mi(sual).com

Introduction:
Lal Isua thawhlehna hi Kristian-te tan a pawimawh em em a. Sakhaw dangte aia Kristian Sakhua a chungnunna leh a danglam bikna a ni. Pathian mihringa lo chang a, misual-te aia thi-a, tho-leh Pathian kan nei hi sakhaw dangte aia Kristian sakhua a chungnun bikna pawh a ni. A danglam em avangin ring duh lo leh Lal Isua pawm duhlo ten hnial khan zawngin, Lal Isua thawhlehna an awihloh zia lantir nan ngaihdan (objection theory) hrang hrang an vawrh chhuak a. Heng “Isua Thawhlehna Awihlotute” awihlohna (objections of resurrection of Jesus)-te hi tawi te te-in kan chhang dawn a ni.

1. Science Lam Ațangin A Dik Thei Lo:
“Science thiamna (Scientific understanding) ațanga chhut-in Isua thawhlehna hi thil theih a ni lo. Law of universe leh Law of nature kalh tlat a ni. Mitthi tawh an thawhleh thu kan hre ngai lo. Isua hi a tho leh a nih chuan a thi lo tihna a ni mai. Chuvangin, Isua thawhlehna an sawi hi dawt a ni.“

Chhanna:-
Pathianin law of nature kalh-in thil a ti fo a, a thiltihtheihna a hmang țhin. Hei hi pathian-te Pathian a nihna pawh a ni reng a ni. Aigupta-a thil mak thlneg te, Tuipui sen kan te, Eliza vanlawn te, Elisan Sunemnu fapa a kaithawh te, Hriak bel phai thei lo te, Elisa ruh avanga mitthi lo nung leh te,  Lazara & hmeithai fa kaihthawh te,  thlipui & tuifawn hau reh te, Tui wine-a chan tir, etc. (Ex.14:ff, 2Lalte 4:32-37, 13:20-21, John 11:1-44, Lk.7:11-17, etc.) te kha leilung dan kalh-a Pathian chetna vek a ni.

2. Isua Kha A Thi Tak Tak Lo:
“Isua kha a thi tak tak lo. Isua zirtir te khan damdawi (hnim-hlum) hmangin an thih-dan tir (unconscious) a. Mi an awm tawh loh veleh, lo harh-chhuakin, ‘thlan ațangin a tho leh ta’ tiin an tlang than tir ta mai a ni. Kros-ah khan Isua kha a thi tak tak lo a ni.”

Chhanna:-
Lal Isua kha Kros-ah khan a thi ngei tih a chiang. Damdawi hmanga an thih-dan tir theih dan tur hi kawng a awm lova, zirtirte khan an ngam a rinawm loh. Lal Isua kha Kros-ah khan chiang takin a thi tih a hnuaia thil-thlengte hian a nemnghet:-

2.1. Lal Isua tihlumtu Rom Sipaite hi mi nunrawng tak an ni a, mi tihhlum thiam (professional killers) an ni. Rom sorkar dotu leh misual awm țha duh lo, thi tlaka an ngaih (criminals)-te tihhlum chu an thiamin, an châk zawng tak a ni. An tihhlum tur-te tihhlum ngei chu an hna (duty) a nih avangin an thih chian leh chian loh thlengin an chian ngei ngei țhin bawk (cf. Joh.19:32-34).

2.2. Rom sipaite hian Lal Isua hi a thi chiang a ni tih fiah nan, a nakah feiin an chhun leh kher a, thisen leh tui a lo chhuak nghe nghe. A ke an tih-tliah lohna chhan pawh ‘a thih tawh’ vang a ni (cf. Joh.19:32-34).

2.3. Pilata, Roman Legal Authority pawhin, Lal Isua hi a thi tawh tih a fiah thlap hnu-ah, Death Certificate a pechhuak. Pilata hian Lal Isua thih thu hrechiangtu Rom sipai hotu a kova, a finfiah thlap hnu-ah chauh Isua ruang hi Josepha a pe phal chauh a ni (cf. Mt.27:57-60, Mk.15:42-46, Lk.23:50-56, Joh.19:38-40).

