chuan mut zai kan han rel leh a, roommate phalna in kekawrte nen ngat (chhunah ka intihtheihpui nasa) kan mu leh bik a, mahse awmpuipa chu ka mut hnuah alo chhuakin kawng alo khar thalo pek a, senior pakhat mi rawn koh tum chuan min hmuin khum atangin min han pawt thla mai chuh, ka harh ciang teh asin, inchungah terrace ah kal rawh tih thupek ka han dawng nghal a, ka han chhoh chu kan batchmate pakhat hi alo awmin ‘ enge mawnile, mut tui nak alaiin alo ti bai bai a’ kan hostel a kan batch te chu rawn chhoh belh zelin kan kim ta a, chutah hnuai lam atang in Au thawm a rawn thleng ta, a rawn chho zel a, senior tam tak mai hi a ni ringawt, an rawn chho a, engmah sawi hmasa loin, min han hel nuai tak tak mai chuh, mittui pawh hi a tla hmanlo, arsi hi a de chuai chuai ani ringawt, chutah an duhtawk an ngah hnu chuan ‘ Hei hi chu hostel dan ani a, tuma hnena sawiloh tur, aia upa te zahdan intirna anih hi, etc.etc ‘ an han ti zuiin, ‘Thank you brother” kan la han tizui a, thinlung lawm lova lawmthu sawi hi Chunglam duh dan anih si loh chuan Chunglam khi ka chungah a lawm hauh lovang le..

Kha zan zet kha chu kei chuan ka theihnghilh tawh lovang, a tukah chhungte kan han phone a, Ka Nu aw ka hriat chiah khan engti vang a tawng zui hlei theilo nge ka nih pawh ka inhre talo, mittui hi PCO tetakte chhungah khan a luang zawih zawih hi ani ringawt.. A hnu kha chuan inla Mipa takin engmah kan hrilh duh tawh bik miahlo, tun hnu a ngaihtuah hian chhungte rilru alo hah tur zia kha ka khawngaih let thin.. Tawrh ngam loh a complain kha chuan buaina a zual dawn tih kan hre si, kan hostel kha kan nep deuh nge, hostel 5 zingah tlanchhuak an tam berin kan batch a mi 12 zingah khan 4 chiahin (mizo 2, bihari 2) kan tuar chhuak..

Tichuan hun leh nite a ral zelin, mihring hi kan hun tawn a zirin alo pachan theih khawp mai, ragging hun thla 3 dawn kha chu tawrh chhuah hi kan tum bur a, inben, inhnek tihte vel kha chu a tawrh dan a thiam theih khawp mai..Zantin kha chu min khawih biklo a, a tantirh khan a nasa in a tawp lam khan a nasa leh deuh..

Mut tawh hnu a min kohkhawm kha chuan zawlnei ni mah suh ila kan hma a thillo thleng tur kha kan hrelawkin, hmaiah body lotion ( Vaseline ngei mai ) kan inhnawih lawk a, hetiang tih hian an kutthlak kha a natloh phah anilo a, mahse a tuk zing a hmai a vung tur kha a veng ve deuh..A hun laia tahna leh rumna ni mahse thil mak leh danglam tak tak kan tawng thin kha chuan min tihlim ve thei hle..

Hostel corridor vela, kan han parade thin lai te, train anga ‘chuk chuk’ ti a kan han tlan a, accident an tih veleh a kan han tlu dual thin te leh ball tel lova criket, football kan han khel te kha chu a lehlamah a hlimawm duh ang reng phian, Zanrei tawh a kuhva,meizial lei tura intirh erawh a hlauhawm deuh..senior zawng zawng te room a kal kual a, an hming veng, chhungkaw zat, etc kan han dil a, kan han by-heart te kha a hun lai chuan a ninawm hle, a duh duh in an duh duh hming, veng, bialnu hming, etc min han zawt a, kan hriat loh chuan “chawrh” ani mai..Mahse khatiang te kha alo tha viau, kum tam liam hnu ah pawh, ka hostel chenpui ka senior te kha chu an hmel ka hmuh hian rilru ah an veng, khua, chhungkaw member zat thleng hian a rawn lang chuai chuai in in unauna a siam bik..

Mitam tak hi inzawt ta ila, a tam zawk chuan taksa tawrhna ai chuan rilru a hreawm tawrh hahthlak zia hi an hre awm e..Keini pawh kha , a hunlai ngaihtuah let khan kut kan tawrhna aia hreawm zawk chu rilru thlaphang leh thlamuanglo reng reng a awm kha a hreawm kan ti zawkin, hlauh nei reng reng a awmkha chuan taksa leh rilru in a tuar hle, ragging a zawh hnu thla 4/5 vel thleng kha chu zanlaia ka room bulah ke pen thawm a awm chuan ka harh nghal kar zel..mahse Pathian remruat a niang nge, a tu a te pawh kha kan thila ei a tui hlaim hliam in breakfast ah te khan Roti/Puri per 10 te zu han ei thei a, a hnu senior kan nih hnu kha chuan per 2 pawh kan ei hleithei tawhlo..

