Sermon atâna thur-chhuah hlawh lo ber ‘Bung leh Châng’ a ni hial àwm e!
Matthaia 1:1-25 chin a inziak. A thuziak a sei tham lo viau nàin, Abrahama atanga Isua Krista (Yahshua ha Messiah) rawn pian inkâr hun chhûng a awh a. Abrahama atanga chhuan (generations) 42-naah Isua Krista a rawn pian thu a inziakna leh thlahtute hming a lan kim chianna a ni.
Kum 1984 khân Champhai-ah ka zin chho ve a. Chumi hma kum 7 liam taa Vairampur College-a ka zirpui thinte hmêl engemaw zàt lai ka han chhar thar leh hnuhnawh a. Lung hlui ngai leh titìhovin hun kan hmang tlâng a. Ruai kan kìlho zui a ni ber bawk e —Nula tawih deuh pakhatin a birthday a làwm a, chutah chuan kan tel ve a. Kan thianpa pakhat chu a meng dul raih tawh a, a tui-tlàn hun a lo nih leh hman diam tawh avàngin!
Ruai kan kìl dâwn tèpah chuan, “Tawngtaina hun hmang lawk ila maw le,” tia rawn rawttu kha tuemaw a awm zauh va. Kan thianpa—rui thle-chhawr chuan—Bible a chuh ta tharh mai le. Matthaia Bung 1:1-25 thleng a chhiar thla ta zèl a.
Heti hian thu a rawn belh zauh va, “Tùnah hian BIRTHDAY làwm tùra pungkhàwm, kèl ruai hmui tui tak kìl tùr kan ni a. Matthaia Bung 1-na thu hi Birthday lawm huna chhiar àwm berah ka ngai a, “A hring a … a hring a …” tih a tam bawk a,” tiin a tlip hmak a. Nui hmêl rèng a pu lo. A tawngtai dâwn emaw tih nàk alaiin —a thu leh ta àt mai a. Kan inmelh hrek hrek hlawm a. Puithùna kan vai liam a, kan hèng zo ta vek hlawm! Kan nui zui vèl ta mai mai a …
Làk hoh chuan a ho mai mai emaw tih a awl … mahse, Pathian Thutak hi a ho ngai lo.
——— A ziaktu hi Isua Zirtîrte zînga tel ve, chhiahkhawntu ni thìn Matthaia (Levi-a) a ni a —a chhiartu mi hmasa berte Jewish mi an nih avàngin Jewish-te benga-rawnga thun luh awlsam leh dawlh nuam tùrin an Jewish Culture-in a ziak a, thlahtu bul Abrahama hming leh Lal Davida hming a tel ve èm èm nghàl ringawt pawh hian chhiar a tichàkawm tùra ngaih a ni. Mosia leh Elija-te hming erawh chu a lang tel lo, lal hnam ni ve hek lo le! Jewish Royal Family inthlahchhàwn dàn zirna Bung pawimawh tak a lo ni reng zu nia!
Matthaia Bung 1-naah hian Hmeichhe hming engemaw zàt lai kan hmu tel a —hminghmerha ziak pali (Tamari, Rahabi, Ruthi, Mari) leh a pehhèl hreta ziak hmeichhe pakhat hming (Uria nupui —Bathsebi), an zavaiin hmeichhe panga kan hmu tel a ni. Chi inthlah chhàwn dàn lamah MIPA (patriarchal) dah chungnung an nih zàwk teh rèng nèn —hmeichhe panga lai Matthaia’n a rawlh lùt tel ve kher hi chu “a ziak huai salh salh hle” chuan a lang mawlh a ni.
Βίβλος γενέσεως Ἰησοῦ Χριστοῦ υἱοῦ Δαυὶδ υἱοῦ Ἀβρααμ.
Grik tawngah phei chuan LEHKHABU – THLAHTUTE – IESUA - HRIAKTHIH - FAPA – DAVID - FAPA – ABRAHAM tia inziak a ni a : a inremchhoh dàn tluang mawi zaih lo mah se, ”Isua Krista —Abrahama fapa, Davida fapa … thlahtute chhuina Lehkhabu,” tihna ang tluk a ni.
