mi(sual).com

1991 kumthar tir a nia; kum dang ang chu nise nun a la nih huau hun lai a ni. Amaherawhchu, hemi ṭum hi chuan kan hma lawka Middle East-a thil thleng mai tur chuan mitin, keini naupang chenin radio kaltlanga thuthar an puan kan hriat ve vek avangin min chiaha. A hma kum daiha kan lo tum lawk tawh a nih avang erawh chuan kan pawl sum tuak na tura kan ruahman thinglak chu ṭhulh phah kan tum chuang lo.

Kan khaw dai ami eng thing nge ka hre reng talo chu kih tumin kan pawl zinga a hotu deuhte chu hnatlangin kan thawkchhuaka, heta ‘a hotu deuh’ ka’n tih kher nachhan chu he kan pawlah hian OB pathum kan awma; President/Leader tih vel kan invuah ve lo. Kei hi a hotu ber ka nia; ka hnuai chiah ami chu a dawttu, a pathumna chu tuleh kan ti mai.

Tichuan, thing chu kit turin kan chem neih ang ang chuan theihtawp chhuahin kan sata; a zatve vel kan sah hnu chuan kan hah tawngkhawng tawh bawka, hemi ni atan hi chuan kan duhtawk rih.

Sawi tak angin kan chhunzawm vat loh chuan khawvel a buai zawh vek dawn avangin (kan rin dan) lak fel thuai thuai chu kan tum lian ber a ni. A tuk hnihnaah chuan kan thawk chhuak leh ta a. Rei vak lo kan sah hnu chuan kan hah leh ta mai, kan beidawng titih ta. Kan hotute zinga pakhat chuan ‘bul ṭan ṭhat chu a zatve zo tluk a ni’ tih kha a lo hre thawi ve a ni tehchek ang chu, “Hmun hran deuhvah sat ila; a sawt zawt mai ang,” a’n tih pek chu.

Kan peih pui ta lo hlauh zawk a. Tichuan, hemi ṭum pawh hian kit thlu lovin kan beidawng leh ta. Hawn mai tuma thui vaklo kan kal hnu chuan ka chem ka theihnghilh tih hrechhuakin a la leh tura kan thing kih tum bul ka thlen lai tak chuan thing chu a tlu ta mai. Ka ngumah tak min delh tehreng a nih kha. Ka vanneia, ka inti silawng lo hlauh kha tun thleng hian ka la lawm. Kan tum ber chu kan hlenchhuak ta naa; kan hawn san ta thova. Tun thleng hian kan la la leh ta lo.

Hun a kal zela; Middle East buaina pawh hman tih a lo ngai ta hial mai. Khawvel ram hrang hrangte chuan mahni inven nan theihtawpa ṭha ralthuam an inchhek veka; heng zinga ṭha bera ngaih chu Nuclear hi a ni awm e. Sorkar tinin neih duh mahse a hautak tham em avangin neih mai mai theih a ni lo.

Khawvel hruaitu Eng sorkar mahin a ne pawh an ek phak loh, khawvel indopui I & II-na a tha chakna a tudaitu, khawvel humhimtu Lalpa, Mipuite zalenna Democracy kulhpui, Ram tenau, thlaphang leh tihduhdah tuar te’n an belhfak, khawvel ram retheite dawm kangtu. Hnamtin chitinte zalen taka zaikhata an lenna ram, ‘DAMLAI PIALRAL’ tih khawpa ram hausa USA pawh a nei zingah chuan a langsar ber anni awm e.

A chunga kan sawi tak ang khian ram ropui tak annih avangin khawvelah lal an hrawta; anmahni khing pha awma ngaih chu a chakna hmachhuana tudai duh mai anni. Tichuan, Iraq ram, pawhin he Nuclear Weapon hi nei ve ngeia an ngaih avangin an do ta ngawt mai a nih kha.

Anmahni pawhin an neia; engahnge midang neih ve an phal loh ngawt? Thil ṭha zawng a ni hauhlo. Amaherawhchu, anni pawn an neih chuan midang neih chu an ngaihmawh bik thiang lo. Chuta karah an (Iraq) la neilo zui. An ram hruaitu Saddam Hussein chu an that ngawt lehnghal a nih kha.

Thuhmahruai chu lo duhtawk phawt ila. Kuwait ramin oil an ngah avangin Saddam Hussein-a kaihhruai Iraq ram chuan itsikin an oil neih chu hnehchhuh tumin theihtawpin ṭan an laa; zahngaihnaa khat USA chuan chu chu ngai thiam lovin Kuwait chhanhim turin theihtawp chhuahin ṭan an la ve bawk a.

Sawi tawh angin Iraq ram President Saddam Hussein chu diklo taka rorela a ram ralmuanglo taka siamtu a ni. A nunrawn zia chu kan hre ṭheuh hlawmin ka ring. Thih pawh hi a phu khawp in ka hria. Mahse, he thu ka’n post nachhan ber chu, sawi tak ang khian USA chuan an thil ṭhalo kawl ang kawl vetu ramdang chu an haw tlata; Iraq pawh hian nei ve ngeia an ngaih avangin an pawng do ngawt maia; he thilah na na na hi chuan an thiamlo hulhual niin ka hria.

Vawiin hi Saddam Hussain an khaihlum champha (phak telh kher hi a tulna ka hrelo) vawi ngana lai a lo ni ta.

Saddam, vawiin i boral champha a lo thlen hian kan thinlungah i cham renga;
Engtikahmah kan theihnghilh tawh lo’ng che.
Amaherawhchu kan ui lemlo che a nia.

Similar Posts:

• ‘Chemical Ali’ execution approved
• Saddam’s Execution Video leaked, Controvery begin
• Ngaihtuah zui peihte tan
• Tunlai Iraq a zofate
• USA leh a kid-te ho ka ninzia hi chu..!!!!

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Friday, December 30th, 2011 at 2:00 pm and is filed under Obituary, Opinion, Politics. You can follow any responses to this entry through the RSS 2.0 feed. You can leave a response, or trackback from your own site.