Thil mak tak tak te min tihtir a, thiamlo chung chung a min zaitir a min lamtir lai te kha ngaihtuah let hian nuih a za in, Mizo hla min han saktir a, “ I hmelchhe lutuk, I sual si, I hang si, Aw hmelchhia, Aw hmelchhia” tih vel, Vanlalsailova hla thluk ngei a kan han sa thin te kha chu nuam ve tak ani !! Thil tam tak min tihtir a, mahse mipa leh mipa ingaizawng anga min han insawngbawl tir thin te leh, min beng hrep a, a hnu chiah ah min han nuih luih tir a, a nui ring ring room lama let theih an han ti thin te kha chu a hnuhnungber ka ni fo thin..

Kan Hostel a kan Mizo senior awm 2 te khan min be tha duhlo tiin kan han vui ru ve viau thin a, mahse khang te khan chhan alo nei vek si..Min ngaihsak viau a min chhan chuan a tuartu kan ni leh si tih anlo hriat kar vanga khatia awm kha anlo ni a..

Tumkhat kan Mizo senior room ah Vawksa an siam a, a rukin min hrilh a, keini vawksa rawp khan lawm takin kan zu ei teuh mai a, kan ei laiin vai senior alo lut a, tha deuhin min biain min fiam vela,engtin mah min ti dawn lo anih hi tih hnuah, kan vawksa ei ngei mai avang chuan zanlaiah min koin min han ‘haih jish’ leh tak tak mai a, Isua vanga tuar te chu an ngaihsan awm a, keini Vawksa vanga tuar te hi engtin nge maw min ngaih ang ni..

Kan tan kha chuan kar tawp chawlh kha a huphurhawmin, Vai ho zurui kha kan huphurh thin hle a, rin ang tete in hmeichhe buanchaklo iangin phal deuhin kan dawh leh hle hle mai thin.. Tawng thar te min zirtir a, Kela, Sudhurbhai,etc,,tawng thalo ani tih kan hr silo, kan senior pakhat phei chu kan Proffesor hnen ah Sudhurbhai(ka let thiam chiah lo a, zawnga tihna lampang ) ati ani awm e, min zirtir dan kha chuan ‘Good morning brother’ tih ani miau a..

Tunhnu a ngaihtuah hian kan U teho pawh kha an peih hi ka tia, a hnu a peih miahlo te pawh kha zing min han tlanpui vel a, midang sport dress nena zing tlan kara Formal dress, smart shoe nena Ek line ngei maia kan han tlan ri khap khap kha chu kan tlanpelh min enzuilo an awm lo reng reng, Zan mu har bawk, tho hma bawk kha chu class lecture kan ngaihthlak ring suh, kan tan chuan class room baka hahchawlhna nuam kha a awmlo, kan Proffesor te pawhin min hrethiam a, min hau duh bik lemlo..Alarm clock a tan a dar 4.29 a.m ah min kaitho rawh an tih a, 4.20 a.m vel atanga sana en chunga an room kawngkhar pawna din tan te kha hreawm ve thei tak ani..

Rilru hi alo mak thei khawp a, min khawih zing leh kan ngei deuh kha chu kan haw em em a, keipawh a hunlaia ka rilru a awm ber chu, ka haw veleh Quarry halna jeletin ka hawn anga, hmun 3 ah bungin ka huat zual 3 te room pawn ah an thih loh na chiah chiah tur velin ka hal ang tih ringawt kha zu ngaihtuah a mawle.. Ka tana hreawm ber kha chu, inkhawih ai kha chuan Hostel landline vil kha ani, mobile kha a tam zawkin anla nei silo, a tawp lam phei kha chuan 4 chiah kan bang tawh in, phone kha ka room bul ah a awm bok si, eng hunah pawh ring se, va hello a, an biak duh va koh kha kan hna a ni ringot, mipa 60 chuang awm ta kha chu a ri reng mai sia, ninawm tak ani..

A hun laia room a, mahriak te a kan tahpui te kha, hun alo kalin kan han nuihpui leh ta zawk in sawi nuam kan tih tih te alo ni chho ta zawk a, mihring nun hi chu mak ve tak ani.. Lung te kha a leng theiin, tu emaw tete kan han phone a, a Pa in a extension a alo ngaihthlak lai te, a hnua ka thiannu ka biak tira ( ka biaktir phot a, ka be thin ) anlo hauh hrep te khan rilru na an belh leh vela, ho tak ani.

