mi(sual).com

1st. Thursday: Khawvel hmun dang rualin Mizoramah World AIDS Day urhsun taka hman a ni a. A hmanna pui ber Aizawl Vanapa Hall-ah chuan Health Minister Pu Lalrinliana Sailo hovin inkhawm neih a ni a, inkhawm hi MSACS-in HIV kai thar awm tawhlohna tura tanlak tih thupui hmangin a buatsaih a ni. AIDS hi 5th June, 1981 ah America ram Los Angeles khuaa homosexual 8 aṭangin hmuhchhuah hmasak ber a ni a. India ramah chuan May, 1986 khan Chennai-ah KS kan tih mai 6 aṭangin hmuhchhuah a ni a. Mizoramah chuan October, 1990 khan hmuhchhuah veleh a ni bawk.

2th. Friday: Law Secretary aṭanga pension tawh P. Chakraborty rawih nawn lehna order sorkarin a tihchhuah duh loh entir nan MZP leh MSU hruaitute leh zirlai 200 chuang ten New Secretariat-ah P.Chakraborty office kal tur dan an tum a, P. Chakraborty hi a zin bo lai a lo nih avangin buaina liantham a chhuak lo. Press Release siamin an ṭin leh a ni. P.Chakraborty, Principal Legal Adviser (Principal Secretary tlukpui) hi Mizoram sorkarin kum khat (1) a rawih nawn tawh hnua thla ruk (6) dang atana rawih nawn a ni leh chu MZP chuan pawi a ti a, Mizo pa, a thawh ang thawk thei an awm lai a hnamdang rawih nawn a ni fo mai chu MZP chuan pawmthiam harsa a tiin a tawp thlengin a dodal an tum thu an sawi a ni.

3rd. Saturday: H. Kapthuama, (33) s/o, H. Vanlalthanga chu an bathroom-ah thiin an chhar. Silaia amah leh amah inkap hlum nia hriat a ni. Chhinga Vengthar, Aizawl-a awm a ni a. An bathroom hi an in nena a hranpa deuha sak niin, Maniature silai hmangin a inkap hlum niin thudawnna chuan a sawi. H. Kapthuama hi a inkahhlum chhan tak hriat ni lo mah se, pumpui ulcer nei reng, a dam theih loh avanga rilru hah avanga buai ta nia rin a ni.

4th. Sunday: ITI venga Pu K.Lalthlamuana f/o Zaithiam C.Lalhmingmawii (Mami), te in chu , Bungrua pawh chuh hman lovin a kangfai vek a, C. Lalhmingmawii nau Tv. C. Lalmalsawma chuan hliam a tuar deuh a, damdawi inah kalpui nghal a ni. Electrict short vang a nih hmel loh bakah pawn lama kawng a inkalh tlat avangte in he thil hi misual thiltih anih a hmuna kalte chuan an ring.

5th. Monday: 407 truck Zonuntluanga (32) Serchhip khua, Dinthar venga cheng khalh, chho zawnga tlan leh CBZ (Extreme) Bike la register loh, Lalhmuthara khalh chu an inpelsual a. Lalhmuthara hian a nupui leh a fapa a phur a, an inpelsual tlu chu Bike laia chuang Lalmuanawma hi motor hnuai-ah a tlulut a, motor hian a chilin hospital panpui a nih laiin a boral.

6th. Tuesday: Synod Inkhawmpui vawi 88-na chu Khatla Kohhran Biak Inah palai lawmna leh report neih a tan a ni ta. Synod Inkhawmpui hi nikum atang khan Bial-in an thleng tan a, nikum (2010) – ah Dawrpui Pastor Bialin Zarkawt Kohhranah thlengin kumin (2011) hian Khatla Bialin Khatla Kohhranah an thleng a ni. He inkhawmpui hian Dt.11, December (Sunday) thleng a awh ang.

7th. Wednesday: Laltanpuia (23) s/o Lalchharliani, Tuikhuahtlang chu Bawngkawn, Sairang road-a Edenthar Veng thlen hma deuhah kawng thlangah a lum hlum.

8th. Thursday: Mizoramin tam tham deuha hmunphiah a thawn chhuah hmasak ber, phiah sing li, Russia rama thawn tur chu Vairengteah Parliamentary Secretary, Pu Lal Thanzara’n a vai liam. Heng hmunphiahte hi Mizoram Broom Industry Private Ltd.-in ram danga thawn chhuah tura a siam a ni.