2.4. Josepha, Arimathai khua leh Nicodema (Sanhedrin member) khan Lal Isua kha a thih-chian avangin, ‘Judate inphum dan dik takin’ Murra leh alloy chawhpawlh, kg 40 vel zet hmangin Lal Isua ruang hi an hnawih (embalmed) a, uluk taka puana tuam-in (puan saizin sei tak hmangin an vet-chhuak vek!) Josepha’n ama thlan atana a lei tharah an zalh a ni (cf. Joh.19:38-40).

3. Isua Kha A Thi Hma Lutuk:
“Pilata ngei pawhin Isua thi hma lutuk kha mak a ti a, a awih lo. Marka 15:44, “Pilatan chutia a thi ta thuai chu mak a ti hle a” tih thu hian, thil dik lo leh fel lo inzep a awm a, thil awm ngai zen zen lo a ni tih a tarlang a. Hei hian Isua thih dan hrim hrim hi a rinhlelhawm a, Isua hi a thi-der (fake) a ni tih a chiang a ni.”

Chhanna:-
Lal Isua hi thi hma lo chi a ni lo. Tisa leh thlarauva a thil tuar hi a nasa em a, mihring pangngai rilru leh taksa-in han tlin mai mai chi a ni lo. A thih hmat avang hian rinhlelh tur a awm lo. Lal Isua thil tawn langsar zual chauh han chhuikir ila:-

3.1. Thursday zanah, mutmu tuah lovin, thlaphang takin, zankhua-in a țawngțai a, rilru lungngai em em leh taksa hah em em-in hun a hmang a. A thlan pawh thisen far lian tak angin a far hial. Hetiang hun hi rilru lam zir mite chuan, ât-theihna hun leh thih tawp theihna hun (Grk.perilupos) a ni a. Thihna leh nunna ram-ri (perilupos/border)-a mihring a awm hun lai a ni an ti.

3.2. Friday-ah, (Thursday zanah man a ni a), Rom sipai leh Temple vengtute ațangin, nasa taka vuak leh velh, ben, hnek, hlinglukhum khumtir leh chil-chhak te a tawk a. Ama an khenbehna tur kross an puttir pawh a pu zo ta lova, a tlukpui fo tak avangin, put-pui turin Simona (Kurini khua) chu an ti-lui hial. Kros-ah khenbeh a ni a, a nâkah thisen chhuak khawpin feiin an chhun zui bawk nen. Zankhuaa an sawisakna ațang te, a kut a ke, a lu, nak ațanga thisen chhuak-te khan a tichauvin, a thih-hmat phah ngei ang tih hi thil chiang em em a ni.

4. Hmeichhia-te Khan Thlan An Hresual:
“Matthaia.28:1, “Ni sarih ni hmasa ber tura khua a var dawnin…” Luka 24:1, “ni sarih ni hmasa berah… varțian-ah,” Johana 20:1, “ni sarih ni hmasa berah, zingah, khua a la thim laiin,” tih a ni a. Palestine ramah hian zing khawvar hma, varțian, a thim hunlai hi chhum pawh a zing țhin. Khua la thim lai a nih avangin, hmeichhia-te hian Isua thlan awmna hi an hrechiang lova. Isua thlan hi an hai a, Isua thlan ni lo zawk, thlan ruak dangah an kal a, an Zawt hial a, Isua kha a tho leh ta emaw an ti mai a ni.”

Chhanna:-
4.1. Hmeichhia-te hian thlan hi an hai lova, Lal Isua an phum lai pawh hian an awmchilh tlat a, thlan awmna lai hi an hrechiang hle tih Mark 15:47-ah min record sak, “Mari leh Magdalini leh Josea nu Mari chuan an zalhna chu an hmu reng a” tiin. Thlan hi an hai mawlh lo ve.

4.2. Lal Isua thawhleh thu hi Vantirhkohvin hmeichhia-te hi a hrilh zawk a, hemi hnu-ah chauh hian Lal Isua thawhleh thu hi an hria a, Tho-leh Isua pawh hi an tawk chauh zawk (Mat.28:2-10).

