mi(sual).com

Thuhmahruai

Pathian thilsiam hi a ropui a, a mak a. Thilsiam (created being) mai kan nih avang hian Siamtu Pathian (Creator) thilsiamte hi chiangkuang tak leh a nihna ang chiah chiaha chhuichhuah fiah-fai-fel-keuh a har a. Scientist-ten he Pathian thilsiam mak leh ropui tak tak te hi an chhui chhuak a, an hmu chhuak a, an hrechhuak a, ropui kan ti a, mak kan ti!

Mahse, scientist-te thil hmuhchhuah leh hriatchhuah te hi mak kan tih mek laiin, a dik tawk lohna te, a felhlelhna te, a mak lehzualna te nen lam kan hre zui leh nghal thin!  Science thil thlir dan țha em em mai chu…dik tawk lo a awm chuan a pawm leh mai țhin!  Ringtu dik tak nun nen a inang ka ti. Ringtu dik tak chu a flexible tur a ni a, tih dik loh a neih chuan a pawmin, a insiam tha thuai mai thin.

Scientific theories te hi research changtlung zawk neihna ațangin siamțhat, tihdanglam leh belhchhah hi a awm reng a, ngaihdan hlui chu a tharin a thlak a, kim lo leh fiah tawk lo te kha kim zawk leh fiah zawkin an rawn phochhuak țhin. Chuvangin, tunhma scientific research & research finding-te kha an “dik lo hulhual” tihna erawh a ni lova, ngaihdan thar chu “a kim zawk a, a rintlak zawk” (new theories are more complete & reliable) tihna anga ngaih tur a ni an ti!

 
1.“Heliocentric view” (sun-at-the-center) chungchangah Kohhran-in a tisual?

Italian astronomer and physicist ropui Galileo Galilei pawh khan kohhran pawmdan (Psalm 93:1, Psalm 96:10, 1 Chronicles 16:30 tlawhchhanin)  “geocentric view” (earth-at-the-center) chu a dik lo tiin, “heliocentric view” (sun-at-the-center) a dik zawk tia lehkhabu meuh a chhuah avangin life-imprison a ni a, a thih phah hial a nih kha. Kum 1992 ah Pope-in an tih dik loh thu a puang leh ta a ni (Faith Can Never Conflict with Reason,  L’Osservatore Romano, November 1, 1992, pp. 1-2). Tunah chuan “heliocentric view” hi chu pawm lo kan awm tawh lovang chu maw?

2.“Global Warming..A Warming Zel” An Ti, A “Warming Leh Lo” An Ti Leh Si? 

Prof. Judith Curry (hmeichhia bawk a ni! Ha.le.lui.ah!) chuan, “Project research data-in a tarlan danin, kum zabi 19-na tawp lam atang khan khawvel temperature hian san lam a pan lo hrim hrim a. He zirchianna hi The Mail chuan a chian thlap a, kum 10 kal ta chhung khan khawlum lam hian hma a sawn lova, a san belh lo a ni” tiin, Oct. 30, 2011 khan a rawn sawi leh ta tlat mai!  (https://www.dailymail.co.uk/sciencetech/article-2055191/Scientists-said-climate-change-sceptics-proved-wrong-accused-hiding-truth-colleague)

Prof. Judith Curry hi Department of Earth and Atmospheric Sciences, Georgia Institute of Technology, USA ah Chair a ni a. Climate research-ah hian kum 30 aia tam expe nei tawh a ni. Georgia Institute of Technology hi US-a Institute tha ber pawla ngaih a ni. Global Warming hlauhawm zia leh a Warming Zel thu sermon thin te hian kan sermon sual ta emni?

3.   The Discovery of Vulcan

Scientist (mathematician) Urbain Jean Joseph Le Verrier chuan Ni leh Mercury inkarah planet thar a hmuchhuak a, Rom mei pathian hming chawiin a hmingah  “Vulcan” a vuah a.  Kum zabi 19-naa scientist-te pawhin an thlawp vek a, mit ngeia Vulcan hi an hmuh thu mi tam takin an sawi a ni.  Mahse, kum 1915 vel atang khan astronomers tam tak ten an ringhlel tan a. Albert Einstein-a theory “general relativity” hmangin a chhanna hi an hre thei ta ah an inngai a ni. Mercury hian Ni himak tak maia a kalhual dan an hmuchhuak nghe nghe a ni. Hei hi duhtawk mai lovin an chhui zui ta zel a, kum 1970 phei kha chuan thil engemaw mak tak (strange object)-in Ni a kalhual (orbiting) lai an hmu leh ta a ni. Hei hi tunlai film lar Star Trek an lo siam chhuahna bul pawh a ni nghe nghe.