9th. Friday: Chief Minister Lal Thanhawla chuan Churachandpur, Kawnpui khelmuala ‘The Mizo Meet 2011’ an hman chu a telpui a; Mizo zawng zawngte rorelna pakhat hnuaia awm chu an duh dan a nih thu a sawi. He ‘The Mizo Meet 2011’ hi Minister pahnih – PC Zoram Sangliana leh H Rohluna bakah Parliamentary Secretary pahnih – Lalrinmawia Ralte leh Chawngtinthanga te pawhin an hmanpui a; Central YMA President leh MZP President ten an hman pui bawk. Manipur Minister pahnih pawh an tel a ni.

10th. Saturday: Mister Mizoram thlan­na Vanapa Hall-ah neih a ni a, Kenneth Lal­hmunsanga s/o Kapthanga Armed Veng South chu Mister Mizoram 2011 atan thlan a ni. Mister Mizoram thlannaah hian category hrang hrang siam niin, chunga pakhatna theuhte zinga tang chuan Mister Mizoram hi thlan a ni.

11th. Sunday: Mizoram UPC General Assembly vawi 17-na Mission Veng field-a 8th. December a hman ṭan chu tluang taka neih a nih hnuin a ṭiak ta. Assembly-a an tarlan danin, Mizoram UPC hian member 41,676, pastor bial 73, kohhran 373 leh preaching point 24 an nei mek a; kum 2011 chhungin kohhran ding thar panga an awm a, ruai nena Pathian chawi­mawina vawi 318 a awm. Kum 2012 General Assembly chu Bethlehem bialah nghah a ni.

12th. Monday: Parliamentary Secretary (PWD), Lal Thanzara chuan Rs. 30,84,879/- sênga siam, Ṭhiak leh Maubuang inkalpawhna kawng km. 1.600-a sei a hawng. He kawng hi kum 2006 atanga laih tan niin, SGRY leh BAFFACOS suma bul tan a ni a, MGNREGS sum hmanga laih zawh a ni.

13th. Tuesday: Mizoram Kohhran Hruaitute Committee (MKHC) chuan Synod Committee Room-ah General Meeting vawi 23-na an hmang a; MKHC hnathawh tawhte a bua siam an rèl bakah, Independent Church of India (ICI) leh Evangelical Free Church of India (EFCI)-in MKHC member nih an dilna chu an remti. MKHC hian kum 2012 chhunga an hruaitu turte thlangin, Chairman-ah Rev. Thangzauva, Synod Moderator a ni. Executive Member atan Presbyterian Church, BCM, UPC, Salvation Army, Roman Catholic, Seventhday Adventist, LIKBK, ECM, Methodist Church, Congregational Church of India (M), Zomi Baptist Church leh Evangelical Baptist Convention Church atang te in an ruat a ni.

14th. Wednesday: Champhai Custom & Preventive Force-te chuan Champhaia hotel pakhatah lunghlu, cheng nuai 57.2 man vela chhût an man. Lunghlu kengtu Liankhangthang, Tahan pawh man nghal a ni a, a neitu erawh Aizawl lam mi nia hriat a ni a, man a la ni lo. Lunghlu hi sawngbawl tawh tlang nga leh sawngbawl loh tlang thum niin, Kolkata leh Mumbai pan pui tur nia hriat a ni.

15th. Thursday : Academy of Integrated Christian Studies (AICS)-in ‘Corruption leh Mizo Kristian’ tih lehkhabu an buatsaih chu I&PR Auditorium-ah Chief Minister-in a tlangzarh. Corruption leh Mizo Kristian tih lehkhabu-ah hian Aizawl leh Lungleia seminar an buatsaiha mithiamte thusawi 14 dah a ni a, Rs. 100/- man a ni.

16th. Friday : Mizorama stevia (hnahthlum) thar chhuahte lei tura thuthlung an ziahpui, Anubhav Biotech Ltd. Kolkata chuan Mizorama stevia thar hmasak quintal 13 leh kg. 20 chu Horticulture department conference hall-a inkhawmah Anubhav Biotech Ltd hotupain Mizoram Stevia Grower Association President, Biakhnuna hnenah cheque-in Rs. 86,320/- hlanin a lei ṭan. Stevia hi Khawruhlian, Maubuang, Sateek, South Sabual, Bawngthah, Kanghmun, Lungphun, Hreichhuk leh Khawrihnim-ah te chìn a ni a; an thar chhuahte lei tur hian Mizoram Stevia Growers Association leh Anubhav Biotech Ltd. chuan September 27, 2010 khan thuthlung an ziak a ni.

