Chanchintha Panga-na (The Fifth Gospel)

February 28th, 2012 9:16 pm by Dr Mahminga Sailo

“Engpawh ni sela, in awm dan chu Krista chanchintha nen inmawi phawt rawh se…”
Phillipi 1:27

The Gospel of…?
Kum li liam ta khan mizo chanchinbu pakhat thlakip chhuak ah ‘The Gospel of Judas’ tih ka chhiar a. Chhiar chhuak ve dap e ti lo chuan sawichhawn tur ka hre miah lo thung! Chuvangin he chanchintha Juda ziak (?) chungchang hi chu kan sawi thui lo mai ang.

Tin he ti hi a ni a, he thu ‘The gospel of…’ tih hian ka ngaihtuahna a hruai thui deuh deuh a. Pastor pakhatin, ‘Bible ah chanchintha bu li kan nei a, mahse chu chanchintha hril tura pawimawh tak pakhat chu kan nundan hi a ni a. Chuvangin I nundan kha chanchintha pangana a ni’, a ti a. Ka pawm zawng tak a ni.

Chanchintha, Nangma ziak…
Chanchintha Matthaia, Marka, Luka, Johana te ziak a awm a. Tun thlengin kohhranin a theih chin chin ah he chanchintha hrila hma lain, thahnemngaih pawh a na hle. Chanchintha pangna erawh ziaktu hran an awm lo a, tin lehkhabu anga hmuh theih a ni hek lo. Chanchintha kan hrilna kawng a pawimawh tak a ni lawi si. Chu chu eng dang ni lo vin, nitin a kan nundan, tawngkam leh chezia zawng zawng te hi an ni mai. Chanchintha ziak tu I ni a, chanchinthabu I ni nghal bawk tihna a nih chu.

I nunin chanchintha I hril thin em…? Isua hmel lah tisa puin kan hmuh tir thei tawh silo a. Kan nunah Isua hmel lantirin, a chanchintha kan hrilna kawnga min puitu pawimawh tak a ni ngei ang. I chanchintha kha midang te tan a chhiar tlak em, nge chhiar tur a bar awm lo in chanchintha I nei lo zawk..?

Mite’n min chhiar…
I ngaihtuah thin em? Kan nundanin midang te a hneh theih dan leh awmzia a neih thuk theihzia hi. Nge mahni nun ngaihtuah lek lo hian midang te nun veiin an tlinlohna leh felhlelhnate sawiin I hmanhlel zawk thin? A bik takin Zoram pawn a awm te hemi kawng ah hian kan mawhphurhna a sang leh zual. Hnam dang, sakhaw dang be zingah kan khawsa a, a thenin hna kan thawk a, thenkhatin kan zir a mek bawk. Kan zirna ah emaw kan hnathawhna atang hian engtin tak kan thiante hian min ngai thin ang maw..? Krista hmel kan nun a lantir chu sawi loh, a ruk hian min lo tih/hlau zawk ang em le…A theih chin chin ah kan bul hnai a awm an pumpelh thin zawk ang em…? Ringlotu bula kan awm chuan missionary kan ni nghal tih hi kan hriat nawn fo hi a tul hle in ka hria.

Kan nuna midang te kan hneh a kan hip theih loh chuan chanchintha hrilh eng ang mah ila, awmzia a nei tlem khawp ang. Upa te’n ‘vut laka vawih’ an tih ang chauh a nih hmel tlat. Galatia 6:17 a Tirhkoh Paula thusawi hi ropui ka tiin a chuanawm ka ti thin. Ani chuan a taksa ah Isua Krista chhinchhiahna a put avang in eng dang mahin a tihbuai theih loh thu huai takin a sawi ngam a. Chu chhinchhiahna chu kan pu ve em? Nge a chang changin ka pu ve zeuh zeuh…?

