Thlahrang hi ka lawm vak lo. Ka hlau chu ka ti chiah lo a, ka nello a ni.Miin an han sawite pawh hian ka ngaithla tha duh vaklo thin; Mahse ka puin ‘Pu Khuma thlahrang’ min hrilh erawh hi chu hlau teh mah i la ka ngaithla kham theilo. A ziah hialin ka’n ziakchhuak teh ang.
Ka pu leh pu Khuma chu Mizoram khawthlang lam, khawlian lo tak atanga lo chawrchhuak dun an ni a, naupan tet atanga inkawmngeih, inzui rawt mai thin an ni. Rambuai laite pawh khan vai sipai kapin an lo hmanhlel dun ve hle tawh a ni awm e.
Tuna thlahrang kan sawi tur hi amah Pu Khuma thla niloin Pu Khuma thlahrang tawn leh hriat, amah chhaihbuaitu, ka pu hnena a hrilh, ka pu in min hrilh chhawn leh a ni a, ‘Pu khuma thlahrang’ tiin ka vuah ve ta ngawt a ni.
Amah Pu Khuma hi a boral tawh a, hemi a thih tum pawh hian thlarum leh thla-ai vangin lumen puitute pawh an thlabar hle nghe nghe a ni. Hetih hun lai hian naupang se en rual awm vel chu ka ni ve tawh a, hrechiang chiah loin Pu Khuma thlahrang chungchang chu kan sawi nasa ve thei hle. Kan sawi tam ber chu, Pu khuma thlahrangin inriak tlangval ho a bawh tih te, archhiar a zen tih te leh inriak tlangval ho pawh riak rei ngam loin an inpu chhuak tih te a ni hlawm. Engpawh nise naupang titi niloin amah ngeiin ka pu hnena a thlahrang tawn chanchin a sawi hi i ngaithla tawh teh ang.
“Khawsak awlsam zawkna um avang leh lusun khawhar avangin hmun hrang hrangah ka pem kual a, ka nupuiin min boralsan hnu phei chuan awmhmun ngaia awm reng kha ka theilo a ni ber mai. Khaw hrang hranga ka awm kual hnuah Khawzawlah ka pem a, hetah hian a ni thil mak tak mai leh ka nunkhua chawkbuai em em tu ka tawn tak ni.
Khawzawlah chuan mi in malding pakhat hlui tawh lam hi luahin ka’n parawl ve leh ta a nih chu. Ka luahtirh zan chuan thenawm khawveng ho an lo chuangkai nak nak a, hawih an hawmin keipawh ka tlangnel ve deuh nghal mai. Hlim takin kan inkawm khawm a, hriatloh Karin hun a lo kal ve duak duak a. Leng hawn hun awm velah chuan an tin ta hlawm a. Awmhmun sawna khawthar kai chan chang ngang ka ni bawk a, ka mut a chhuak lo hle mai. Bathlarah te chuan ka’n hawi vel a, thlamang lai a nih avang leh khua a hnim deuh avangin thui phei zawng a hmuh theih loh.
Chutia ka tawi ka tawi lai chuan keimahah hian tunhma lama ka la hriat ngai reng reng loh, hlauh ruk deuhna a ni ta ber ang chu, ka tirilah hian engin emaw mi tham tlat mai a. Ka sawi tawh ang khan parawl, mahni tal tal a tal thang ka ni a, hetiang hlauhna ang chi hi chu ka hre ngai lo hrim hrim a ni. Ka nupui thi ta kha ka ngai em em a, a thla tal hi hmu i la, te ka ti fo thin. Thlahrang leh thlarau hlauhna lam hi ka hre ngailo reng reng a; Mahse zanina ka awmdan chu a dang tlat !
Ka sawithiam dan ber chuan, kha inchhungah keimah chauhin ka awmlo tih kha ka hria a ni ta ber awm e. Ka hnungchhawn lam apiangah hian ‘awm’ hi a awm zel mai a, thawm a nei lo a, mahse ka hnunglamah a awm tih hi chiang em em in ka hriain ka mitthla thei tlat a ni. Hnungzangah tang a vak cham cham mai. Ka hlau chu ka ti phal chiahlo; Mahse a nuam lo.
Chianglo hlaua patling tlan ngawt thu awm lo, pawngsen tlaivar ngawt thu awm hek suh, chak lo tak chung chuan ka mu ta nge nge a. Ka mu fel chauh tih chuan kawl a rawn rum dar dar a, ruah a rawn tla phuar phuar a, keipawh chu ka lo muhil ve ta a ni ang chu- mumang ka lo nei a.
Ka mumangah chuan vai sipaiin min lo man a, kan kut hnungkhirhin kawng chep zetah hian min lo chhawm a, kan kal chakloh deuh chuan min lo nam leh dawrh thin a. Tumkhat chu min lo nam na deuh a, ka han pe tek chu ka harh ta hlawl a, khum atang chuan ka lo tla lek lek chu niin. Ka han harhchiang a, ka khumah chuan keimah chauhin ka lo mu hauh lo !!
Hlauhna tak takin min tuam ta. Ka bula mu chu ka hmulo a, min si hek lo. Ka en ngam lo a, in leh pawh ka inlet ngam lo. Ka hriatna thazam(?) erawh chuan a hre chiang hle. Palian pui hi ka lam hawia saisirin ka hnungah chuan a mu ve run mai a ni. Tukhum sam a tho tha duh sang sang hle.
