Aw Zoram, Aw kan Zoram, Aw Zoram ka ngaihlu che

December 20th, 2011 11:00 pm by Thahminga

Ni 16.12.2011 a ni a, Aizawl khawpui tawt tak leh mipui zi nuaih nuaih karah chuan ka in zep ve zel a, tih tur nei hlir mai, hmanhmawh taka an han inpel sung sung mai chu(h) an tumah an chiang tlang hle tih a hriat theih ngei mai. Nawhalh bawk kuang khat pawh la siam chhuak ve thei lo te hi Computer age ah kan chuangkai ve tawh laklawh sia buaipui leh vei kan nei ve hrim hrim hi changkanna tepawh a ni mahna le. Tin, buaipui nei ve lo te hi buaipui an ngai tawh a, vei nei ve lo te hi vei an ngai tawh zawk a nih hi mawle…

Chutia ka phei zêl chu ‘Hnam rûn’ ka thleng a, kal pelh mai ka tum lai chuan ring taka an hla zai tir “Lungrualna hi ram leh hnam tan, hlimna kulhpui ber a lo ni e” tih hla tlar chuan min rawn deng dawt mai a, ka ngaithla zui a, ka ngaithla zel, a hla ah chuan ka tuiral ti tih ta der mai. Hnam rûna len luh ve a, a hla phuahtu chanchin te zawh chian a, a hla thu han chhiar chian tepawh ka chak ta khawp mai a, ngaihsan namen in ka ngaisang ta lova!!! Mahse naupangchhia kei ni ang bengkhawn tu tur awm a ka rin loh a vang in kal kawi lo chuan ka tlang phei ta zel a.

Chutah, Vanapa hall kawt ka thleng phei a, mipui tam tak an lo in hawr khawm a, “hei hi ka pa hei hi ka patea, hei hi ka pu,” tih thawm te ka hre ta nawk mai a, keipawh chhungte nei ve ni awm ang hrimin thlalak târ en tur in ka in zep lut hram hram a, ka thil hmuh chuan min barakhaih hle mai. Thlalak, a hlui tawh em a vanga lang mawilo ni lo, Zoram tana an mawina zawng zawng hlan zova, an hmelthatna zawng zawngte thâp ral thak tute hmêl; nalh tak a rem tlar that chu ka hmu a, ka zâm ru veng veng mai. Ruhkawl ria thauh mai, vun thû tak ina a tuam khawm ve hram hram, an hmaitlang hriam hrak mai a tumruhna hmel pu lui tlat ka hmu a, an mit ah chuan thutiam ropui tak a chuang a, ngaihnobeina reng nei lo mahse an zûn ah ka uai ti tih ta reng mai. An ruangam cher tak ah te chuan hliam dang han tawrh belh thei hmel pawh an pu tawh lova, chawkawpuar an hmulo a, lum pui khawp thawmhnaw an in bel hek lo tih te chu an hliam ai a langsar zawk te a ni. Zoram tana vangvat pakhat pawh kai ve lo tan chuan insit a na duh ngei e. An tawrh zia ka van hmu chiang tak em…. Thu mai a lo ni lo tawp mai.

Pitar pakhat in , “Pa a, min liam san a, kan fapa, kan neih chhun lah hmanni lawkah a boral bawk a, engahnge maw min kalsan hlawm le, mahni chauh a hringnun hman chu a va’n khawhar thlak teh lul em, mama nen hlim takin in hmu rawh u aw…” tiin a pasal Zoram tana nun hlan chu a tah karh karh a, ka hnuk a ulh nasa ngei mai. Heh pet fan fan in a pasal hmel chu ka en vawng vawng a, ka mittui parawl kuang kuang thup tur a vanvadak a ka hawi kual ruai lai chuan, a veng tu pan, “Ka pi i mittui farin thlalak rawng a ti chhe thei a khawngaihin hlat deuh rawh” a rawn ti chu(h) “Zoram tan” tih paha, a veng tupa chu hnek leh tawp mai hi ka duh a. Chutah, Pitar te chuan “ka lung a leng em a ni, min hrethiam hram teh u” ti a lo din chhuah pah in, a mittui hrukna kut huh chial mai leh la lum thar thar chuan ka ban ah chuan min rawn vuan a, min ka ban a min vawn sak tawh a zawng ah chuan ka hriat chian ber a la ni mai awm e…. ka hre chiang mai ni lovin min tawh dan a dang hle mai.