Chhungten Phaia awm chuan Zu inloh tur, tunah inlo mahla, chhinloh tur, i thian ten beer an in pawhin Frooti chiah in tur ti a min thlah liam ka ni bawk a, ka in lemlo a..Mahse zankhat chhan awmlo a, Senior pakhat ruiin a, ha nghing lawih khawpa min hnek avanga, a tuka kan rilru hahin Zu kan in ngawt, in ngai talo chu, ka ruiin Guwahati GS road, HUB bul velah ngei khian chhun pachanga ka inbin lai vel te kha chuh tunhnu thleng hian ka la mur chem chem, thiante tan khan zahthlak tak tur ani..Hun te alo ralin freshmen te kan han hmu ta nawm zia kha chuh !! Nuam ka tih ber chu, freshmen hmun zawh a, thla 3 hnu a, a vawi khat nana kekawr bul leh slipper nena ka han inthuam kha, khatiang khawp khan slipper bun kha alo nuam tih ka hre lo re re…

Kei thinram ve tak, vai ngainep tak tan kha chuan ka zir tur tak ka zir hi ani ringawt, kan college a first day a classmate te velh ka tum te kha zan lamah nghawng alo nei leh a, tlawm thiam kan zir hi ani ringawt, mahse tun hmu thleng hian a huna tlawm thiam min zirtir a, a tha ang reng..Inlakpa kha chu a hlawk vaklo, tum khat ka mood off in min kohin ka kal duh lova, min ko tupa chuan ka room a rawn pan a, ka hawn duh lova, a tlawh chhiat dawn takngial avangin kan hawng mai chuh, duhsak takin a ben pawh ni lovin, min han hnek tak tak mai chuh, ka sawi peih lo, na tak ani ringawt..

Thenkhat chuan ka khawihlet ang, Pawnah in ka luah ang in ti mai thei, a boruak ah khan khatiang lam chu a lang lovin, kan zir suh chuan kan tawrh a ngai ani ringawt, Ragging tuar chhuak lova pawn lam a In luah te kha chu a rei tulh tulh a, an tan a hreawm tual tual.

Tam tak chuan college authority hnena complain awm te pawh inti maithei, mahse khatih hun (ala reilo) lai pawh khan kan Dean, Proffesor te pawh khan an hre ru vek a, eng an ti lemlo, anni ngei pawh keimahni ai ai a tuar nasa anni in kan senior te pawh khan ka tawrh kha an hunlai nen khaikhin chuan a nep zia min hrilh thin, tuna Supreme court order a chhuah hnu phei hi chuan a awm tawhlo ang aniin an fimkhur tawh hle a, a titu te pawh an suspend hmak hmak tawh..

Ka sawi tak te khi phuahchawp pakhatmah a awmlo a, a hunlaia a hrewmzia kha chu ka sawi thiamlo, mahse kan nuna hreawmna alo thlen hian, a tha zawnga hman thiam a, tawrh thiam hi a tha a keipawh thil tam tak ka zir phahin, ka hostel awmchhung zawng leh tunhnu ka nun min hruai theitu tam tak ka hriat phah a, tun hnu thleng hian kan school kal laia insual hrat ve tak kha ka thinrim mai mai thei tawhlo in, ka kut a ram ve thin tehreng nen, tun thleng hian kut thawh lampang hi ka hreh phah a, aia Upa zahna, inngaihtlawmna, tuarchhela, hnam dang kawm ngeihna leh inunauna te ka zir phah in, hlawkna tam tak ka chhar a..

A hunlai a kut min thlak hnemtu kha kan chunga sual anni kher loin, tun thleng ka huat phei kha chuan vawi khat mah min benglo, khapa kha Aizawl khawlai hmuh ka chak khawp mai, he2..Khatianga tawrh chhuah kha chuan hostel kan inla tatu in, kan tlangnel a, hostel awmpui te nen in unauna kan neiin, kum 5 ka awm chhung khan mipa rual 60 chuang awmna ah khan inhau te chu awm thin mahse insual pakhatmah an awmlo, aia U kan zah a, nauten min zah dan te kha hlu ve tak ani..

Kei erawh hi chuan tawrhna, pachanna min zirtirtu ah ka ngaiin ka tu leh fate hnena nakin hnu a ka sawi tur ka tawng ah ka ngai a, ka vui lemlo, mahse ka tawrh ang tuar tur kha chuan tumah ka duhlo in, Ragging a bo ta hi ka lawm hle..

Bonus : Thil mak tam tak ka tawng a, Freshmen dawn zana Adama suit a kan din tlar a, senior pakhat ina scale kenga a rawn teh diat diat kha chu sawi thuilo mai ang, pakhatna Hostel freshmen function ah Dean in, a chhan hre miahlo in lawmman ala hlan thin zui…

Similar Posts:

• Boys’ Hostel, PUC-a kan awm lai
• Harsatna tuar turin ka tling ve a -2
• Ka hmangaih che, ka hmangaih fo ang che.
• Chhanlet loh hmangaihna
• Naupang tul lova sawisak

Recent Posts:

• BEIDAWNG SUH
• Bawihpuia kha
• L.Kira an tih chu (The man behind Lalzova)!
• LUNGPHUNLIAN TUMKAWNG
• A liampui ta si

This entry was posted on Saturday, November 5th, 2011 at 10:00 am and is filed under Adventure, More than words. You can follow any responses to this entry through the RSS 2.0 feed. You can leave a response, or trackback from your own site.