Zan chu a reh hle mai, khua lah chu a vawt em em si a. Reilo te a message lo thleng tur nghak chuan ka nun chu a hlim veng veng a, hmuh mawlh chu ka va thlahlel em. Ka lungphu chu a ri dup dup a, ka vai deuh ruai te hian ka hria. A hlimthla thlir chuan ka nun chu a hlim ru ver ver bawk si a. Chu message lo thlenhun nghak chuan ka sa huam huam ni ber hian ka inhria. Ka duhthusam ang ngei chuan ka zawhna chhangin he hla hi ngaithla turin min ti ta a; chu erawh chu hla dang tam tak hre fo tawh thin mah ila tun thleng hian ka theihnghilh thei mawlh si lo!
A hun tam tak liamta a thil tawn te chu lungchim takin min hrilh a; a biangah mittui tlain a inhnit faih faih a. A lungngaihna biang tai sen tak mai te chu ka va khawngaih em. Keichuan, ‘ I hmangaih hmasa ber ka nilo tiraw’ ka ti a, ani chuan, ‘Nilo, ka hmangaih hmasa ber chuan min kalsan tawh’ tiin mi chhang thin. Mahse kei erawh chuan ka hmeichhe tawn hmasak ber leh hmangaih hmasak ber a ni tih erawh dawt tel hauhloin ka hrilh mawlh mawlh a, ka tan a hlut zia te, ka zeiloh zia leh, ka ti lungawilo fo ang tih chu ka ring thin!
A hun liam tawhte avangin a rilru a na a, a hmangaih hmasa ber ngaiin a rum a. A kianglo ah chuan hlim theilo hial tur khawpin an chanchin chu a tahpui hawm hawm thin a. A hun liam ta theihnghil nana sual kawng a zawh tak mai dante chu min hril chamchi a. Huain a chungah thinrim dawn teh pawh ni ila, ‘hei chauh hi ilo lan hma kha chuan min hnemtu a nia sin’ tiin a mittui hnam chungchuan min hrilh leh a! Chung zawng zawng chu hre mah ila ka ngaidam fan a, ka hnem a, lungchim taka kuah vawng vawng chu ka tih theih tawk a ni si. Ka hmangaihna chu zantin mai hrilhin, chah lawm lawm thin mah ila; kei erawh a thinlung chhungah hmun ka chang ve mawlh silo! Za mual liam hnu ngaia lunglen hnem chu a zia e, duhberte lunghlui biahthu ngaihna erawh thikthu a chhe duh ngei mai!
Kha mipa, a thianghlimna laksak a, diriamtu bak a mi huat kha ka neilo. Ka hmangaih ber thinlung a hliam a. Keipawn duat taka ka dawm, ka nupui atana ka lo beisei ve em em; nei duh hauh silo a ka hmangaih thinlung alo tihnat leh laksak hi pawm thiam a har ka van ti thin em. Kei hi ami tawn hmasak ber nise hetiang em em hian a na awm silo a. Hmangaihna hi chu ava fair lo teh lul em!
“Min kalsan mai ta che” tiin biahthu ka hlan fo thin. Ka rilru a tihnat zia a hre ve kiau mai si a. Ka kianga awm a duh ve fo bawk si a. Ka hnenah ngaihdam dilin, “i thinlung reng reng ka ti na ngai tawhlo ang” tiin biahthu min hlan fo thin. Ka nun chuan rinngamna zawng zawng nen a thlir a, a beisei a, a ring em em a. Amah avangin ka nunna hi hausa takin a aw fo thin.
Zan khat chu he hla hi min theha, chu hla chu thinlung zawng zawnga ka han ngaihthlak chuan, thenna biahthu hla a ni tih ka hai mawlh si lo. Hun kal ta a chhuikirna hla maiah ka ngai a, ka hnem fo a, a mipa tawn hmasak ang ka nihloh zia chu nitin, zantin leh darkartin mai hian ka lanchhuah tir fo thin.
Chu hla chu hei ngei hi a ni; zan tlai a ni a, thla de riai riai karah chuan chhum alo zing chiai a, thli thaw vur mai karah lunghlui a lo leng leh. Ka hla chuam leh ama tana ka hriat rengna tur hla, a duh leh ngainat em em chu ngaithlain ka mittui a lo far leh hial thin. Chu hla chu hei hi a ni; there goes my everything tih hla ngei mai kha.
Tunah erawh keima tan alo ni ta. Tunah chuan amah min thlansaktu ngei chu hla takah a awm a, diriam leh hmusit takin min liamsan a. Sawi theih reng ka neilo, ngaiin au mah ila a hre thei hauh silo a, hla takah min kalsanin auh theih rual a ni ta lo. Ka ngaiin ka thinlung nat zia leh a hliam zia hi lo hre mawlh se ka van ti em. Min hrethiam dawnlo pawh nise anka nem tal chuan min chhang ve se ka ti thin. Tunah chuan hlim takin a awm ang a, Lalpa ka Pathian chuan lo venghim tlat thin rawh se. A tan nitin ka tawngtai a, him takin he hringnun hi hmang ve mawlh se la. Amah hmangih em emtu hi lo theihnghil lul lo se, atan ka awm reng a ni!
“Chu laichhuat rem a pheichheh thawm ri thang zawi tak mai leh a anka nem damdiai mai a, “ duhlai, kumtluang atan mangtha aw….”