Jentail mi Abrahama chanchin hre chiang tùr chuan Genesis 11:26—25:11 thleng chhiar mai tùr; serhtan lohte leh serhtante Pa ni kawp—rinna lama Pa ber nih kaipha, Pathian thianpa a ni hial. Lal Davida ve thung hi Israel fate hun vul lai bera an lal ropui—Juda hnama mi ngei, Davida lalram hming chuai thei lo—hmangaihna lama duai chuang hek lo a ni. Krista Isua thlahtute chu Rinna leh Hmangaihna lama mi duai lo an ni hlawm tih Abrahama leh Davida atang pawh hian a chiang tàwk hle a, chutiang takin Isua Krista kha hmangaihna leh rinnaa khat a ni ta rèng a, lal thlah kal zèl a nih angin lei leh vàn Lal a ni bawk. Israela faten an lo nghahhlelh èm èm Pathian Hriakthih YAH-SHUA awmzia hi Pathian Chhandamna —HRIAKTHIHA chanchin inziakna Bu ni ngeia Matthaia ziak a ni! Kum AD 37-te kha chuan chhiar theih Lehkhabuzial a ni hman vèl tawh bawk.
Piang hnuhnùng zàwk Pathianin a thlang : Harana - Abrahama, Ismaela-Isaaka, Esauva - Jakoba —rawn tàrlan ka duh tak zàwk erawh chu —Abrahama, Isaaka leh Jakoba te atang ringawt pawh hian fapa upa ber, an hnam dàna roluahtu tùr chu an ni lo vek zàwk tih tàrlan chian nân anmahni aia an pianpui unau upa zàwkte hming Harana, Ismaela leh Esauva rawn tàrlan tel ve kher an ni e.
Hei hian a entîr tak zàwk erawh chu NAUPANG ZAWK dinhmun chungnung ta zàwka Pathianin min dinna tihlan chian nân a ni. Tùna he thu chhiartu ngei NANG pawh —i nuin a hrin che ni lovin, Pathianin a hrinna zàwk che kha dinhmun duhawm—roluahtu dinhmuna i awm theihna a ni zàwk e. Tùnlai tawngin—chunglam atanga hrin nawn i nihna—piang thar kan tih hi Pathian fa kan nih theihna (Messia zârah chauh) a ni ta. Chutiang takin, Paula pawhin Isua Krista kha a hre chiang a—“Adam hnuhnungbera” tiin a sawifiah a. Adam hmasa zàwkaah kha chuan khawvèlah sualna leh thihna a lùhphah a tih hial kha! Adam hnuhnùng bera —ISUA-ah erawh chuan ‘tihnun leh chhanchhuah’ kan ni ta zàwk a ni. (cf I Korinth 15:45).
Hmeichhe awm-eu-ho : Tamari hming hi a mawi fû, Tûm kùng ngîl tak leh sâng tak hmingchawia phuah a ni. Mi nunngîlte hming put thin a ni. Juda chì bìkah hian Messia rawn piang tùra Bible-in a sawilàwk a ni. Chuvàngin, chi thlah ngei ngeia an khawsak theih a pawimawh. Chi thlah hman lova thi an awm chuan chi thlah tal tùrin boraltà pianpui nau chuan a û nupui a rochun a ngai thìn —chutiang ang kalhmang chu Levirate an ti hial.
Juda fapa pahnih (Era leh Onana)-ten nupui an inrochun Tamari lakah fa an nei lo —an ‘pang ber (Sela) lah chi thlah tùra puitling hman a la nih si loh bàkah Juda bera khàn a monu a hnawt hàw bawk si. Tamari’n fin kherek a chhuah a, nawhchizuar angin a inthuam a—a pasalte pa Juda lakah ngei fa a pai ta thung a nih kha … ngaihtuah chian chuan an che niam-nai-lo viau (cf Genesis 38).
