Thupuiah “Mahni Inhriat Chian” ka’n ti hluai tak na a, mahni inhriat chian loh zia thu lam a ni zawk mah awm e. Mahni inhriat chian hi engti ang chiahin nge kan ngaihpawimawh hlawm tih lam erawh chu mahni ngaihdan dan ni se. Engpawh nise mahni inhriat chian hi thil awlai tak chu a ni lo tawp mai.
Kan Lal Isua meuh pawh khan, “Miten tunge a ni mi tih?” tiin a zirtirte hnenah khan a zawt ve hial a nih kha. A theih ang chin china mahni inhriat chian hi a pawimawh hlein ka hre ve thin. Kawng liin i han thlur dawn teh ang.
1. Inhawngsa/lang tlang nghal (open):- Han inhmuh phat atang hian thupbo theih miah loh leh lang tlang nghal mai keimahniah hian a awm tlat a. Chungte chu- pian hmang leh ruangam ( len leh tet, san leh tawi), vun rawng (hang leh ngo), sam (kir leh ngil, tawi leh sei, a dum leh a buang), mitkalh, hakuh, khuptuah, hnar bawng leh ngul sei, pian nalh leh hmeltha adt. Hetia han inhmuh thuak emaw, ngun taka inen chet chet emaw pawha inthup ngaihna awm miah lo, lang tlang nghal vek mai hi ‘open’ an ti thin.
Kan pumrua leh sakruang lan dan te hi thupbo tum ta ila a buaithlakin a hah thlawn thlak ngawt ang. Amaherawhchu keimahnia inhawngsa (open) hi thup theih a ni chuang lo tih avangin siam that theih loh vek chu a ni bik miah si lo. Eg: Hmeltha lem lo pawhin seih (smile) a ngah chuan a kianga awm a nuam a, a hmel hmuh a nuam nge nge thin. Chuvangin siam that theih loh tam tak awm bawk mahse, siam that theih tam tak a awm tih chu a chiang hle tho a ni.2. Mahni kan inhriat loh (blind):- Mihringah hian mahni kan inhriat hauh si loh, miten min hriat ruk kiau mai si a awm tlat a. Kan tleirawl lai chuan, ‘I sawi zawngin i nihna a lang’ tih kha kan uar khawp mai a, khati ang deuh chi kha a ni awm e. Kan hriat hauh si loh hian kan chetziaah te, kan thiltihah te, kan thian kawm duh zawngah te, kan eizawn duh danah te, kan mit men dan atang ringawt te adt.
A tawi zawngin kan expression lama lang chhuak kan hriat phak miah si loha midangin min lo hmuh ruk khiau si hi a ni ber mai. Pathian Thu sawi thiamte chuan, ‘Ka unau, i pharna lai tak, i inhriat hauh si loh kha, miten an hmu a, an ten em em che a, i inhre der si lo. I hnung lam atangin an nuihzat che a, i thusawi engahmah an ngai lo a, i insiam thata i sim vat loh chuan i tan a la pawi lutuk dawn’ an tih ang chi hi a ni. Kan hla pakhat chuan, ‘Miten min chhiar, min thlir reng e. Ka awm dan zawng zawng min hai lo’ tiin fimkhur turin min chah mawlh mawlh reng a ni.
He thil hi mihring khawsak honaah pawh kan insiam that ngai lai ber leh pawimawh ber a nih tehlul vei nen, mahni kan inhriat phak loh thil a nih miau avangin, Pathian Thlarau Thianghlim zara nitin hriattirna thar dawnga kan chang chho zui zel a nih loh phei chuan, mihring finna hian a tlin lo a, a daih ngang lo a ni. Chuvangin Thlarau Thianghlim hruaina kan mamawh hle reng a ni.
3. Mahni inhriat ruk khiau (hidden):- Tuman min hriatpui phak loh leh hriatpui pawh kan duh ngai reng reng loh tur leh, tuman min hriatpui ve miah loha thlanmuala luhpui thak ka duh zawk tur tam tak keimahniah hian zu awm kuh tul hlawma mawle!!
