mi(sual).com

Bike hi ka awt em em hran lo. Mi a phur tlem thei si a, leklam berah hman chi pawh a ni lo. Bike chuan hi a chung a neih ve loh avang hian ruahsur in a hul theih bawk silo, nisa hnuaiah khua a lum thei si. Traffic lun laiah a tha tih mai loh chu ka awt em em hran love. Bike hi a buaithlak si, a chain leh battery a nei hian scooter aiin enkawl ti hautak. Tin, bike hi a him lo, insut nikhua in a hnunga chuang an na zawk duh a, tin a bo duh em em bawk si. Intlansiakna leh sual rawngbawl nan a hman rim ber a ni.

Tangkaina tam tak awm mahse hnawksakna chin a awm. Bike a intlansiak hi ka ngaisang em em hran lova. Khawvel bike intlansiak Moto GP pawh hi ka en vak ngai lova, ka tui pha em em lo bawk. Mahse, ka ngainep em em hran lo bawk.
Mamawh leh a tulna avang pawh ni lova, mahni thawhchhuah pawh ni hlei lova lei phei chu ka ngaisang bik lo. Bike changkang a sawi R15(R one five) hi ngaisang in min ring a mi? Delhi a ka R15 hmuh ang kha chu tumah in inkhalh duh lovang. A hmel a chul tawh bawk si. A awmna a changkan teh fahran silova. Tin, a a tlan chak lo, Mizoram kawng chhia ang phei chuan tufa mahin a thlawn pawh in intlan pui duh kher lo ang. Mi tam zawk hi chu kha ka RI5 hmuh kha pe che u ila, vai thir chhe zawng hnenah hralhna tur bak in kal pui duh kher awm love..

He R15 hi ka hmuh hian kan nau pakhat R15 ngaisang/duh ve deuh hi ka hre chhuak a, thla ka lak sak ngat nghe nghe a. He R15 thlalak hi kan in hlanchhawng (Bluetooth transfer) dawn tum chuan a phur ve khawp a, mahse a hlan chhawn hnu hian a ni, R15 ngaisang meuh pawh in he R15 thlalak hi chu a duh lo. Chuti chung a in hmuh duh a khalh chhin in chak em em chuan ka hmuhna hmunah tun tleng a la awm, in va en ve dawn nia. A awmna hi a hla deuh hlek a, mipui zi hut hut erawh tawn angai, in kal peih ngut ang em maw ni le? Mahse en chak a hmuh in duh em em chuan, New Delhi Railway Station, platform 16-ah khan hulhliap ban an phun kha en phei nghauh nghauh ula chiang takin hai rual loh in R-15 tih a lo in ziak kalh ang a. Mahse nuih suh ang che u. A chhan chu YZF tih lam a ni ve lo bakah Yamaha ho pum chhuak a ni lo tlat a…

Chutianga bike ngaisang lo chu ni mahila, mamawhna avangin Bike ka lei ve a tul tlat mai a, ka lei ve ta nge nge a. Ka bike chu R15 a ni lova, Yamaha, Honda, Bajaj leh Suzuki tih vel pum chhuak a ni hek lo. Petrol hmang a nilova diesel hmang ani hek loh avang hian oil man sang tih vel in min ti buai lo. Electric leh solar engery hmanga kal a nih loh avang hian sum senna a tlem em em bawk ni. Ka bike hi a pian zia sawi danglam a modified chiam ve chi a ni lova. Ka neih tirh a a hmeh hmang ang kha a lo pu deuh vek a. A thutna (seat) hi pa lian deuh deuh in an khal tumin an ti chhe palh a. A thutna lian chi nghet tlut mai, spring awm ka hmang a. A khalhna (steering) hi tlem chuan a tir lam a ka neih tirh lam ai chuan tih tawi a ni tawh in ka hria. Hei pawh hi keima duh thu avanga tih pawh a nilo, chhiat (accident) tawh avanga tih tawi a nih zawk a.

Ka bike hi mihring phur teuh teuh chi a nilo. Mi pakhat tan a siam ni awm tak a ni. Khawvel a bike man to leh changkang Hurley Davidson bike thenkhat ang a mi pakhat chauh chuan theih na a ni a. Mahse, a tul chuan a bungraw phurna tur, a hnunga an dah belhah hian mi dang a phur theih thung a ni. Ka bike hi insurance tih leh a kaihhnawih tih ve ngai miah lo. Transport office chu a tlan pel bak chu tlawh pawh ka thlawh pui loh hrim hrim a ni. Tin, Pollution test tih ve ngai miah lo a ni bawk avang hian ka tan chuan tension free bike a ni ngawt mai a.