Ruah a la sur cherh cherh a, khawpui a ri kal rum rum bawk a, kei erawh chu muhil thei ziazang ka ni lo. Ka inlukhup a, ka tawm tlat mai a ni. Thli a thaw vuk vuk a, ka tukverh pakhat chu a inhawng niin ka hria, a inhlap ri leh thak thin a, pawnpui kar atang chuan ka’n bih a, chtih lai tak chuan kawl a rawn phe zuai a- bangkila ka thil hmuh chu le(h) !!
Pawnpui chu ka keu dek dek a, kawl a rawn phe zuai a, tukverh chu inhawng loin tha takin a inkalh; Mahse ka hmazawn bangkil, banphak mai ah chuan mi pakhat hi pawndum batin a lo ding zun mai a, a hmel ka’n en chiah phei zawng patling ka ni, a tih theih loh. Bangkila ding zun chu Keimah chiah chiah a ni tlat!
Phut pawh ka phu lo, a khurhin ka khur nghal a ni ta ber awm e. Ruah a sur zel a, tek te pawh a tla ri rum rumin ka hre ta, kei erawh chu ka mumal lo. Chiang taka ka hriat erawh chu khawvar dawn hnaihah ka bula mu pa chuan chiang em em in ka nakah min rawn kheuh a nih chu; Mahse chumi hnu chuan keimah chauhin ka mu leh ta a, khua pawh a var zui ve ta mai.
Zan hmasa bera ka thil tawn ang chu ka tawng zui ta lemlo bawk a nuam ti chiahlo chungin chu inah chuan ka khawsa zui chho ta naw naw a. Khaw mipui te an felin an bengvar bawk a, thian kawmngeih tak tak pawh ka nei ta nual mai. Chu’ng zinga ka kawmngeih ber Pu Zinga chanchin hi ka’n sawi ang e.
Pu Zinga chu kei aia U daih, ramvah hrat zet mai hi a ni a, sapelin kan chhuak dun fo mai. Nupui sun tawh ve bawk a nih avangin kan titi pawh a rual hle. Tumkhat chu sih tlan sazuk ki hreu kah tumin kan chhuak dun a, kan tumloh zawk sazuk tiat dawn lai sakhi kan kap a, kan hlim hle tho mai.
Chumi kan ramvah haw zan chuan salu lawmna angreng atan ka inluahah a tuitling kan indun a, kan titi pawh a tui hle. Chutia kan titi a kan tawng ring tan ta hle tihah chuan hun rei tak ka lo hriat tawh loh, he in ka luah tirh zana keimaha ‘awm’ ang kha a awm leh ta tlat mai. Mahse Pu Zinga nen kan nih avang erawh chuan hlauh zawng ka hlau lutuk lo. Pu Zinga chu zunram thiar turin a tho tuah tuah a, inthiarna pindanah a lut fel chiah tih chuan bangkil khawilai atang emaw chuan pitar pali hian miruang tih hriat tak mai hi pai deuh tawng tawng chungin an rawn zawnchhuak ta mai. Au chhuah ka tum a, ‘em a’ ka ti leh deuh a. Ka thil in in min hneh deuh vang emaw tia ka’n inthin harh pawh chuan a lang chiang ang tawlh tawlh a.
An thil zwn chu ka khumah an nghat a, an lo kalna lamah an pilbo leh ta nghal a. Ngampa lo tak chungin ka khum lam chu ka zu pan a, ka khuma ruang an zalh chu ka han en a, ka phu chiang kher mai. Pu Zinga ruang a ni. !
Ring lutukin Ka ko tuarh a, inthiarna pindan lam atang chuan min rawn chhawn dut dut ang lawi a, ka khuma ruang let reng chu ka han en a, ka chiang bawk si. Kawngkhar a ri rak a, Pu Zinga chu kekawr zipper siamtha mawlh mawlh chungin a lo chhuak a, khum bula ka lo ding ka ho lai chu min rawn en a, ‘engnge ni ta’ a ti a, ka chhanglo. Khum chu ka han en leh a- khum ruak chu.
Mak ka ti hle a, mahse chutiang thil belhchian dawl chiahlo tur han sawichhuah chu a patling hna loin ka hria a, ka hrilh ta lem lo; Mahse ka tawng tlem tak em avang erawh chuan a ngaih chu a tha chiah loin ka hria. Rei vaklo kan thu leh ren rawn a, a lo hma ta vak bawklo nen mu turin a tin ve ta a.
Chumi zan chuan rinloh takin engmah ka tawnglo a, ka mutui hle mai; Mahse a tuk tlaia ka thil tawn erawh chuan min nghawng na ngei mai. ‘Pu Zinga an huan mawngah thia chhar a ni. A thluak a baw nuaih a, a hmel hmuhtlak a awm lo.’ A hma zana thilthleng te nen ka han hmehbel a, mak ka ti tawlh tawlh mai.
Ka thil tawn maksak tak tak avang leh ka thian tha ve berin min boralsan leh tak zel avang chuan nuam ka ti thei thlawt lo a, Pu Zinga boral atanga thla khat pawh tling loah Selingah ka pem leh ta a ni. A khaw mipui felin boruak nuam hle mahse ka thil tawnin a zirloh em avangin khawzawl ka chhuahsan chu ka thaw huai mai.
Selingah chuan mi inhnuai luahin ka inbengbel a, nuam pawh ka ti viau. Khawpui hnaih nge nge chu khawsak pawh a awlsam ve ta deuh niin ka hria. Kum chanve lai a lo ni ta mai-khawzawl ka chhuahsanna chin pawh.