Congress hmalakna chihrang hrang te ka ngaihtuah kual a, an phaktawk ang zel a an thawhrim zia ka chhût kual neuh neuh bawk a, hmasawn natura hmachhawp an neih len zia te ka ngaihtuah thlen phei chuan fak tlak si fak hmaih te zingah an tel ang tih ka hlauhthawn pui rum rum mai. Tin, Party dang dang tepawh Zoram hmangaihtu in têl khawm an ni tih ril ru in a hre reng a, “Lungrualna hi ram leh hnam tan, hlimna kulhpui ber a lo ni e” ti a phei han khai za in, Lungrualna thlazar hnuai ah, tlawmngaihna nen rawng in bawl tawn in Zoram hliam tawrh na tak mai hi tuam dam leh tur in “Tho la ding ta che” ti a au in Party theihnghilh thak khawp in Zoram tan tan han khawh tak tak se la; a van nuam dawn take m!!! kan hla phuah thiam Pu Rokunga te meuh pawh Zoram khawvel a lo kir leh hial an chak et et in ka ring thin.
Thalai kan ni a, thu rawn kan mamawh a, kawng min kawhhmuh tu kan ngai ngawih ngawih a ni. Kan hma a mi huaisen kal ta te leh, tun a kan ram ro reltu tangkai tak tak te thawrim zia kan hria a, kan thahnemngaihna hi nasa hle mahse kan theihna a la tlem a, chhenfakawm thil chhawpchuak turin kan tha a la thum si. Kan rilru a tur tu nasa tak awm hi awmze nei a min chher sak turin ka ngen che u a, Zoram tana mi tangkai kan nih ve theih ngei natur in Zoram thlirtu ten thu râwn min fah teh u khai.

42 Responses to “Aw Zoram, Aw kan Zoram, Aw Zoram ka ngaihlu che”

1
Saitawk Says:
December 20th, 2011 at 11:01 pm
Aw ka pianna zoram nuam. Tlawm leh chim rala awm atan ka phallo che.

Report this comment
2
chhangteval Says:
December 20th, 2011 at 11:01 pm
chhiar ve si ang…

Report this comment
3
Asteric Says:
December 20th, 2011 at 11:15 pm
Luangliam tha phian mai…Vanapa hall ah Photo exhibition iva chhim tihna emni ka lo ti rilru deuh a

Report this comment
4
La-me-a 25 Says:
December 20th, 2011 at 11:24 pm
A dik

Report this comment
5
chhangteval Says:
December 20th, 2011 at 11:40 pm
Thalai ram leh hnam vei tak tak an awm hian ka thla hi alo muang ve em em zel ringawt a! Zoram hi kan la siam tha dawn ania…

Report this comment
6
xotea Says:
December 20th, 2011 at 11:57 pm
Tun ang reng a kan kal hi chuan kei chu ka bei a dawng. eng party-ah mah hian rinna nghah ngamna ka hmu ta lo

Report this comment
7
mamboihi Says:
December 21st, 2011 at 12:10 am
@xotea.. A beidawn thlak viau na a lo beidawng suh!! Misual ah hian ram hruaitu tha tak tak tur an awm in ka hria.. chutiang ho in an hruai dan tur ngaihtuah angai ani!!…

Thusawi thiam leh pawisa ngah ringawt ni lo, midik/mitha/mi rinawm kan thlan thiam hunah khua a la var ve ang chu…..