Nula pakhat piangthar chanchin…
Mi sawi ka hriat a ni a, a tak tak pawh a ni kher lo mai thei, mahse a tha ka ti ve tlat. Vawi khat chu nula pakhat hi Salvation Camping-ah a lut ve a, vanneihthlak takin piangthar in a lo hawng a, a hlimin an chhuangkua pawh an hlim tlang hle. Mahse, a pi erawhin a tunu piangthar chu chuti teh ualin mi dangin an lawm ang in a lawmpui ve hauh lo. Tin heti hi a ni a, camping atanga an chhuah tuk a ni a, nula a pumpa chu inchhungkhur tifelin hmunte a’n phiat faiin inchungkhur an rel fel a. Muangchang a a mutna atang lo tho chhuak a pi chuan, ‘Mami tukin hian I piangthar tak tak a ni tih ka hre ve ta’, a ti khauh mai a. Chu nula chuan mak ti takin a pi chu chutiang zawhna chu eng vang a zawt nge a ni tih a zawt let nghal vat a. A pi chuan awlsam te in, ‘E, mami I hmun phiah leh inchhung khur i tihfel dan atang hian piangthar nun ka hmu ve tlat a lawm’, a ti e, an ti…

Thil hote angin lang mahse a tha ka ti tlat! Piangthara inchhal ve si, mahni hnathawhna leh mawhphurhna a rintlak miah silo te hi an ngeiawm (tenawm ka ti mah…). Piangthar hmunphiah nge fai, ‘tharlo hmunphiah; piangthar bula awm nge nuam ‘tharlo bula awm…? Hetia ka sawi vang hian pianthar hnu a phurrit a pung dawn tihna a ni hauh lo. Kan phak ang tawk a mawhphurhna kan neih te kan hlen a, hun kan hman that hian mahni ah nun hlimna leh lawmna min pe a. Thil tha ti an inchhir ngailo ang in chu nun chuan thil tha dang tih duhna kan nunah a siam ang a, nun a nuam in a hahdam thin.

Mi tam takin ‘thusawi thiam’ an tih reng rengte hian mahni tawnhriat atangin tehkhinna leh zirtirna an sawi chhuak fo thin, chu chuan midangte nun a hneh hmain an thusawi pawm a awlsam thin. Hei vang hi a ni ang e, Tirhkoh Paula rengin confi –takin (tunlai tawngin), ‘Mi zirtute ni rawh u’ a tih fak fak ngam ni. Ama’rawhchu mahni nihna lo pui a in sawi an nih erawh chuan mahni mawng hlim an ni thung. Chuvangin nitin kan nunkawng ah, khawi hmunah pawh awm ila, kan nundan fimkhur fo ila, midangte tan a malsawmna kan ni theilo a nih pawhin harsatna siamtu nih loh hram hram a tha. Hla siamtu pakhatin min ngen ang in min siamtu duh ang leh lawm zawnga nun I tum zel ang u.

“Thiltha ti atana siama awmin,
Ama kutchhuak kan ni si a;
Chu thil tha tih chu kan awmna tura,
Lalpa’n a buatsaih lawk a ni”

20 Responses to “Chanchintha Panga-na (The Fifth Gospel)”

1
chhangteval Says:
February 28th, 2012 at 9:20 pm
are…

Report this comment
2
TuaiSialA Says:
February 28th, 2012 at 9:22 pm
Chhiar ila..

Report this comment
3
hiho Says:
February 28th, 2012 at 9:30 pm
‘The Gospel of Judas’ ka chhiar ve chak

Report this comment
4
aduhi Says:
February 28th, 2012 at 9:32 pm
Hmana khan secondhand bazar ah hian The Book of the Mormons hi ka hmu thin a, lo lei mai mai ila a tha tur. HMuh tur a awm leh tawh der lo.

Report this comment
5
PKfanai Says:
February 28th, 2012 at 9:33 pm
Ka Rilrem zawng tak Post ani e. Amaherawhchu, Mihring tumna piah lamah Pathian Thlarau keimahnia cheng kha ngaichangin a hruai theih turin awm bawk ila (Mahni mihringhlui zia lo lang ang anga kal buan buan lovin, kal dem dem ila).Tin, Mihring mihrin naa ‘Tum tlat’ hi a tisa loa, a RAU em em tih hi hriat bawk tur. Kan theih bakah Pathian Thlarau Thianghlimin min pui ang.

Report this comment
6
thianpa04 Says:
February 28th, 2012 at 9:40 pm
Kan rah chin apiang kan ram a ni kha maw. Mahni rahloh hi chu huai tak a sawi chi nilo

Report this comment
7
sheldon170 Says:
February 28th, 2012 at 9:54 pm
Good post Biakina lam thin, mahni inchhung leh hnathawhna a piangthar nun hmuhtur awm silo te hi a awm theih khawp ang. I ziak tha ka ti.