Zankhat chu thenawm sipai chhuti te nen mi pali lain ka inluah ah chuan sipai zu kan in a, kan hlim dar dar hle. Peg hnih thum kan peg hnu chuan ka awmdan a dik ta tlat lo. Hmana khawzawla ka boruak tawn ang khan min la kiansanlo tih ka hre ta mai- ‘awm’ a awm leh tlat tawh. Lu lamah a lo kai ta deuh chiai bawk a, ngai pawimawhlo luiin ka titi lawng lawng a, a chang leh kan han zai vei thul. Nuam ve thin tak a ni- hetiang boruak hi chu.
Pai tuang tuang chungin pawn lerah zunram thiar turin ka chhuak a, ka kawmchhak thim leh thimlo chinah chuan thingrem ang tak hi a lo inhung teh ngawt a. Rui deuh tawh nen phun nuah nuah chungin ka pan chho a, ka han en chiang chu kuang a nit lat! Mi rap deuh viau mahse ka’n panchho lui hram a, harhfimlo bawk nen ka’n inpal khut leh nghal a. Kuang bawh deuhthaw chuan ka’n tlu chho tehreng a nih chu.. Ka inthing harh a, kuang ka’n bih chuan miruang a lo let ngut mai.
A ngaihthatthlak leh ta hauh loh mai. Pu Zinga nena kan zan hnuhnung ber te kha min ngaihtuahchhuahtir a, tuna ka thil hmuh hi hlauh lamah ka la lo a, ngaih erawh a tha mawlh lo. Kuang chhunga ka miruang hmuh chu tuna kan zu inpui mek, kan sipai chhuti-a saw a ni tlat.
Inchhung ka va luh leh chuan an lo titi nasa hlawm hle a, tu tawng mah inngaithla tawn loin au ti tih, kuk titihin an lo bei a, lo zai ngawng ngawng tawk lah bo lo. A tuk lui kal an lo rawt chu niin- ta deuh deuh chuan.
A tukah chuan lui lam panin kan thawkchhuak ta a, nuamlo ti ru viau mah ila sawichhuah chu nuamlo ka tihzawk fe avangin ka ngawi reng a, Sipai-a erawh ka mitmei uluk hle. Lui kan thlen dawn chuan kan phur hle a, kan auin kan kuk a, kan zai thul, ‘lui pui thlen dawna kuk ruih ruih pa rawn an awmlo’ tih zawng zawng kan neih zo a ni ber e. Lui kan thleng a, engamah hmain tui dai huaina kan han ti hmasa phawt a, nawm zawng a nuam e.
Bomb kan keng a, kan ren lemlo bawk a, a rem lai laiah kan vawmthla hmiah hmiah mai a, sangha pawh kan man ta nual mai. Chawfak hun velah chuan hmun rem laiah kan innghata, rawng kan bawl ta a. Chutia rawngbawla a then an phet laiin a thenin an lo thli sen zuai zuai bawk a, thian pahnihin kan bula li lian leh thuk tak mai chu vawm tumin an lo inpuahchah mek bawk a.
A puak ri dur a, au ri rawih rawihin a zui nghal a, a thenin chang an lo tum thul, nuam ngei mai. ‘Chaw fak phawt ang, lut nghal zawk ang’ tih thawm a inpawlh nuaih a, sangha a lang nuaih nuaih bawk a-nuam ngei mai.
Kan sipai chhuti-a chuan li mawnga luh a chuh ta tlat mai a, a thawkchhuak zui nghal mai bawk a. Engtik laiin nge ka chet ka hre lo, a hmaah chuan ka din khalh a, ‘kal suh, a hlauhawm’ tih chiah ka sawi thei. Thian dangte chu an lo nui tlawrh tlawrh a, sawi ngaihna vak ka hre si lo. Ka tihsual lian ber chu ka lo danglui ta lo kha a ni.
Darkar a liam a, a liam zeal , khua a thima Sipai-a chu kan la hmu chuanglo. Li mawng a thukin a zau angreng si. Tui te chu thiam ve nial nual mah ila tuitla zawnga li mawnga han che vel turin kan thiam tawk si lo. A tuk khawvar rual vel chuan engtin tin emaw kan hmuchhuak thei ta hram a ni. Sipaia kan chan ta..
Tui ah a awmrei avangin a khawng deuh a, a kun deuh khul bawk a, chu chu han siamrem tumin ka khupin a kawngah ka do a, ka elh ta vak a, a ri thawt a, a ka atangin tui a rawn baw hawk bawk a, ka phu chiang ngei mai.. A taksa erawh a ngil ta deuh.
Chumi hnu karkhatna chiahah chuan a ni-zan pawh a la rei lo, ka nawmsam meuhloh avangin ka tluzal a, ka lo chhing sek a ni awm e. Ka kawngka a rawn intheh hawng thuai a, Sipaia ngei mai kha a rawn penlut ta. A tuitla hmel, dang var pup leh a heh dukchur nen khan min rawn pan chhut chhut a, Tui atanga kan lakchhuah hlim ang chiah khan a meng kuau a, a mit atangin tui a rawn luangthla nguai nguai bawk a.
Chutih lai tak chuan tek a rawn tla ri dur a, current a thim nghal hmiah bawk a. Ka sirah chuan a rawn mu ve ta a nih chu!! Ka tim sung sung mai. Chutah le- a kut vawt thlur mai chuan ka nghawngah a rawn khawih a, te chhuah ka tum leh ka thei si lo. Chumi hnuah a ruang kawi ka siamrem dawna ka tih ang khan ka kawngah a khupin a do a, ka chalah leh ka keah dawmin min han elh tak tak mai a nih chu. A tir khan ka hlauin ka rap viau a, a rei hnuah chuan ninawmin hahthlak tak a ni- Khawvar hma min elh a nih chu.
