mi(sual).com

Ziak leh chhiar thiam tehna-a a sang ber dawttu leh a sang ber dinhmun hauh thuak thuak reng state kan ni bawk a, lehkhabu leh chanchinbu pawh a state len zawng ngaihtuah chuan kan chhuah hnem kumtin ve ta khawp mai. Hmasawnna duhawm tak a ni e.

Chutih rual erawh chuan competitive exam lamah chuan kan state thenawm Manipur pawh kan la phak lo hle lawi si. Thiamna tak tak pawchhuak thei khawpa finna nei tur chuan tan kan lak a pawimawh hle mai. Sikula kan zirlai ringawt bakah hriatna (knowledge) kan dap peih a, kan in zir nasat a pawimawh. Zirna run ringawt atanga thiamna famkim pawchhuak thei nia kan inhriat chhung chuan kan thleng sang thei ngai lovang.

Khawi zirna in mah hian zirna famkim min pe thei a awm lova. Zirna in (sikul)-ina a pek theh chu a ruangam, zirlaite kawng kawhhmuha kaihhruaina tha tak hnuaia enkawl a ni. A bak zawng thiamna leh hriatna; mahni-a inhai ven chawp ngai tam tak la awm chu keimah ni kut liau liau a ni tawh.

“Education is not what one acquires in the class-room. It begins the moment when one is born and ends when one dies” tia Indira Gandhi-in a lo sawi kha a dik mai piah lamah a pawimawh, kan chet vel naah te, kan lehkha chhiar leh kan TV en thlengin kan tangkai pui theih thil tam tak kan chheh velah hian a tam khawp mai. Chung thil te chu thlir liam ringawt lova a taka kan bawhzui a ngaih chu thuhran; hlawhtling tur chuan a tul takzet. Chuti a nih chuan eng nge kan tih anga, engtin chuan nge kan inhai ven ang?

A bul atangin

Nu leh pa tan, hmathlir tha nei thiam tura kan fate kan enkawl chhoh a pawimawh. Chutiang tur chuan kan faten zirna in an rah chiah atang hian a intan, “America ramah chuan naupang kum 7 an tlin hmain sikul pangngaiah an kai ngai lo,” an ti. Keini ramah chuan a luh lam kan hmanhmawh deuh vek tlangpui a, thil tha tak a ni lem lo. Zo lo chunga naupangin a zirlai a hmachhawn chuan huphurhna leh zirlai hmelmakna a neih phah hial thei a, chu chuan a zirlaia a tuina a ti hniam a, a tan hmasawn ngaihna a awm lo tluk a ni.

Thil pawi tak a ni thei a, a bul kan tan that pui hi a pawimawh. Kan thu hnuaia an awm lai hian tha taka enkawla buaipui hi kan tih makmawh a ni. Tichuan, tunlai khawvel tehna atang chuan, i fain pawl 10 a lo zawh chuan amaha in hai veng thei tura ngaih a ni.

Tum mumal nei lova a la awm a nih chuan beisei a sang vak thei lo! Chu chu tunlai khawvel awmdan a ni tawh tlat. B.A zawh ve phawta, a  rem rem thawh  kha a hmathlir ropui pawl a ni chho tan mai ang tih a hlauhawm. Hei hi kan zoram zirna (thiamna) thanmawhbawk a ni. Lehkha thiam hna hmu zo lo (educated unemployed) kan neih teuh phah. A chhan eng nge? Mi thiam lo zir sang kan tam.

Thiam tak tak si lova kan zir san poh leh kan certificate ngei khan min la nuih zat let ve ang. Mahni zirlai bak hriat belh tuma inhaiveng miah lo thiamna hi ‘thiamna hlauhawm’ ka tih zawng tak a ni. Chu chu thil pawi tak a nih rualin thiam tak tak lo chunga hna hmu (uneducated employed) awm lawi si phei hi chuan Zoram than a tithu thei hial em! Mahni hna thiam lo na na na chu a hna-ah a tui thei lova,  thawk tha peih ngai lo. Chutiang chu mipuiin kan tuar thin. chu chu a tir atanga a bul kan tan that loh vang a ni daih thei a.   A  zung chawpa tui kan pek that a ngai!

 Electronic media hman thiam

Cable TV leh internet in min chiah hnu hian chanchinbu leh lehkhabu chhiar melh melh peih hi kan tlem ta deuh em aw a tih theih. Thil tangkai tak hi kan hman thiam loh chuan hmasawnna daltu a ni thei tih hriaa thiam taka hmang tangkaia, kan thuhnuaia dah hi hmasawnna a ni.

Chanchinbu, television, internet leh cell phone emaw pawh nise entertainment section ringawt mai buaipui laklawh hi awm theih a ni a, kan tuina ringawt lam kan awn renga kan tana tangkai tur kan ngaihthah leh si ang tih pawh hlauhawm tak a ni. Electronic media leh tunlai khawvel changkanna in a ken tel thil tam tak hi kan hman thiam loh vek chuan chhiatpui lam kan hnaih zel ang.

Chhiar tam hi finna

Reading habbit hi puitlin hnua neih thut chi a ni em ka hre chiah lo nain, a hma lama neih erawh a that ka ring. Kan zirlai ngawr ngawr bakah hian kan hriatna tizau tura lehkha kan chhiar tam peih a ngai. Kan thiante aia lehkhabu, chanchinbu emaw magazine pawh ni rawh se, kan chhiar peih zawk chhung chuan hriatnaah kan chungnung zawk zel ang. Chu chuan kan zirlaiah hmasawnna min pek mai bakah, tuma min chhuhsak theih tawh loh finna; rohlu tak chu kan khawl keuh keuh nitin ang.

Survival of the fittest world ah hian kan thian, kan pawlpui te aia zirlai (lesson) thiam hi a tawk ringawt tawh lo, eng pawh ni dawn ila, pawimawh em em mai chu hriatna (knowledge) zau leh tha neih tel hi a ni. Chu chu in zirtir vek chi a ni lova, mahnia in hai ven chawp chi tam tak a awm. Mi tha leh rinawm tak nichungin vawilehkhatah a hausak thut theih loh ang deuh bawk hian vawilehkhata fin thut tuma beih chiam chi chu a ni ngawt lo. Chuti ang finna nei tur chuan lehkhabu lei ila, chhiar thin phawt mai rawh le!

Similar Posts:

• Zirlai te tan thil hriat tur pawimawh zual te
• Emotional Intelligence i nei sang em?
• MZP Nagpur thuchhuah
• Zirtirtu ṭha
• Animation

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Thursday, February 9th, 2012 at 6:30 am and is filed under Education, Mizoram. You can follow any responses to this entry through the RSS 2.0 feed. You can leave a response, or trackback from your own site.