mi(sual).com

Ka hming chu Edward Spencer a ni a, 31 May 1889 ah Walworth, London ah ka piang a. Ka pa hi lemchan lama tui mi a ni a ka nu erawh chu puan ṭhui a ni. Kum 3 ka tlin hma in ka nu leh pa chu an inṭhen a, tichuan ka nu in min enkawlin hmun hrang hrang ah kan pem dun a. Kum 12 ka nihin ka nu pawh chuan lungna leh thawhah avangin min boral san a. Tichuan Kennington Road, Lamberth lamah eizawng turin ka pem a, lawng bungrua siamna ah thlakhata pound 2 hlawh in hna ka thawk ve a, hna thawk tu an indaih em avangin ban ka ni a. Chumi hnu ah chuan Birmingham lamah te hna nghet zawk zawngin ka pemkual leh a, kum 17 ka nih thleng chuan pheikhawk siamna hmun ah ka thawk ta a.

Ram chhung ah pawisa avan avangin kan hna pawh chu chawlhsan turin kan pu te chuan min ti leh a. Ram chhung ah eizawnna avang ta em em a, pemkualna mai tur pawh ka hre tawh lova, rukruk a hluara tumahin an hnuai thawk turin rintlak an nei meuh tawhlo a, hna thawh tur hmu tur chuan sawrkar in mi ṭha leh dik a ni tih a ziahna lehkha nei te tan chauh lo chuan eng hna mah a thawh theih tawhloh a ni.

Broad Street(Birmingham City) ah te chuan hna zawng leh rukruk tum hi kan in pel suau suau a, mihausa leh rethei kar a hla ta em em a. Keipawh chuan 10 pence hlawhin restaurant ah chhuat ka nawt ṭhin a. Mi ei bangnawi leh an thil theihnghilh te chu ka thukru zel a, chu chu ka nitin ei hmuh ve na awm chhun chu a ni. Thawmhnaw hakthlak engmah ka nei lova, ka suit bal tak tih mai lo chu ka nei lo, dawr kawt ah chuan ka riak mai ṭhin a.

Ka chhuat nawhna ṭhin restaurant pawh chuan thlakhat chhung dawr khar an tum avangin tlai khat chu Swinford Street lamah ka leng chhuak a, kawng zim lai ah motor an inhnawh a, ke a kalna tur mumal pawh awm lovin motor an ding tlat a, kawng sir ah kal ka tum a, ka kalna tur chu motor ding pakhat hian min dal tlat avangin a chhung ah ka lut a a kawngka lehlamah chuan ka chhuak tlang ta ta. A kawngka ka khar rual chiah chuan kawng sira nula lo ṭhu chuan “Ka pu khawngaih takin ka pangpar hi min lei sak ve rawh” a lo ti a, ka han en chianga nula hmeṭha tak a ni. A pangpar chu hnim ve chhin turin min ti a, min rawn pek tuma a rawn ban lai chuan a thlauh ta a, ka chhar sak hnu pawh chuan lei lam chu ala dap ala dap a “Kapu i chhar tawh ami?” a ti a ka han en chianga mitdel a lo ni reng a. Chutiang taka nula hmelṭha midel ka hmu chu ka lainat ta em em a, ka thinlung ah hmangaihna in min rawn fan a, “Ka chhar sak tawh che, ka lei sak ang che” tih pah chuan 10 pence chu ka pe a. “Ka pu ka lawm e” a ti a ka kawr ah min thil sak a.

Ka motor ni awm taka ka rawn chhuahna kha a neitupa alo kal a, a motor kawngkhar chu a hawng a a khar rik leh rual chuan nula i chuan ka pu i pawisa nawi i la hleinem a ti a, motor chu a tlan zui a. A bul ah chuan ka la ding reng si a, keimah emaw a ti a ni tih ka hre ta a, mi hausa tak turah min ngai a ni tih ka hriaa, ṭanpuitu leh lainattu mihausa a tawngta ni a a inhriat avang chuan a hmel a hlim ta em em a. Keipawh chuan a beiseina kawl eng hmu a a inhria han hmuh chu nuam ka tih em avangin a sir ah chuan ngawi rengin ka ṭhu a.