Ka bike hi second hand ni lova. A zawrhna dawr atang a thar sar sar a kan lei a ni a. Kan lei thar hlim hian a tuamna sarang thenkhat pawh a lo awm nghe nghe in ka hria. Kan lei zo chu duat takin motor ngat in kan hawn bawk a. Tin, ka bike hi ka pawisa a kan lei pawh a nilova. A lei duhna hi keima rilru puakchhuaka ka neih pawh a ni lo. Thian tha ten ka pawisa nei loh lai taka an duhsakna dawnga an pawisa puk a ka lei a ni a. Ka thiante pawisa puka ka lei a ni chung hian ka ba ka rul fel tawh avangin keimah lo chuan tuman “ka ta a ni” tiin an hauh thiang lo bawk. Tun lai thlalai ho anga pate thawhchhuaha bike man hi rul ka ni lova, Mizoram sum tel miah lova, sorkar lai pui, India ram sorkar ngat in min pek sak a ni nghe nghe a. Min pek sak tih lemah ka lehkha zir hah man(scholarship) min pek hmanga ka rulh a ni ve miau a.

Ka bike hi bike dang te ang thlan chak puat puat chi a nilova. Hlauhawm khawpa tlan chak pui vut vut chi a ni bawk lo. A chak lam tehna CC (cubic centimetre) pawh hi a khaltu a zir in a a inthlak thin. Engtiang takin nge a tlan chak theih tih hi ka la en chhin bik chiah lo a ni. A pa lian loh em avang hian bike lian pui pui Pulsar leh CBZ te nen hmun khatah park ho mah ila, ka zah pui lova, ka iai bik hek lo. Ka tan chuan ka duhna hmun min thlen theih avang hian a hlu em em zawk a ni.

Ka bike hian tlangval leh nula thleng in phurh loh a hleih a nei tawh bik lova. Lehkha thiam sang vak lo atanga University zirtirtute leh officer thleng thleng in a phur kim biai tawh a ni. Vairam lo awm tawh atanga Sap ram lo awm tawh thleng in a phur kim ve tawh vek a. A khal thiam sa leh khal thiam lo thleng hian an chuang tawk tawk thin. Khalh zir nan a lo hmang tawk lah bo hek suh. Thiante nen awm khawm nikhua hi chuan kei ai mah hian nula lam hian an lawm emaw tih tur a ni a, mahse ka thik hran lem lo. Ka bike ka chhuanna em em chu mitdel pawh in an khal tawh bike a ni tlat a ni. Kan thianpa mitdel hian in khalh in mi a phur ngat tawh a ropui dang dai ve tak chu a ni.

Ka bike hi khawpui hulum lama a la tlan lut vak ngai lova. Ka awmna khawpui hi fan pui ila chu a bo fe fen a tur hi a tam zawk a ni ang. Ka chenna hmun atang a bus stand hnai ber bul thleng hi chu vuan lo pawh in a mah pawh in a kal thiam ang tih turin a a kal zing a. Ka inkhawmna leh Mizoram house a thil tihpui nikhua in mi zui awl lova. Tu te bike ang deuh a bag leh pawisa pe ila a mah in savawm (beer) a la thei ang tih te chu zu dawr address pawh a hre bar lo thung ang. Mahse vawikhat chu a pu nen hian thenawmpa savawm tur kan zuk kaih sak ve tawh ngei kha.. hahaha.

Petrol a heh lo na a tha leh zung a heh thung a ni. Tlan tur chuan mamawh a nei ve tlat a, petrol thun ang in a mamawh thun a ngai fo thin. Chu lah chu a thunna neitupa lah hian min thun sak duh mang lova, nula ho deuh chauh hi a thun sak duh a, thlan thla phung a thun chang ka ngah mai. Ka bike hi sil buai pawh ngai vak lo, a pu hi mi chengvawng leh pa ti thlip thlep ka nih loh avang hian ka neih tirh atang hian ka la sil tam lo kher mai. Ruah a sur hian fai awm zawk tak a nih laiin a maha vaivut kai thenkhat hi a bet nghet emw tih tur ni a. Puan chhia nen ka hru nawk nawka a tlan chhuah pui ngam ve leh mai thin a.