17th. Saturday: Pi Rualkungi Hnamte IOC Veng, Serchhip chu an tukverh thlang lamah tla in a thlang fit 30 vel a lum a; a tukhumah hliam na tak a neih bakah a ban vei lam a sawh tliah bawk avangin a borala; vui nghal a ni. Pi Rualkungi Hnamte, hi IOC Veng, Bazar lam NH-54 kawngpui kama ama in chhawng hnih, In chung zawkah a tunu Veronica Lalrinmawii nena khawsa anni. Tukverha a dak chhuak chu thlang lam tukverh fit 18 vela sangah tla thla ta a n.
i

18th. Sunday: Chhim lam atanga lo phei hnamdang motor 709 truck serthlum phur, mi 9 (hnamdang vek) chuanna chu Sateek khaw dai khawngthlangah tlan liamin a chesuala, a hmunah mi 2 an thi-a mi 7 dang te natakin an hliam.He chetsualna hmun hi Sateek khaw chhim lam, khawchhung luh hma lawkah a ni a, a awihin a chhengchhe hle a, kawngthlang feet 200 velah motor hi a in sawh bung hmawk a, a number pawh hriat theih loh khawpin a chhe hneh a ni. Mi chuang zinga 7 te hi an na hlawm hle a, biak tlak an awm meuh lo. Truck hian a lumna tawp a thlen hmain mi chuang te hi a vawrh chhuak vek a, tumah che theilova engemaw chen an awm hnuah an zinga pakhat chu hliam na tak tuar chungin kawngpuiah a vak chhuak thei hram a, an chetsual thu hi midangin an hre ta chauh a ni.

19th. Monday : Arsenal Mizoram Supporters Club (AMSC) chuan Krismas thilpek atan a mamawh apiangte tan tiin an thisen hlu tak chu Civil Hospital Blood Bank ah an pe a. Member 26 te kalin mi 17 in an pe thei a ni. Member dang hemi ni a pe ve hmanlo te pawhin pek zel an la tum thu an sawi.

20th. Tuesday: Reuben Lalramhlimpuia s/o K.Vanlalsawma, Govt Complex Aizawl nia insawi chu Vairengte Police Checkgate duty te chuan a bike in vawi engemawh zat Vairengte Police Checkgate a paltlang avang leh ruih nei nia hriat anih avangin ringhlelin Lailapur lam pana a tlan chu lo check in, polythene bag, a chhunga pawisa thahnemtak a ken chu an hmuchhuak a, hetianga ualau taka pawisa thahnemtak a ken leh amah hi Vairengte Police te chuan thu zawhfiah turin an la ta a ni. Police hnena a inpuan danin heng a pawisa kente hi Vairengte a Seipuii Hotel neitu Thangseii pawisa a nih thu leh mi tumah an awmloh hlana luta bedroom kawngkhar inkalh chu chemte leh hmanraw dang hmanga karchhia a chhunga pawisa lo awmte chu la ta niin a insawi. Heng a pawisa ruk Rs 2,62,800/- lai a ni. Rukru mawl takin a rawk a nih hlauh avangin Pi Thangseii hi a vannei hle a ni. Chuti nilose a chan der mai tur a.

21st. Wednesday: Governor, Vokkom Purushothaman chuan Raj Bhavan-a thawkte pualin Advance Christmas a buatsaih a, thingpui ruai an theh. Larsap chuan, India ram chu sakhua zawng zawng intluktlânna ram a ni a, sakhuate an sakhuana leh rinnaah inngaihhlutsak a tul thu sawiin, “Isua Krista pawh mi zawng zawng tan a lo kal angin, mi zawng zawng tan malsawmna ni turin tan ila zel ang u,” a ti.

22nd. Thursday: Mission Veng-a Er. C. Lianlunga Garage-a dah scooty MZ01 F 9235 chu Tv. Jacob Lalrinchhana s/o PC Sawma, Aizawl Venglai-a mi chuan gelatin bomb hmangin a bomb darh vek. He bomb puak hian scooty hi a bomb chhiat hneh bakah a bul hnai in darthlalang te a tikeh nasa hle bawk a. Scooty darh hi a leng nasain vanneihthlak takin a bul hnaiah mi an awm lo hlauh a ni. Mission Veng YMA North Branch chuan hetianga Veng chhunga thlamuang taka Krismas hmuah a nih mek laia Veng chhung nu leh pa, tar chak lo zawk te tithlabar thei ang ber tura hetianga mi dawihzep leh nunrawng thiltiha Jacob-an a rawn ti hi an dem tak zet a. Hetiang hi thleng tawh lo se an duh hlein thuneituten a phu ang ngeiin rorelsak se an duh hle tih thuchhuah siamin an tarlang.

23rd. Friday: Chhinga Vengthlang Br. KTP chuan Aizawl Bazar atanga tanin kawngpui dungah thingpui leh a hmeh tuihnai tak an sem a, member 100 zet an thawk chhuak a ni. Hetiang hian kumtin Dec 23 zanah hmun hrang hrangah hun an hmang thin.