4. Spontaneous Generation

Kum tam tak chu, Aristotle, Anaximander, Hippolytus leh Anaxagoras-te ngaihdan kha khawvelin a pawmpui a, “nunna hi thil awmsa chi (seed), tui (egg) leh chithlahna kawng dang (reproduction) atanga insiam a ni lo” niin an ngai a ni. Aristotle-te ngaihdanah chuan “Nunna nei lo thil hnang (slime), chirh (mud) leh lei (earth) te hi ni eng (sunlight)-ah kan phochhuah atangin nunna hi a lo insiam thei a ni” an ti a. Aristlotle hian ran thi atanga lung (maggot- sa lung, ek lung, thil titek) a lo insiam atang leh chengkawl (barnacle) lo insiam dan atangin he ngaihdan hi a nei a ni.

Scientist lar tak Louis Pasteur chuan he ngaihdan hi a dik lohzia a rawn sawifiah nghal a. Sa hi chhinphui tlat (sealed/air-tight container) chhunga kan dah tlat chuan lung (maggot) hi a insiam thei lo tih a hmuchhuak a. Tin, microscope atanga en chuan heng lung (maggot/insects) te hi “airborne microorganisms” atanga lo insiam an ni zawk tih chiang takin a hmuchhuak ta a ni.

5. The Expanding Earth

Kum zabi liam ta (20^th century) thleng kha chuan, scienetist-ten, kan awmna lei (earth) hi a țhangin, a lian tual tual (forever increasing in volume) niin an ngai a, hei hi tuifinriat leh tlang insiam leh chevel ațang hian a chiang ni an ti. He Expending Earth Theory ngaihdan hi Theory of Plate Tectonics chuan chiang takin a rawn paih-thla ta a. Theory of plate tectonics chuan, kan awmna lei hi a țhang lova, tuifinriat leh tlang insiam leh chevel hi chu leihnuai lama lei chhungril innghahna (plates in the lithosphere) che velin a siam mai a ni an ti a, hei hi kan pawmdan chu a ni ta a ni.

6. Phlogiston Theory

Johan Joachim Becher-an kum 1667 khan he Phlogiston Theory hi a rawn sawi hmasaber a. Thil kang thei (combustible objects) zawng zawng hian “phlogiston” hi an pai vek a, hei hi thil a kan/alh lai hian a chhuak ta țhin a ni, a ti. An sawifiah danah chuan he “phlogiston” hian rawng, tuina, rim etc. a nei lova, he phlogistston a kan zawh hian mei pawh a mit a, thil kang pawhin a nihna (shape/weight/color) a hloh vek țhin a ni, tiin.

Tunah chuan he ngaihdan hi a dik lohzia a chiang leh ta. Phlogiston theory ang hi ni ta se chuan, thir kan hal (burned) khan phlogiston a tichhuak ang a, chu chuan mei a siam ang a, a kan zawh chuan a nihna (weight) pawh a hloh tur  a ni, Mahse, thir (metal) hi hal hian a nihna hloh ai chuan a rih belh zawk (gained weight instead of losing) daih a ni. Tin, thil kang țanpuitu hi oxygen (oxidation theory) hi a pawimawh berte zinga mi a ni zawk tih kan hre ta bawk.

7. The Martian Canals

Italian astronomer Giovanni Schiaparelli chuan uluk taka planet a zirna ațangin Mars (sikeisen) ah khian rawng leh hnuhma (color & markings) inthlak kual vel a hmu a, kum 1877 khan hei hi “canali” (Italian for channels) tiin a vuah a, mahse, english-in “canals” (tuikawng/tui luankawr) emaw an lo ti a, a hming hi a pu hlen ta a ni. Hei hi American astronomer & mathematician Percival Lowell-an rawn thehlar-in kum zabi 20-na thleng khan tam zawk chuan an la pawm nghet hle a ni.

Tichuan, kum zabi 20-na bul lam ațang khan rinhlelh a hlawh chhova, kum 1960 khan mihring chuang lo chi Spacecraft(Hubble Space Telescope) chu Mars chung zawnah an thlawh kual tir a, telescopes țha ber leh thlalakna țha ber hmanga chiang taka an en kual a, thla an lak chuan, “canals” anga an lo hmuh kha, thli-in vaivut a lo chhem kual ațanga in siam mai an lo ni a, khang kha tuikawng (canals) angin an lo hmusual zawk chu lo niin! He an hmuh-sual (optical illusion) hi tunlai thiamna sang tak tak hmanga an han enchian chuan Mars ah hian tuikawng (canals) awzawng a lo awm lo tih an hmuchhuak ta a ni.

