mi(sual).com

(Ka edit zo ang a, ka submit ang tia ka inngaihtuah laiin, Ms-in “Nula senior” tih a rawn post ta hlauh mai a, lawmawm khawp mai, tlangval lampang, thlirna dang deuh atangin aw!! )

Inleng neih thap lain, ka U fanu chu rawn lutin “Apute, I hla a zai mek“ tih leh remote chuh a rual a, chutah demand channel chu hmet chhuak in C.Lalmuansanga’n Tu Pu nge tih hi a lo sa al al a, kan inlengte chu an nui ham ham in, kei erawh ka lawm hauh lo, nuihloh chuan ka lungawi chiah lohna chu an hria ang tih ka hlau bawk si..

Ani taka, kalna lam apianga “Val to lo” ti a fiam kan hlawh kan hlawh chin tawh ah hi chuan tlangval lai hun kan hmang ve fe tawh tih a hriatin, hmelhriat apiang lah hian ka hriat ve loh an ring emaw ni, thawka phitah “Nupui nei rawh“ te hi an han ti thlazen lehnghal a, hmelhriat ka lo ngah lutuk hi chu a pawi ka tih chang a tam fo thin.. Hawi hlek ila, ”U Lame, nupui nei ve tawh rawh” tih hi ka tawk zing ta malh malh in, chu nu chu kalo tihpui ang che emaw, kan veng ah nula senior fel deuh a awm asin, “An veng VC member atan an thlang thar lehnghal” tiin nula fel tak tak te hi mi han kawhhmuh ta thin a. Dik tak chuan vengchhung tlangval fel, khawtlang leh Kohhran a rinrawl ber kum tam lo ni tawh mah ila Nulat laia VC ni thei khawpa fel chu ka phu bik hian ka inringlo, lo buai lo buai suh u, Ka nakruh kimlo hi a bo hlen bik ka ring biklo..

Vengchhung ah lah Nupui Pasal nei tur awm se, a innei tur a chungchang ai chuan U La-me-a pawh hi neih a hun tawh mawle tiin, ka nupui neih hun an tih tawh sia te hi khawtlang titi ani ta daih thin a. Ka lar viau nge mawni, Christmas, Valentine’s Day leh Independence day te han thleng se, a ngai bawkin kan veng YMA leh kan Kohhran titi chu ka Senior tawh zia leh nupui neih hun tawh zia ah bawk an kai lut leh thin. Han lungawi lo dawn ila, tlangval senior fiam dawllo ah min chhuah leh awm si a, lungawi lo ru deuh in kan nui kan nui leh mi thin zawng ani e..

Nia, thlanlaih nikhua te, kohhrana hnatlan nikhua te hian enge mawni han sawi ve ila “ Val Upa thu tiin” tleirawl atanga kan rualpui te thleng thleng hian ka thu an zawmin, ka sawina lam lam ah an thle dual dual a, min ngaih pawimawh avanga ka thu zawm ni mahse, a nuam vek lemlo.. A tu ate pawh ina “U La-me, U La-me” an tiha a, ka hming bulah “U“ tih hi awm tur ni a an ngaih tawh chin ah hi chuan tlangval tirh a kan ngam ve thin nen hmeltha tih deuh te pawh kan chhai tha ngam tawhlo ani e.. Hmanni ah pawh kan kohhran secretary thupuang in, Nilai zan tantu chu “U La-me-a“ a’n ti pek a, ka thiamlo lo e, kohhran leh khawtlang ah hi chuan inhmang rual ka nih atang in a phusa pawl ka ni in, mi pawh an ngai pawimawh ve a, mahse nupui neilo ta chu a tu a te pawh ina an chhaih ka hlawh in ka hming bulah “U” tih hi midang tan chuan a bet nghet in, tumloh deuh pawn an sawi sual fo thin reng ani..