Sipai-a ka hlauh vang pawh niloin eizawnna chhuanlama hmangin Aizawlah ka pemlut ve ta a.Dawr te kaiin khawsak a lo awmsam ta deuh bawk a, chubakah thlahrang hoin min tihbuai lohna pawh kum hial a lo vei ve ta a, ka nun pawh a nuam ve viau. Pu Zinga leh Sipai-a pawhin ka ngaihtuahna an luah reng ta lo.
Hetia ka intih Aizawl mi hle hnu hian vawikhat chu hmelhriat hluite tlawha riak nghal turin zanah ka chhuak a, hmelhriat taxi driver ka inthlahtir a ni. Kan tluang vaklo a, a kete kan thlakin kan ding deuh sek bawk nen zan tlai tawh takah Seling dai kan thleng a. Chutah chuan a ni ‘awm’ a la awm reng a, min la kiansan lo a ni tih ka hriat tak ni. In a lo lang tan pheuh pheuh tih chuan kawngsirah hian mi pakhatin min lo phar a, driver chuan a hmulo nge a tlan tlang ta mai a. Keichu tukverhah dakin ka’n lehhawi kher a, ka rei, min lo phar tu kha tuna ka bula thu ka driver hi a ni. !
Ka ngaih reng a tha thei lo a, driver haw tur pawh chu chelh ngial ka tum a, pawisa pekbelh hial ka tum pawhin ka chelh thei lo. Hemi tuma ka tihsual pawi ber chu ka lo chelh lui ta lo kha a ni.
Ka thlenna te nen chuan kan inhmulo rei angreng tawh bawk a, kan ti ti luam a, mut kan tum chuan dar hnih a lo ri dawn reng tawh mai. Zung turin ka tho a, chutih lai tak chuan kawngka kik ri a lo awm a, ka han hawn chuan driver kha a lo ni, ‘ ka motor a chianglo bawk si a, ka lo cham ve leh si mai ang e’ a ti a, ka thaw huai mai. Thlenin nulain chhuatah mutna min siamsaka, ka(n) mu dun ta a.
Kawngka kik ri dawt dawtin min tiharh a, ka tho a, sana ka han en chuan dar thum a lo pel tawh a; Driver a awm hauh lo. Kawngka chhunglam atangin a inkalh a, a chhuaklo chu a ni phawt ang a. Kawngka ka hawng a, rawlthar pahnih hian hlauhthawn hmel takin ‘taxi a accident’, ‘khawiah?’ a hmun an han sawi chuan nichina min lo phartu lo dinna zawn chiah kha a ni. “Engtikah?”, ‘dar hnih vel khan pi mawiin ri rum rum a hria a, a reh leh nghal mai a, mutthilhsan a tum a, a ngaih a tha thei thlawtlo a, a fapate pahnih a zu entir a, driver chauh a chuang a, a lu a keh vek, hmuhtlak a awm lo’. “Dar hnih vel”, karei tu’nge ka mutpui kha le!!?
He thil ka tawn hnu atang phei hi chuan zantin, khawthim dek dek atang hian min tibuai a ni ta ber mai. Hlauh zawng ka hlau tawh mawlh lo, mahse zanrei mut duh hun tawh a, Pu Zinga, driver leh Sipai-a te an han zai ruah ruah mai thin chu a ninawm ve khawp mai.
Chutiang chu a nia, ngaiah ka nei titih deuh hial tawh a; Mahse nizan ka thil tawn erawh chu ngaih han tih sam a, ngaihzam chi ziazang niin ka hrelo mai kawngi pa (Pu Khuma’n ka pu a koh dan) Chuvang a nia, zingkar karah ka rawn len chuk chuk ni.
Nizan chu zan dang anglo tak maiin kan thlahrang ho an reh phian mai a, tawng mawilo nilo se khua lam lam a har dawn mai. Chutia reh ta hmak chu kei pawh ka awm thiamlo lek lek zu nia; Mahse mut dawnah chuan an lo lang leh ta nge nge tho a.
Pu Zinga leh Sipai-a leh taxi driver mai bakah ka la hmuh ngai loh pakhat palian angreng tak mai hian kuang hi an rawn zawn chhuak a, Pa lian-a chu ka la hmu hauhlo na a khawzawl ka awmtirh zana ka khuma rawn mu ve kha a ni tih ka hre mai. Ka rin ang em em chuan a lo lian lo. Mi pawh hian hlauh lai leh chiang vaklo a ‘ramhuai lianpui’ an tih te pawh hi hmun ralmuangah han hmu se chutiang he hu an lo ni lo tih an hre ve ngei ang.
Chu an kuang rawn zawn chu bang thlang lam depah an zu hung ta a. Zantin min rawn tibuaiin thlahrang hrang hrang rawn inlar mahse kuang leh miruang hmuh kher kher erawh chu ngaiah a neih theih tlat loh. Ngaihtha lo takin ka zu panthla a, kuang chhunga miruang mu ka hmuh phei chuan ka ngaih a thalo leh zual; Achhan chu kuang chhunga miruang let reng chu tu dang niloin keimah ngei ka nit lat!”
Khiti zawng khi Pu Khuma’n a thlahrang hmuh, tawn leh hriat a sawi chu a ni. Khimi a sawi zo khi ka pu te in atang chuan a haw chho a, a kawngka luh dawn ah, hmun rualrem lai tak lehnghalah a tlusual a, ka pawh chhawn loin a boral nghal a ni.