Tin, hmeichhe pahnihna pawh —Jericho khuaa pa awmthei leh hlei ru deuhte chuan an lova dàwr nawn ve hial tawh mah nà le —mahse, Rahabi kha Jentail-nawhchizuar mah ni se, Pathian hnamthlan enthlatute pahnih a lo humhim a. A chanvo a tha ta hlauh a ni. Chhui chian zèlin Pathian mite zîngah a khawsa zui ve ta a —Boaza nu hial a lo ni ta! Thuthlung Hlui hun lai pawh khân Jentail uichova ngaihte tân Pathian mi nih theihna kawng —sual sima Pathian zuitu nihna kawng a lo inhawng chiang hle a ni. Tùn laia “KS dam leh te” tân pawh—Krista zârah—Pathian Lalram a inchhawp ve tho.
Hmeichhe pathumna hi Moab hnam Ruthi (Israel-te hmêlma kumkhua) a ni. Israel-te Pathian khàn hnam dang neih kha a phal loh teh rèng nèn! Moab ramah pûrchàwka an pèm a ngai ta maiu si. Naomi te chhûngkua hi an ràl-thùm teuh khawp mai! Mipa zawng zawng an han thi vek a —Naomi leh a monu pakhat zàwk chiah Bethlehem (Buh/Chhang In)-an pan thleng ta a nih kha. Bethlehem (Chhang In) tih leh tàmpui mitthî, eitùr awm lo pawh kha thil intu lo tak a ni.
Naomi ber khàn an dàn leh hrai Levirate system kha a hriat chian èm avàngin Boaza lovah Ruthi kha a tîr ta thìn a; buh-to an tih —leilet bial pâwna kûr chhuak buhphal ah hmaih kha a va lâwrkhàwm ta thìn a nih kha! Ngun taka chhùt phei chuan rethei rahbi tleu tawh laklawh intlan lèt leh kha Jubilee kumah a awm ngei ngei thìn a; an chhûngkhat hnaivai laichìn bul ber goel an tih ten an tlan lèt tùr a ni.
Mahse, Jentail hmeichhia Ruthi kha tlan lèt (redeem) tùr zînga a tel miau avàngin Ruthi Bung 4-na bul lam thu hi chu lungchhiatna thu a ni ber mai—mahse, Bung 4-na chanve hnu lamah Rahabi fapa Boaza khàn Jentail hmeichhia Ruthi chu a nupui atân—Elimeleka leh a fapa Mahlon-a te chi a mang loh nân leh he Juda inchhûngkhur atanga rawn inthlah chhàwng zèlah ISUA KRISTA chu thutiam-fa a lo ni miau tawh si!
Hmeichhe palìna —sipai lal Uria nupui, Solomona nu kan hmu leh ta. Matthaia hian a hming a thupsak viau! A hming hi Juda-ho tâna an lungten a hlauhthàwnawm bawk lahtak a! Lal Davida kha lal chak tak leh huaisen a ni. A râwlthar chhoh lai pawha beràm rual vêng him thei khawpa chak leh huaisen—sapui hmâa zàm hauh lo—Philistia mi kawlhsen Goliath pawh tlàwm hialtu kha a ni. Indona ruamah ropui eltiang mah se, pindan chhûngril khum laizâwla Bathsebi nèna an chanchinin History dang a siam pùk ta ruih mai! Bathsebi leh Davida chungchângah hian thiam zàwk leh thiam lo zàwk an awm lo ve ve!
Similar Posts:
- Isua leh Muhammad
- Tunlai ka mutmawh hnarmawh.
- Jona Zawlnei Thuawih lo kha.
- Kristian chhungkua leh kan tehdan diktawk lo te
- Lal Davida
March 6th, 2012 at 10:29 pm
Chhiar ang..
Report this comment
March 6th, 2012 at 10:29 pm
Post Bvt tak a ni e….
Report this comment
March 6th, 2012 at 10:35 pm
Pu Chawnghilh, thanks hmasa phot….Kum 1 dawn a liam ta, Mathaia bung 1 thu sermon ron post tur a ka ngen che kha i la hria m, i blog ah ka hmu bok si lo, Ruthi te ho kha ka chhiar liam puat2 ringot alom le, hei tun ah i ron chhop chhuak ta hlol mai, a ngaihnom in a bengvarthlak ngei mai..kan hlokpui theuh beisei ang
Report this comment
March 6th, 2012 at 10:42 pm
Chhiar puat… Nakinah uluk takin ka la chhiar nawn leh ang.