24th. Saturday: Aizawlah kg khat rau ruaah Uisa man a to ber; Aizawl New market-ah kum dang ang bawkin Uisa hralh a kal leh hle a, vawiin pawh khan pum 10 chuang an hralh. Kg-ah cheng 250/- a ni. Hetih lai hian Mizo inchai chak ber lo ni tawh Saidingliana Sailo chuan, “Ui sa hmanga thil lawm reng rengin hlawhtlinna a thlen ngailo,” a ti.

25th. Sunday: Khawvel hmun hrang hranga Kristiante rualin Mizoramah pawh hlim takin Krismass lawm a ni. Krismass hi Lal Isua keini misualte tlan tura a lokal na lawmna ni a nia; he ni hi Rom ramah AD 335/336-ah hman ṭan a ni a, Mizoramah chuan Zosap Missionary Zosaphluia leh Zosapthara te hovin kum 1903 khân Mission Veng, Aizawlah hman ṭan a ni thung.

26th. Monday: Brig. Ṭ. Sailo Chief Minister nih lai P.C Sorkara Nominated MLA ( 1979 leh 1984 inkar khan Nominated MLA a nia, khatih laia PC Ministry khan Bru Minority Community aiawhin ruat seat-ah a dah a ni ) lo ni tawh Pu LLalzirliana chu Aizawl , Ramhlun North a an chenna inah a thi. Kum 65 a upa a nia, a nupui leh fapa 2, fanu 1 leh tute a thih san. Pu V. Lalzirliana hian hun engemaw chen atang khan zunthlum natna a veia, hei hi a zual zel avang leh natna dang kaihhnawih a neih chhoh zel avangin a boral pui ta a ni.

27th. Tuesday: Zemabawk Zokhawthar kawngah Taxi Mz-01/F 6848 chu kawngthlangah a back liam a, Taxi-a chuang mi 5 zinga 2 ten hliam an tuara, hliam pakhat hi Synod Hospital Durtlangah dah a ni a, pakhat chu Civil Hopital-ah admit a ni. Taxi hi kawngthlangah feet 30 vel a lum. He Taxi hi R. Vanlalruata Zemabawk ta a ni a, a ma khalh a ni.

28th. Wednesday: Vairengte Excise Check Gate Duty ten Truck pahnih atangin Sapzu um puitling um 640 leh Zu anga Lehkhakhawng bawma Pack vaivut hlang Case 6 hmuchhuakin, Zu hi an man zui. Zu neitu hi Maliana Aizawl Dawrpui venga cheng nia insawi a ni a, Zu phurtu Truck Driver hi R. Laldawngzela Kawlkulh Chhimveng a ni a, Aizawl thleng phurh man cheng sing 2/- it vanga phur niin, a phurtu Driver hian a insawi.

29th. Thursday: Parlianmentary Secretary Pu S.Laldingliana chuan kum 39 chhunga Lunglawn khaw awptu lal pathum heng: Lalchhunga Zadeng, Manchiauva Zadeng leh Tawnluia Zadeng te hriatrengna lungphun a hawng.

30th. Friday:Lunglei Excise & Narcotic Dept. te chuan Rakzu litre 590 an man a; heng Rakzu te hi Maruti Van leh Santro Aizawl lam Register hmang in phurh a ni a, Rakzu neitu a puh te hi Parthauvi, Venglai Lunglei, Lalnunmawii Venglai Lunglei, Lalpanliana Tuirial, Lalbiaksanga Tuirial leh Lalhmachhuana Phunchawng te niin thubuai siamsak nghal an ni a, heng Rakzu an man te hi Lunglei Tualchhung rate chuan Rs. 236,000/- man hu a ni.

31st. Saturday: Kum 2011 kum tawp ni a nia; mi tam takin kumtawp intihhlimnate neiin hun an hmanga; tlaiah kumhluia ni tla hnuhnung ber an venga tlang sang lai aṭangin an thlir liam hlawm. Kohhran lam pawhin kumin chhunga an hun hman dante tarlan pahin an member pui mual liam tate sunna hun an hmang bawk.

KUMTHAR CHIBAI

Similar Posts:

• Population of Nine biggest Churches in Mizoram
• CBI to probe the death of Rev Chanchinmawia
• MCS 2012 Final Result
• Mizoram Liverpool fan club in registration tifel
• Smoking zone

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Sunday, January 1st, 2012 at 10:00 am and is filed under Information. You can follow any responses to this entry through the RSS 2.0 feed. You can leave a response, or trackback from your own site.