Khawilam mi nge a ni tih hriat ka châk em avang chuan a haw tur chu ka zui ru ta a. In chhung a luh thlengin an tukverh lamah ka enthla zui zela, pitar pakhat hian alo lawm a, an titi aṭang chuan a pi tar tawh tak nen chauh chuan an khawsa a ni tih ka hre thei ta maia. A pi chuan “Rosalene bawihte, vawiin enge i chanchin?” tiin a zawt a, nula i chuan “Ka pi vawiin ah chuan ni ṭha tak ka hmang a sin. Mirethei khawngaihtu mihausa tak mai ka tawng a ni” a ti a, a pi chuan “Pathianin min awmpui reng a nih chu” a ti a. Chumi ni chuan ka rilru a thil tam tak in zawt chungin ka haw leh ta a.

Zankhat chu khawlai ka vah kualna ah chuan zun na tur zawngin lawng chawlhna sir lam chu ka va pan a, pa pakhat zu rui tak mai hi mahni intih hlum tumin a nghawng ah chuan hruizen alo valh a, a hmawr lehlamah lungtum lian tak ṭawnin tuipui a thlak chu alo tum a ni a. Enge thil awmzia ka han zawh chuan a nupui nena an inṭhen avanga intihhlum tum a lo ni a, a hming chu Douglas a ni. Ka theih ang tawkin ka thlamuana, khawvar nghak hram turin ka ngen a, a tum luiṭalh pawh chuan ka ṭanglui ve zel a, ka awm nghenga ṭap chung chuan kan inhnema. An in lamah chuan ka hruai haw ta a.

Mi hausa tak mai hi a ni a, ka thusawi ten a tih thlamuan em avang chuan a in a cheng ve tur chuan min duh a. Zu lah chu duhtawka in tur a ngah a, zankhuaa inpui mai min tuma, ka inpui tam duh ta lova. Zing khua alo var chuan Douglas-a chu a rawn harh chhuaka min hre leh ta reng reng lova, tichuan a in aṭang chuan ka chhuak ta a. Khawlai ah chuan ka tei leh ta mai mai a.

Tlaikhat chu Douglas-a zurui bawk chuan min rawn hmu leh a, a ruih lai chauhin min lo hria a ni a. “Engatinge min kalbo san daiha, i tello chuan ka nun hi engmah a ni hleinem” tih pah chuan min kuah a a in lamah min hruai leh a. Kawng kan lai chuan motor chhung aṭang hmana ka nula hmuh kha kawng sir ah pangpar zuara a ṭhu ka hmu leh a, Douglas-a hnen ah chuan “Pangpar lei ang i nun hlimnan” ka ti a, a ni chuan “I duh zah zah lei rawh” a ti a, tichuan pawisa ṭhahnem tak keng chuan nula i pangpar zawng zawng chu ka lei sak ta a. Rosalene-i chu a lawm em em a, ka kut chu a chulin a fawp ta ngawih ngawih a. Douglas-a a in a ka hruai hnu chuan a khum ah ka mut a, nula i chu Douglas-a motor chuan a in lamah ka thlah ta a. A pi chu khumbetin a naa, a mutthilh avangin ka hmel a hmu lo. Rosalene-i chuan Pathian vantirhkoh ang hiala min ngaiin ka chung ah lawmthu a sawi bang thei lova. Ka haw hnu chuan Douglas-a in lama kir lovin street ah ka riak leh ta a.