Miin min hriat sak vaih chuan min hua ang, min ten mai ang, min ngainep anga kan chhe vek mai ang, khua kan hawi ngam lo ang adt. Pathian Thu sawi thiamte chuan, ‘I thinlung lei khek kha let rawh. I thinlung leitha khan Chanchin Tha dawngsawng la, i thinlung chhungril berah khan Isua luh tir la, tahchuan lo Lal ber rawh se’ tiin an sawi thin awm e.
Mahni kan inhriat ruk khiauna hmunah hian Pathian kan pawl tur a ni tlat mai. A chhan chu A hmaah chuan saruak leh inhawngsa kan ni miau a, engmah zep leh thupbo theih a ni tlat lo. Kan sual zep ruk emaw, hriat loh vanga tihpalh thil thua ka tih emaw pawh nise, miten min hriatpui kan duh loh thil a nih phawt chuan, min chinfelsak theitu tumah dang an awm chuang lo tih hre rengin. min chinfelsak theitu kan Pathian hnenah kan hrilh mawlh mawlh mai tur a ni. Hrilh satliah chu a ni hauh lo, thinlung leh tih takzeta Pathian hnena intuk luh tur tihna lam zawk a ni.
4. Hriat phak loh (unknown):- Pathian thilsiam ropui zia leh mihring min siam dan phung danglam tak mai hi chhui fiah sen rual a ni awm lo e. Pu Chawngkhupa pawhin, “Mihring mihrinna hianin a ngaihtuah chhuak zo lo…” a lo ti ve thlawt reng a ni. Mifing leh mithiam ber ber te pawhin thil an hriat tam zawh poh leh an la hriat tlem zia an hriat belh lek fang a ni mai.
Mihring taksa khawl ropui zia leh thluak hnathawh ropui zia ringawt pawh hi kan la hre tlem hle chung pawh hian ngaihnawm tak chu a ni. Vanthengreng (space) ropui zia leh teh phak rual loha a zau zia te, tunah pawh minute tin maia arsi thar la insiam ut ut reng niawma mithiamten an sawi te hi a dik a nih si chuan, a makin a ropui lutuk a, kan va hre pha ve lo chai chai em!
Pathianin mak danglam taka a siam kan ni a, Davida chuan, “Mihring hi enge maw a niha, i hriat reng thin ni…Ani chu Pathian aia hnuai deuh chauhin i siam a..” (Sam 8: 4,5). a lo ti hial reng a ni. Mihring chu Pathian aia hnuai deuh chauh a nih chu! Mithiamte chuan, ‘mihring hian a theihna 14% vel chauh a hmang phak a ni’ an lo ti ve reng a ni. Pathianin mihring min siam dan ropui zia hi kan hre pha lo nasa hle a ni tih hria ila, tumah i inhmusit ngai hauh suh ang u.
Tichuan thupbo theih loh, lang tlangsa (open) keimahniah hian a awm ngei a. Miten min hriat ruk keimahni kan inhriat phak meuh si loh (blind) a awm bawk a. Tin, tuman min hriatpui phak loh, keimahni kan inhriat ruk kar (hidden) a la awm cheu a.
Chubakah mahni kan inhriat phak loh, midang pawhin min hriatpui phak reng reng loh, thlarau khawvel leh he kan chenna khawvel leh vanthengreng zau lutuk hriat phak rual loh (unknown) a la awm bawk a ni. Heti hi a nih avangin khawvel lam finna thil a ni emaw, thlarau lam hriatna thuk leh ril zawk a ni emaw, nang leh kei hian hriat phak loh kan va la ngah tak em! A hre tam apiangin an hriat loh zia an hria a.
Chuvangin miin hre tura a hriat loh zia tal a hriat hmasak phawt loh chuan, a hriat loh zia pawh a hre phak ngai lo ang a, a hriat tur tak phei chu a hre pha ngai hauh lo ang. Chapo khawpa tlang sang tur tunge awm?
Similar Posts:
- Nupa nun hlimna tur atana zawm ngai thenkhat te.