Report this comment
8
H.Vangchhia Says:
December 21st, 2011 at 12:10 am
‘Hnam rûn’ ka thleng a, kal pelh mai ka tum lai chuan ring taka an hla zai tir “Lungrualna hi ram leh hnam tan, hlimna kulhpui ber a lo ni e” tih hla tlar chuan min rawn deng dawt mai a, ka ngaithla zui a, ka ngaithla zel, a hla ah chuan ka tuiral ti tih ta der mai. Hnam rûna len luh ve a, a hla phuahtu chanchin te zawh chian a, a hla thu han chhiar chian tepawh ka chak ta khawp mai a, ngaihsan namen in ka ngaisang ta lova!!!

Khita, ” ngaihsan namen in ka ngaisang ta lova!!!” i tih lai tak hi typo ani em aw?

I ziak ngaihnawmin i sawi hmang hi kan rilru puthmang tur niawm tak a ni. Chuti lovin keini Mizo te chu, mahni hmasial, vervek leh midang hnuaichhiah peih leh chapo. A taka ram hmangaih aia tawngkam chiah a hmangaih, tanrual aia mahni thuduh thah kan ni lawi si… ngaihtuah chian hian future a bright zawk zawkin ka hrelo.

Zoram Genesis te anga beiseina nei tak tak tanlo chuan kan awmdan hi hnam ralna zel anih hmel.

Thangtharte ram hmangaihna, tanrual a pawimawh zia hriain an fing zel turah ka ngai a, rilru erawh ka inhnem chawp thin!

Report this comment
9
lrpa Says:
December 21st, 2011 at 12:16 am
Ziak tha hle mai. Ka like like like e.
Thalaite hi kan thanharh a hun ani. Congress/MNF sawisel ila, ‘MNF/Congress pawn an ti ve tho’. Eirukna sawi ila, chowkider paper hawn nen kan ngaihfin zel bawk si.
Thalaite hian dik duhna tak tak rilru kan neih hunah kan zia ang.

Report this comment
10
saint sammoo Says:
December 21st, 2011 at 12:22 am
kan hmalama beiseina eng ka hmuh hi a chau ta khawp mai..kan naupan laia kapa sawi thin ka theihnghilh theih miah loh chu..”Treasury square ah sawn vai naupangin ka tu leh fate ngei hi a la vel dawn..chutiang hmu hman lo chuan thi i la ka ti ngawt mai..” a ti thin.. Hetiang mai maia kan kal chhoh chuan zoram leh zofate hi kan la ral vek dawn. Zoram leh zofate hi kan tanna khuarkhurum hi a thuk lutuk tawh. insiam tha a ‘rilru dik’ pu leh tur chuan pathian thilmak tih (miracle) bak beisei dang ka nei ta lo..aw..zoram..harh mawlh teh..

Report this comment
11
lrpa Says:
December 21st, 2011 at 12:27 am
Rik hulh hulh, pawngpaw sahawk leh hmui hmanga ram hruai hlawhtling an awm lo ang. Hnathawh angai! hnathawh..Ramh hruitute an thawhrim nasat angai.
Pu Hawla khan chiang takin, mittui tla chungin eirukna a do tur thu a sawi ani! Enge a tih? Engemaw chu a ti ve mahna, mahse ram leh hnam hmelma ber hi a ‘tackle’ ngam lo, a sawi pawh a sawi ngam tawh lo!
Mahse inthlan leh hunah hei hi a tlakna chhan tur ani hauh si lo ang! A buaithlak ani e :undecided:

Report this comment
12
ltvangchhia Says:
December 21st, 2011 at 12:28 am
Keizawng Zoram hian Dinchhuah/Hmasawn ai chuan Tlukchhiat lam a hnaih in ka hria

Report this comment
13
Asteric Says:
December 21st, 2011 at 12:32 am
#8 Pu HV, Bible ṭawngkam a rawn hawh a nih khi, a hmanna khi a dik ang.