Pu Pka comment ang khian – ‘zawi te in ka kal dem dem tawh ang’ han ti thei ila.

Report this comment
8
Tete-i Says:
February 28th, 2012 at 11:11 pm
Post tha dap dap khawp mai..

Report this comment
9
Asteric™ Says:
February 28th, 2012 at 11:11 pm
Ka la kawment lo nih hi
A ṭha khawp mai, kan nundan pawh hian kan hmel landan a chawi bawk a ni tih hi keimah aṭang pawh hian a chiang khawp in ka hria. Kan tleirawl sual lai chuan “he tleirawl hi maw…a hmel aṭang pawh hian a sual hmel tih a hriat alawm” ti a ka beng hriat ngeia sawi ka hre tawh a. “Nang chu i hmel en aṭang hian i fel tih a hriat, ruihtheih thil engmah pawh i tih loh hmel” tih ka tawng tawh a. “A hmel en hian nula nula a ngaihsak loh hmel” tih leh “A lerh hmel, nula a duh ve hmel” tih ho hi ka beng hriat ah chiang takin ka dawng kawp vek tawh

Report this comment
10
Dr Mahminga Sailo Says:
February 28th, 2012 at 11:19 pm
# 9 Asteric™…

Tawnhriat i va nei dangdai ve. Mahse, tlangval fel tak i ni tawh a, ka lawmpui che..

Nikum khan Aizawl nu pakhat, a fapa damlo buaipuia lo kal pawn ka chhungte hnenah Ha Doctor (Dentist) a ni ti raw a lo ti ngawt tawh
Engatinge ha doctor emaw i tih a? an tih lah chuan, aw, A ha a var em a a ti teh ngawt

Report this comment
11
mamboihi Says:
February 28th, 2012 at 11:23 pm
Aste chu i va all round ve hehe!

Great post.. Kan awmdan Krista chanchin nen a inmawi hi a har fo, Mizo phei hi chuan zu in, meizu etc ah hian kan in teh nasa a, thih pui tham sual leh sual lo hi an awm bawk a, engpawhnise, zawi te a kal dem dem hi tha ka ti khawp mai.

Report this comment
12
Asteric™ Says:
February 28th, 2012 at 11:32 pm
#11@mamboih…Acting pawh hi ka thiam riau a sin Nun lem leh tak, ṭha der leh sual tak tak lo te pawh hi mi tam tak Pathian thu hria ai hian ka hmu thuk zawk asin…hairehai…
Ka hmel hi a attractive hrim hrim a nih ka ring Serious hmel ka put hian min min zah a, fiamthu thawh hmel ka lan tir hian min min nel hma bik riau in ka hria…Jish…sual hmel deuha awm leh fel hmel deuha awm pawh ka thiam lutuk

Report this comment
13
Dr Mahminga Sailo Says:
February 28th, 2012 at 11:43 pm
# 12.. sual hmel deuha awm tih lai tak khi.. Vawikhat chu zu rui pakhat hian mi en vang vanga, i va’n inlakpa hmel ve a? tiin min cho ti tih ngawt pek a. A rang a rangin, pa lo ve ka ti a. Harsatna ka pumpelh hram..
Nia, hringnunah hian fimkhur taka kal dem dem hi a pawimawh khawp mai. Tluk tawh hi chuan tho tur tha sen belh ngai nen, a hahthlak lehzual thin si a. Min tichaktu ah chuan engkim ka ti thei tia Isua rin ngam te hi a va tul em, harsa viau thin mah se..

Report this comment
14
mamboihi Says:
February 29th, 2012 at 12:04 am
Aste i acting thiam hi Rempy hian a hria ani ngei ngei mai!! Heti i la nih hi..