- Mahni in X-Ray nan
- Pathiana mihringte dinhmun;
- Pathian Chungchang
- Hmangaihna.. Beiseina.. Rinna..
a tha khawp mai
January 6th, 2012 at 9:02 pm
Inhriat chian tih hi zawm ta la, consciousness/awareness tih vel nen a thuhmun chiah angem aw. I tum a nih zawk hmel deuh em ka ti mai mai.
Entirnan, Gospel tih hi Chanchintha, Good news erawh chanchin tha.. Chanchintha leh chanchin tha hi a danglam daih thei ania.. Good post.
Report this comment
January 6th, 2012 at 9:03 pm
Chhiar nawn fo chi anih hi
Report this comment
January 6th, 2012 at 9:13 pm
Ka chhiar nawn leh nghal sak teh ang..
Report this comment
January 6th, 2012 at 9:13 pm
weeee! a va ngaihnawm leh si em
Report this comment
January 6th, 2012 at 9:24 pm
Mi thenkhat mahni nihna tak aia indah sang te, mahni theihna pholang theilo khawpa indah hniam te hi awm theih a ni. Mahni inhriat chian hi thil tul tak a ni awm e. Hmasawn zel tur chuan mahni phaktawk ah sang deuha goal set thiam a tha awm mange aw…te ka tia.
Post tha e.
Report this comment
January 6th, 2012 at 9:25 pm
A van tha em! Mahni inenfiahna’n a tha ngei ang.
Hetia en mai a kan lan ang hian kan chhungril nun, hidden life nen lang nghal vek ta mai ila chu a manganthlak dawn emai. Buh tak leh a lem chu Pathian in a hrevek alawm ti mai ang.
Report this comment
January 6th, 2012 at 9:27 pm
boihapa nge nge, a ril leh raih mai. Mahni inhriatchian leh Mahni rilru inhneh hi a tul khawp mai. Bible in “Khaw zakhat la tu aiin a tha zawk” a tih hial kha.
Report this comment
January 6th, 2012 at 9:32 pm
I nun a bengchheng lutuk a i tawng ka hre thei lo tih emaw ni kha ka ni ve ang tih ka hlau!!
Boihapa chu i ziak tha hle mai. Mahni inenfiahnan ka lo hmang ang e…
Report this comment
January 6th, 2012 at 9:34 pm
a van tha em em….chhiar a a manhla khawp mai…
Report this comment
January 6th, 2012 at 9:39 pm
Mahni inhriatchian loh chuan hnunglam atangin mi in min nuih duh.
Report this comment
January 6th, 2012 at 9:40 pm
Pahnihna intanna khi 1 na para tawp berah an zep tel daih mai. Han siamthat sak teh u khai.
A ngaihnawm khawp mai… a dik reng a ni hairehai
Report this comment
January 6th, 2012 at 9:41 pm
“Kan Lal Isua meuh pawh khan, “Miten
tunge a ni mi tih?” tiin a zirtirte
hnenah khan a zawt ve hial a nih kha.”..
kan Lal Isua Krista hian a inhriatchian loh vanga a zawt ah ka ngai lo bur!!
A dang zawng chu good post.
Report this comment
January 6th, 2012 at 9:43 pm
Mite min hmuh dan leh hriat dan hi kan nihna a ni tlangpui reng a ni. Mahni kan inngaihdan hi kan nihna a ni lo tlangpui bawk, tiin kan tuihnih ve teh ang.
Post tha tak a ni e.
tren tren.
Report this comment
January 6th, 2012 at 9:48 pm
#12 Ka sawi tum a rawn sawi chhuak
Isuan a zirtirten an hriatdan leh mite hriatdan a hriat duhna chhan kha chu kha leh chen rawng a bawl tawh hnu ah, a hun tawp lamah, khawvel a chhuahsan dawn hnaiha a zirtirte leh a rawngbawlsaka te’n eng angin nge an hmuh tih a hriat duh vang zawk a ni.