4.3. Bible khawilai-ah mah hian Isua thlan awmna hmeichhia ten an hai thu leh an zawn thu a chuang lo. Lal Isua thlan-a lung chu ‘lum sawn’ a ni a, ruang tuamna puan-te awm vek si a, thlan chhungah Isua ruang a awm loh avangin ‘ruang hi lak-sawn’ (kal bopui) ni-ah an ngai zawk a ni (Mk.16:3, Lk.24:2,3, Joh.20:1-18). He thu hian Lal Isua kha amah zuitute ngei pawhin a thawhleh mai an rinlohzia a tichiang zawk.

4.4. Hmeichhia-te hian thlan awmna hi hrechiang lo ta sela chuan Huan vengtu leh Rom sipai leh Temple vengtute hi an zawt thei reng a. Lal Isua an zalhna Thlan-ah Lal Isua ruang an hmuh zawh tak loh avangin Huan vengtu hi Isua ruang awmna an zawt chauh nghe nghe a ni (Joh.20:1-18).

5. Isua Ruang Kha A Zirtir-ten An Ru-bo:
“Isua khan a thih hma-in, ‘ka tho leh dawn’ a tih avangin, a zirtir-te (disciples) khan Thlana Isua ruang, Rom sipai-te ven lai kha an ru-bo ta a ni. A ruang ber a awm tawh loh avangin, mipui bum-in, ‘Isua kha a tho leh ta e’ an ti ta mai a ni! Hei hi Bible-ah ngei, Matthaia 28:12-15, record a ni.”

5.1. Lal Isua thawhlehna awihlotute hian, an awihlohna-ah ‘a thi tak tak lo’ an ti a, tunah ‘thih chu a thi a, a ruang kha a zirtir-ten an rubo’ an ti leh si!? Hei hian Lal Isua thih chian zia hi an pawm a, a thawhlehna pawh sawi-hnawm tur an zawng chawp mai mai a ni tih a ti-chiang hle. An thusawi hi anmahni leh anmahni an inkalh-kual-kawisawi-chingchivet vel a ni ber e.

5.2. ‘Lal Isua ruang Ruk-bo’ (stolen theory) chungchang hi Bible-ah chiang takin a inziak a. Upaten dawt sawi turin Rom sipai leh Temple vengtute (Temple guard) chu ‘pawisa tam takin’ an tham a. Pilata hnenah pawh sawipui an intiam a, an duhdan ang takin thil an tih-tir zawk a ni (Mat.28:11-15).

5.3. Vengtu sipai (Rom sipai) zinga țhenkhatin, Jerusalem khua-ah lutin ‘Lal Isua thawhleh thu, thudik tak hi an va sawi darh hman tawh’ a (Mat.28:11). Juda Puithiam-te hian Rom sipai tham lungawi tur hian ‘pawisa tam tak’ an hmang nghe nghe a. Pilata (Ram Awptu) hnenah pawh sawipui an intiam a ni (Mat.28:14).

5.4. Rom sipai-te hi pawisa (eng anga tam pawh nise) hmanga tham lungawih ngawt theih chi an ni lo. Rom sipai-te hian hotu thu zah lova, an duty a tih-hlawhtlin loh chuan mahni in-tihlum tura thupek an nih mai dawn avangin, Puithiam-te hian hei hi hre rengin, Rom sipaite an hneh (convince) theih nan, ‘Ram Awptu-in a lo hriat chuan, amah chu kan thlêm ang’ an tihna chhan pawh hi a ni.

5.5. Ruk bo an hlauh avangin Pilata hnenah Vengtu dah an dil a. Rom sipaiten, Rom sorkar chhinchhiahna hmanga chhinchhiah chungin, Lal Isua thlan hi an ven bakah, Temple sipaite (Temple guards) pawh-in an veng tel ve nghal. Sipai thuah hnih-in an veng tihna a ni (Mat.27:62-66). Lal Isua zirtir Galili mi, mimawl leh sangha mantu mai mai te hian, Rom Sipai țha tak tak-te hi an khing ngam hauh lovang tih hi mimawl ber pawhin a hre thei.