Rosalene i chu a dam lova a pi chu tlema alo ṭhatchhuah tak avangin chuan pangpar chu a tunu a zawrh chhawk ta a, mahse sum engmah hawn tur a hmu ve thei lova. Tlai khat chu an in ah lehkha alo thleng a, chu chuan a pi rilru a ti hah hle a Rosalene-i pawh chu engmah a hrilh duh ta lova. Douglas-a zurui nen kan inhmuh leh avangin Rosalene-i kan tur chuan thil eng engemaw kengin an in ah ka leng lut a. Rosalene-i chu a lawm em em a, ka kut a fawp a ka hmel hmuh a chak zia a sawi cham chi a, pa hausa leh ngilnei tak ka nih a ring em em bawk a. Chumai bakah chanchinbu ah Rosalene-i mit ṭhatlohna ang chi sum tam tak senga tihdam theih a nih thu leh Dr hming te alo chuang a, chumi ka han chhiar sak chuan a lawm a mahse sum a neihlohna chuan a rilru a ti hnual nasa ta em em a. Kei chuan “Lungngai suh keiman engkim ka tum ang” ka ti a, inthlahrung takin lawmthu min hrilh a. Chumi hnu chuan “Ka pi in lehkha a rawn thleng a ti a, engmah a inziak a sawi si lova khawngaihin min lo chhiar sak teh” a ti a. Chu leh kha chu ka han chhiar sak a, inluahman thla engemaw zah an bat avangin thlakhat chhunga an rulh theih loh chuan hnawhchhuah leh jail tan tir an nih tur thu alo ni a. Chu thu chuan Rosalene-i mittui chu a ko chhuak ta nghal a. Ka inngaihtuaha Douglas-a sum hman sak dan tur ka ngaihtuah ta a, Rosalene-i hnen ah chuan “Lungngai suh, engkim ka tum ang. I mit damna tur nen avaiin ka pe ang” ka ti ta a, ka haw san ta a.

Tichuan Douglas-a zurui chu a inlamah ka luh pui a, a sum neih ang ang chu ka dil a, ṭhahnem tak a ni. Chu chu ka tlan chhuah puia Rosalene-i mit enkawlna tur leh an inluahman zawng zawng atan chuan ka pe ta a. Amaherawh chu Douglas-a diklo taka a sum hmansaka puh ka nih tak avangin Jail ah min khung ta a. Kum 3 lai Jail ah chuan ka tang a, hrehawm ka ti em em lem lo. Jail aṭang chuan chhuak tawh turin min ti a, ka chhuah meuh chuan ka ṭawp em em tawh a. eizawnna tur awm bawk si lo, Jail a awm reng mai chu ka thlahlel zawk mah a, mahse Jail ah pawh chuan tan reng theih a ni tawh bik si lo. Bungrua engmah nei lovin ka thawmhnaw ṭeṭ hneng hnuang nen chuan khawlaiah kelawng in ka tei ta ruk ruk a.

Market lun laia pangpar dawr awmna ka thlen chuan Rosalene-i pangpar ka lei sak ang kha kawnglaia tla hi ka chhara, ka hnim vang vang lai chuan mi anglo emaw tiin naupang hochuan min lo chhaiha, tiangin min hawlh a, ka um darh zel a. Ka pangpar ken lai chu min chhuhsak a ka um a ka chhuhsak ve leh a, chutia naupang nena kan in umkual lai chu pangpar dawr chhung aṭang hian darthlalang chhanan min hmu in min lo nuih hawm hawm hlawm a. Chu pangpar dawr chu ka han en chianga Rosalene-i pangpar zawrh ang hlir kha ka hmu a, ka lung a leng ta khawp maia. Ka pangpar ken lai chu ka thlauha Dawr chhung aṭang nula chu lo chhuakin min chhar sak a “Kha naupangin an laksak leh hma che in ka chhar sak che nia” tihpah chuan min han pe a, a hmel chu ka han en chianga Rosalene-i a ni!!! Mak ka ti a, a hmel lah chu a hma ai khan a ṭha tawk zawka, a mitmeng te chu a lo nalh tawh em em a, engmah sawi ngaihna hre lo chuan ka en ta reng a. Rosalene-i chuan “Ka pu hei i pangpar la rawh” tih pah chuan ka kut ah a han vuan a. Ka kut a han khawih chuan a ni pawh chu a hmel a dang lam ta nghal a, ka kut chu chiang lehzualin a han chul a, kei chuan “Min hmu em?” ka ti a, a mittui a tla a ka kut a fawp a “Nangmah hi maw” a ti a min kuah ta vawng vawng a.

PS: He thawnthu hi Charlie Chaplin Movie behchhana ka phuahchawp a ni 😀

This entry was posted on Sunday, January 1st, 2012 at 12:00 pm and is filed under Fiction. Both comments and pings are currently closed.