Chhungte lah hian!!! Chhung inkhawm nikhua a, tawngtai thupui atana Ka Pu thlenga “Mama nupui tur hi tihtak meuhin I dil ang u” an han tih khurh bab bab tawh hi chuan nakruh bo zawn lampang hi tihtak meuha thapui thawh a buaipui a hunta ani tih hi ka hrechhuak leh fo thin.. Ngaihzawng te pawh ka nei ve foin, tleirawl chhuah tirh te phei kha chuan phuloh tak tak in min chhai ve foin, zeilo lutuk a sawi ka ni ngailo.. Mahse, tunah zawng!! Lu a hai ani e, Birthday kan hmang zing tual tual a, nula lakah kan dawi tulh tulh si.. Engah nge maw hla siamtu te hian “ Val to lo“ tihte, “Tu Pu nge” tihte hi anlo siam kher kher ni tiin ka inzawt fo thin. Mitam tak tan chuan heng hlate hi sak liam mai mai a awlin, nuihpui a awl thin, mahse a hla mil a nung, hun tawh taka kawppui la neilo tan chuan ngaihtuah ti thuitu leh chhan awmlo a min thinrim teuh tirtu ani fo thin.. Chauh thuhla ah, Salman Khan te, Cameron Diaz te pawhin an la nei chuanglo te han tithla ngawt mah ila, anni nena intehkhin ralah te chuan kan inanglo in,kan dinhmun hi lei leh van ang ani si.. Mahse, midang hi dem ngawt suh u, engkim hian chhan a nei vek si..

Nia, kei ngei pawh hi nu leh pa te thlazar hnuai a seilian leh duat ka niin, ka khawvel nun ka han hmang chho a.. Lehkha te zir chho in higher secondary thleng ka zawh hnu ah B.A zir turin Shillong lampang pan zai ka han rel ve ta a. Chhung te’na “Lehkha i zir thatloh chuan puak i phur ang“ ti a an fuih thin kha ka ni bawk a, lehkha zirsan loh hi ka hlauh ber ani thin. Rualkawm nuam ti mi ka ni bawk a kan kohhran KTP ah pawh ka in hmang hma in, B.A zir tura ka kal dawn te pawh khan kum lamah la naupang mah ila, nihna tenau neuh neuh ka nei hmanin, ui tak te a uiin min thlahliam ve hman a.. Shillong ka han awm a, class kal bak co-curricular activities ah ka tui chho in Shillong Presbyterian kohhran ah pawh ka tlangnel nghal vatin, khawtlang ah pawh ka tlangtla ta thuai a.. Lehkha zir san kha ka thil tum ani bawk a, ka lehkha zirah ka fail ngai loin, M.A pawh ka zo ve ta thuai a. Shillong ka chhuahsan meuh kha chuan min ui der ve in, ka chhuahsan dawn kumah phei kha chuan Mizo awm min hrelo pawh an awm tawh mang lo.. Mi fak derte pawh ka hlawh ve in damloh leh chhiat tawh nikhua ah te, kan mi puih tena kan chhungte hnena anlo sawi te pawh khan ka Nu chu a lawmin, Ka Pa erawh in “Midang i tanpui hma in nangmah in tanpui hmasa la, midang tanpui thei dinhmun ah insiam tum phawt rawh,” tih bak a sawi ngai lemlo.

Aizawl ah ka han awm ve ta a, reilo te ah Kohhran leh Khawtlang ah ka han inhmang chho in, a nuam ti chi ka lo ni bawk nen, reilo te ah hruaitu dinhmunah ka inhlang kai ta thuaiin, mi fak te pawh ka hlawh chhoin tlangval fel ni a hriat ka ni chho ta a, ngaihzawng lamah chuan ka buai ring suh.. Phuloh tak tak te pawh in min zim buai ve fo in, hmeltha leh fel taktak te pawh ka ngaizawng fo.. Mahse, kawng zawng zawng ah hian kal tluan purh alo har aniange, eizawnn lampang ah erawh ka tluang hlei theilo.. Hna ka han dil ve a, interview tur takngial pawhin ka inziak tling hlei theilo.. Ka inziah tlin ve chhun ah lah politics lama hmelhriat ngah zawk te an tling zel si.. Chhungte chuan mi hnem thin mahse mahni in rilru hah avangin kan kur kan kur leh si thin..