Ngaihsan namen in ka ngaisang ta lova = ka ngaisang ta em em a tihna ang a ni, he ṭawngkam hi Bible lehlin hmasa ah khan a tam khawp mai.

Report this comment
14
chhangteval Says:
December 21st, 2011 at 12:35 am
Aw Zoram, lungphang suh aw..
https://youtu.be/2Yo4cnVbCbU

Report this comment
15
H.Vangchhia Says:
December 21st, 2011 at 12:37 am
#13 nasa takin ka ngaisang ta a emaw, Namen in ka ngaisang ta a, tih tur niawm tak a ni. Ka hriat thin dan chuan, “Namen” tih hi nasa sawina a ni.

Report this comment
16
mamboihi Says:
December 21st, 2011 at 12:40 am
HV @ 8… Chuti lovin keini Mizo te chu, mahni hmasial, vervek leh midang hnuaichhiah peih leh chapo. A taka ram hmangaih aia tawngkam chiah a hmangaih, tanrual aia mahni thuduh thah kan ni lawi si…

Dik fu bawk si dik lo se ka tih bawk si i thil sawi hi!

Report this comment
17
H.Vangchhia Says:
December 21st, 2011 at 12:47 am
♪ ♫ Aw Zoram ka ngai em a che. Nanglo chuan lawm a kim theilo. Dar ang tawnleh ni herchhuak thuai se, thinlai dam ten leh ve aw ka nuam e. tra la la la la ♫ ♪

Khawnge mahni buai buaiin kan buai leh tawh ang e hairehai

Report this comment
18
DXBFreak Says:
December 21st, 2011 at 12:55 am
he luangliam ah hian ka luangliam leh chhawng, i va han ziak tha ve le…

Report this comment
19
ReMpY_ScisSoR Says:
December 21st, 2011 at 1:07 am
Thra dap dap ve. Vote thlak hi citizen’s duty a ni tiin kan zir thin. Mahse keichu beisei tlak party vote tur an awm loh chuan eiru leh tho tur te tana vote 1 lo thawh ve ai chuan thlak miahloh thra ka ti zawk.
Bik takin thingtlang lam mi te, sawrkar thralo tuar ber ber tu te hi inthlan lai chuan a party rui nasa sa an ni leh tho a, in chhung hnaivaite pawh party inan loh avang ten an in bei lo chauh a ni thrin si a.

Report this comment
20
ReMpY_ScisSoR Says:
December 21st, 2011 at 1:21 am
Mihring famkimlohna (?) / human weakness hi tharum hmanga tihreh theih a nilo a, vauna leh hremna te, hlauhna ten an tireh zo tak tak chuang lo. Duhamna hi chutiang zinga mi chu a ni a, a hrinchhuah chu corruption a ni si. Mi thra leh dik tak, duhamna in a tihbuai phak loh ang chi te hi chu millenium khatah hian tam an lo lang lo a, an lo lan laia awm velo te hi chu kan vanduai a ni mai a, an lo lan laia awm a, thlanchhuah nachang hrelo te hi chu kan chawh thung nimai ten ka hria.

Report this comment
21
lrpa Says:
December 21st, 2011 at 1:30 am
20 hi a dik vei fikfuk khawp mai..LIKE

Report this comment
22
H.Vangchhia Says:
December 21st, 2011 at 1:33 am
Misual.com tih intar khi avan mawi

Report this comment
23
CFL Says:
December 21st, 2011 at 1:36 am
@ Chhiar a nuam e.
@ Kan krismas theme chu a nalh hle mai. KZP Up.

