mi(sual).com

Vengthlang kawn atanga chak deuha a rawn chho chu Pi.Rinhui dawr kawtah a han ding a, a koki dinglamah gas bur a puin a kut veilamah chow pack sa Rambo polythene khat tlat a khai bawk a, a hawi vual vual a, a bawr lutuk chu a hmute chuan anlo fiam sap sap reng a.. A dress ngai te te, a t-shirt dum a hma a iron maiden tih inziak, a hlui tawh em avanga I RO MAI tih chiah lang tawh leh a kekawr hman thiam, jeans azawnga jeans eng ngei mai chu hain Pi.Hlu-i dawrah lutin a thil put leh khai dah chuang lova dingin a hawi vual vual a, a bawr em avanga nuih tute erawhin a hmel an en chian cuan an nuih reng a zalo , a hmel hmu tan chuan nuih ngam chi ni heklo.. Lungngaih zana Isua hmel kha chu tluklo mahse a hmelah zawng lungngaihna a langin, a mitmeng te lah phungzawl mitmeng iaingin a pual titih a, a hmai mam lemlo takah chuan thlantui rawn luangin a din dan lah a mak.

A gas bur leh thil khai nghhat chuang silo in a ke ding lam chu ngil at a dahin a ke veilam erawh dah awn deuhin a ding kawi ang ngel a, a mawng fual tak erawh a dah poh ang hàrh a, mi hnungchhawn zawnga reilo te a awm chhung erawh kha chuan a jeans eng, a lu lian tak kheng rang nuai , a tshirt dum dal tawh tak leh a koki a gas bur leh a kut veilam hmawra a chow khai tenen chuan hmuhnawm a tlingin Pi.Rinhlui pawh a insum hleitheilo. Mahse chutia patling, a hmel leh a thlantui nen meuha thil a pangngailo ani tih lantir lo nuih khum chu thil awm ani loin, an biak lahin a chhang si heklo, chutah insum tak chunga “U.Chawi enge nita, buaina I nei ami” an han tih chuan,

“Nu.Hlu In inthiarna a ruak em”
“Aw ruak e”

…a thil put leh khai reng a ngaihtuahlo, Gas bur chu en mang lo, sawt nawlh khawpa theh thlain inthiarna room lam pan chuan a tlan phei ta a.. Dawr chhunga zawngtah rim a nam ram ram tak avang chuan a hmeh rêng hai rual anilo, reife hnuah a rawn chhuak a “U.Chawia chu ava chhuak awm ve, nizan zawngtah in hmeh ani maw” ti a anlo fiam chuan “ Chhuak tak ani chhuak tak, Isua pawh rawn kal thut se, Ka E phawt dawn kati ang, nizan kan mikhualpa zawngtah rawn hawn ka riam deuh atin ni” an tihzawm zat a.

“Engzah em em nge I ei, ka dawr chhung zawng zawng ah a nam vek thei alawm”
“kawm 20 lai ka ei mawle, a tui em ani” tih pah chuan engthawl hmel takin a chhuak ta a.

U.Chawia ti a an koh hi Tlangval tih lemah kum lamah chuan kum 50 dawn tawh aniin, michak chhungkua atanga rawn chhuak , a Pu michak hmingthang Thuamkungan an khaw lal Se pa lian leh chhuan a chawi chhala Chawiliana ti a hming phuahsak aniin, Khawhai khawchhuak anni . A tlangval chhuahtirh, pawl 10 a zirlaiin an chhungkuain an chhawr zawk ange tih rilru nen sipai ah tangin, a sipai tan chhung zawng pawh khan hotu te duhsak leh rinrawl ber ah tangin a pension meuh kha chuan bel thum kai hmanin a hming tha hle a, a hnathawh that avanga tangkapui dawng pha ngat ani.

A taksa leh pianphung en reng reng pawhin a hrisel ani tih hriat a, a hmel bumro ang aia a rilru a nem leh that avang erawh chuan mintin ngainat leh nel a hlawhin khatia pensiona a rawn chhuah hnu pawh khan khawtlang leh kohhran ah a tangkai hle reng a.

A rawn chhuahhnu pawh khan mi taima leh huaisen tihtakah sipai bang thenkhat thawpawr tak te ang loin police hna a dil duh heklo. A tan zawng mihring te chu eden huan ata tawh hah taka hnathawk tur a siam kan nih angin hnathawh hi thil hreawm ani lova, a theihna a hrechiangin thluak lam a eizawn ai chuan kuthnathawh lam atan a awlsam zawk tih a hria a.

