Vai velhnaah ka la tel lo va, tualthattu leh pawngsual chîlnaah ka la tel hek lo. Tel lo mah ila, ka Mizopuite’n tun kum sangbi thar, IT khawvela kan chuankai hnu pawha an la kalsan theih miau loh avangin ka inthiarfihlim bik thei lo. Vai ka velh ve a ngai; Burma mi ka hnawhchhuah a ngai!
Vai vel ang!
Kan kut hi a va han za ngawih ngawih tak em! Kan kuttum hi hnam dang lakah kan va han chhuang tehreng em! Khawi emaw lai vai pakhatin Mizo nula a pâwngsual a, vai zawng zawng vaihma vek kan tum ta mai ṭhin. Hei hi pawngsual kan duh lohna ngawr ngawr ai mahin vai kan huat vang hrim hrim a ni lo’ng maw?
Eng vanga vai hua nge kan nih? Mizoram buai laia Mizo mipuite chunga vai sipaite chêt dan ràwvâ lutuk hrinah kan puh lo thei lovang. Hei hian Mizo mipuite-ah thil ṭha lo tak a hnutchhiah niin a lang. A nih loh vëk leh, kan rama hna hnuaihnung ber bera kan ngaihte thawktu an nih vang a ni ngei ang. Hemi vang a nih ngat chuan ram intodelh chu khawi lam riangvaiah! Mi hausa chapo hlir bak kan inkhawi chhuak lovang.
Tichuan, chu’ng thil te chuan kan kut tha hi a tiza ta zek zek mai a; pawisawi lo thleng thlengin an tuar a, phuba diktak chu kan la chho mek a nih hi. Mahse, heti chung hian kristian 100% kan la inti! Kristian 100% ni-a inchhal tan chuan Deuteronomy 32:35 kha kan hre reng tur a ni ringawt.
Tin, a tu-a te mai pawh hian dân hi kan pawisa lo. Roreltute’n an lekkawh ṭha tawk lo va, mipuite’n zawm kan tum hek lo va; zawm hi kan tihmakmawh a ni tih pawh kan hre lo. Keimahni-a rorel kan tum a, keimahniin thubuai rem kan tum ṭhin; khu’ng an ramah NE mi tiin min hmusit em em a, a haw hlei hleiah kan ṭang ta dah a. An tel lo lahin kan awm thei der si lo.
Kan inenfiah deuh chu a ngai e. Vaipain thil a tisual a nih chuan, thil tisualtu chu kan manchhuak a nih pawhin roreltute hnenah kan pe mai tur a ni. Vai kan haw lovang a, thil tisualtu kan haw zawk tur a ni.
Burma mi hnawtchhuak ang!
Eng kan ti nge, khawchhak lam mi Burma mi tiin kan hmusit em em a! An inbualna thlî in mai mai kan nih hi! Awmpui tur kan duh a, kan zawn beidawn hnuah Burma mi tal pawh tiin kan la au kan la au a ni lo’m ni? Kan thinlunga Burma mi awm hi bo tawh teh se!
Burma aṭanga lo chhukthlain tual a that a, a lo chhukthla zawng zawng hnawhchhuah kan tum hnuhnawh a! Dân lova lo lut an nih chuan tual an thah hmaa hnawhchhuah mai tur. Kan hmusitin kan diriam em em a, ṭhenkhat lahin an ‘Burma mi’ nihna avang hrim hrimin kan lo hnuaichhiah ve em em ringawt a. Inenchiang teh u!
Inlaichinna lama thlir paw’n i thlahtute an ni a, i unaute an ni. An awmna lah chu kan pi leh pute lo chèn hrep tawhna hmun a ni. A awmzia chu — chuta ṭanga Mizorama chhukthlate’n kan chhukthlaksana te kan hmusit tihna mai a ni. Kristian inti chuan I Johana 3:15 chhiarin hre mawlh rawh se.
Tu paw’n thil lo tisual ta se, a nihna vang ni lovin a thil tih avangin i haw zawk ang u. ‘Burma mi-in tual a that’ ti-a chîlhlum nghal mai tum lovin, ‘Misualin tual a that’ tiin man ila, roreltute hnenah i pe hmak zel zawk mai ang u.
Mi chîlhlum te hi a ṭhing tawh lutuk!
Similar Posts:
- …tual tual…
- Mizoram ah Burma mi nih a vanduai thlak khop
- Kerh Kerh…
- Aw Zoram, harh rawh; harh lul rawh!
- Mizo ka ni lo.
:-D
:)
January 20th, 2012 at 9:59 pm
Tuaite, username ka thlak lova, display name publicly chiah ka thlak. Mahse maw, Arsi neilo pawh hian ka lung hi an awi khawp a
Report this comment
January 20th, 2012 at 10:05 pm
@Sheldon: Nick atana pawh username hmang lo hi a nih ka ring a. Pawi tih thu-ah chuan arsi awm loh hi pawi ka ti teuh lo mai!
Senior leh junior inkarah gap a siam ang tih ka hlauh vang zawk a nia.
Report this comment
January 20th, 2012 at 10:20 pm
Vawikhat chu Vai kutdawh kan inah a rawn dak a, “Khaw’nge i ILP?” ka lo ti a, a ni lah chuan, “Keimah kutdawh maw le” ti chiahin min chhang a, ka rilru te tein “Dikna a fam ta” tih hla ka sa zui a. Lei laih leh cement chawh te hi kan thalai te hian engtikah tak peih ve ang maw!! Kan hnam hi a ral tep tawh lo maw..?
Report this comment
January 20th, 2012 at 10:31 pm
Mizo, vai, sap, burma mi, etc. eng mi pawh nise, pawikhawihlo chuan tuar suh se. Hemi kawngah hian mizo ho pawh kan harh/fing tial tialin ka hria, hma pawh kan sawn zel ang
Report this comment
January 20th, 2012 at 10:33 pm
@Sofloy: Nu leh pate thawhchhuaha kan khawsak theih chuan thawh kan tum lo va, mahnia intodelh hi kan tum bulpui ber a ni lo thin atin ni. Hetiang mi hi thalai zingah kan tam lutuk a, a buaithlak a nih hi. Kuthnathawh (cement chawh etc.) hi loh theih lohvah chuan kan tum tlat lo va. Kuthnathawk lova eitur nei lo, thawk peih si lote’n ruk an ru a. Hetiang hi mi tam tak kan la ni e.
Report this comment