mi(sual).com

Duhtak,

Ṭhalfavang ni eng no ruai mai chuan ralkhat tlang chu alo en sen no nghulh mai a. Romei zam chi chiai te chuan tlangdung tluan chuan an bawh chiai mai bawk a. Lung ti leng tawk chauh chuan murvate pawh chu vanchungzawlah chuan inchhaih tawn awr awr chungin in hlim takin tual an… lo chai ve rawl nen. Kawngpui sira naupang hlim taka infiam, au khek rawih rawih te nen pawh chuan an in hmeh em em mai bawk a. Amaherawhchu, chung leilung mawina leh hlimna te chuan ka mit an la zo tak tak lo a;ka beng an fah hek lo. Ka ngaihtuahna thinlung hi i luahkhat vek a; nang lo hi chuan hlimna hi min thlen tak tak lo zawng ani e.

Ani, chutia ding taka ka inngaihtuah zawh chuan, mumang ram aṭang chuan ka harhchhuak zawk a. Ka khawvel tukverh ve ka cabin tukverh chu ka khar ta a. Ka thinlung tukverh chu hawngin, nang nena hlim taka kan lendun lai nite chu ka ngaihtuah leh ta zawk a. Ka tan chuan hlimna i ni a, ka lawmna i ni bawk a, ka Hringnun hi i ni asin. Tunah erawh chuan ka khawvel hi tihthim in a awm a, ka nunna chhun engtu ber chu ka kalsan i ngai ta si. Ui beh rual i ni si lo. Dal rual lah i ni bawk hek lo. Ka beiseina leh ka suangtuahna zawng zawng te chu hmeh mih vek anni a, kawlkila ni a tla liam ang mai hian i liampui ta si a.

Thla hnih kalta-a kan hun tawng te ka han chhuikir ṭhin. Tun hun nen hian ava han inthlau em. Khang hunlai te kha nimin ang lek mah ni se tuna kan dinhmun nen han tehkhin chuan chhun leh zan a inthlau ang mai hi anni ta si a. Khang hunlai te kha chuan nang nen khan hlim takin kan lengdun a, tlai nitla te, ruahsur te, pangpar vulmawi tak te kha inkutsuih rial khan kan en dun a, kan hlimpui hle ṭhin anih kha. Hmangaih biahthu hlim takin kan inhlan tawn a, tudang reng kan ngaih bik thin loh kha. Inṭhen tawh lo turin thu kan intiam a, kha thu kan tiam dun laia i hmel mawlh kha, ka theihnghilh ngai tawh lo ang. I kawrfual var mawi tak mai i rawn ha a, kan inghahna ṭhin ngaiah min lo nghak a, i hmel ka hmuh apiang hian tihdanglamin ka awm ṭhin a; kha mi ni ngei pawh khan khawvel te hi a thar sur hian a hriat a, pangpar te hi an vulmawi bik a, thlifim lo thaw heuh heuh te khan hmangaih biahthu an keng tel asin. I hmui senno fawh chakawm tawk lek a lo sen hiam te, i biang tai tek te, i hnarngul sei ṭha tak leh zum van mai te, ani, i mitkhurte mawlh kha, tlemin khur thuk deuh mahse kha aia dar atan chuan ka it hauh lo asin. I hmelṭhatna hian min hip a, i duhawmna hian min phuar a, i zumzam hian min fan chhuak asin.

Mahse, mihringte hlimna hian kumkhua hi a daih zo lo fo ṭhin a,nge kan hlim dun lutuk khan Khuanu pawi kan sawi zawk? Engmah hre loa hlim taka kan lendun lai chuan natna in min tlakbuak ta si anih kha. Chu natna hlauhawm tak mai ‘Cancer’ chuan ka taksa ah bu a khuar tih reng kan hre si lo. Ka natna kan hriatchhuah ṭuma ka tana i mittui sen zozai te kha…….!!Ani, khami ni khan ka tan khawvel hi tih tawpin a awm asin. Kha mi ni khan ka lak aṭang hian lakhranin i awm a, duh lo hle mah ila ka tan chuan cho rual ini ta si lo. Ka hlimna te, ka Beiseina te, ka suangtuahna leh kan pahnih hmalam hun tur kan duan lawk zawng zawng te kha zing kan han ṭhangharh a mumang alo bo duak ang mai hian lak kian vek in an awm a, ka natna chuan i lak ata min ṭhen ta si a. Lengdun thei ziazang kan ni ta si lo. Aw!! A van na tak em… Khami ni ngei khan keimaha mihring mihrinna awm chu tihhlumin a awm a. Beidawnna a khat mihring ka lo chang ta. Chu Cancer natna ṭihbaiawm tak chuan ka nungchung ngei chuan ka hnuk min chhahsak ta si a. Beiseina in mihring a chhuahsan rual hian hlimna leh lawmna te hian mihring hi an hnuchhawn ve nghal a. An hmun ruak hnawh khat tur chuan Beidawnna chhum thim mup mai chuan manganna a rawn keng tel a, lungngaihna leh harsatna chi tinrengin rawn zui nghal in ṭahna ruamah min hnuk lut a; he Hringnun hi ‘Damlai Thlanthim’ a chantir ta asin.