“Hringchan piallei a ka dam chhan, ka duhthusam, ka neihchhun, ka engkim mai chuan mual min her liam san ta si maw….”
“Thinlairukah nun hlui dawn kir chang hian, kan hlimlai ni zawng te nghilhni reng a awm si lo. He thinlung I hmangaihna meialh in a lo chawm nun thin hi..hnutiang min chhawnna khartung sawn ri chuan a keh sawm tir zo ta si….”
March 29th, 2012 at 1:49 pm
Lung hlui iva tileng ve. Inkawm ang
Report this comment
March 29th, 2012 at 1:49 pm
Mitthi tawh hnu lo thik te chu a.
Mipa thikthu chhe deuh hi ka ti thei thak lo anih chu mawle,ka thikthu a chhiat loh luatah hian min tih tauh san zeuh2 thin. Mahse a nuam! There goes your everything. A khawngaihthlak khawp mai,hnemtu a mamawh laia lo thik tit kha hit lo viau ang. 
Report this comment
March 29th, 2012 at 1:51 pm
Report this comment
March 29th, 2012 at 2:03 pm
Hetiang deuh hlek hi vawikhat ka tawng ve tawh. Awmloah lo ngailo ula, kan sawi ve luam teh ang.
A ngaihzawng nen hmun inhlat takah an awm a, telephone leh internet bak inbiak theihna an neilo. Vawikhat chu SMS a an inbiak reng laiin a ngaihzawng chuan a reh san ta a. A tuk a a chanchin a hriat leh chuan chatuan ram a pan ta a ni tih an hrilh.
Kum hnih hnuah kan in tawng ve ta. Khing thu zawng zawng khi ka bulah a sawi ngailo. Mah se khami zan kha chuan khum laizawl a inkuah ral chung khan khi thu ngei mai khi min fah ta malh malh mai.
Kum hnih (A ai rei deuh pawh a ni maithei) vel chu mipa dang ngaizawng thei tawhlo in a lo awm. Mah se min tawn a tang khan keimah hian a ngaihzawng boral ta ka hriatchhuah tir thin angin a chhal. Mipa dang a ngaihzawng dawn pawh a a ngaihzawng boral ta in a thik a rin tlat thin thu te min hrilh ta mial mial. Mah se kei ve kha chu min thik rinna thinlung kha a neilo tih thu te min hrilh. Thil tamtakah min tehkhin. Amah ka hriatchhuah tir thin thu te min hrilh. Amah rilru na a siamlo thei tur ber dan a dawnsawn ka tum, a va han har tak em. Thil kal tawh mah se a thinlungah a la thi lo tih a chiang si. Tuarpuina awka fah chung zelin thildang ka sawipui ta hram.
A tawpah chuan kan inthen ta nge nge a. Kan inthen tak a chinah khan ngaihzawng neilo in a la awm lehlo e. Tihian ka ngaihtuah ta a, Pathianin a rilruna te thawi dam tur leh a khawhar te hnem turin kei ve te mai hi minlo tir a ni nge, tiin.
Kei a tan erawh zawng a ni hi ka hmangaih hmasa ber leh hnuhnung ber a la ni rih e. Midang tan ka thinlung ka hawng phal tawhlo. Ka taksa erawh chuan a hniallo.
Report this comment
March 29th, 2012 at 2:09 pm
Ka han chhiar thla pur pur a, Glen Frey hla ‘She can’t let go’ tih kha emaw an in thlansak dawn ka lo ti hmanhmawh pek a
Report this comment
March 29th, 2012 at 2:20 pm
Thu i thiam, a ngaihnawm khawp mai…
Tlangval lai hian biahthu hlan tur te hi tawng ve ang i maw… 
Mahse, ka tan chuan tawnhriat loh khawvel a ni tlat mai
Report this comment
March 29th, 2012 at 2:40 pm
Ngaihzawng ten an ngaihzawng hluite chanchin an sawi fo chuan an rilru ah kei ala tla na zawk tihna..
Report this comment
March 29th, 2012 at 3:19 pm
Report this comment
March 29th, 2012 at 3:42 pm
A ngaihnawm. Khawngaihthlak bawk. Alejendro chu va la inno ve aw
Sual kawng an zawh hian excuse ah rilru nat vang hi an ti ve chhen a, kei chu ka pawm miahlo. An va sual/ruih khan an rilru na a tidam chuang pawh a ni silo a. Mi thenkhat, vanduai em em, chhungte zawng zawngin an thihsan te, thihdan pangngai pawh nilo a in thihsan te pawh an tam.
Hmanah pawh Evangelist pakhat a inkhawm hlanin an in a kang a, a nupui leh fate an boral vek kha. Rilru na tawpkhawk tuar te hian sual kawng an zawh vek kher lo. A zawh ho hi chu an sual chak ve rengah ka ngai. Sual kawng zawh tur hian eng excuse mah hi tling ka ti lo.
Report this comment
March 29th, 2012 at 3:59 pm
Love story lungkuai deuha ziah hi i thiam tlat.
Report this comment
March 29th, 2012 at 4:01 pm
# 9… Sual kawng zawh tur hian eng excuse mah hi tling ka ti lo.
Report this comment
March 30th, 2012 at 1:38 am
Report this comment