Report this comment
March 6th, 2012 at 10:43 pm
Post BVT tak ani leh ta. Mahse a chang hi chuan keini ang tan chuan in ril mah mah thin a, kan interest pha lo fo, midang thenkhat pawh an nih ka ring.
Bible thu ngawt pawh a har a, a greek leh a juda tawng azawng te hian in han chhui ta thin ania. Post tupa, i fakawm thlawt e. Post tangkai leh bengtivar tak ani ngei ang.
Report this comment
March 6th, 2012 at 11:40 pm
Pu-a chu kan Grp min chawlh san a kan khua i ti har vek alom le
muangchangin chhiar ang o niang!
Report this comment
March 6th, 2012 at 11:54 pm
Good post.
Sermon ka hriat thiam lo tak a ni thin a, tuna ka hre fiah ta e. Ka lawm lutuk e.
Report this comment
March 6th, 2012 at 11:59 pm
I chhui tha khawp mai.
Hman deuh khan ka theologian ngaihsan tak maiin Rome 16 (Paulan chibai min rawn buk ang che u a tih diat diatna kha) tlawhchhana a sermon ka ngaithla a ngaihnawm ka ti khawp mai. Tul vak lova kan ngaih hi tul tak a lo ni khawp mai.
Chanchintha bu 4 te hian anmahni zawnah nawr lam an nei theuh a, Matthaia hian Jewish concept-a messiah kha Isua-a khung goal a tum khawp mai a, geneology pawh a dahpawimawh reng a; Marka hian messiahnic secret a uar ve thung, tin first source a ni hrim bawk a. Luka a thlek dan hi a dang khawp mai a, Jentailte lenna Krista a nih zia pawh ruk takin a puang thiam. The fourth gospel, the evangelist.
Synoptic Gospel (hmasa pathum)ah hian ka chhiara atanga ka ngaihtuahna a lo lut hi sawi ila a rem ang em ka hre lo (ka OT dawntlat)kan zo lovang tih pawh ka hlauhlel lo ve. Setana khan a tlawmna tur tih hria se Isua kha a khenbehtir ang em? Mahni tlawmna turin tuman an ti duh awm si lo, Isua ngei pawn a sawi a, mahni indo chu an ding chhuak ngai lo angin a sawi a.
Matthaia ziak leh Luka ziaka Messianic secret (Isua inthupna, tumah hrilh loh tura a thupek fo kha) a ril hlein ka hre thin. Pathian politics-a Judate puala lo kal anga Lal Isua lo kal leh Israelten an lo hnawl hlauh danah khan Setana hriatthiam loh Politics kha an khel a ni. Hei hi sawifiah dawn chuan Eden huana tluk danah khan a innghat daihin ka hre bawk, ka sawi kual viau chuan ka chulmam hman leh si lo vang e…Chawnghilh i post tha e.
Report this comment
March 7th, 2012 at 1:25 am
Report this comment
March 7th, 2012 at 2:17 am
Post ropui tak a va ni em, muang marin uluk zawkin ka chhiar leh ang.
Judan Tamari lakah Pharesa leh Zera a hring a..
Boazan Ruthi lakah Obida a hring a…
Davidan Uria nupui lakah Solomona a hring a…
Chu mi Mari lakah chuan Isua, Krista an tih hi a lo piang ta a.
Isua Krista hian hringtu a nei ve hauh lo, mihring laka lo piang a ni ve lo, Mari lakah a lo piangta a tih a ni. He mi thu avang hian he Bible bung leh changte hi ngaihnawm ti takin an chhiar thrin, an tia lawm.
Report this comment
March 7th, 2012 at 2:20 am
Report this comment
March 7th, 2012 at 2:47 am
#10.. ‘mihring laka lo piang a ni ve lo’ ni lovin
‘mihring hrin a ni ve lo’ tih zawk tur.