Chu ‘Damlai Thlanthim’ chhungah chuan midangte hlimna hi lungngaih ti zualtu mai an ni a, mi dangte lawmna hian ṭahna min thlen si a. Ani, he ṭahna ruamah hian Thihna chuan thla a zar mup reng a, hawi velna lam apiangah chuan manganna leh beidawnna chhum dum hlup mai chuan min tuam vel a; harsatna namen lo tawkin lungngaihna chirhdup ah kan tang si ṭhin a. Hringnun hi ava han nunrawng tak em!!

Kha thla hnih kalta mai a hlim taka kan lendun ṭhin laia, duat tak maia ka chul heuh heuhna ṭhin che leh thlahlel taka ka kaihna ṭhin che ka kut chu ka han en leh ṭhin, lung reng hi a awi mawlh lo asin! Kha kut ngei maiah khan tunah chuan damdawi bawlhlo chi tinreng thun luhna turin hriau lian tak chu an vit bur a, ruhkawl mai chu vun cuan a tuam hi ani ngawt mai si a. Thisen zam lo pawng chhuak thliai thliai te chuan hlimna min thlen hauh lo asin. Ka hmai dang bei mai te chu ka han en a, ka mitkhur thuk tak mai leh ka lu damdawi min pek avanga ka sam te takngial pawhina an chhuahsan tak kawlh tul mai te han hmuh chuan hlim a va han har ṭhin em! He hringnun hi ka tan chuan ‘Tân in’ ani a. Damchhung ni te hi ‘Hremhmun’ an chang zo ta si a.

Ka dinhmun ka han ngaihtuah a; nang nena fanau maltluan chawi lo-a fam dairial ka chang mai tur hi a van na tak em. Duh leh hmangaih reng chung che a inṭhen a ngai ta si. Rei ka dam tawh dawn si lo. Keimah vanga hrehawm i tuar tur te, min lainatna vanga i mittui tla tur zozaite ka ngaihtuahin he thinlung hi tih kehsawmin a awm a, chemtea vih ang maiin a na ngawih ngawih asin. Tunah chuan i lakah hian phut reng ka nei tawh lo a. He taksa chaklo tak ti chak leh ka dangro char ti hnawm tura tui no khat te mai min suah sak pawh hian ka tan chuan a hlu a, he hringnun phurrit hi min chhawk zangkhai zawk ṭhin asin! He lehkha ka taksa khur dar dar chunga ka ziah lai ngei pawh hian ka beng bula zawi tea ‘Ka Hmangaih che’ i tih ri kha ka bengah a cham reng a, i hmel hlim nui seih khan ka mitthla hi an luahkhat a, engtikah mah an chhuahsan tawh lo ang a; ka thawk ve theih ṭek ṭek chhung chu ka theihnghilh tawh ngai lo ang.

Hun te a lo liam zel ang a, he ka taksa chau tawh tak hian ka natna hi a do zawh loh hun a la awm ang a. Thlan thim hnuaiah he ka taksa ṭawih thei hi zalh ala ni ve ngei ang. Chu hun chu tun aṭanga hun rei tak pawh ani tawh kher lo thei. Chutiang hun chu lo thleng pawh ni se min Siamtu hmu tur hian ka thlarau chu a inpeih a, ka chhung leh khat ka ṭhen leh rual te pawh kalsan turin engmah huphurhna ka nei lul lo e. Amaherawhchu he ka hmalam hun tur leh natna awm lohna hmuna ka len hun tur te pawh thlahlel hlei thei lo leh nghakhlel hlei thei lo a min siam a he taksa natna leh lungngaihna in a bawm khah luk mai damna thlahlela min siamtu leh min la chelh nung hram hram tu chu nangmah leh hmangaihna min lo hlan tawh kha ani asin. I hmangaihna hian nunna min pe hram hram a, mihringah min la chantir hram hram anih hi. Eng anga natna leh harsatna pawh tawk dawn ila,kan inṭhenna tur daltu anih chuan ka huam a, an sawi pialral ngei mai pawh hi i tello chuan a thlakhlelhawm lul lo asin.

He lehkha hi i chhiar hunah chuan he ka taksa hi chuan mihring chang zo tawh lo in thlan thim run chu a bel tawh zawk ang a, mahse hei hi lo hre reng ang che, i tana ka rinawmna leh ka hmangaihna che hi chu a dai ngai dawn lo a, piallei thima phum bo theih lah a ni hek lo. He khawvela hringmi kan chan chhung hian dal ruallohin harsatna ten min tlakbuak a min ṭhen in,hlimte in lengdun thei lo mah ila fam khawpui i lawi ve hunah pialralah hlimten kan leng dun leh ngei dawn nia…. Kumtluang atan mangṭha.

By: Tetea Kawlni

Inspired by:
Cancer – My Chemical Romance

Note: He article hi ka nau in an awm na a Mizo Magazine a chhuah tur a a pek a nia, ka rawn post ve mai mai a ni e.

Similar Posts:

• Ka vei reng thin che asin
• Hringnun(Chapter-I)
• Hringnun
• Thalaite u…
• Mi beidawng

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Wednesday, February 1st, 2012 at 11:00 am and is filed under Copy Paste, Luangliam, More than words, Music and lyrics. You can follow any responses to this entry through the RSS 2.0 feed. You can leave a response, or trackback from your own site.