5.6. Lal Isua zirtir-te thlabar zia kha… A inti-huai ber leh Isua ruang ru tura rinhlelh kai ber Petera lah Thursaday zan ațangin a bo daih a. Friday, Lal Isua an khenbeh ni-ah pawh hmeichhia te leh Zirtir Johana chiah an lang ngam. Isua zirtir-te hian Judate hi an hlau em em mai a. An Boss ber Judaten an man tak avangin, anmahni pawh an rawn man tel ve mai ang tih hlauvin, in 1 ah an in-kalh-khum a, pawn pawh chhuak ngam lovin, an tawm tlat zawk a ni! (Joh.20:19-23). Lal Isua thawhleh thu hmeichhia-ten Zirtirte an hrilh pawh khan, Petera hian mak a ti a, mit ngeia chian tumin Isua thlan lamah chak tawkin a tlan nghal nghe nghe a ni (Lk.24:12). Chuvangin, Lal Isua ruang hi a zirtirte hian an ru lo tih hi thil chiang tak a ni.

6. Psychological Problems Vang Mai A Ni:
“Hmeichhia-te khan Isua a thi kha an tuar em em a. A thih an phal lo lutuk khan, Isua kha thi lova, nung reng angin an ngai a. An khawhar-lusun rilru buai lutuk (psychological affects/problems) avang khan, Isua’n “ka tho leh dawn a ni” a tih kha tak tak emaw an ti a, Isua kha tho leh angah (pre-occupied by thought of resurrection) an ngai ta mai a ni.”

Chhanna:-
6.1. Lal Isua’n a thawhleh tur thu a sawi hi Hmeichhia-te hian an awih sak lo tih an thiltih hian a ti-lang chiang hle zawk. Lal Isua thawhleh tuka thlana an kal hian, thawhlehna beisei avanga kal an ni lova, Judate tihdan pangngaiin, thlan en tur leh englo-rimtui (spices) hnawih (embalm) tura kal an ni zawk (Mat.28:1, Mk.16:1,2; Lk.24:1). Mitthi ruang embalming hi țawih dal leh rim chhe tur veng atana tih a ni. Hmeichhia-te thiltih hian, Isua thawhleh an beisei lova, an beisei loh tak thil (Isua thawhlehna) an tawng zawk tih a ti-chiang hle.

6.2. “Thlan kawngka khartu Lung hi tunge lumsawn ang aw?” tiin, an rilru a buai a. Isua ruang kha Huan enkawltu-in a kal bopui-ah riak an ngai bawk (Joh.20:11-15). Lal Isua thawhlehna beiseina reng reng an thinlungah leh an thiltih-ah a lang lo.

8. Rinna Leh Thlarauva Thawhlehna A Ni:
“Isua kha taksa-in, a tak takin a tho lo. Amah ringtute thinlungah, an rinna leh thlarau (faith & spiritual experience)-ah Isua kha a tho leh mai zawk a ni. Rinna leh thlarauva Isua an tawn thar lehna kha Isua thawhlehna-ah an ngai mai a ni. Hmuh-theih leh taksa ngeia Isua thawhlehna hi chu phuahchawp leh dawt a ni.”

Chhanna:-
Lal Isua thawhlehna kha zirtirte (ringtute) rinna leh thlarauvah mai a ni lo. Taksa ngeiin, a tak takin Lal Isua kha a tho leh a. Hei hi Rom sipaite, Temple vengtute leh hmeichhiate (thlan tlawhtute) leh Isua zirtirte pawhin a tak ngeiin an tawng a ni. An mit ngeiin an hmu a (Grk.etheathe, seen with their own human eyes, Mk.16:11). Thoma chuan a kut ngeiin a khawih a, a endik vek a (Grk.horao, properly stare, see, perceive, to discern clearly- physically or mentally, Joh.20:24-29). Mari chuan a vuan (Grk.haptomai, physical contact) tlat a, a thlah phal lo hial (Joh.20:17, 24-29).  Lal Isua hi taksa ngeia tho-leh, minung a nih avangin chaw te thlengin a ei tih kan hria a ni (Joh.21:4-15).