Report this comment
March 7th, 2012 at 2:49 am
#5 sheldon170, sawi ang khian, kei pawh a ril thei mah mah ka ti. Biakin a sermon te hi, hrilhfiahna mawlmang tak nen a an tih hian hriatthiam a awlsam zawk te ka tia.
Good post! I fakawm thlawt e!
Report this comment
March 7th, 2012 at 2:57 am
tha khawp mai
Report this comment
March 7th, 2012 at 5:28 am
Mathaia bungkhatna Sermon ropui tak a ni e. Mizo Jews ho hian Isua Pathianna leh Davida Fapa a nihna hi an pawmlo ve ve a. matthaian heti tak maia chianga a lo record thlap mai hi Pathian Thlarau Thianghlim atanga chhuak ava ni teh lul em. A lo tul hle alo nih hi.
Report this comment
March 7th, 2012 at 5:59 am
Pu chawnghilh nge nge, a va han ngaihnawm leh miah miah ve le!! Matthaia bung khat thu hian kei pawh min fuih thar fo thin, a bik takin hmeichhe hming lang ho khian! Mi famkim lote Kristaa tihfamkim kan lo nihzia leh Gentail ui cho ve mai Israelte Pathian ngeiin Ama faa min han vuah ve tlat mai te hi a mak thlawt a, Matthaia bung khat thu hian chu chu a lo sawi fiah daih tawh a lo ni reng mai!
A ropui e. Hetiang hi han post zeuh zeuh rawh khai!
Report this comment
March 7th, 2012 at 7:14 am
Man hla thin e, Pu Chawnghilhaa nge nge ..
Report this comment
March 7th, 2012 at 7:44 am
A lo ni maw, a va hlawkthlak ve le, a tawp dan khi a zawm zel a awm duh hmel. Han ti zel teh, hriat ka neitlem si a, a chhiar lamah ka lo ramtang ang e.
Vakul@8, i comment chuan beng a verh hle mai, post hranin rawn ti la ka ti hle mai, min ti vir tawk lek.
tren tren
Report this comment
March 7th, 2012 at 10:45 am
Pu Chawnghilha nge nge, a ropui thin e, sawi ve tur avang hle mai.
Post ti-hlu zualtu atan an sawi ka hriat belh ve ta mai mai ila 
:-
Matthaia hian Judate tana hriatthiam ngei ngei turin Chanchin tha hi a ziak a. Thlahtute chhuina-in bul a han tan tawp a, hei hian Thuthlung Hlui leh Judate a tinzawn tih a chiang phawt a.
Judate hriat chak ber leh zawhna awm nghal tur, “Isua hi Messiah a nih chuan, Abrahama & Davida hnena Pathian thuthlung (Abrahamic covenant Gen.12 & 15, & Davidic covenant 2Sam.7) te nen inzawmna neiin, thlahtu dik tak (rightful line) atangin Messiah hi a lo chhuak ngei em?” tih kha a chhanna a ni nghal. Matthaia hian, thlahtu chanchin ngai pawimawh em em Judate chu fiah tak leh chiang leng lawng takin a chhang a ni.
Matthaia hian Abrahama–Davida, Davida–Saltan, Saltan–Isua inkara thlahtu zawng zawng hi a chhui vek lova, Chhuan 14 chauh a chhui bik a. Chhuan 14 chin hi Judaten Isua kha Messiah ngei a ni tih an hriat nan a tawk hle a ni. Thil mak tak chu, Bible Scholar-te chuan “DAVIDA” tih hi Hebrai tawng alphabet (number) zawng zawng belh-khawm chuan 14 chiah a ni e an ti!
Matthaia’n Isua thlahtute a chhuinaah hian, Judate chhuidanin Josepha (legal father) lamah a chhui daih a. A chhui zelnaa Zakonia (Jer.22:30) leh Shealtiela chungchang a rawn sawi hian awmzia a neiin, beng a verh khawp mai. Zakonia leh a fate khan Lalthuthtleng an luah loh avangin, Isua kha Zakonia kap-ka-lak thlah kal zel dik tak (physical descendant of Jeconiah) lo ni ta se’ng chuan, Davida lalthuthleng a luah thei dawn lo chu lo ni rengin!? Hemi avang hian Dr.Luka khan Nathana (Davida thlah) kaltlangin Isua hi Davida kap-ka-lak thlah dik tak a nih thu a rawn chhui ta a nih kha (Luk.3:31).