8. Luminiferous Aether

Luminiferous Aether (aether/ether) hi “thil engemaw” (mysterious substance) van thengreng (universe) luahkhat tlattu, eng a kaltlang theihna tura thil pawimawh tak a ni an ti a. Greek mifingte chuan eng hi mita kan hmuh theihna tura kawng rawn siamtu a awm an ti. He ngaihdan hi finfiah theih chiah a nih loh avangin kum 1700 hnu lamah chuan ngaihsak a hlawh vak ta lova, hetihlai denchhen hian Physicist Albert Michelson chuan a rawn chhawmnung a, “luminiferous aether” hi thil pawimawh tawp-khawk a nih thu a rawn sawi leh ta a ni.

Tunhma scientific theory reng reng kha, tunlai thiamna hmanga zirchianna ațanga ngaihdan leh hnialkalhna (sophisticated theories)-te avangin a dawih zawkah an țang ta fo mai a. He “luminiferous aether” pawh hi Albert Einstein-a Theory of Relativity khan a rawn ti danglam (completely reconfigured physics) zo ta vek a, a vaiin hnawl tawp lo mahse, “aether” tih țawngkam phei hi chu ngaihsual theih a nih dawn avangin  “field” leh “fabric” tih țawngkam te-in an thlak ta hmiah nghe nghe a ni.

9. The Blank Slate Theory

Blank Slate Theory hi ‘Tabula rasa’ tia vuah a ni bawk a, “One of the oldest and most controversial theories in psychology and philosophy is the theory” tih hiala hriat a ni. He theory sawidan chuan, mihring hi kan pian chhuah hian, mihring kan nihna tifamkimtu zawng zawng, midangte aia kan danglam bikna leh chhia leh tha hriatna etc. reng reng hi kan pianpui lova (no built-in personality traits/proclivities/mental content/nature/instincts), kan pian hnu-a kan zir chhuah chawp vek an ni an ti!

He theory hi Aristotle-an a rawn hmang hmasaber a, St. Thomas Aquinas pawh khan a pawmin, a tuipui em em a, Empiricist philosopher John Locke thlengin an pawm em em a ni. John Locke phei chuan, mihringin rilru-a thil kan dahkhawl leh hman zawng zawng (all mental content) hi tawn-hriat leh zirna (experience and education) atanga kan neih vek a ni a, instinct emaw nature emaw hi a awm lo a ti tawp! Naupan laia kan thil zir leh hriat te chu puitlin hnu-ah kan chhawm vek, hei hian Blank slate theory hi a dik zia a tichiang a ni an ti.

Tunah erawhchuan, he theory hi a dik tawk lo tih an hmuchhuak a. Chhungkaw khat-a seilian ve ve te hi, zirchawp nungchang (learned behaviors) ten an nun-ah thu a sawi viau angin lang mah sela, ze inthlahchawn (genes) leh pianpui chhungkaw zia (pianken) leh pianken ziaa inphum (innate instincts) te hi an pawimawh zawk daih tih an hmuchhuak a ni. Hei hi kum tamtak uluk taka an zir hnu-ah, chhungkaw khata piang phir (twin) ngei chu an zirbing ta a. He mite hi chhungkaw dang daih-ah dah hran an ni a, an lo puitlin chuan, an piantirh ațanga an chhawm chhungkaw zia leh pianken kha a danglam lova, a in-ang reng a ni tih an hmuchiang ta a ni.

10. Phrenology

Phrenology hi a hunlai kha chuan neuroscience pengte zinga pawimawh ber leh zir hlawh tak a ni. Phrenology chuan mihring mizia hrang hrang (character traits/intelligence/aggression/an ear for music) te reng reng hi thluak bawm-a peng bik (specific parts of the brain) pakhatah hian a inkhung hrang vek a. He peng bik hi a len poh leh a tih tur a thawk țha ting a ni mai an ti. Tichuan, lu piandan leh a len leh tet (size & shape of head)-in kawngro a su hle niin an hria a, hriattheih chinah thluak chhung chu hmun 27 ah an țhen nghe nghe a ni. Phrenology hi Nazis leh Rwanda-a Belgian colonialist-te chuan dik an ti a, an hmang țangkai hle-in an sawi thung.

Kum zabi 20-na hnu lamah erawhchuan, sawi a hlawh vak ta lova, Phrenology sawi ang hian mihring nihna leh zia hi thluaka peng bik-a zawn hmuh tum chi a ni lo tih an chiang tawh viau a.  Scientist rintlak pangngai te chuan “pseudoscience” or “fringe science” tiin an ko ta hial nghe nghe a ni.