Pu Khuma, a nuna thil mak tak tawngtu, thlahrang sawi tur hre em em mai chu thlahrang sawi theiin a awm tawhlo a, ama thlahrang chungchang zawk chu miin an sawi thin ta zawk a ni. Hun a awm chuan ama thla tak tak hrang chanchin kan la sawi dawn nia.
Similar Posts:
- Thlahrang
- Ramhuai vs thlahrang
- Pu Khuma Thlahrang – 2
- Thlahrang hi a awm tak tak em ?
- Thlahrang/ramhuai
December 12th, 2011 at 3:05 pm
Awi ka hlau!!! Ka tlanchhia phirs
December 12th, 2011 at 3:19 pm
Thlahrang post ka hmuh hian ka rilruah Lamji post anih ka ring nghal ve ringawt a, a lo ni der silo:-D
Thlahrang ka chhiar duhlo, ka hlau :-O
December 12th, 2011 at 3:22 pm
sei ve. Thlahrang hi ka awi der lo. Ka hlau lo bawk. (H)
December 12th, 2011 at 3:24 pm
Ka hlau mang e aw….
December 12th, 2011 at 3:31 pm
Thui ve le,zan rei ah ka chhiar dawn 😛
December 12th, 2011 at 3:32 pm
Awi!! zanah ka hlau dawn tih hre reng chungin ka chhiar chhuak a,ka inchhir zia hi!!!!
December 12th, 2011 at 3:32 pm
the sixth sense kha minti hrechhuak roh, ka hlau zawng tak hetiang hi
December 12th, 2011 at 3:40 pm
Thil dang hi hlauh vak ka nei lo, thlahrang erawh chu ka ti hleithei lo, ka hmu tawh a zeng pawh hi a ni si lo a, bakah thlahrang ni loin ramhuai,setana tirhkoh te, mihring te tibuai tura mitthi tawh ni awm taka inlan an ni tih hi ka pawm dan a ni reng chung hian ka hlau em em tho a, horror lampang lah hi ka en peih viau tho bawk sia, mak ve ngawt mai
December 12th, 2011 at 3:43 pm
Oi ka hlau ka tlanchhia, phir!
December 12th, 2011 at 3:43 pm
Ka va’n awi(h) chiah lo e aw…
December 12th, 2011 at 3:46 pm
Post poh hi a-hrang ni ang, ka chiar tawp theilo :-O
December 12th, 2011 at 3:46 pm
Van hlauhawm e!!! Khaw thim hma in haw teh ang, a rawn hrang dawn tan tlat :-[
December 12th, 2011 at 3:46 pm
Ka hlauh dam hi a quality tawp…
December 12th, 2011 at 3:48 pm
Ka hlauh dan hi a quality tawp…
December 12th, 2011 at 3:49 pm
Ka awih leh awih loh chu 50:50. Ka chhiar chhuak vek a, tak tak a nih chuan a hlauhawm hle ang. Engpawh chu ni se, a ngaihnawm ka ti khawp mai…
December 12th, 2011 at 3:52 pm
Thlahrang lampang ka chhiar leh ngaihthlak tawhah chuan ala awm ang berin ala hlauhawm ber. Pianthar hma nita se ka hlau ve hial awm e. Khawnge Rempy kha? A chhiar chak kha. Thu ngaìhnawm lam i hriat tam hmel tlat. Welcome.
December 12th, 2011 at 3:53 pm
Thlahrang ka chhiar duh ngailo ania..ka inchhir. Zanah Ka hlau dawn
December 12th, 2011 at 3:56 pm
Ka chhiar chhuak dap, a hlauhawm eee
December 12th, 2011 at 3:58 pm
Hman deuh khan facebook ami kha ka chhiar a, office-ah ka print a, hmeichhe hovin an chhiar a, an hlau khawp mai. 🙂
December 12th, 2011 at 4:00 pm
Kan mipa ho chu in va dawih hlawm zek zuk tak aw!!!! 😛
December 12th, 2011 at 4:01 pm
I va’n ziak ngaihnawm thiam tak em! Hmulthi a ding sung sung mai a :-O
A thui thui nen, ka chhiarchhuak dap e… (Y)
December 12th, 2011 at 4:06 pm
Thlahrang hi chhui chian a dawl lo niin an sawi thin a, fiah ngam an awm phawt chuan engmah a lo ni leh lo thin an tia. Mahse, kan veng ami a ruang an chhar kha chu hun eng emaw ti chhung chu a thla rûm ri an hre thin a, luikawrah a rûm chho dut dut zel a ni awm e. Han awih sak lo ngawt dawn ila, a hretute kha chhungkaw 20 vel lai an ni bawk sia, a mak danglam ve mai mai ngawt asin.
December 12th, 2011 at 4:11 pm
a ngaihnawm hle mai. Mahse, a nuihzatthlak bawk. I ziak thiam e.
December 12th, 2011 at 4:11 pm
Ka chhiarchhuak dap nia le. A ngaihnawm kher mai. A hmuh apiang an thi zel tihna a ni a, a mah a inhmuh meuh chuan; sawi leh tu tur pawh awm lovin a thi ve nghal a nia. Mak ve tak chu a ni. A tak tak a nih ngai chuan, zu kha in thin lose, a thiltawn tam tak hi a tawn ka ring miah lo; Setana leh ramhuai hnathawh dik tak a ni.