Mipui tam zawkin an la hre diklo zuia, a hre dik ber/chhang dik ber Petera chhanna pawh ama hriatna nilovin Thlarauthianghlim hriattir a ni a tih sak daih. A thih thleng khan Isua hriatna dik tak tumahin an nei lo
Report this comment
January 6th, 2012 at 9:51 pm
#14 arsi bel khat ka hlan a che i hming tawp ah
Report this comment
January 6th, 2012 at 9:57 pm
Thufing pakhat
“I mizia i hriat duh chuan nangmah i in hmuh dan nilovin, miten an ngaihdan che nilovin, eng angin nge miten an ngaih che i rin tih in zawt rawh”
tih hi hman deuh khan khawi atangin emawni ka hriaa dik ka ti angreng.
Report this comment
January 6th, 2012 at 10:08 pm
Asteric, i thil hriat khi ka sawi ni awm taka tha ani e.
Report this comment
January 6th, 2012 at 10:11 pm
A va tha em! Rilru a vawn reng chi nih hi
Report this comment
January 6th, 2012 at 10:13 pm
#17@Sãñgpüîípã….I sawi ka lo Quote hi nilek zawk ange
Report this comment
January 6th, 2012 at 10:17 pm
Ka la chhiar lo. En thuak thuak a, thiante comment nen en thuak thuak leh a, ‘post tha tak a ni’ ka ti ve ngam sak. Ka’n chhiar nghal te’ng.
Report this comment
January 6th, 2012 at 10:25 pm
Hehe, Aste, i sawi a ka hre ve chauh tak tak.
Report this comment
January 6th, 2012 at 11:24 pm
Thil fiah nghal kuk, i ziak kual sei thiam mang e…
Ni e, tumah mahni inhrefiah takzet hi an awm theih tak tak ka ring lo.
Report this comment
January 6th, 2012 at 11:41 pm
Nia a, i sawi kual nasa ang reng, a dik ka ti viau tho nangin. Post tha tak a ni e
Report this comment
January 6th, 2012 at 11:54 pm
Mahni inhriat chian leh lutuk hi chu a zahthlak duh em mai..tlem tlem chauh a inhriat chian chi zawk
Report this comment
January 6th, 2012 at 11:58 pm
Good post.
Report this comment
January 7th, 2012 at 12:03 am
#26@lrpa…I sawi dik tlat
Mahni kan inhriat chian lutuk hian kan famkimloh zia kan hriaa, chutiang chiaha midang famkimlohna kan hriat leh si loh avangin kan inthlahrungin kan dawih zek duh a sin. Lei chhuah chungin rawn sawi mahla ka support che 
Report this comment
January 7th, 2012 at 7:52 am
E he! Ka rin aia hmain a lo chhuah tlat chu!
Conmment ka chhiar chhuak vek a, a mal mala respond pawh a chakawm khawp mai. Engpawh nise in zavaia chungah ka lawm tak zet a ni.
Asteric, Isuan, “Miten tunge a ni mi tih?” tia a zawh chhan tawite i rawn sawifiah hi ka pawm dan leh, mahni tawka ka lo chhui ve chiam tawh a ni nghe nghe asin. I rawn sawi lang a, a tha khawp mai. Mahse tun tumah chuan ka luh chilh tum lam a ni rih lo zawk mai mai a ni. Remchangah ka la rawn luh chilh maithei.
HV-a min ngen sakna paragraph hrana tan tur, point 2-na khi Admin ten min ngaih pawimawh sak thei ula ka ti viau mai. Tin, chemtatrawtan ‘Inhriat chian hi ziah zawm ni ta se’ tia a sawi khi erawh chu, ka ziak dan khi dik zawk turah ka’n ngai zawk deuh a, Saptawng nena khaikhin remchang tak leh rem chiah lo tawngkam kan nei nualin ka hria. Eg: Conscience tih hi kan tawng chuan- Chhia leh tha hriatna tih a ngai duah mai. Engpawh nise ngaihtuahna thar chu min siam sak tho tho e.
Sawi leh sawi hnu mimal taka ka chhan let vek sen loh che u avangin min hrethiam teh un.
Report this comment