Kei hi ahma atanga ka chawm zawh loh chuan nupui ka neilo ang ti ve thin ka ni a, chuvanga tun thlenga la neilo pawh ka ni reng ani.. Mahni in bul han tan dawn ila Sum hmachhuan a tam bakah, thil han tih tak tak dawn hian ka lehkhazir te kha kalo thiam tak taklo ani tih hi a hrchhuak leh fo thin.. Nia, “Lehkha I zir thatloh chuan Puak I phur ang” ti a lehkha zir tura fuih ka niin, thiam aia pawlsan tum ta chu pawl a sang a thiam tak tak ka nei silo.. Chutah college kalin hmun dangah kan han awm a, thiamna fawm ai chuan tiin thian leh hmelhriat kan han fawm khawm a, Khawtlang, kohhran ah a kul a taia tang chhoin, damlo lah ka pui hnem narawh.. Mahse, a pawimawh ber ka zirlai ka hmuh hmaihin, a hunlaia a pawizia kha tunah ka hrechhuak chauh si.. Khawtlang leh kohhran a inhman a damlo tanpui kha a sual ka tilo, mahse keizawng kha kha thupui ber aneiin, mi min fak derna ah te khan ka lungawiin, ka duhtawk a, hmasawn ka tum silo.. Hei kum a liam a, eizawnna lampang ngaihtuah han tum chiah hian ka hunkal tawhte ah khan inchhirna mai ani si, kum a upa chho a, Nu leh Pate laka inthlahrunna nen a rukin Val kan rum tlawk tlawk mai si.

Ka hun hman dante ka thlirlet in, Suahsual kawng zawhlo mah ila, ka hun ka hman danah ka lung a awi meuh silo.. ka ngaihtuah zel a, kei ang hi mitam tak an awm ka ring a, thangthar, khawvel lo la hmang tur te hi cuan ka tihsual ang hi tisual velo turin ka fuih duh ani. Kan zirlai te hi thiam tuma kan zir a, a tul chuan hmun danga thawh a, kan thiamna hi kan ram ah chauh lo hman tangkai kan tum a tul tawh ani.. Kei ang bawk hian Mizo tam tak, thiamna aia, pawlsan tum ngawr ngawr hi an tam tih ka hria in, Puak phurh hlauh vanga lehkhazir kha alo pawiin, hei ngei hi kan ram changkan theih lohna pawh niin ka hre bawk thin.. Phaia ka awmlai rengin, ka pawlpui vai ten nen kan inthiam hleihin, anni chuan eng pawh zir ila, a bulthut( basic) atangin an man avangin an hrethiam zung zung si.. Chutah kan zirlai kan han zo ve a, Mizo tan chuan Aizawl khawpui hi kan Jerusalem ani tih thupui changchawiin Phai Khawpui a hna ka hmuh vete pawh hnuchhawnin, engah nge ka hmuh loh ang tiin Sawrkar hna ka han zawng a, tum angin a hmuh theihloh tih tlai khawhnuah ka hrechhuakin, khua lah a tlai zo ta si.. Phai a hnathawh te kha changkanna leh kan hmangaih kan ram tan ngei pawh a hmasawnna kawng alo ni si.. Kumtin zirlai tam takin kan zirlai kan zo a, kan rama in ekchhe beng kan tum chuan hmasawnna kawng a awm mawlh silo.. Kei zawng a hunlai a ka duhloh leh peihloh ani a, an thiamna ngei hmanga Phai leh Sapram thleng thleng a inbengbel te hi ka ngaisang thar leh thin..

Chuvang ani e, heti chen ka leng a, ka duhzawng ka hmuh pawh nupui neih ka ngam lohni, Ka Nu leh Pa te an upa chhoin anni rinchhan a zahthlakin, kei thiamna neilo zirsan ringawt, a rem rem private school a thawh kual a, kuthnathawh hreh ve ting tang tur khawpa degree nei sang, thawhchhuah erawh tlemsi tan chuan kawppui neiha chhungkaw din zawng ka ngamlo ani e. Chhungte chuan, mama nupui nei ve tawh rawh,hna nghet i hmuh hma chu a tul leh dawr te i siam anga tiin min han hnem thin mahse ani ngawt silo, thiamna neih tum lova lehkhazir leh thil dang aia midang tana inhman a, kohhran leh khawtlang a inhman kalo thupui lutuk kha pawi ka ti thin, “Nupui neih hun” min ti maw? Ka hria, mahse… keizawng ka ngamlo ani..

Similar Posts:

• Lung a leng a ni !!! Mahse…
• Kohhran leh YMA fel teh (Judge) nan kan hmang ta mah2 em??
• My parent vs Myself
• Tunge maw i nih a, a hriat reng che le?
• Tlangval ni leh thei ngat i la chuan tlangtlan nula ngat ka nei ang..

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Saturday, December 10th, 2011 at 11:30 am and is filed under Fiction, More than words. You can follow any responses to this entry through the RSS 2.0 feed. You can leave a response, or trackback from your own site.