9. A Zirtirte Hnenah Chauh A Inlâr:
“Isua thawhlehna hi thudik leh thil thleng ngei nise, engahnge midangte, Isua ringlote pawhin an hriat ve loh? Engah nge ringlo-te hnenah pawh a inlâr ve loh? Amah ringtute leh a zirtirte chauhvin an hria a, anni hi chuan Isua chu an țan hrim hrim dawn a, a chanchin dik lo leh chanchin chhia chu an sawi duh lo hrim hrim ang tih a chiang. Chuvangin, Isua thawhlehna thu hi a awihawm lo tawp.”

Chhanna:-
9.1. Amah ringtute hnena a inlâr hi a rinhlelhawmna a awm chuang lo. Amah ngaitu leh a thusawi lawk tawh hretute hnena a inlâr hi thil awm tak a ni zawk. A thusawi lawkte hre miah lo hnenah chuan lo inlâr ta pawh ni sela, an awih phah chuang lovang.

9.2. Lal Isua chanchin leh a nihna pawm lote- Rom sipaite leh Temple vengtute khan Lal Isua thawhlehna kha mit ngeiin an hmu. Mahse, Puithiam-ten dawt sawi turin sum-in an tham a ni.

9.3. Isua zirtir zingah, Thoma khan Isua thawhleh thu hi a awih lova. A taka a hmuh a, a kut ngeia a khawih hnu chauhvin Lal Isua thawhleh thu kha a awih ta a nih kha (Grk.horao, properly stare, see, perceive, to discern clearly- physically or mentally, Joh.20:24-29).

9.4. Juda kulmuk zinga mi, Kristian-te tiduhdahtu, Hebraite-hebrai, Pharisaite-pharisai, Gamaliela hnuaia in-zirchhuak Paula (Saula) pawh khan, Isua thawhleh thu hi a awih lo. A tak taka ahnena Lal Isua a inlârna ațangin a hmu fiah a, a hrechiang ve chauh a ni (Tirh.9:1-25).

Conclusion:
Frank Morrison, “Who moved the stone?” tih lehkhabu ziaktu pawhin, Lal Isua thawhlehna hi a awih lo lutuk a. Jerusalem-ah kalin, Isua thawhleh thu an sawi chu a dik loh zia leh thil theih a nih lohzia finfiah ngei tumin, a hmunah kal-in a zir chiang a. Mahse, mak tak maiin, thudik tak a hmuchhuak ta zawk a! A lehkhabu pawh a chanve ațangin a ziak dan leh a kal-hmang a inthlak a, Lal Isua ringlo leh hmusittu chuan a pianthar phah hlauh zawk. Tunah chuan, Lal Isua thawhlehna dik zia finfiahtu țha tak a ni ta zawk a ni. Chuvangin, Lal Isua thawhlehna pawm lo tu leh, he khawvel damchhung atan chauhva beiseina nei tu chu, mi zawng zawnga khawngaihthlak ber a ni dawn a ni (1Cor.15:19).

Ngai teh, Pathian ni ropui chu,
A lo thleng, kawl a lo êng,
Hringfa zawngte u, tho ula,
Lawm r’u, Vârhparh êng mawi chu,

Hnâwl leh phatsan ni mah se,
Tihduhdah, khenbeh tuarin,
Thlân ata a tho leh ta,
A hmêlma a hneh ta!
Tu nge a hming phat leh ang,
A chakna do ngam ang?
A hmaah kunin kan rawn bia,
Lalber chu khumtírin.

“Happy Easter Sunday”

Similar Posts:

• Beiseina siamtu thawhlehna
• Halleluiah! A Tho Leh Ta!
• NAZARETH ISUA KRAWS-A AN KHENBEH KHA A THO LEH TA (Easter Sunday Sermon)
• Tu Ber Nge Lal Isua Hmu Tura Lo Kal?
• Thihna hnehin a tho leh ta!

Recent Posts:

• NUN THÂMRAL
• President Trump ka hmuhdan (amah thlawptu lam atangin)
• YMA LIBRARY ENKAWLTU TEN SEMINAR & TRANING KAN NEI
• February 2017, Mizo(ram) Diary
• misual.com tih tawp a ni dawn?

This entry was posted on Sunday, April 8th, 2012 at 6:00 am and is filed under Religion. You can follow any responses to this entry through the RSS 2.0 feed. You can leave a response, or trackback from your own site.