He post hi ka urlawkna a rei ta hle mai, nikum October thla atang tawha ka rilrua awm a ni ve a. Ka ziak famkim seng lovang tih ka hlau deuh a, ka ziak lawk duh lova, mahse thiam ang tawk tawkin ka ngaihdan ka rawn khawrchhuak ve mawp mawp mai teh ang.
Pu Mzvision te hma deuh anih avangin han ziah pawh hi ka insit deuh rum rum e a. K’u Zualbonez-a fuihna avangin comments lam erawh ka rawn vil ngun thei ta vak lo che u anih pawhin inhriatthiamah kan ti mai aniang chu.
Tunlai khawvel changkang zelah hian Thuneihna pumhlum hmawm te, hmunkhata dah nghuk te hi khawvel hian a kalsan chho zel a. Hmanlai Rome hunlaia thuneihna leh engkim Rome khawpuia a awmlai kha chuan hmun pakhat kha a ropui em em a, amaherawhchu Rome Ram ropui tlukchhiatna bul ber a ni tih i hre thar ang u.
Khawvel mithiam leh zirmite chuan “Thuneihna semzai”, ” Decentralisation and Devolution of powers” hi ram than zelna leh inlungrual taka pheikhairual taka ram a than theihna tura tihmakmawh niin an ngai a. Kan Hnampa, Pu Gandhi-a pawh khan he thu hi a tlangaupui nasain, tunhnaiah pawh India chu helam kawngah hian a ke a pen nasa hle a ni.
Mizoram lam i lo thlir teh ang. Mizoramah chuan eng pawh ti dawn la, Aizawlah kal a ngai vek mai hi state thenkhat kan dinhmun hrechiangte chuan min nuihzat tan tawh anih hi. Aizawl an rawn hmu a, sawrkar hmun lian zawng zawng AIzawl khawchhungah rem leh rem lovin an in zep tit tet a. Heng office dahna atan hian Mizoram hmun dang hi a laktlak loh em ni ang??
A hnuaiah hian Mizoramin thuneihna kan semzai theih dan tawitein kan ngaihruat ve chhin a. Post a sei lutuk loh nan tawitein in chinglet ve mai mai ang aw.
1. Aizawl District hi kan administrative capital anih avangin administration lam dept zawng zawng hi chu an awm ngei ngei a ngai a. Chuvangin, state administration khawih tur dept chu Aizawla a awm hi a tul ngei ang. Tin, Aizawl district hmar chhak lam, Manipur border ah hian MAP battalion khat hi dah theih ni bawk se kan border issue hi a fel deuhin a rinawm.
2. Kolasib District hi kan Zoram kawtchhuah a ni a. Helai bawr vel hi Hel pawl hrang hrang leh hnamdang rawn lut ru an tamna tak pawh anih avangin Home Dept hi helai hmunah hian in kulh mup mai se Zoram tiralmuanglotu tam tak hi chu a reh huaiin a rinawm.
3. Serchhip DIstrict hi kan ram neih thatna hmun tak a ni a. Thenzawl, NOrth Vanlaiphai leh hmundang tam tak hmun rem tak tak a awm avang hian Agriculture Dept hmunpui hi kawl se kan ram hian hma a sawn awk ang. Tin, he dept hian Sericulture, Animal husbandry and Vety lam hi kawl tel ngei bawk se.
4. Champhai District hi kan “Land of the rising sun” a ni a. Burma lam atanga sumdawnna pawh hi a lian hle a, chuvangin Trade and COmmerce, Taxation Dept hian thutchilh se la, helam atanga ruihhlo lakluh a nasat bawk thin avang hian Excise and Narcotics pawh hian hmun bengbel se a tha hle ang.
5. Saiha district lam hi thalai an tha a za zek zawk a, infiamna lamah pawh Zoram an al hneh hle. Heng ho hmalakpui tur hian Sports and Youth Affairs dept hi sawn ta se hma an sawnpui ngawt ang le. Tin, thintlang hmun kilkhawr an ngah avang hian Social Welfare dept pawh hi chang ta se District dang zawng aiin an hlawkpui ngei ang.
6. Lunglei District hi a laili tha a, hmun hrang hrang hi a pawh vek theih avang hian Health and Family Welfare lam hian an hmunpui hi bun se Zoram hmun hrang hrangah hmalak a awlsam phah ngei ang, chumi thlawp chiah tur chuan DIsaster management and Rehabilitation pawh hi chang bawk ta se. Tin, Education lam- Higher and technical leh School education hi chang ta bawk se, Zoram hmun hrang hrang hian hma a sawn angem? Tin, Urban Development and Poverty Alleviation lam hi chang ta se, changkanna hi semzai a ni deuh thei ang.