“Kei chu thiam ka neilo, Pu.Lian minister min biaksak la, MRP ah tal min thun theih chuan ka lawm ngawt ang, Ex-serviceman kani tho bawk a” emaw, “Ka Pu hei ka Sipai ban hnuah kan Party tan ka thehtawp ka chhuah ve thin a, khawngaihin Vengthlang Culvert siamna tur contract ka dil hi minlo sawipui teh a” ti a, mi biak kual dun dun ang chi hi a duhlo mai niloin atan zawng ringtu te tihloh tawp tur anisi. Hnathawh tur a tam lutuk tih thupui hi a sahuai thingvawn tlatin, a pension hnu pawh khan Kashmir Chow factory dinin zing nichhuak chhiarin nitin hna a thawk thin.

“Nitin kan eikhawp min pe ang che” tia diltu ringtu tan chuan hausak a ngailo, chunglamin kan nghei a phal dawn silo ti a taima taka thawk ani bawka a hausa lemlo. Mahse, a ngheilo mai niloin a Nu leh Pa te a chawm theiin nuamsa takin a siam a, Aizawl khawpui ah ngei in tha tak RCC ngeiin a sa thei si. Sawma pakhat a pe a, chhungkhat hnai tanpui ngai a tanpui bakah a Nau fate 3 sikul kal a awmpui bawk a,a nun a hlim a thlakhlelh reng a neilo, kawppui neilo mahse…

Kawppui maw? Aw, U Chawia hian kum 50 pel tawh mahse nupui ala a nei lova, neih tum a khawsa pawhin a lang heklo in an thenawm hlun te pawhin a ngaihzawng neih anla hre heklo. Mi chanchin hre chaka phusa thin Mizo tih takah zawhna pawh a tawng zingin, tuman anla zawt chhuak heklo. A sipai rawn chhuah tirh, El Bethel vanglaia testimony a sawiah kha chuan a hmangaih em em a nula, a sipai tan tirh vela a kawp leh a rin em em in pasal a neih san ani awm e, “Ka ngaihzawng hmasa ber ani a, ka hmangaih a, khatia ka chan takah khan ka rilru a nain khawvel lamah ka tlan a, ka pil hman tep a, mahse hei a hunah ka chhuak ta anih hi, Pathian zawngin kan bo a phal silo. Kha nula kha ka theihnghilh mai mai ka ring lova, ka theihnghilh hma chu nula dang kawp ka tum ka heklo. Ka rilru atanga ka dahbo theih lo a, nula dang ka lungdum ka tawnglo anih leh nupui nei lo turin Chunglamin min ruat ani tih ka pawm anga, lawm takin ka theih ang tawkin rawng ka bawl zui ang tih erawh ka tiam e” tiin testimony a sawi ani awm e, kum 20 hmalam khan.

A bak tumahin an hre heklo, mahse a lungdum a tawnglo ani ange, tun thlengin nupui ala nei lsilo. Mahse Pathian ringtu ani a, a tana tha tura Pathian remruatah ngaiin vawi khat pawh ala vui lova, a theih ang tawk erawhin Pathian a zui a, a rawng a bawl a, mi tan malsawmna ani a, a nun a hlim si.Kum 3 kal ta khan a chow siam semnan leh maida phurh nana an hman ber a 207 chu a accident pui a, thichhawnga awmin a thawk pawh rei tak an hmu lova, ni 1 nikhaw hrelova a awm hnua a rawn harhchhuaha a thusawi hmasa ber chu,

“Ka kal ala hun lo aniange, kal mah ila ka inpeih asin mawle” tih niin , kha thu khan a chhungte leh lainate mittui a luantira, a ngaihsanawmzia pho chhuakin nupui neilo thak khawpa a di hlui la hmangaih Chawiliana hian a siamtu a ring ngam a, a nuna thil thlengah a vui lova, tun ang huamhauhna leh duhamna khawvel ah pawh a Mizo pui te anglo takin a chan tawkah a lungawi a, ringtu tam zawk te ang loin engtik hunah pawh kal turin ain peih si..

I’m just sitting here thinking about Jesus, rocking as my old chair creaks
Some glad day I’ll fly away when Jesus came calling for me
It might be today, it might be tommorrow, maybe one day next week
I’ll soon be done with troubles when he came calling for me
When Jesus Comes Calling For Me

When I die don’t grieve and cry
Lordy, don’t feel sorry for me
Oh what a day, what a mighty fine day
When Jesus Comes Calling For Me
When He Comes Calling For Me
(Dolly Parton: When Jesus Comes Calling For Me)

Similar Posts:

• Tunge India ramah nula chhe lo ber?
• Lal Huaisen Zakapa
• V-J Day in Times Square
• Mizo Bible – Audio
• Sunday a ni bawk a

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Thursday, March 29th, 2012 at 1:10 am and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.