Matthai’n Isua thlahtute zingah hmeichhe 4 lai mai, hming tha vak lo lehnghal a rawn tarlang tlat mai hi Chawnghilha sawi ang khian “Ropui Rapthlak tak” a ni ringawt. Judate sat tur zia leh nat dan tur hi…hmeichhia an ngaihnep piah lamah, KS leh Uire (den hlum tura an ngaih) te an tel lehnghal! Hei vang hian Matthaian Solomon-a nu pawh a hming pum (Bathsebi) a ziak ngam lo hial a ni an ti!?
Mari’n Isua a hrin thu (1:16), a’n sawi thleng chu Matthaia’n a tawngkam a thlak daih! Ahma zawng zawnga “a hring a” (Grk. egénnesen, Eng. begot) tih kha, “lakah” (Grk. ex hes, Eng. of whom) tih a ni ta. Greek “egénnesen” (a hring a) hian kap-ka-lak fa (hrin) kher lo, dan anga fa hrin (legally/genealogical=unaute nupui or pasalte fachhawm/nupui or pasalte fachhawm) a huam tel thei. Helai Greek “ex hés” (feminie relative pronoun) thung hi chuan, “Isua chu Mari kap-ka-lak fa ngei (physical child) a nihzia” a rawn nemnghet thung a ni.
…ka tlak leh duah a…liluh nghal vang vang…
Report this comment
March 7th, 2012 at 11:38 am
In comment a ngaihnawm tlang e. In rawn thual belh nalh hlawm thei hle mai.
Ka ziak zo emaw ka tih, a then chauh ka lo khung a nih pek hi … ni dangah kan la ziah zawm leh mai dawn nia!
Chhuan 42 tia intarlang si-ah, 41 chiah a lang si a. Jews-hoten an ngaithiam thei lo. Mahse, THLARAU THIANGHLIM-in a raitir … tih kha ring ve thei sela chuan aw…
Mizo Bible-ah hian Abrahama hming hi Davida hming aia dah hmasak a ni a. Original text lamah chuan Davida hming hi dah hmasak a ni thung a, ROYAL LINEAGE chhui bing Matthaia hian a tum chian em vang a ni. Luka ve thung chuan Pathian Fapa a nihzia lantir a tum thung avangin, Adama pawh Pathian fapa … Adam hnuhnung bera Yeshua Messia nena rawn khaikhin kawp a tum vang a ni thung.
Matthaia hian Juda lal sual zualte kha chu a hmaihthelh lui thiam ve khawp bawk.
Genesis leh Matthaia ziak Gospel hi compare tham tak a ni bawk —TANAKH-a bu hmasa ber leh New Testament-a bu hmasa ber ni ve ta hi…
Report this comment
March 7th, 2012 at 11:55 am
Nizan khan ka chhiar chhuak dap tawh a mahse a hmasa lama han coemment hi ka tih chi zawng a nih loh avangin midang ka kian a ka ngawi ta daih a.
A ngaihnawm khawp mai. I tawngkau chheh – i thumal chheh dan hian lung min ti leng thin riau a nia.
‘Isua hi hrin, siam ni lo, Pa nena nihna hmunkhat (Essence Homoousious), Van atanga lo chhuk mihringa lo chang’ tih ka thinlungah a lo lang zawk zawk.
Soberte: Tirkoh Paula’n a Juda puite hnenah run deuh tak chungin Jentailte hnenah Krsita chanchin ka hril tawh dawn tia a kal san ang khan i pu hian a lo chhuahsan ta che u a ni maw. In hlauh hi helaiah hlepah kan chhiar zel thei a lawm tiraw, i lo misual reng tho a nangpawh…
Report this comment
March 7th, 2012 at 3:25 pm
Ignatia leh Doc John —in comment-ah hian ka hlawk fe zawk hian ka hre thin. Ka hlim phah veng veng zel —chhungril takah hian!
Report this comment