Ka bike hi bike dang ang bawk a chhiat (accident) tawh pui ve thin a ni a. Tum khat chu an lo tluk pui ve ngawt a. A khalhna ber a chhe mauh mai a. A workshop ve ah ka han kal pui a. A siamtu pa khan cheng za sawmnga (Rs 150) lai a ngai ang a ti mauh mai si a. Ka pawisa neih loh lai a nih avangin ka siam tir mai ngam lova. Eng tin tin emaw chuan a khalh ve thei sawih sawih avangin ka khalh lui zel a. Nikhat chu chu workshop ah vek chuan ka han kal pui, chu mi tum chuan cheng sawmli (Rs 40) a ngai ang a lo ti a, cheng za sawmnga a tih leh hma in ka siam tir ta vat ta.

He ka bike hi nula chhawm chi bike ngat a nih hi aw. Ka awm loh lai pawh in nula ten an kawl a. A khalh thiam tum ve, thiam thei der lo nula zingah pawh an awm nia mawle. Kha nula kha zan khat chu kan thianpa bike in khalh ka zirtir a,(ka bike ka lei hma nia) chu mi tuma a tlu chu a la in sawh na ta riau riau a, mahse hliam pui em chu a tuar lo hlauh a. Kha nula khalh zirtir kha chu a beidawn thlak lam hrat chu a ni e. Tum khat chu kan thianpa thiannu (tawihnu) a lo zin tum in a khalh ve chhin a. Kha tih lai khan a break a chiang lutk lova, mahse keimah in ka khalm thiam tho avangin ka siam tha mai lova. A khalh hma chuan “ a break hi hmet suh aw” tiin a tawihpa khan a hrilh khang lang a. A duh aiin a tlan chak ta si a, a din loh chuan bang a sut mai a hlau si a, a zuan thlaksan ta daih mai a.Ka bike chuang an awm loh chuan rei tlang duh bik hlei lova. An pahnih chuan an thal dun chiang khawp mai.

Ka bike hian kawng chhia pawh a ngam na rawh e. Vawikhat pawh short cut kawng, a kal theih miah lohna turah ka kal pui lui a. A kal theih lohna ah pawh ka chawi zel mai a, ziaawm tak chu a ni. Mahse, bike dang ang bawkin hling vel a ngam bik lo tawp mai. Vawikhat pawha ke a thep a, kan entir nak chuan hling sei tawk hi a lo rap chu niin a hling rap hmel hmang chu a ti chhe ve khawp mai.

A hmel en in a tlawm viau na a, ka tan chuan a hlutna a dang chuang lo, India ram khawpui ber a Prime Minister motor te nen a tualkhat leng an nih miau vang hian a ni pawh hi a zam lo. Cyclothon ah pawh a pu hi min tel pui ve vau vau tawh a. India Gate atang Rastrapati Bhavan inkar kawngpui ngil tak a kan duk pui ve zur zur mai chu tawng thei nisela nuam a tih thu hi hahip in a sawi ve ngei ang. Tunah chuan ralleng nula lakah ka hralh tawh a…. a thlalak bak chan reng ka nei ta lo….

Ka bike ang hi lei ve teh u. Hetiang ang petrol heh lo, pollution ah buaina awm lo, servicing tih zen zen ngai lo enkawl nuam bawk si hi chu a tam lo teh a ni. Major repair pawhin cheng 45 lawih te a nia ka sen thin ni. Khawi lo kal nikhua a, bazaar a ka bike ang hi an zawrhna in hmuh chuan min lo hre chhuak ve thin dawn nia. E taka.. ka bike hi a enge bike nge tih ka sawi lo tak e… Sap hovin Mountain bike an tih ngat….A Mizo tawnga THIRSAKAWR an ti chi ngat hi a ni e.

Similar Posts:

• Scooty Tangkaina Pathum
• Bike-a Nula Phurh Kekawrte lang hi
• Ka ti ta lova…! Part – I
• Bike accident ah mi pakhat boral
• A dik in ti em??

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Saturday, December 10th, 2011 at 8:30 pm and is filed under Lifestyle, More than words. You can follow any responses to this entry through the RSS 2.0 feed. You can leave a response, or trackback from your own site.