December 12th, 2011 at 4:17 pm
van hlauhawm ve,ngaihthlaknawm bawk si,a ma thlahrang chu han ti leh vat rawh chhiar chak tawh a nia
December 12th, 2011 at 4:22 pm
Thlahrang lam hi chu sei viau mahse, chil lem kholh2 chungin ka chhiar zo nghal vek zel! Ka awih loh pon ka hlau tho zel.. 😀
thla hlauh hi mihring zia ah a awm ve top (human instinct) in ka hria. Naupang te, engtin nge ramhuai leh thlahrang hmel a awm ang tih suangtuah thiam miahlo pon thim chu a hlau nghal ringot. Hmu ta ila min ron tih nat kan ring chuanglo chung pon ramhuai hmuh chu thih hrehin kan hreh a, sakei leh savom, rul etc min tina thei te kn hlauh dan nen a inang chuang miahlo.,heheh.
A ngaihnom ltk e!
December 12th, 2011 at 4:22 pm
A ngaihnawm khawp mai…mahse k hlau ltk (Y)
December 12th, 2011 at 4:23 pm
Misual banner pawh an lo thlak ta alawm hei. Tu design nge ni ang aw? OT miah lovin…
December 12th, 2011 at 4:37 pm
A then chuan a ngaihthlak ten an lo ngaithla vel a…
December 12th, 2011 at 4:38 pm
Den rem rem ve.Angel sual te ho hian mihring conscience tih buai bak chak nei heklo,sualthiam ve tak an ni. 😛
December 12th, 2011 at 4:48 pm
Hetiang lam hi thlarau sual leh ramhuai hnathawh lama ngai an awm tlat thin. A nihna takah chuan, ramhuai an awm reng reng lo. Science phei chuan, ramhuai a hre lo. Ramhuai chu tunlai evangilical team tam tawh lutuk team speaker, sual haw lem si lote hi; ramhuai kan ti mah zawk.
December 12th, 2011 at 4:49 pm
ka roommate hian thlahrang zu han hmu ziah a,kan roomah hian,ka ke an pawt te tia,a nuam miah lo..haha!! Muslim ho chu an dawih niag. Keicu Kristian ka nia kan ti ve thlap zel a. Nuam riau sin Kristian nih te chu..
December 12th, 2011 at 5:00 pm
Thlahrang te in rawn sawi!ka hlau teh mai a nia! In fal deuh nalh a awm/chen pawh hi ka duh lo!Thlahrang rawn kal palh pawh a thenawm khawveng in hrilh zung2 theihna a chen ka duh! U kz,u sangmawi..etc thlahrangin min rawn run ,lo kal vat rawh u ,tih theihna a chen hi ka duhdan a ni!Hairehai! 😛
December 12th, 2011 at 5:00 pm
Kan chhiar chhuah dap chu le.
Dampui khua (mamit thlen hma) pa pakhak minhrilh chu, ‘putar pakhat a boral a, kan lumen a, thalai leh nu leh pa pawh kan zai tui khawp mai, pawn lam kan hawi chu, kan lumen mek chu tui hmel em em hian a lo lam dah dah mai a. Hmuh anuam lo khawp mai’ tiin min hrilh.
December 12th, 2011 at 5:02 pm
Muslim ho chuan thlahrang (ghost) hi an hmu thei khawp mai. Hlauh pawh an hlau. Ghost hlau nih pawh an zak lo.
December 12th, 2011 at 5:03 pm
Van mak ve le. :O
Ka lukham hnuaia ka Bible ka phawrh a.., tih lam chu a tel lem lo a ni maw? :$ Setana nen lam chunga roreltu hi ka biak Pathian a ni. Ramhuai leh thlahrangin Pathian thu lovin ka samzai khat pawh an khawih thei lo.
tren tren.
December 12th, 2011 at 5:06 pm
ka thianpa thlahrang hriat kha punctual khawp mai. Tlai thim thet thet vel hian a hrang thin a, a rei hnu deuh chuan a in neitu te ning lutuk khan a hran hun velah an leng chhuak daih a, a hran tawp awm velah an haw chauh zel
December 12th, 2011 at 5:10 pm
Ava Final Destination tawh ve 😉
December 12th, 2011 at 5:18 pm
Kan Naupanlai chuan, Zanah han Hmeithai pakhat inah hian kan lengkhawm tiau a, Tapchhakah hian vawkchaw vil pahin kan thu bial laih a, Pi Baii chuan Thawnthu a sawi thin a, Thlahrang lam a sawi phei chuan ngaihnawm kan ti thei lutuk. Mahse, Ina han haw hian pawn atangin nute hi kan ko vau vau zel. Chhun pachangah pawh Tukverh leh Kawngkhar khar phui thim mup chungin kan sawi khawm zeuh zeuh. Hetiang Environment a thang chho ka nih avang hi aniang, Ka mangphan fo mai a, ka hlau thei thin khawp mai. Ka Nu hian Thlahrang awmloh zia leh finfiah an dawl loh zia hi min hrilh hneh hle thung. Tun thleng hian ka la hmu ta lo reng a.Tin, Ka Pianthar atang khan Thlahrang hlauhna hi ka nei ta miahlo tih ka inhre chhuak hnuhnawh bawk.
December 12th, 2011 at 5:18 pm
Tawia thlahrang min ti hre chhuak zawk..kan hlau thei thin raps.
December 12th, 2011 at 5:19 pm
#2,@seldom,, 😛 Ka sim tawh..a sawi tur hre hnem ber Pu lusei_ber ‘an a ho a ti tawh a.. 🙂
He post hi fb ah ka chhiar tawh,a ngaihnawm reuh khawp mai. Putar pui sawi ania a tak2 ani’ang han tih ngawt chi pawh niin ka hre tawh lo. Hman kum Pensioner ho lehkhabu siam ka pu lei ka chhiar a,an thlahrang hmuh leh hriat thu lawrkhawm…awihawm loh tak2 a tam e…Hlauh loh phawt hi a fin thlak ber zel e.