7. Mamit District hi Tripura leh Bangladesh border nei an nih avang hian ngaihsak an phu hle. Cooperation, Rural development hi chang se an changkanpui hle ang.
8. Lawngtlai District hi Mizoram Economic capital tura ka hual lawk a ni a. Chuvangin, Finance leh trade lam hi chang se, tin Koladyne project avanga heng hmathlir kan neih avang hian Tourism Dept, Power and electricity, Fisheries Dept, Soil and water, Minor Irrigation, Horticulture leh Industries dept hi chang se Zoram bung thar kan kai takmeuhin ka ring a ni.
Engnge i ngaih ve dan le???
January 24th, 2012 at 2:39 pm
I lo chhiar ang u 🙂
January 24th, 2012 at 2:43 pm
Aw… duhthusam hi a takah chang vek thei thin se la a va nuam dawn em…te ka tia :-O
January 24th, 2012 at 2:45 pm
Good Post! I duhthusam hi hlawhtling sela chuan a tha phian maithei. Kawng tam takah erawh a buaithlak ve ngawt ang. Aizawl hmun hi Mizoram-ah chuan a awmna a laili a, thingtlang atang pawhin pan mai a awlsam. Chuvangin i han sawi tak ang khian, Bilkhawthlir atangin Sports & Youth Affairs Department hi dawr duh ta se, Saiha va kal daih kha a hautak lutuk! Tin, thil harsa tam tak a awm, ngaihtuah ringawt pawhin.
I thahnemngaihna a ropui, post ropui tak a ni e. (Y)
January 24th, 2012 at 2:47 pm
Tatrawt, i post hian aizawl milian ho pawi a sawi 😀
January 24th, 2012 at 2:53 pm
Mizo pawh awm loh na, thingtlang hmun kil khawr deuh deuh a missionary va tirh a, lehkha va zirtir hi a tha ka ti lo ve tlat. Nakin a kan tana la hnawksak thei anni. Hnah khawrin mulek a hring an tih kha. Ei lo fe fe chu in tam ang, mahse a pawi ka ti miah leu 😛
January 24th, 2012 at 3:05 pm
An tih loh dan tur chu sawi in a siak lo. Aizawl atanga sawn chhuah (transfer) hi thih hlauhvin asin an hlau hlur. Staff ho ten remti mahse minister berin CM thutna atnaga km 3 aia hla a thut a hlau hlur dawn a. Minister ber Aizawla a awm chuan Secretary/Commissioner, anni an awm chuan Deputy Secretary/Director/Under Secretary adt.
Anni hovin lo remti tehreng pawh nise heng department sawn chhuah in tumte atanga contract beisei ho ten an chelh tlat dawn bawk a. Politician hrimhrim hian Aizawl atanga capital sawn hi an duh dawn ngai lo reng reng. A chhan pakhat chu an hmingin emaw an chhungte hmnigin emaw real estate multi-million man an nei thap.
January 24th, 2012 at 3:48 pm
i vision ang hi tuna i post chhiar thei chin hi tumah kan dam thleng lovang. Kum 100 te a ral leh chuan kan harh mahna le..
January 24th, 2012 at 4:28 pm
Efficiency ngawr ngawr thlir chuan tun atanga rei lutuk lo-ah hian ministry/department/office hrang hrang hi physically-in khawiah nge a awm tih hi a pawimawh nep tawh viau zawk ang.
Delegation of power erawh hi chu a pawimawh em em rengin a rinawm. Chutih laiin power kan centralise tawlh tawlh emaw tih tur a ni lawi bawk si hi a thawipikthlak deuh. Minister thusawi pawhin CM hming chhama a credit pe tel lo chuan thu an sawi sei ngam tawh miah loh hi.
January 24th, 2012 at 4:37 pm
ehe Tatrawt i Post siam zawng2 a HIT vek nachungin hei zet chu ka LIKE hle mai a 🙂 Good Post
January 24th, 2012 at 4:38 pm
Post tha hle mai, ngaihtuahna i seng nasa. (Y)
Mahse, i rawtna thleng tur erawh chuan beiseina neih a harsa khawp mai. Kan ram hruaitute hi, an tu leh fa te’n thinrim takin an la dem ang tih bak sawi tur ka nei lo.. 😉
January 24th, 2012 at 5:12 pm
I ngaihtuahna ang hian thleng thei se la chuan mizoram chu a va ropui dawn teh lul em! Kum 25 chuang vel hmasawnna lama ka lo thansan tawh Chin state chuan min rawn umpha har mai thei a ni. Anni pawh khi kum 10 vel a liam meuh chuan kan chho en mai thei a ni. An tan kawl a En tan ta. I pem chho vek mai ang u hmiang.