11. Einstein’s Static Universe

The Static Universe theory hi Albert Einstein hmuhchhuah a ni a, “Einstein’s Universe” tia hriat a ni bawk. He theory ngaihdanah chuan, van thengreng (universe) khi a len zawng leh a nihna engkim khi danglam lo tura siam a ni a. Hemi avang hian universe hi a danglam dawn lova, a nihdan pangngai ang chiah chiah hian chatuan a daih dawn a ni an ti.

Tunah chuan, he theory hi a bul țan dan a fuh lo hrim hrim an ti ta thung! A chhan chu, hetianga danglam miah lova universe hi a awm reng chuan a chhung leh a vela thil awm inthlak kual reng leh țhang rengte avang hian black hole-ah a tla daih thei a ni an ti. Hei hi Edwin Hubble ațanga an thil finfiah – arsi etc. te chu an awmna hlat dan azir zelin an rawng a inthlak danglam zel a ni tih an hmuhchhuak a, hei hian universe hi a țhang (expanding) zel a ni tih a rawn tichiang a ni an ti. He theory hi a dik lohzia chiang taka fiah a nih tak avangin “Eintein-a thil hriatsual lian ber” (biggest blunder of his career) tia sawi a ni zui ta nghe nghe a ni.

12. Fleischmann and Pons’s Cold Fusion

Dan pangngaiah chuannuclear energy siamchhuak tur chuantemperature sang tak a ngai a. Cold fusion theory chuan, temperature sang tak a ngai lem lova, room temperature pangngai hi a tawk a, hemi atang hian a siam theih a ni a rawn ti ta a ni. Hei hi thil theih a nih dawn chuan, energy siamchhuak turin nuclear power plants senso tam leh hlauhawm tak a ngai dawn lova thil țha tak a ni dawn a ni. He theory hi mak takin, kum 1989 khan Electro-chemists Martin Fleischmann leh Stanley Pons te chuan an experiment results chu sawiin, “Palladium cold fusion theory” hmangin, seawater leh metal chu electric current kaltlang tirin  “excess energy” an siamchhuak thei tih an fiah thu an puang ta a ni. He theory hi a tak a nih chuan energy tlawm, thianghlim leh hnianghnar (cheap, clean, and abundant ) tak kan nei thei dawn a ni.

Mahse, he theory hi ataka hman ngei tuma scientist ten Martin Fleischmann leh Stanley Pons te experiment chiah chiah (replicate the experiment) hmanga hna an han thawh chuan an beisei ang reng reng a thleng ta lo a ni. Tichuan, Fleischmann leh Pons te chu mipui bum a, thianghlim lo leh rilru dik lo tak pu-a thilti-a puh an ni zui ta nghe nghe a ni. Tunhnai lawk pawh khan, hetiang deuh bawk, “tabletop nuclear reaction” tih a rawn chhuak leh a, he theory pawh hi energy lampang kaih-hnawih tho a ni.

13. Faster-Than-Light Neutrinos: OPERA Confirms

“Albert Einstein-a chuan kum 1905 daih tawhah khan rihna (mass) nei tawh phawt chu eng (light) aiia kal chaktir turin thahrui (energy) teh theih loh khawpa tam (infinite energy) a ngai dawn a, chuvangin eng aia chakin rihna nei tawh phawt chu a kal thei lo a ni tih a theory (Special theory of Relativity) ropui tak maiah chuan a lo sawi tawh a. Nimahsela, September (September 23?) thla chawhnu lam khan Italy rama lei hnuai zirbingna hmun, Gran Sasso Laboratory-a khawl, OPERA an tiha thawkte chuan thil mak tak mai an hmuh thu an puang zar ta” (Read more on https://misual.life/2012/02/23/light-aiin-a-kal-chak-lo-leh-zawk-mai-thei/ ).

Mahse, he theory chungchangah hian, “but some members continue to insist that further checks are needed before the result can be considered sound” an la tih tlat avangin, tunah hian OPERA (Oscillation Project with Emulsion-Tracking Apparatus)-a mite pawh hian final & concrete decision chu an la siam thei bik rih lovah ngai ila a țha awm e.

(Ka ziak tawi thiam tawh si lova, ka duh aiin a thui ta, chhiartute hriatthiamna ka ngen e)

Similar Posts:

• Universe hi Pathian siam a ni lo! – Stephen Hawking
• Pathian, Hun leh Chatuan (Part 1 of 3)
• Transgender-te tân Miss Universe a tel theih dâwn
• Mihring te hi zawng thlah kan ni em?
• Aliens I

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Saturday, February 25th, 2012 at 8:00 pm and is filed under Nature, Opinion. You can follow any responses to this entry through the RSS 2.0 feed. You can leave a response, or trackback from your own site.