Hmanni ka nau ina a awm mai2 lai fan a rawn in on ringawt mawle…mak ve mai2..mahse kan hlau law…
December 12th, 2011 at 5:23 pm
Sadbutt, Tawia thlahrang kha kan kawmthlangpa phuah ania…kapi khan, “Ani phuah mai mai lo hlauh…” a ti hu huuu 😉
December 12th, 2011 at 5:34 pm
@Pu Hv Tawia thlahrang kha kan naupan laiin kan chhiar thian ho in kan sawi khawm thin 😉
Ka pa hi mahni a ram riak thang ania, hetiang lam phuah chawp neuh neuh sawi tur chu a ngah ve viau in ka ring. Kan naupan lai hian thianza ho in Pa Zuala te in ah thlahrang kan sawi ho thin a, kan zinga upa ber Sena hian sawi tur a ngah khawp maia. Dar 12 hi chu kan meng thleng leh mai thin. Ka haw na tur a hla ber a, ka hlau lo ber a ka thianpa kei aia u zet(ka cho rual loh) hi ka haw kawng opposite lama awm a ni a, ka thlah haw hmasa ziah thin 😉 Ka hlau chu a ti ngam chiah lova, “Kan veng lamah rawn haw kual rawh” hi ti ziah a, ka kual leh nge nge thin.
Street light pawh thim vek mahse ka hlauh awm ka hre ngai lo reng reng….ka ngaihtuah zui thin loh vang ni ber in ka hria 😀 bakah Ho tihna ka nei
December 12th, 2011 at 5:41 pm
A ngaihnawm e. :-[
December 12th, 2011 at 6:04 pm
Ka’n zep ve mai2.,a remchang bawk a…
Pu PC Biaksiama fapa hi ka best buddy ania(sawi hong mai teh ang,ama’n a remti tho ang chu maw.)..Shillong atanga an rawn insawn chhoh tirh khan inchung ah hian pawn atanga chhoh ngai hian a room hi a hranin a awm a.
Zan khat chu kan veng pa a thi a,pa lian zet mai hi..anni la rawn awm tir kha tu vak mah an la hrelhriat silo a. Mithi lumen zan khan ruah hi a sur bur2 a,thli kha a thaw nasa hle bawk. Tichuan 1am velah hian a room kawngkhar hi an rawn kik dawt2 a,palian pui pakhat hian mithi lumen na a kal ah a rawn sawm a. Zan a rei tawh thu leh ruah a sur nasa sia a kal loh mai tur thu alo hrilh a,ani pawh chu a kal ve leh mai a..
A tuk ah a vuina a an han kal chu mithi board a an thlalak tar kha a hma zana rawn sawm tu chiah kha alo ni mawle. Mak ve mai2 khawp mai.
A hre lawk sa lo a,a hnu ah pawh a hlau lem hlei lo a.
December 12th, 2011 at 6:24 pm
Nghainawm hle mai (Y)
Hei ai hian a story han ti complicate deuh ila, film lamah pawh a siam theih dawn hi a..
December 12th, 2011 at 6:44 pm
min tihthaih..
December 12th, 2011 at 7:09 pm
Kan sawi ve lawks,
a rei tawh Aizawla kan Pem hma ania, kan khaw tlangau Pu.Sawia a thi a, kan kawmthlang lawka awm ania. Kar 2 hnu vel atang chuan Pu.Sawia thla a hrang, a rum ri ka hria hi an tifo mai mai a, kan kawmchhak lawka a thla hmu te pawh an awm ani awm e.. Kan Khua ang khaw te chu a thla hrang chuan a luahkhat hneh hle a.. Tum khat chu, ka Pa Khawhar chhungte ina a leng haw chuan Pu.Sawia thla vel chungchang chu Tapchhak ah thu chungin a sawi a kan ngaithla thap a, kan tapchhak zawn Pu.Kapa te nena kan inkar ah pawh hmu an awm thu te sawiin, keini Naupang ta chu kan hlau in ka Nu phei chuan a hau in chumi hnu chuan kan mu ta a. Rei kanla Mu hmanlo tihah chuan thawklehkhatah kan tapchhak zawn chu a rawn ri ta dup in, kan saum bur leh sarep etc rapchunga kan dah chu a tla ri ta rum rum a,kan hlau in kan phu chiang in kan meng tang hru a.. Ka Pa chuan a ho mai mai mu ru atia,mahse a hnu lawk ah pawh vawi 4/5 lai a rawn rik tak dup dup hnu chuan Ka Nu phallo chung chu ka Pa chuan engah ngeni vei, mama rawn kal rawh tiin a tho a.hlau hle mah ila ka Pa ka hlau si, Tichuan ka Pa chuan a chempui la in kei chu torch light min kentir a, khur dar2 chung chuan ka pa chu ka zui a, kawngkapui kan han hawn a, tapchhak zawn kan han chhoh a,torch light a kan han chhun chuan kawmchhakpa te Kelpa chu kan tapchhak zawnah chuan lo dingin hnim alo pet a, Pu.Kapa te Kelpa a thlunna atanga chhuakin kan bang alo si chu nilekin!! Ho tak ani.