Tlangval ka hriat pakhat chu Mizo “Fel” tehna ah chuan a tling vek!. Ruih hlo engmah ti lo, Kohhran leh Khawtlanga in hmang.. Mahse tumah in an ngaizawng duh lo!! A nungchang an hmuhchian hlawm em avangin…

Report this comment
15
lrpa Says:
February 29th, 2012 at 12:16 am
Post tha ang reng phian mai (Y), tlangval ziah ah chuan a tha thlawt e ..
A thu pawh a tha, mahse kan ti veleh hram ange!
Chanchintha tih tak hi chu pakhat chauh a awm ani awm e.

Report this comment
16
Dr John Says:
February 29th, 2012 at 1:18 am
Gud Post. Kei pawh Fakna Hla, “Miten min chhiar, min thlir reng e, Ka awmdan zawng zawng an hai lo, Krista Nunmawi leh Chanchin Tha, Keimah-ah hian Hmuh an chak thin”

tih hla hian min khawih nawn awn awn thin,

Dr Mahming, i thlir dan hi “pawmdan dan pakhat”-ah ngai ila, Theological circle-ah pawmdan dang a awm nual a, beng tih-var nan…i hriat-hnu ka rawn repeat mai mai…

1. Ram Thianghlim (Israel/Holy Land, especially archaeological sites)) khu the Fifth Gospel a ni e an ti. “Four you will find in books and one you will find in the land they called holy. The Holy Land illuminates the Bible like nothing else can…..read the fifth gospel and the world of the four will open to you” an ti hial.

2. Isaiah 53 hi the Fifth Gospel a ni an ti (Karl Barth, Robert L. Moyer, German scholars, Matthew Henry, etc).

3. The Gospel of Thomas hi Gnostic-te chuan the Fifth Gospel an ti. Gnostic-ten Apocryphal Gospels (Gospel of Thomas & Gospel of Mary) te an ziak ve a. Krista Pathian thlarau khan mihring Isua taksa kha a luah hawh a, Kros-ah pawh a thi lo, vanah a lawn chho daih an ti. Lal Isua tuarna leh Krista thihna leh Thawhlehna an pawm lo.

4. Rom khuaa mite hnena Lehkhathawn (Romans) hi the Fifth Gospel a ni e an ti. Rom Lehkhathawn-ah hian “Chanchin tha” (gospel) tih hi vawi 9 aia tam a chuang a, Chanchin tha Bu dangte (Matthew/Mark/Luke/John) aiin “Chanchin tha” (gospel) tih hi a chuang hnem zawk an ti.

5. Tirhkohte Thiltih Bu (Acts of the Apostles) hi the Fifth Gospel (The Fifth Book of the New Testament) a ni e an ti. Chanchin Tha Luka Ziak hi Volume 1-na a ni a, Tirhkohte Thiltih Bu (Luka ziak tho) hi Volume 2-na (the Fifth Gospel) a ni e an ti.

Achunga mite lo pawh khi Pawndan dang pawh a la awm nual, lar zualte ka rawn tarlang a ni.

Report this comment
17
Belebuta Says:
February 29th, 2012 at 1:33 am
Ka chhiarchhuak hran lo, a heading khi a tha ka tih em avang khian, zanrei lam atan chuan ka chhiarchhuak peih ta lo mai

Report this comment
18
chawnghilh Says:
February 29th, 2012 at 7:09 am
GOOD POST

Acts 29 ber mai hi an pawimawh ta khawp mai!

Report this comment
19
Dr Mahminga Sailo Says:
February 29th, 2012 at 8:55 am
@lrpa… A dik chiah…
#16 Dr John… A va bengvarthlak em. Ka post i tiphuisui khawp mai…

Mahni mawng han hlim ta ila. Hnathawh in a zir lem loh phei chuan lehkhabu chhiar te hi thatchhiat a awl riau. Ka thuziak ve te hi chumi khami ah chuan a inziak tia han sawi tur te hi ka van. Nitin ka nun, thiankawm leh inkhawmna vela ka hriat hi ka ziak chhuak mai thin si a.

Report this comment
20
renard_curieux Says:
February 29th, 2012 at 6:20 pm
Dr Mahminga chu hmeichhia leh nula lam chauh lo pawh i lo ziak thiam anih hi (jk)

atira i tarlan Phillipi 1:27 khi post khat a tling der tawhin ka hria, marawhchu i ziak tha khawp mai

miten min chhiar, min thlir reng thin, tih hi kan hriat nawn fo a tul reng a ni

Report this comment