Report this comment
24
lrpa Says:
December 21st, 2011 at 1:38 am
@Pu HV..hla ka thlan sak ang che..
https://www.youtube.com/watch?v=aY2FPbHr-wg

Report this comment
25
Asteric Says:
December 21st, 2011 at 1:40 am
#19&20 Thats my girl speaking

Report this comment
26
Asteric Says:
December 21st, 2011 at 1:44 am
#15 Pu HV kei chuan he ṭawngkam lo chhuahna, awmzia leh a ṭobul tak ka hre law, mahse Bible ah hian a awm a, hmandeuh ah pawh fiamthu thutak deuhin a mak kan tih thu kan sawi ho tawh lawm.

Report this comment
27
ReMpY_ScisSoR Says:
December 21st, 2011 at 2:08 am
Mizotawng hi chu ka thiam vak bik lo nachungin ‘ngaihsan namen loin ka ngaisang ta a’ tih hian awmzia chu a nei ber tur chu a ni, hnamdang bengah pawh
ngaihsan namen in ka ngaisang ta lo a??????? Makes no sense..

pu HV-a samaw.kom case te ka va chhiar vak chu aa.. mu kawk tengs

Report this comment
28
Asteric Says:
December 21st, 2011 at 2:25 am
#27 Boihi la mu hrih suh enge tunlai i tih ṭhin (ka contc theihna hmun che ni bawka, hetah hian ual au deuh2 in ka be dawn che)

Report this comment
29
ReMpY_ScisSoR Says:
December 21st, 2011 at 2:31 am
astee, la mu lo pitt..film pakhat ka download mek a, a zo trep. ahmuhnawm don chuan ka en tlang nghal law2 ang :lol: ka fb account ka lut thei tih siloa, mse ka net thrianpa password ka hre hlauh a, a fb loh laiin a msg ka chhiar ru thrin a, nuih a za em em zel e..

Report this comment
30
Asteric Says:
December 21st, 2011 at 2:38 am
#29…eng film nge min lo hrilh ve..hihi…mahse nang pawh hi i mengrei thei riau in ka hria, i taksa dawrawm tak kha lo duat rawh. Ka care tehlul che nen , wit al ma hrt….lolz

Report this comment
31
ReMpY_ScisSoR Says:
December 21st, 2011 at 2:44 am
puss in boots (animation) , theatre ah ka en ve hman lo a, kei mi buai hian mu tak2 teng, naktuk 9:00 offica ngai tlats…lewl goozenight, superman(kawthralo) lolz :kiss:

Report this comment
32
Asteric Says:
December 21st, 2011 at 2:45 am
hahaha…nang super girl….gudnyte sweetheart :kiss:

Report this comment
33
M_Pautu Says:
December 21st, 2011 at 3:03 am
Gud post…chhiar a nuam hle mai! Heng article ngaihnawm tak chang hian misual.com hi log in kherlovin ka chhiar ziah….

Report this comment
34
Chhuaklinga Says:
December 21st, 2011 at 7:02 am
Tha khawp mai. Mahse, “Lungrualna hi ram leh hnam tan, hlimna kulhpui ber a lo ni e” tih lai hi “Lungrualna hi ram leh hnam tan, himna kulhpui ber a lo ni e” tih zawk tur niin ka hria.

tren tren

Report this comment
35
PKfanai Says:
December 21st, 2011 at 9:03 am
Post tha hle mai. A post tu rilru leh rempy comment khi ‘duh namen in ka duh lo mai a’. Tha ka ti e.

Report this comment
36
Lersia Says:
December 21st, 2011 at 2:07 pm
Zoram siamtha leh tur hian Mipui sukthlek nge thlak ngai zawk Hruaitu te? Mipui te mawhphurhna nge tam a ram Hruaitu te ….
Ka ngaihdan chuan Democracy ramah chuan mipui te mawhphurhna hi nasa zawk ah ka ngai e… enge in ngaihdan ni ve le…