Thlahrang kan tih tamtak hi fiah chuan a ho vek zel.hairehai
December 12th, 2011 at 7:33 pm
A ngaihnawm hle mai, rawn chhunzawm thuai teh. (Y)
MUP ho lehkhabu kha a ngaihnawm deuh ho ka rawn hrut kual dawn em ni?… 😛
December 12th, 2011 at 7:40 pm
#49 yes
December 12th, 2011 at 7:54 pm
Ka chhiar chhuak veka, ka awih vak lo. Ka hriat pakhat kan share ve ange. Mizo Boys Hostel kha shillonga Motinagar thlan mual bulah khuan a awm thin a. An sawi dan chuan, a hran em avangin a neitute an awm ngam lo an ti thin. Dark room a awma, chutah chuan mi an inawkhluma, chuta tang chuan a hrang ta ani awm e. First year PU ( Pawl 11 )kan nih laiin, kan class mate 1 kha chu thlahrang chuan a hmaiah alo chulsak a. Dark roomah khan mi 3 an awm a, light on vek si khan pen ri an hria a, amah tak hmuh theih si lohin. Thosi len hnuaia amulai chu thosilen ron keuin a hmai a rawn chul sak. A tukah pawh a dang var pap mai, a hlau bawk aniang. Mahse Hostel Warden, Pu TT Pachhunga khan hosteller ho kha a tawngtaitir a, chubakah thlahrang tihdan ang chiah khan an chhuri thul a, an intihder kual a, a reh ve zui ta mai.
Report this comment
December 12th, 2011 at 8:05 pm
I thlahrang ai chuan a sei lutuk hi a ‘rapthlak’ zawk a lawm le..haha..
Report this comment
December 12th, 2011 at 8:14 pm
Kei chu ka tha a la khur..huhu
Report this comment
December 12th, 2011 at 8:30 pm
51. Kha ‘Dark room’ ah khan 1985 kum khan ka awm ve tawh ngei a lawm.
Report this comment
December 12th, 2011 at 9:16 pm
zanin chu ka leng chhuak a, kawngkhar rang deuhin kan kan chu le.
Report this comment
December 12th, 2011 at 9:38 pm
Thlahrang lampang reng reng hi chu a him chin atang hian hlauhloh aiin hlauh a nuam zawk!
Report this comment
December 12th, 2011 at 9:52 pm
A la hma viau na a member kan kim tan e. Tumah tihchhan awmlo, a general in
Report this comment
December 12th, 2011 at 10:13 pm
#57 hian tihchhan a neihloh tak ah!
Report this comment
December 12th, 2011 at 10:17 pm
@58, tihchhan awmlo in ti na na a
Inngaihbel vanga rawn inpuan kher…haha 
Report this comment
December 12th, 2011 at 10:21 pm
Khaw maw, min han tihchhan zia kha! hahahahaa
Report this comment
December 12th, 2011 at 10:24 pm
Hihi…a la hma e!!! Thlasik lai te chuan blanket hnuaiah han mut lum pui vat vat mai la, tuilum ip nen, an rawn tho sek peih tawh lovang. Tichuan misual char char thei ni tawh mai
Report this comment
December 12th, 2011 at 10:29 pm
Tunlai tak hi chuan thlahrang aiin ka online tantir hi sheldon hian min lo hmu ang tih ka hlau ziah tawh jokes!
Report this comment
December 12th, 2011 at 10:36 pm
Hets hets….chu ber ai chuan ‘midang’ ho hi an muhil lawk duhlo ang tih ka hlauhpui jokes che
Report this comment
December 12th, 2011 at 10:49 pm
Discovery channel a ‘A Haunting’ program en thin chuan thla hrang, hrang dan leh awmdan chu kan hrethiam mitthla thiam ruai ruai thin ang chu..chutiangin Pu Khuma hian a tak tak nihchuan Sixsense anei turah ka ngai mai..mahnia diklohna nei hian hetiang lamah hian mahniah buaina annei duh khawpmai..mahnia chinfel harsa si,pianpui ve hrim hrim angah ngaihtheih angchu.mahnia chan nita se,a hlauhawm duh khawp ang..
Thla hrang tihvel hi chu awih harsa kati em ema..mahse ka tawng ve tawha,hlauh em em lamah ka la lo.
Report this comment
December 12th, 2011 at 11:04 pm
pawstupa nick khi thlahrangin mi a tihthaih dawna a hram dan a ang ka ti… ahoomaaaaa….
Report this comment
December 13th, 2011 at 6:29 am
Thlahrang pherh ka nia, tihthaih inremchang em?
tren tren.
Report this comment
December 13th, 2011 at 2:03 pm
He post hi nizan ka mutnaah ka ngaihtuah zui nasa! Mahse ka hlauh phah chuang miah lo. Ka ngaihtuah dan chu ‘a kual thui tawh mang e’ tih lam a ni. Pu Khuma’n posttupa pu a hrilh a, ani’n a tupa a hrilh chhawn chu kein’n kan lo chhiar chhawng ve leh a, a la ngaihnawmin a la hlauhawm em em tho. A original version aiin a hlauhawm fe tawh zawk ang em? tih te ka inzawt rilru mai mai pek a.
Report this comment
December 13th, 2011 at 5:01 pm
A va ngaihnawm trek trek ve le.
A boruakah a chen theih khawp mai. Amah Pu Khuma Thlahrang pawh chu a va nghahhlelhawm ve mawle. Hetiang lampang hi ka tui chi ania.
Report this comment
December 15th, 2011 at 2:09 am
Ka chhiarlo ṭepa; ka chhiar lui ta hrama, a hlauhawm hle mai, Pu Khuma hnena awm ang khan min zem chiai chiai mai.
Report this comment
February 27th, 2012 at 6:00 am
[…] ‘Pu Khuma Thlahrang’ tih kha ka post tawh a, a thui viau bakah thlahrang post lawm vak lo kha kan tam riau a, ka post […]
Report this comment