January 24th, 2012 at 5:14 pm
A tha viau a, mahse tuna an awmna hmun theuh hi enge a that tawklohna, dahsawn leh sawnloh hi a inthlauhna tur a tam ang em ? Ngai-awh deuh reng chung si hian kan buai mai mai zawk thei ang em ? Research neih phawt te pawh a ngaih hmel .I ti ta sa sa a, a lehpekah helam hawi hi rawn vawrh ve leh thung la a interesting lehzual ngawtin ka ring.
Tunah chuan ngaihdan mumal neih a har ka ti, department dinhmun hriat ka nei tam lemlo bawk a, ka bo tlat. (Y)
January 24th, 2012 at 5:21 pm
Tangrual thiam hi a pawimawh dawn khawp mai. Kan ram futher hi a thim zawnga thlir chuan a thimmup mai niin a lang. Mi tak kan vang lutuk hian bei a tidawng hle mai. Ram hmasawnna kan sawi hi kan hmui chiah hian a thiam em em ringawt mai a ni. A taka hlawhtlin tir tumna kan nei mang tlat lo. A pawi thin ngawt mai. Post tha tak a ni.
January 24th, 2012 at 6:22 pm
Dik viau mai, mahse a practical tak chuan a la hla deuh viau mai thei, mahse he ti zawng hian kal thei ila a tha khawp ang.
Ram hruaitu tha leh vision nei tha kan mamawh sawt khawp mai. Aizawl a engkim mai a tawp tawp hi a tha lo a, decentralize lam pawh ni lo in state chhung a mipuite inthurualna/integrity a ti chhia a, chibing a vulh lian tlat ani.
Information technology a changkang zel a, office file leh engilo inhriat pawh zung zung a harsa lo zel a. Chhim tawp leh hmar tawp pawh kan inbe pawp zung zung a. Sap ram doctor te pawn video hmangin India ramah surgery an nei te pawh an tih kha..
January 24th, 2012 at 7:47 pm
Hypothetical viau mah se post hlu leh tha a ni!
A taka chantir chu a har deuh ang mahse hmathlir nei thei tura inruahman hi thil tul tak a ni hrim hrim.
January 24th, 2012 at 8:20 pm
Comment tam zawk atang khian a huphurhawm dan tur kan hmu tawh hlawm a. Mahse…
Mi tha leh fel tak, a ngaihna hre chung chuang, leadership neih tha bawk si, huaisen leh ram hmangaih rum ruut, a ram mipui te’n kan zah leh ngaihsan rawn em em … tu emaw hi CM ni ta se?
Kawng a kaw kuar mai lo’ng maw? Tuna ramin kan mamawh ber chu MOSIA ang kha a ni.
January 24th, 2012 at 8:53 pm
Hetiang lam leh changkanna tur kawng dang danga rawtna chhiar chang hi chuan rilru a hah duh. Kan ram hruaitu, politician leh officer rual hian an vei loh hmel hlawm si, nge an man pha lo zawk aw…..???? A tihlawhtling theilo lo hian kan vei ni berin a lang.
January 24th, 2012 at 9:51 pm
Tsa chiah hi kan chhang ange. Hetianga Dept hmunpui kan sawnkual hian Regional Office chu hmundangah an neih tho a tul dawn a, chuvangin sawrkar hmunpui kan sawnkual hian office dawr lamah harsatna engmah a thlenin a rinawm loh.
January 24th, 2012 at 10:04 pm
Hetiang lam hi sawi chak deuh chu a ngai a ni.(Politics a inrawlh chu ka ni em lovang chu maw? hehe).Ka thlawp fu mai. (Y)
January 24th, 2012 at 10:25 pm
Hlawhtling vek dawnlo mahse vision neih hi a tha. I vision khi ka thlawp vek lo na a.
January 25th, 2012 at 5:14 am
“Ngaihtuahna hmalam hawi” a ni e! Tha khawp mai! Hetiang vision tihlawhtling tur chuan Kawnga #16 sawi ang khian HRUAITU THA kan mamawh a ni ber mai.