Report this comment
37
Lersia Says:
December 21st, 2011 at 2:15 pm
@Pu HV, Bible kan keu zat zat a, “ngaihsan namen in ka ngaisang ta lova” tih tawngkam ang zulzuia hman na hi a lo tam khawp mai…. A ngaisang ta em em a tihna a ni mai awm e…. Tin, Namen tih hi ‘lo’ hian a zui tlangpui.
Grammar ang zawng in kan sawi ve chhin dawn a nge…. He tawng hi Saptawng word formation a tanga kan lak ni in ka hria.. Emphatical sentence ah chuan double negative words in Positive meaning a nei ang deuh hi a ni in ka hria… ka va sawi chiang loh teh nuaih ve… Pu Muante a ka ruai e…

Report this comment
38
Thahminga Says:
December 21st, 2011 at 2:34 pm
Misual. com hi ka ngaisang thin a…. In thurawn ka mamawh a, kum lama phan chhang zawk leh a khupkawi changchin in thu tak tak min fah turah ka ngai che u a, belhfakawm tak tak thu in rawn sawi te hi ka lo zir zui dawn nia… In mi fakna hi fuihna duhawm tak a ni e… han sawi zel teh u.. ka lawm e..

Report this comment
39
buh-duha Says:
December 21st, 2011 at 5:41 pm
A ngaihnawm a, a thuken pawh a tha hle mai.

Report this comment
40
PimPom Says:
December 21st, 2011 at 10:25 pm
A chhiar a nuam hle mai.

Report this comment
41
hmingtea Says:
December 21st, 2011 at 10:34 pm
Kan zoram politicain/officer/NGO hruaitu te zingah hian ram leh hnam hmangaihtu an awm lo pakhat te mah an awm lo tih mai ka chak hahah

Report this comment
42
Maverick Says:
December 22nd, 2011 at 2:35 am
‘Lungrual a pawimawh e’ tih bak khi chu han lak khun khan tur em em vak pawh a awm pawh ka hrelo. Mizoramin zalenna a sual pawh kha threnkhat te hnemhnan duhna, Zoram pumpui tuarna thlentu ah ka ngai hmiah kei chuan. Tam takin nunna leh ro hlu tam takah kan chan a, a pawi hi ka ti tawp theilo. Khami hnu a UT kan nih a pawisa rawn tam thut khan kan Mizo nun mawi a eichhia in corruption ah hian kha khan min ti hmasawn hle in kei ka hre ve tlat. Keima ngaihdan ve mai mai ani e…
Eiru sawisel a dem ho tam tak sawi te khian eiru thei dinhmunah chuan awm ula eng in nih bik vak ka ring hlawm der lo a tam zawk khi chu…
Bakah Sorkar hi dem tur ngawt pawh ani lo, mipui thra chuan ram hruaitu thra an nei mai. Chuvangin Mizoram mipui te hi chuan kan phu tawk zel hi ram hruaitu kan nei a, kan nei zel bawk ang. Tuna Congress sorkar hi ka rin aiin hna an thawk thra in corruption ah chuan ka hriat ve phak chinah chuan an la zia berin ka hria kei misual ve mai mai hian!
Hmun danga hnathawka awm hi chuan eiruk hi a har a, chuvangin thra hi intih a Mizoram vei hi a awl teh in ka hria. Lo tawn ve hnu te ania. Mahse, hetianga hmun dang a hnathawk ho threnkhat ina ram rawn vei em em ho hi kei ka ngaisang hran lo khop mai hlawm che u. NOI
1% vel hi chuan genuine taka ram hmangaih tak tak a corruption hua hi chu in awm maithei. A thei dinhmunah chuan ding ula eng in nih hi ka ring hlawm tehchiam lo. ‘Hei hi chu corruption ani hleinem, sum thianghlim alom ti a inhnem chungin in hum hawm trun trun ve tho mai lawng maw?’
Chuvangin thra ber awm anga ram pawna hnathawk corrupt ve pha silo tam zawk ram rawn vei em em ho hi chu kei ka ngaisang eih lo… Tumah sawi chhan bik ka neilo, ka ngaihdan ve mai ani e… :rolleyes:

Report this comment